Nugana 38 - Buki Tabu Lowaenei 1919

‘UPWA 38.

¹ Ta tuta gote gete ‘i apwesa, Iuda tasinao ‘ediega ‘i mwa‘uta, ta goma Adulama ‘e bweu, ‘ana esana Irai, ‘ena ‘i tauia.

² Ta Iuda ‘e bweu goma Kanania ‘ana esana Sua natuna me wainena i ‘itena; ta i ‘au‘ewena, ta ‘ena ‘i rugu.

³ Ta i ‘euwana, ta natuna me‘olotona i ‘enatunena; ta ‘i eesena Era.

⁴ Ta i ‘euwana limana, ta natuna me‘olotona ‘i enatunena; ta ‘i eesena Onana.

⁵ Ta wate natuna me‘olotona ‘i enatunena, ta ‘i eesena Sela: ta Kesiba ‘ena ‘i miami, ‘ena ‘i enatunena.

⁶ Ta Iuda waine ‘e bweu i ‘au‘ewena Era ‘ina tomatua mwanena manuna, ta ‘ana esana Tamara.

⁷ Ta Era, Iuda ‘ina tomatua, ‘i to‘umalina Ieoba matanaia; ta Ieoba ‘i ununa.

⁸ Ta Iuda ‘i ona Onana ‘enaia, Tasio mwanena ‘ena ‘u da rugu, ta to ai me‘olotona tasina ‘ina bubuna ‘u da guinua ‘enaia, ta tasio ena natuna ‘u da gietooro.

⁹ Ta Onana ‘i mwaratoni ‘aene natuna nigea ‘i da tauna natuna; ta gete ‘i apwesa, ni‘atu tasina mwanena ‘ena ‘i rugu, ga ‘i e tasiwena bare‘uia, nai tasina ‘ena natuna ‘i da ‘ebwaea.

¹⁰ Ta iage ‘i guinuena ‘i to‘umali Ieoba matanaia: ta tauna wate ‘I ununa.

¹¹ Ga Iuda ‘i gwae lawana Tamana ‘enaia, Tamaio ‘ina anua ‘ena ‘u da mia kwabukwabura, ga Sela natugu me‘olotona ‘i da sinabwa; ‘i gwae ta ‘enega, Nai tauna wate ‘i da mwawasa, tasinao nadigega. Ta Tamara ‘i tauia ta tamana ‘ina anuaia ‘i miami.

¹² Ta ma‘etamo Sua natuna me wainena, Iuda mwanena, ‘i mwawasa; ta Iuda ni‘atu nuana ‘i bobo‘ana, ga ‘i tu‘e ‘ina to‘upwasipi ‘edia Timanai ‘enaia, tauna ta gosiana Irai goma Adulama.

¹³ Ta Tamara ‘ena si simana, si gwae, U ‘ita, lawaio ‘i tu‘e Timanai ‘enaia sabi ‘upwa ‘ina sipi.

¹⁴ Ta ‘ana ‘oama kwabura ‘i alolona, ta ‘ina lobodaboda ‘enega ‘i lobodebodena tauna, ta ‘i nugwena tauna, ta ‘awa‐‘eberugu Enaima ‘ena ‘i miatoa, tauna ‘eda Timanai deinaia; i ‘itena Sela ni‘atu ‘i sinabwa ta ‘enega, ta nigea ‘ena si tautauie be ‘i da ‘awamwanena.

¹⁵ Ni‘atu Iuda i ‘itena, ga ‘i nuena ‘aene sogara; maninina i ‘aubodebodena ta ‘enega.

¹⁶ Ta ‘edega ‘ena ‘i sana‘ila, ta ‘i gwae, Ia sideio, ‘u da tagwara be ‘emuia ia da rugu: nigea ‘i mwaramwaratoni ‘aene lawana ta ‘enega. Ta waine ‘i ona, To‘ase ‘u da ‘ebwaegu, be ‘enega ‘u da ruguma ‘eguia?

¹⁷ Ta tai ‘i ona, Gota menonoiana iau ‘enega ia da etunena ‘emuia. Ta waine ‘i gwae, We‘iwe‘iiaia ‘e bweu ‘u da ‘ebwaegu, ga ‘u da etunena?

¹⁸ Ta tai ‘i ona, To we‘iweiiaia ia da ‘ebwaemu? Ta waine ‘i ona, ‘Imu ‘ebetuepa‘i ta ‘imu nosanosa, ta ‘imu keweliwelili nimamuia ‘i miamiana. Ta ‘ena i ‘ebwaeaedi, ta ‘ena ‘i rugu, ta i ‘euwana ‘enega.

¹⁹ Ta waine ‘i tooro, ta ‘i tauiawa, ta ‘ana lobodaboda ‘i alolona, ta ‘ana ‘oama kwabura i ‘otena.

²⁰ Ta Iuda gota menonoiana ‘i etunena gosiana goma Adulama nimanega, be we‘iiwe‘iiaia ‘i da ‘ewa waine nimanega: ta nigea ‘i lobena.

²¹ Ga ‘ina esena taidi ‘i eonedi, ‘i gwae, Sogara mwa‘o, tauna ‘eda tupitupinaia Enaima ‘ena ‘i miami? Ta si ona, Nigea ‘e bweu sogara bada ‘i miami.

²² Ta Iuda ‘ena i ‘ila ta ‘i gwae, Nigea ia lobaloba, ta wate esena nina taidi si gwae, Nigea ‘e bweu sogara bada ‘i miami.

²³ Ta Iuda ‘i ona, ‘Enaia waine ‘i da ‘ewa, nai ta omaiamaia: u ‘ita, gota menonoiana gete ia ‘etunena, ta nigea ‘u lobaloba.

²⁴ Ta nawarae ‘e toi si gumwara ga gete ‘i apwesa, Iuda ‘ena si simana si gwae, Lawaio Tamara ‘i esogara; ta wate, u ‘ita, i ‘euwana esogarega. Ia Iuda ‘i gwae, Wa da ‘au‘ewa apwesenama, ta ‘i da ‘arasi.

²⁵ Ni‘atu si ‘au‘ewa apwesenama, ga lawana ‘ena ‘i etunedi, ‘i gwae, Tai nina, tauna tonigwegwe getedi, tauna ‘enega ia ‘euwana: ta waine ‘i ona, U ‘ita, ia sideio, iaita ‘ina iage getedi, ‘ebetuepa‘i nina, nosanosa nidi, keweliwelili nina.

²⁶ Ta Iuda ‘i lotamo ‘edia, ta ‘i gwae, Waine ‘ina bubuna ‘i paruparuna wawasae ‘eguia; nigea ia ‘ebwaea‘ena natugu Sela ‘enaia ta ‘enega. Ta nigea wate ‘i mwaramwaratonina.

²⁷ Ta tuta ‘i edadama gete ‘i apwesa, wa ‘ita, goama didiruarua gamwana ‘enaia.

²⁸ Ta gete ‘i apwesa, ‘ena ‘i edadama, ga ‘e bweuna nimana ‘i e‘etoapwesena: ta waine to‐etubua nimana ‘i giiai ta marakwa bweabwearina ‘ena ‘i losipwena, ‘i gwae, Gete ‘i gimi apwesa.

²⁹ Ta gete ‘i apwesa, nimana ‘i lisi ‘ilena, ga, wa ‘ita, tasina ‘i apwesama: ta waine ‘i gwae, To‘ase manuna ‘u weara taumumo? Ta ‘enega si eesena Peresa.

³⁰ Ta muriega tasina ‘i apwesama, tauna marakwa bweabwearina nimanaia: ta si eesena Sera.