Nugana 32 - Buki Tabu Lowaenei 1919

‘UPWA 32.

¹ Ta Iakobo ‘i tautauia, ta Eaubada ‘ina aneloseao si lobena.

² Ta Iakobo ‘ena ‘i ‘itedi ‘i ona, Gete Eaubada ‘ina boda: ta esena gote ‘i eesena Maanaima.

³ Ta Iakobo topiliiareiare ‘i etunedi nuganinaia tasina Esau ‘ena ‘asa Seira ‘enaia, tauna Edoma mitawina.

⁴ Ta ‘i eonedi ‘i ona, Gete nadigega wa da ona ‘igu ‘inapwana Esau ‘enaia; Gete nadigega ‘imu toguinua Iakobo ‘i gwae, Labana ma‘ieagu ‘a miamiana, ta ia miamiana ga batua:

⁵ ta ma‘igu bulomakau, ase ta sipi iau be, to guinua me‘olotodi ta mewainedi be: ta ia etune be ‘igu ‘inapwana ‘ena ia simana, be ‘enega oboboma ia da loba matamuia.

⁶ Ta topiliiareiare Iakobo ‘ena si ‘ila, si gwae, Tasio Esau ‘ena ‘a apwesa, ta wate sabi lobaio ‘i memai, ta tai poa anaredi ma‘enao.

⁷ Ga Iakobo ‘i matauta sinabwana ta i ‘atesa‘ara: ta tomota ma‘enao si miamiana, sipi iau be, bulomakau iau be, kameliao be, ‘i wearidi boda ‘e rua;

⁸ ta ‘i gwae, ‘Abo Esau ‘i mai boda ‘e bweuna ‘enaia, ta ‘i da unua‘ena, ga boda ‘i tupwana ‘i da dena.

⁹ Ta Iakobo ‘i gwae, Ie tubugu Aberaamo ‘ina Eaubada, ta tamagu Isaako ‘ina Eaubada, Ieoba ie, tauio ‘u eonegu, ‘Imu ‘asa ‘ena ‘u da ‘ila, ta ‘imu bu‘unao ‘edia, ta ia da giebobo‘aneio:

¹⁰ ‘imu nua‘ole‘ole iauiauna, ta ‘imu ona‘ai‘aila iauiauna, taudi ‘imu toguinua ‘ena u ‘e‘ita, ‘Abo‘agu nigea sawesaweguia ‘e bweuna me gidarina; ma‘igu guna Ioridana gete ia taonina ta ‘enega; ta gete ‘abo‘agu ni‘atu boda ‘e rua.

¹¹ ‘U da ‘etoseegu, ia sideio, tasigu nimanega, Esau nimanega: ia matautena ta ‘enega, nai ‘i da mai be ‘i da unugu, sinadi manatunao.

¹² Ta ‘u ona, ‘Ai‘aila ia da giebobo‘aneio, ta tubumuao ia da bubudi be si da e ora ‘ina kaukau ‘atua, ‘ana iau iaudidigana ‘enega nigea kapekapeana ‘u da sawa.

¹³ Ta boiboi gote nada i ‘eno; ta ‘ina iage ‘enega ‘ebwaeadaita i ‘ewena tasina Esau manuna;

¹⁴ gota mewainedi ‘e tu ‘anaredi ta me‘olotodi e tweniti, sipi mewainedi e tu anaredi ta me‘olotodi ‘e tweniti,

¹⁵ kameli susudi ‘e tati ta menonoiadi me‘olotodi, bulomakau mewainedi ‘e poti ta me‘olotodi ‘e teni, ase mewainedi ‘e tweniti ta menonoiadi me‘olotodi e teni.

¹⁶ Ta ‘ina toguinuao nimadia i ‘ebwaea‘edi, iau ‘e bweuna ‘e bweuna ‘ana esena ‘e bweuna ‘e bweuna: ta ‘ina toguinuao ‘i eonedi, Nuganiguia wa da taona, ta mwatui wa da sa‘u iau ta iau gamwagamwanidia.

¹⁷ Ta tonugana ‘i eonena, ‘i gwae, ‘Ena tasigu Esau ‘i lobemu, ta ‘i eonaio, ‘i gwae, Iaita ‘ina tai ‘oio? ta mwa‘o ‘u tautauia? ta iasigei getedi matamuia?

¹⁸ ga ‘u da ona, ‘Imu toguinua Iakobo ‘ina; gete ‘ebwaeadaita ‘i etunena ‘igu ‘inapwana Esau ‘ena: ta, u ‘ita, tauna wate murimaia.

¹⁹ Ta wate e ruena ‘i eonena, ta ‘e tonina, ta iauiaudi iau si muriedi, ‘i gwae, Gete bubuna nina ‘enega Esau ‘ena wa da ona, ‘ena wa lobena;

²⁰ ta wa da ona, Wate, u ‘ita, ‘imu toguinua Iakobo murimaia. ‘I gwae ta ‘enega, Nuana ia da giesiwaroni ‘ebwaeadaita ‘i da nuganegu ‘enega, ta muriega maninina ia da ‘itena; nai nuana ‘i da bobo‘ana ‘eguia.

²¹ Ta ‘enega ‘ebwaeadaita ‘i taonama nuganinaia: ta tauna boda ‘ena i ‘eno‘eno.

²² Ta boiboi gote ‘i tooro, ta mwanenao ‘e rua i ‘au‘ewedi, ‘ina toguinua mewainedi ‘e rua be, natunao ‘e elebeni be, ta ‘ebeabarega Iaboka ‘enega ‘i abara.

²³ Ta i ‘ewedi, ta i ‘etunedi be si da abara, ta ‘ina iage i ‘etunedi be si da abara.

²⁴ Ta Iakobo ‘i miami tebweuna; ta ‘ena ‘e bweu tai ma‘ieana si edididi masarina.

²⁵ Ta ni‘atu i ‘itena nigea ‘ena ‘i ewaiwai, ga bwadagana ‘agaraunaia ‘i gitoona; ta Iakobo bwadagana ‘agarauna ‘i didina, ma‘ieana si edididi ‘enega.

²⁶ Ta ‘i ona, ‘U da gisinegu, tomwa ‘i ulisina ta ‘enega. Ta ‘i ona, Gea‘abo ia gisineio, ‘abo nigea ‘u onaonaobobomegu.

²⁷ Ta ‘i eonena, Mwa‘adega ‘amu esana? Ta ‘i ona, Iakobo.

²⁸ Ta ‘i ona, ‘Amu esana gea‘abo si ‘inanena ‘aene Iakobo, ta Iseraela: Eaubada ma‘ieana ta tomota ma‘edi wa e‘upwa ta ‘enega, ta ‘u ewaiwai.

²⁹ Ta Iakobo i eonena, ta ‘i ona, Ia sideio, ‘amu esana ‘u da simana ‘eguia. Ta ‘i ona, To‘ase manuna ‘agu esana manuna ‘u enaida? Ta nada ‘i onaobobomena.

³⁰ Ta Iakobo esena nina ‘i eesena Peniela: ‘i ona, ta ‘enega, Eaubada ia ‘itena e‘awatanesinesiega, ta iawasigu ‘i bobo‘ana.

³¹ Ta sinara ‘ena ‘i sa‘e Penuela ‘ena ‘i abara, ta bwadagana ‘enega ‘i lopegoi.

³² Ta ‘enega Iseraela natunao ‘esi‘esina warona bwadaga ‘agaraunaia nigea si da ‘enina, ga batua: Iakobo bwadagana ‘agarauna ‘i gitoona ta ‘enega ‘esi‘esina warona ‘enaia.