Nugana 40 - Buki Tabu Lowaenei 1919

‘UPWA 40.

¹ Ta iage getedi si gumwara ga gete ‘i apwesa, Aigupito ‘ana king ‘ina to‐‘a‘ara‐keiga ta ‘ina to‐gabu masura ‘idi ‘inapwana Aigupito ‘ana king nuana si gieto‘umaliena.

² Ta Parao ‘i gamwasoara ‘ina toguinua nidi ‘e rua ‘edia, to‘a‘ara‐keiga ‘idi to‐nugana ‘enaia, ta to‐gabu‐masura ‘idi to‐nugana ‘enaia,

³ Ta to losaia ‘idi to‐nugana ‘ina anua ‘ena ‘i ionidi, anua ‘ebeiona ‘enaia, esena nina ‘ena Iosepa si ionina.

⁴ Ta tolosaia ‘idi to nugana Iosepa ‘i eonena ‘aene ‘i da ‘ita‘i‘isidi, ta ‘edia ‘i guinua: ta ‘asiata iauna si miami ioniionidi.

⁵ Ta siterua si madawara, ‘e bweuna ‘e bweuna ‘ina madawara, boiboi ‘e bweuna ‘enega, ‘e bweuna ‘e bweuna na‘ieana ‘ina madawara ‘ana e‘ita, Aigupito ‘ana king ‘ina to‐‘a‘arakeiga ta ‘ina to‐gabu‐masura, taudi anua ‘ebeiona ‘ena si miami ioniionidi.

⁶ Ta Iosepa ‘i ruguma ‘edia gonagonaia, ta i ‘itedi, ta, wa ‘ita, maninidi si tuegoegoa.

⁷ Ta Parao ‘ina to‐guinuao ma‘ieana si miami ioniionidi ‘ina ‘inapwana ‘ina anuaia ‘i eonedi, ‘i gwaegwae, To‘ase manuna maninimi wa tuegoegoa?

⁸ Ta ‘ena si ona, Madawara ‘a madamadawarena, ta nigea ‘e bweu ‘i da e‘itae. Ta Iosepa ‘i ona ‘edia, E‘itao nigea nai Eaubada ‘ina iage? ‘eguia wa da simanena, ia sidemi.

⁹ Ta to‐‘a‘ara‐keiga sinabwana ‘ina madawara ‘i simanena Iosepa ‘enaia, ta ‘ena ‘i gwae, ‘Igu madawara ‘ena, u ‘ita, kaiwe‐oine ‘e bweuna mataguia;

¹⁰ ta kaiwe‐oine nina narinao ‘e toi: ta ‘atua ‘i lobwasila, ta didina ‘i separa; ta ‘i uaua ga oine‐uana matuanamo ‘i lolona:

¹¹ ta Parao ‘ana keiga nimaguia; ta oine‐uana ia ‘ewedi, ta Parao ‘ana keiga ‘ena ia bibidi, ta keiga ia ‘ebwaea‘ena Parao nimanaia.

¹² Ta Iosepa ‘ena ‘i ona, Gete ‘ana e‘ita: narina ‘e toi ‘asiata ‘e toi;

¹³ ‘asiata ‘e toi ga Parao debaio ‘i da gilagasi, ta ‘imu guinua ‘ena ‘i da sa‘u limaio: ta Parao ‘ana keiga nimanaia ‘u da ‘ebwaea, nadigega bubuna lowa ‘ena ‘oio ‘ina to‐‘a‘ara‐keiga.

¹⁴ Ta ‘ena ‘u miabobo‘ana ‘u da nua‘i‘isigu, ta ia sideio, ‘eguia ‘u da nua‘ole‘ole, ta Parao ‘ena ‘u da simanegu, ta anua gete ‘enega ‘u da tauiegu:

¹⁵ ‘Abo‘agu si ‘ipwara ‘ai‘ailigu me Eberu ‘idi ‘asega: ta gete wate ‘ena nigea ‘e bweu iage ia guinua be ‘enega gogora ‘ena si sa‘ugu.

¹⁶ Ni‘atu to‐gabumasura sinabwana i ‘itena ‘aene e‘ita nina ‘i bobo‘ana, ga Iosepa ‘ena ‘i ona, ‘Abo‘agu wate madawara ‘ena ia miami, ta, u ‘ita, palaua wakewakekena kodo ‘e toi debaguia:

¹⁷ Ta kodo ‘etanaia masura gabugabuna iauna ‘ena ‘i miami Parao manuna; ta manua si ‘enidi kodoega debaguia ‘enega.

¹⁸ Ta Iosepa ‘i onalimana ta ‘i gwae, Gete ‘ana e‘ita: kodo ‘e toi ‘asiata ‘e toi;

¹⁹ ‘asiata ‘e toi ga Parao debaio ‘i da gilagasi ‘emuiega, ta kaiwe ‘ena ‘i da loesaneio; ta esioio ‘emuiega manua si da e‘ani.

²⁰ Ta ‘asiata ‘etonina gete ‘i apwesa, tauna Parao ‘ina ‘asiata tubua, ga ‘ina to‐guinua iauiaudi ‘edia sagari ‘i bubuna: ta to‘a‘ara‐keiga sinabwana debana ta to‐gabu‐masura sinabwana debana ‘i gilagasidi ‘ina to‐guinuao gamwagamwanidia.

²¹ Ta to‘a‘ara keiga sinabwana ‘ina ‘a‘ara‐keiga ‘ena i ‘ebwaea limena; ta keiga i ‘ebwaea‘ena Parao nimanaia:

²² ta to‐gabu‐masura sinabwana ‘i loesanena: na‘ieana Iosepa ‘i e‘ita ‘edia.

²³ Ta to‐‘a‘ara‐keiga sinabwana Iosepa nigea ‘i nua‘i‘isina, ta ‘i nuapupurena.