Nugana 37 - Buki Tabu Lowaenei 1919

‘UPWA 37.

¹ Ta Iakobo ‘asa nina ‘ena tamana ‘i miamiana ‘ena ‘i miami, ‘asa Kanania.

² Getedi Iakobo natunao ‘adi tetera. Iosepa, ‘ana iakwara ‘e sebenitini, sipi iau ‘i e‘enidi tasinao ma‘edi; ta tauna tubuau Bila natunao ma‘edi, ta Silipa natunao ma‘ediao, tamana mwanenao: ta Iosepa tetera to‘umalina manudi ‘i me‘ena tamadi ‘enaia.

³ Ta Iseraela Iosepa ‘i obobomena wawasae natunao iauiaudi ‘edia, tauna natuna tuta enega ‘i tai sinabwana ta ‘enega: ta ‘ana ‘oama iomwaiomwarina ‘i sailina.

⁴ Ta tasinao si ‘itena ‘aene tamadi ‘i obobomena wawasae tasinao iauiaudi ‘edia; ta nuadi ‘i to‘umali ‘enaia, ta nigea kapekapeana ‘ena si da ona guguia.

⁵ Ta Iosepa ‘i madawara, ta tasinao ‘edia ‘i simana: ta nuadi ‘i to‘umalina wawasae ‘enaia.

⁶ Ta ‘i eonedi, Ia sidemi, madawara gete ni‘atu ia madawarena wa da nonona:

⁷ Wa ‘ita, ta ‘enega, witi ta ebwagilina bagura ‘enaia, ta, wa ‘ita, ‘igu bwagila ‘i tooro, ta wate ‘i tooro paruparuna; ta, wa ‘ita, ‘imi bwagilao si sakowasiena, ta ‘igu bwagila ‘ena si bwagobwago.

⁸ Ta tasinao si eonena, ‘O io nai ‘u da loinema? ‘O io nai ‘u da e‘inapwana ‘emaia? Ta ‘ina madawara manudi, ta ‘ina ona manudi nuadi ‘i to‘umali wawasae ‘enaia.

⁹ Ta wate ‘e bweu madawara ‘i madawarena, ta tasinao ‘edia ‘i simanena, ta ‘i gwae, Wa ‘ita, wate ‘e bweu madawara ia madawarena; ta, wa ‘ita, sinara ta nawarae ta kwadima ‘e elebeni ‘eguia si bwagobwago.

¹⁰ Ta tamana ‘ena, ta tasinao ‘edia ‘i simanena; ta tamana ‘i ba‘ena, ta ‘ena ‘i ona, To madawara gete ‘u madawarena? ‘Abo‘agu be, sinaio be, tasimuao be, ‘aene ‘a da bwagobwago ‘emuia bare‘uia?

¹¹ Ta tasinao si e‘ipi‘ipi manuna; ta tamana ona nina ‘i nua‘i‘isina.

¹² Ta tasinao si tauia be tamadi ‘ina sipi iau si da e‘enidi Sekema ‘enaia.

¹³ Ta Iseraela ‘i ona Iosepa ‘enaia, Tasimuao nigea nai sipi iau si e‘enina Sekema ‘enaia? U da mai, ta ia da ‘etuneio ‘edia. Ta ‘i ona ‘enaia, ‘Abo‘agu.

¹⁴ Ta ‘i eonena, Gete tuga ‘u da tauia, ‘u da ‘itadi nai tasimuao si bobo‘anaia, ta nai sipi iau bobo‘ana; ta ona ‘u da ‘ilenama. Ta ‘enega Eberona ‘abataunega ‘i etunena, ta ‘i mai Sekema ‘enaia.

¹⁵ Ta ‘e bweu tai ‘i lobena, ta, wa ‘ita, mitawaia ‘i lopilidadana: ta tai ‘i eonena, ‘i gwae, To‘ase u ‘ebe‘ebese?

¹⁶ Ta ‘i ona, Tasiguao ia ‘ebe‘ebesedi: ia sideio, ‘eguia ‘u da simana, mwa‘o sipi iau si e‘enidi.

¹⁷ Ta tai ‘i ona, Gete ‘enega si tauia: ia nonodi si gwaegwaelia ta ‘enega, Ta da tauia Dotana ‘enaia. Ta Iosepa tasinao ‘i muriedi, ta Dotana ‘ena ‘i lobedi.

¹⁸ Ta si ‘itena ‘edasoraia, ta nigea ‘i mema serabedia, ga si wasegigiena ‘aene si da ununa.

¹⁹ Ta si eonaona ‘e bweuna ‘e bweuna. Wa ‘ita, to madawara gete ‘i memai.

²⁰ ‘Enega wa da mai be ta da ununa, ta gaula ‘e bweuna ‘ena ta da ulena, be ta da ona, Bomitawa to‘umalina ‘e bweu i ‘enina: be ta da ‘ita to‘ase ‘i da apwesa ‘ina madawarega.

²¹ Ta Rubena ‘i nonona, ta nimadiega i ‘etoseena; ta ‘i gwae, Gea‘abo ta loemwawasi.

²² Ta Rubena ‘edia ‘i gwae, Gea‘abo rarana ta giedau; gaula gete mitawaia ‘ena ta da ulena, ta gea‘abo ta unuunu: ‘aene nimadiega ‘i da ‘etoseena, be tamana ‘ena ‘i da ‘ebwaea limane.

²³ Ta gete ‘i apwesa, ni‘atu Iosepa ‘i mai tasinao ‘edia, ga Iosepa ‘ana ‘oama si alolona, ‘oama iomwaiomwarina nina i ‘ote‘otena;

²⁴ Ta si giiaina, ta gaulaia si ulena; ta gaula nina kakaena, nigea boasinamo.

²⁵ Ta si miatoa sabi ‘e‘ai palaua: ta si ‘ita tu‘e ta si dune, ta, wa ‘ita, me Isimaela boda to lopilidadana Gileadega si mema, ‘idi kameliao gweda mamaina be, gweda ‘epuio be, gweda muro be, si lo‘a‘aridi, ‘i abe si lo‘a‘ara mwa‘uta Aigupito ‘enaia.

²⁶ Ta Iuda ‘i ona tasinao ‘edia, To‘ase ‘ana bobo‘ana ‘abo tasida ta ununa ta rarana ta sa‘u kwaiena?

²⁷ Wa da mai, ta da gimwaniena me Isimaela ‘edia, ta gea‘abo ta da unuunu; tauna tasida ta ‘enega, esioda. Ta tasinao si nonona.

²⁸ Ta me Midiana si tautauia, to gimwani; ta Iosepa gaulega si lisi tu‘eienama ta si ‘ewatu‘eiena, ta Iosepa si gimwaniena me Isimaela ‘edia sileba ‘e tweniti manudi. Ta Iosepa si ‘au‘ewena Aigupito ‘enaia.

²⁹ Ta Rubena i ‘ila gaula ‘enaia; ta, wa ‘ita, Iosepa nigea gaulaia; ta ‘ana ‘oama ‘i gisabudi.

³⁰ Ta tasinao ‘edia i ‘ila, ta ‘i gwae, Goama nigea ‘i miami; ta ‘abo‘agu, mwa‘onai ia da tauia?

³¹ Ta Iosepa ‘ana ‘oama si ‘ewena, ta gota‐me‘olotona si ununa, ta ‘oama si sa‘u mwa‘utena rara ‘enaia;

³² Ta ‘oama iomwaiomwarina si ‘etunena, ta tamadi ‘ena si me‘ena; ta si gwae, Gete ‘a lobena: ‘u da ‘ita nai natuio ‘ana ‘oama nai nigea.

³³ Ta ‘i mwaratonina, ta ‘i gwae, Gete natugu ‘ana ‘oama; bomitawa to‘umalina ni‘atu i ‘enina; ona‘ai‘aila Iosepa ‘i sabulelewanena.

³⁴ Ta Iakobo ‘ana ‘oama i gisabuna, ta tolobwana ‘ena ‘oama ‘oausa i ‘otena, ta ‘asiata iauna ‘i dedoi natuna manuna.

³⁵ Ta natunao me‘olotodi iauiaudi ta natunao mewainedi iauiaudi si tooro sabi gienuabobo‘anena; ta nuabobo‘ana geanuana; ta ‘i gwae, ‘Ari‘ari ‘ena ia da tauia ta ‘enega natugu ‘enaia ma‘igu dedoi. Ta tamana ‘i dedoi manuna.

³⁶ Ta me Midiana si gimwaniena Aigupito ‘enaia Potipara ‘ena, Parao ‘ina to‘ita‘i‘isi ‘e bweu, to losaia ‘idi ‘inapwana.