Nugana 43 - Buki Tabu Lowaenei 1919

‘UPWA 43.

¹ Ta botana nina ‘i didiga wawasae ‘asa ‘enaia.

² Ta gete ‘i apwesa, ni‘atu witi Aigupitoega si me‘eme‘ena si ‘e egumwarena, ga tamadi ‘i ona ‘edia, Wa da tauia limana, masura gidarina wa da gimwani ‘edaia.

³ Ta Iuda ‘i ona ‘enaia, ‘i gwae, Tai nina ona pa‘arinega ‘i onaona, ‘i gwaegwae, Maninigu gea‘abo wa da ‘ita‘ita, ‘abo tasimi nigea ma‘emi.

⁴ ‘Abo tasima ‘u da ‘etunena ma‘ema, ‘a da mwa‘uta ta masura ‘a da gimwani ‘emuia:

⁵ ta ‘abo nigea u ‘etunena, gea‘abo ‘a mwa‘umwa‘uta: tai nina ‘emaia ‘i ona ta ‘enega, Maninigu gea‘abo wa ‘ita‘ita, ‘abo tasimi nigea ma‘emi.

⁶ Ta Iseraela ‘i ona, To‘ase manuna wa bubuna geiogeioi nadigega ‘eguia, tai nina ‘ena wa simana ‘aene wate ‘e bweu tasimi?

⁷ Ta si gwaegwae, Tai nina ‘i eonema paruparuna manuma, ta ‘ima buunao manudi, ‘i gwae, Tamami ‘i bobo‘ana nai? wate ‘e bweu tasimi? ta ‘ena ‘a simana nadigega ona getedi ‘idi bubuna: kapekapeana nai ‘e bweu iage manuna ‘a da mwaratoni ‘aene ‘i da ona, Tasimi wa da ‘au‘ewa mwa‘utenama?

⁸ Ta Iuda ‘i ona tamana Iseraela ‘enaia, Tubuau ‘u da ‘etunena ma‘ieagu, ta ‘a da tooro be ‘a da tauia; be ‘enega ta da bobo‘ana, ta gea‘abo ta da mwawamwawasa, ‘abo‘ama be, ‘oio be, wate ‘ida gogama gidaridi be.

⁹ ‘Abo‘agu ‘ebeona‘upa‘upa manuna; nimaguiega ‘u da enaidena: ‘abo nigea ia ‘au‘ewenama ‘emuia, ta nigea matamuia ia sa‘usa‘u, ga ni‘atu ia da to‘umalina ataia ‘emuia:

¹⁰ ‘abo nigea ‘a miami ta ‘enega, ni‘atu gete ‘enega a ‘ilama marua.

¹¹ Ta tamadi Iseraela ‘i ona ‘edia, ‘Abo nadigega gete ‘enega, gete wa da guinua; ‘asa uana bobo‘ai‘ailidi wa da ‘ewa ‘imi ‘ebe‘a‘ara ‘edia, ta tai nina ‘ana ‘ebwaeadaita wa da ‘a‘ara mwa‘ute, gweda ‘epuio gidarina be, mu‘awa gidarina be, gweda mamaina ta muro be, pisakio‐uana be, saido be:

¹² nimamia mani giiruadi wa da ‘ewai; ta mani ‘imi baga ‘edia si sa‘usa‘u limena nimamiega wa da ‘a‘ara; nai si loegesi:

¹³ wate tasimi wa da ‘au‘ewa, ta wa da tooro, wa da tauia limana tai nina ‘enaia:

¹⁴ ta Eaubada Toewaiwai sana nua‘ole‘ole ‘i da ‘ebwa‘emi tai nina matanaia, be ‘enega mari tasimi ta Beniamina ‘i da li‘amidi ‘emia. Ta ‘abo natuguao ‘eguiega si ‘ewadi, tua ‘eguiega si ‘ewadi.

¹⁵ Ta tai nidi ‘ebwaeadaita gote si ‘ewena, ta nimadia mani giiruadi si ‘ewena, ta Beniamina; ta si tooro, ta Aigupito ‘ena si mwa‘uta, ta Iosepa matanaia si tooro.

¹⁶ Ta ni‘atu Iosepa Beniamina i ‘itena ma‘edi, ga anua ‘ana to‘ita‘i‘isi ‘ena ‘i ona, Tai nidi ‘a da me‘edi anuaia, ta ‘u da lo‘anina, ta ‘u da sa‘u; tai nidi ma‘eguao ‘a da ‘e‘ai asuoreorea ta ‘enega.

¹⁷ Ta tai ‘i bubuna na‘ieana Iosepa ‘i ona; ta tai nidi tai i ‘au‘ewedima Iosepa ‘ina anuaia.

¹⁸ Ta tai si matauta, si ‘au‘ewedima Iosepa ‘ina anuaia ta ‘enega; ta si ona, Mani si ‘e‘ilenama ‘ida baga ‘edia tuta ‘e bweuna ‘enega si me‘eda gamwagamwanaia; be ‘enega ‘areda ‘i da ‘ebesa, be ‘i da unuda, ta ‘i da giiaida toguinua ioniionida manuna, ta ‘ida aseao.

¹⁹ Ta Iosepa ‘ina anua ‘ana to‐‘ita‘i‘ita ‘ena si mai serabenaia, ta anua ‘ana ‘auboda ‘enega si ona,

²⁰ ta si gwae, ‘Igu ‘inapwana ie, ‘ai‘aila ‘e bweu tuta ‘a mwa‘utama sabi gimwani masura:

²¹ ta gete ‘i apwesa, ni‘atu anua ‘ebe‘eno ‘ena ‘a apwesa, ga ‘ima baga ‘a egigegedi, ta, u ‘ita, tai ‘e bweuna ‘e bweuna ‘ina mani ‘ina baga ‘awanaia ‘i miami, ‘imi mani ma‘ana mwau ‘ai‘aila: ta nimamega ‘a me‘e limena.

²² Ta mani wate ‘a mwa‘utenama nimamega sabi gimwani masura: nigea ‘a mwaratonina iaita ‘ima mani ‘i sa‘u limedi ‘ima baga ‘edia.

²³ Ta ‘i ona, Guguia ‘emia, gea‘abo wa matauta: ‘imi Eaubada, ta tamami ‘ina Eaubada, gwegwe i ‘ebwaemi ‘imi baga ‘edia: ‘abo‘agu ‘imi mani ia ‘ewena. Ta Simeona i ‘au‘ewa apwesenama ‘edia.

²⁴ Ta tai nidi tai ‘i me‘edi Iosepa ‘ina anua gamwanaia, ta boasi i ‘ebwaedi, ta ‘aedi si e ‘utudi; ta ‘idi aseao masura i ‘ebwaedi.

²⁵ Ta ‘ebwaeadaita si sa‘u ‘ai‘ailina Iosepa ‘ina mai manuna ‘asuoreorea: si nonona ‘aene gote ‘enaia si da ‘ai masura ta ‘enega.

²⁶ Ta ni‘atu Iosepa ‘i mai anuaia, ga ‘ebwaeadaita nimadia ‘i miamiana si me‘ena ‘enaia anua gamwanaia, ta ‘ena si bwagobwago sanamwa‘uta bare‘uia.

²⁷ Ta ‘idi miami ‘i enaidena, ta ‘i gwae, Tamami ‘i bobo‘anaia, tai sinabwana nina manuna wa gwaegwae? I bobo‘ana ataiaia?

²⁸ Ta si ona, ‘Imu toguinua tamama ‘i bobo‘ana, nigea ‘i mwawamwawasa. Ta debadiega si sanabwago, ta si ‘amaiabena.

²⁹ Ta i ‘ita tu‘e, ta tasina Beniamina i ‘itena, sinana natuna, ta ‘i ona, Gete tasimina megoamana, ga tauna manuna wa gwae ‘eguia ga? Ta ‘i ona, Eaubada ‘i da ‘atenua‘ole‘oleio, natugu.

³⁰ Ta Iosepa ‘i lomanini; ga sinaana ‘i lo‘upwa‘upwasae tasina manuna ta ‘enega; ta ‘i ebesa mwa‘onai ‘i da dedoi; ta ‘ina anua gamwanaia ‘ena ‘i rugu, ta ‘ena ‘i dedoi.

³¹ Ta i ‘atumaninisa, ta ‘i apwesama; ta i ‘etobodena tauna, ta ‘i ona, Masura wa da sa‘u.

³² Ta tauna manuna si sa‘u tebweuna tuga, ta taudi manudi taudimo, ta me Aigupito manudi, taudi ma‘enao si ‘e‘ai, taudimo: me Aigupito gea‘abo si ‘e‘a masura me Eberu ma‘ediao ta ‘enega; gote iage geiogeioi me Aigupito ‘edia ta ‘enega.

³³ Ta matanaia si miatoa, gimi tubua nadigega ‘ina tomatua, ta megoamana nadigega ‘ina tubumurimuria; ta tai nidi nuadi ‘i owana ‘e bweuna ‘e bweuna ‘enaia.

³⁴ Ta matanega ‘adi masura tomwanao si ‘ewedi ‘edia: ta Beniamina ‘ana masura tomwana ‘ana sinabwana ‘i gienimena ‘adi ‘e bweuna ‘enaia. Ta si numanuma, ta si eguausoara ma‘enao.