Nugana 41 - Buki Tabu Lowaenei 1919

‘UPWA 41.

¹ Ta iakwara maibo‘ana ‘e rua si gumwara, ga Parao i madawara: ta, wa ‘ita, boasi‘awa deinaia ‘i tooro.

² Ta, u ‘ita, bulomakau ‘e sebeni boasi‘awega si apwesama, si momonana ta si iapa; ta si ‘e‘a pwatura ‘enaia.

³ Ta, wa ‘ita, mari bulomakau ‘e sebeni si apwesama muridiega boasi‘awega, ‘adi ‘ita to‘umalina ta wakakadi; ta si tooro mari bulomakau deidia boasi‘awa tupitupinaia.

⁴ Ta bulomakau ‘adi ‘ita to‘umalina ta wakakadi bulomakau ‘e sebeni momonanidi ta iapadi si e‘a egumwaridi. Ga Parao ‘i tooro.

⁵ Ta i ‘eno ta ‘i madawara e rua: ta, wa ‘ita, witi soluna ‘e sebeni ‘arena ‘e bweuna ‘enega si tupwama, momonana ta bobo‘ana.

⁶ Ta, wa ‘ita, soluna ‘e sebeni, pikodi ta pepedi bomatuiega, si tupwa muriedima.

⁷ Ta soluna pikodi soluna momonana ta maa ‘e sebeni si tonedi. Ta Parao ‘i tooro, ta, wa ‘ita, madawara.

⁸ Ta gonagonaia gete ‘i apwesa iaruiaruana ‘i loniu; ta i ‘etune ta Aigupito ‘ana to ‘etoladi tabuiao iauiaudi, ta ‘ina to sinasinapu iauiaudi ‘i bwauiedi: ta Parao ‘ina madawara ‘i simanena ‘edia; ta nigea ‘e bweu i e‘ita‘edi Parao ‘enaia.

⁹ Ga to‘a‘ara‐keiga sinabwana Parao ‘ena ‘i ona, ‘i gwae, Batua ‘igu bubuna to‘umalina ia nua‘i‘isidi:

¹⁰ Parao ‘i gamwasoara ‘ina to‐guinuao ‘edia, ta to losaia ‘adi to‐nugana ‘ina anua ‘ena ‘i ionigu, ‘abo‘agu ta togabu‐masura sinabwana:

¹¹ ta boiboi ‘e bweu ‘a madawara, ‘abo‘agu ta tauna; ‘a madawara ‘e bweuna ‘e bweuna na‘ieana ‘ina madawara ‘ana simana.

¹² Ta tubuau ‘e bweuna ma‘ema ‘enaia, goma Eberu, to losaia ‘adi tonugana ‘ina toguinua; ta ‘ena ‘a simana, ta ‘ima madawara i ‘e simanena ‘emaia; ‘e bweuna ‘e bweuna na‘ieana ‘ina madawara ‘ena ‘i simanena.

¹³ Ta gete ‘i apwesa, na‘ieana ‘emaia ‘i simasimana, na‘ieana ‘i apwesa; ‘abo‘agu ‘igu guinua ‘ena ‘i sa‘u limegu, ta tauna ‘i loesanena.

¹⁴ Ga Parao ‘i etune ta Iosepa ‘i bwauiena, ta gogorega si me‘e maniniena: ta ‘i suina tauna, ta ‘ana ‘oama i ‘otena, ta Parao ‘ena ‘i ruguma.

¹⁵ Ta Parao ‘i ona Iosepa ‘enaia, ‘Abo‘agu ‘e bweu madawara ia madawarena, ta nigea ‘e bweu ‘i da simasimane: ta ia nonona manuio si gwae, ‘aene ‘ena madawara ‘u nonona ‘u simanena.

¹⁶ Ta Iosepa Parao ‘ena ‘i onalimana, ‘i gwae, Nigea ‘eguia: Eaubada guguia ‘ana onalimana Parao ‘i da ‘ebwae.

¹⁷ Ta Parao ‘i ona Iosepa ‘ena, ‘Igu madawara ‘ena, u ‘ita, boasi‘awa tupitupinaia ia tooro:

¹⁸ Ta, u ‘ita, bulomakau ‘e sebeni, iapa ta momonana, boasi‐‘awega si apwesama; ta pwatura ‘ena si ‘e‘ai:

¹⁹ ta, u ‘ita, mari bulomakau ‘e sebeni si apwesama muriediega, nigea iapedimo ta ‘adi ‘ita to‘umalina ta wakakadi, nigea to‘umalidi nadigega ia ‘itedi ‘asa Aigupito maibo‘ana ‘enaia:

²⁰ ta bulomakau wakakadi ta ‘adi ‘ita to‘umalina gimi bulomakau iapadi ‘e sebeni si ‘e gumwaridi:

²¹ ta ni‘atu si ‘e gumwaridi, nigea ia mwaratoni ‘aene si ‘enidi; ‘adi ‘ita to‘umalina ataia, ‘atua nuganega. Ga ia tooro.

²² Ta ‘igu madawara ‘ena ia ‘itena, ta, u ‘ita, witi soluna ‘e sebeni ‘arena ‘e bweuna ‘enega si separa si maa ta si bobo‘ana:

²³ ta, u ‘ita, witi soluna ‘e sebeni, pepedi, pikodi, medaridi bomatuiega si separa muriedi:

²⁴ ta witi soluna solu ‘e sebeni bobo‘adi si tonedi: ta to‐‘etoladi tabu ‘edia ia simana; ta nigea ‘e bweu ‘eguia ‘i da simasimane.

²⁵ Ta Iosepa ‘i ona Parao ‘ena, Parao ‘ina madawara ‘e bweuna: iage Eaubada ‘i abe ‘i guinua ni‘atu ‘i simana Parao ‘enaia.

²⁶ Bulomakau bobo‘adi ‘e sebeni iakwara ‘e sebeni; ta witi soluna bobo‘adi ‘e sebeni iakwara ‘e sebeni: madawara nina ‘e bweuna.

²⁷ Ta bulomakau wakakadi ta ‘adi ‘ita to‘umalina ‘e sebeni si apweapwesama muridiega taudi iakwara ‘e sebeni, ta wate witi soluna kakaedi ‘e sebeni bomatuiega si medaridi; taudi si da e iakwara botana ‘e sebeni.

²⁸ Gote iage nina Parao ‘ena ia oneone: iage Eaubada ‘i abe ‘i guinua ni‘atu Parao ‘ena ‘i e‘ita.

²⁹ U ‘ita, iakwara masura sinabwana ‘e sebeni ‘i abe si mama ‘asa Aigupito maibo‘ana ‘enaia:

³⁰ ta muridiega iakwara botana ‘e sebeni si da apwesa; ta masura sinabwana maibo‘ana si da nuapupurena ‘asa Aigupito maibo‘ana ‘enaia; ta botana nina ‘asa ‘i da loegumwarina;

³¹ ta masura sinabwana nina gea‘abo si da mwaramwaratonina ‘asa ‘enaia botana gote ‘i murimuriama leleana; ‘i da mwauwawasae ta ‘enega.

³² Ta madawara nina i ‘e ruena marua Parao ‘enaia manuna, tauna iage nina Eaubada ‘i giepa‘ara ta ‘enega, ta Eaubada ‘i abe ‘i gieapwesena.

³³ Ta ‘enega gete tuga Parao tai loina ‘ai‘ailina ta sinasinapuna ‘i da ‘ita ‘esi‘esinuena, ta ‘asa Aigupito ‘ana loina ‘i da ‘ebwae.

³⁴ Iage gete Parao ‘i da guinua, ta ‘asa ‘ana to‐‘ita‘i‘itao ‘i da ‘aseiedi, ta ‘asa Aigupito ‘ana ‘upwa ‘e nima ‘i da ‘ewena iakwara masura sinabwana ‘e sebeni ‘ediega.

³⁵ Ta iakwara bobo‘adi getedi si memai masuridi maibo‘ana si da egogonena, ta witi si da sa‘u Parao ‘ina loina ‘agaraunaia ‘asa ‘edia masura manuna, ta si da egagarena.

³⁶ Ta masura nina ‘i da ‘asa ‘ana sa‘u lobodaboda iakwara botana ‘e sebeni manudi, taudi ‘asa Aigupito ‘ena si da miami; be ‘enega ‘asa gea‘abo ‘i da saosaoora botana ‘enega.

³⁷ Ta iage nina ‘i bobo‘ana Parao matanaia, ta ‘ina to‐guinua iauiaudi matadia.

³⁸ Ta Parao ‘i ona ‘ina toguinua ‘edia, Kapekapeana nai ‘e bweu nadigega ta da lobena, tai Eaubada iaruiaruana ‘i miami ‘enaia?

³⁹ Ta Parao ‘i ona Iosepa ‘enaia, Iage iauiauna gete Eaubada ni‘atu ‘i e‘itemu, ta ‘enega nigea ‘e bweu ‘i loina ‘ai‘aila ta ‘i sinasinapu ‘oio nadigega:

⁴⁰ ‘oio ‘igu anua ‘u da loine, ta ‘imu ona nadigega ‘igu tomota iauiauna loina si da muria: ‘ebemiesaesa namo ‘ena ia da sinabwasineio.

⁴¹ Ta Parao ‘i ona Iosepa ‘enaia, U ‘ita, ‘asa Aigupito maibo‘ana ‘ana loina ia ‘ebwaemu.

⁴² Ta Parao ‘ina nimapasapasa ‘ebetuepa‘i nimanega ‘i alolona, ta Iosepa nimana ‘ena ‘i sa‘una, ta ‘oama kaleko matagidarinega ‘i e‘otena, ta ‘aupa gola ‘otonaia ‘i taramaga‘ena;

⁴³ ta ‘ina waga lisilisi ‘e ruena ‘ena ‘i egeruna; ta matanaia si bwau, ‘Aemi wa da tulasena: ta ‘asa Aigupito maibo‘ana ‘ana loina i ‘ebwa‘ena.

⁴⁴ Ta Parao ‘i ona Iosepa ‘enaia, ‘Abo‘agu Parao, ta ‘oio nigea gea‘abo ‘e bweu tai ‘asa Aigupito maibo‘ana ‘enaia nimana nai ‘aena ‘i da sa‘usa‘u tu‘eie.

⁴⁵ Ta Parao Iosepa ‘i eesena Sapenata‐panea; ta Asenata i ‘ebwaea‘ena be ‘i mwanena tauna Potipera Ona ‘ana totaria natuna me wainena. Ta Iosepa ‘i tauiawa ‘asa Aigupito maibo‘ana ‘enaia.

⁴⁶ Ta Iosepa ‘ana iakwara ‘e tati ‘ena ‘i tooro Parao Aigupito ‘ana king matanaia. Ta Iosepa Parao matanega ‘i apwesa, ta ‘asa Aigupito maibo‘ana ‘ena ‘i tauia.

⁴⁷ Ta iakwara masuras inabwana ‘e sebeni nidi bare‘u ‘i ualoepoepopo.

⁴⁸ Ta iakwara ‘e sebeni nidi masura iauiauna ‘asa Aigupito ‘ena si miami ‘i egogonedi, ta masura nina ‘asa ‘edia ‘i sa‘una: tanoa, ‘asa ‘e bweuna ‘e bweuna ‘i mia sakowasiena, ‘ina masura ‘i sa‘usa‘u tauna ‘enaia.

⁴⁹ Ta Iosepa witi ‘i siwena na‘ieana ora kaukauna, to sinabwa sana, ga sawa ‘i pilisinena; ‘ana sawa nigea kapekapeana ta ‘enega.

⁵⁰ Ta natunao me‘olotodi, ‘e rua si tubua Iosepa ‘enaia iakwara botana nuganinaia, taudi Asenata Potipera Ona ‘ina totaria natuna ‘ena ‘i enatunedi.

⁵¹ Ta Iosepa to gimi tubua ‘i eesena Manase: ‘I ona, ta ‘enega, Eaubada ‘eguia ‘i bubuna be ‘igu guinua maibo‘ana, ta tamagu ‘ina susu, maibo‘ana ia nuapupuredi.

⁵² Ta ‘e ruena ‘i eesena Eparaima: Eaubada ‘eguia ‘i bubuna be ia uaua ‘igu elo‘uia ‘ina ‘asa ‘ena ta ‘enega.

⁵³ Ta masura sinabwana tauna ‘asa Aigupito ‘ena ‘i miami, ‘ana iakwara ‘e sebeni, si losaroni.

⁵⁴ Ta botana ‘ina iakwara ‘e sebeni si mai, nadigega Iosepa ‘i onaona ni‘atu: ta ‘asa iauiaudi botana ‘edia ‘i miami; ta ‘asa Aigupito maibo‘ana masura ‘ena ‘i miami.

⁵⁵ Ta ni‘atu ‘asa Aigupito maibo‘ana si botana, ga tomota si dedoi Parao ‘ena masura manuna: ta Parao ‘i ona me Aigupito iauiaudi ‘edia, Iosepa ‘ena wa da tauia; iage ‘emia ‘i ona, wa da guinua.

⁵⁶ Ta botana bare‘u matana maibo‘ana ‘ena ‘i miami: ta Iosepa anua‐witi iauiaudi ‘i gigegedi, ta me Aigupito ‘edia ‘i egimwani; ta botana nina ‘i didigawawasae ‘asa Aigupito ‘enaia.

⁵⁷ Ta ‘ebeloina iauiauna si mai Aigupito ‘enaia Iosepa ‘ena sabi gimwani witi; botana ‘i didiga wawasae bare‘u maibo‘ana ‘ena manuna.