Nugana 31 - Buki Tabu Lowaenei 1919

‘UPWA 31.

¹ Ta Labana natunao me‘olotodi ‘idi ona ‘i nonodi, si gwae, Iakobo ni‘atu tamada ‘ina iage iauiauna i ‘ewedi; ta tamada ‘ina iage ‘ediega ‘ina esaesa iauiauna i ‘ewena.

² Ta Iakobo Labana maninina i ‘itena, ta, wa ‘ita, nigea ‘enaia nadigega tuta lowa.

³ Ta Ieoba Iakobo ‘ena ‘i ona, Tubumuao ‘idi ‘asa ‘ena ‘u da ‘ila, ta ‘imu bu‘unao ‘edia; ta ‘abo‘agu ma‘ieaio.

⁴ Ta Iakobo ‘i etune ta Rakela ta Lea ‘i bwauiedi mitawaia ‘ina iau ‘enaia,

⁵ ta ‘i eonedi, Tamami maninina ia ‘itena, nigea ‘eguia nadigega tuta lowa; ta tamagu ‘ina Eaubada ma‘ieagu ‘a miami.

⁶ Ta wa mwaratoni ‘igu waiwai maibo‘anega tamami ‘ena ia guinua.

⁷ Ta tamami ‘i kaboegu, ta ‘agu e‘isa ‘i gibunina e sanauna; ta Eaubada nigea ‘i tagwarena be ‘i da gieto‘umaliegu.

⁸ ‘Abo ‘i ona gete nadigega, Iomwaiomwaridi ‘amu e‘isa; ga iau maibo‘ana iomwaiomwaridi si enatunedi: ta ‘abo ‘i ona nadigega, Ma‘adi saba ‘amu e‘isa; ga iau maibo‘ana ma‘adi saba si enatunedi.

⁹ Nadigega Eaubada tamami ‘ina iobai i ‘ewedi, ta eguia i ‘ebwaeaedi.

¹⁰ Ta gete ‘i apwesa tuta nina iau si ‘euwana, ia ‘ita tu‘e, ta madawara ‘ena ia ‘itena, ta, wa ‘ita, gota me‘olotodi iau ‘edia si mwera ma‘adi saba, iomwaiomwaridi, ta guaiaguaiadi.

¹¹ Ta Eaubada ‘ina anelose madawara ‘enega ‘i eonegu, Iakobo: ta ia ona, ‘Abo‘agu.

¹² Ta ‘i gwae, Gete tuga ‘u da ‘ita tu‘e, ta u ‘ita, gota me‘olotodi iauiaudi iau ‘edia si mwera ma‘adi Saba, iomwaiomwaridi, guaiaguaiadi: iage iauiauna Labana ‘i guinua ‘emuia ni‘atu ia ‘itena ta ‘enega.

¹³ ‘Abo‘agu Betela ‘ana Eaubada, ‘ena ‘ora ‘u siwarorona, ‘ena ‘eguia ona‘upa‘upa u ‘inanena: gete tuga ‘u da tooro, ‘asa gete ‘enega ‘u da tauia, ta ‘imu ‘asa ‘ena ‘u tubua ‘ena ‘u da ‘ila.

¹⁴ Ta Rakela ta Lea si onalimana ta ‘ena si gwae, Tamama ‘ina anua ‘ena ‘e bweu esena nai ‘egu‘eguia ‘i miami manuma?

¹⁵ Nigea nai ‘a eto‘u‘umara ‘ina nuenega? ‘i gimwaniema ta ‘enega, ta wate ‘ama e‘isa ‘i loegumwarina.

¹⁶ Gwegwe iauiauna Eaubada i ‘ewedi tamama ‘enega, nate ‘abo‘ama ta natuma ‘ima gwegwe: gete ‘enega, to‘ase nai Eaubada ‘emuia ‘i ona, ‘u da guinua.

¹⁷ Ga Iakobo ‘i tooro, ta natunao be mwanenao kameliao ‘edia ‘i sa‘udi:

¹⁸ ta ‘ina iobai iauiaudi i ‘ewedi, ta ‘ina gwegwe iauiauna ‘i egogonedi, ‘ina iobai tauna ‘i lobelobedi, taudi ‘i egogonedi Padanarama ‘enaia, be ‘enega ‘i da tauia tamana Isaako ‘enaia ‘asa Kanania ‘enaia.

¹⁹ Ta Labana ‘i tauia sabi ‘upwa ‘ina sipi: ta Rakela goamamea i ‘ipwaridi taudi tamana ‘ina iageao.

²⁰ Ta Iakobo Labana goma Siria ‘enega ‘i tauia ma‘ulamo, ‘ina dena nigea ‘i simasimane ta ‘enega.

²¹ Ta ‘enega ‘i dena ma‘ina iage iauiauna; ta ‘i tooro, ta Boasi‐‘Awana ‘i taonina, ta maninina ‘oea Gileada ‘enaia.

²² Ta asiata ‘e tonina Labana ‘ena si simana ‘aene Iakobo ‘i dena.

²³ Ta tasinao i ‘au‘ewedi ma‘enao, ta ‘i muriena asiata ‘e sebeni; ta ‘i lobena ‘oea Gileada ‘enaia.

²⁴ Ta Eaubada Labana goma Siria ‘ena ‘i mai boiboi ‘ana madawarega, ta ‘i eonena, ‘U da ‘ita‘i‘isio ‘oio ta gea‘abo Iakobo ‘ena ‘u onaona nai bobo‘ana nai to‘umalina.

²⁵ Ta Labana ‘i apwesa Iakobo ‘enaia. Ta Iakobo ‘ina anua i ‘abina ‘oea ‘enaia: ta Labana matasinao ‘oea Gileada ‘ena i ‘abina.

²⁶ Ta Labana Iakobo ‘ena ‘i ona, To‘ase ‘u guiguinua, ga ‘eguiega ‘u tauia ‘ipwaramo, ta natuguao mewainedi u ‘au‘ewedi ‘atua ioniionidi sisi‐saiega?

²⁷ To‘ase manuna ‘u dena kwaikwaia, ta u ‘ipwarigu; ta nigea ‘u simasimana ‘eguia, be ‘enega ia da etuneio guausoarega ta wariega be, taborineega ta apiega be;

²⁸ ta nigea ‘u tagwaregu be natuguao me‘olotodi ta natuguao mewainedi ia da ‘awamuidi? gete tuga ni‘atu ‘u bubuna ‘euwauwa.

²⁹ Nimagu ‘ina waiwaiega ia da gieto‘umaliemi: ta tamami ‘ina Eaubada guruwana ‘i eonegu, ‘i gwae, ‘U da ‘ita‘i‘isio ‘oio be gea‘abo Iakobo ‘ena ‘u onaona nai bobo‘ana nai to‘umalina.

³⁰ Ta gete tuga, nuanuaio ‘u da tauia, tamaio ‘ina anua manuna ‘u gewagewana, ta to‘ase manuna ‘igu tokwarui u ‘ipwaridi?

³¹ Ta Iakobo ‘i onalimana ta Labana ‘ena ‘i gwae, Ia ‘atesa‘ara ta ‘enega: ia ona ta ‘enega, Nai natumuao mewainedi ‘eguiega ‘u da ‘oaegu.

³² Tauna ‘ena ‘imu tokwarui ‘u lobedi, gea‘abo ‘i da bobo‘ana ta ‘i da mwawasa; tasidao matadia ‘imu iage ‘eguia ‘i miami ‘u da ‘itena, ta ‘emuia ‘u da ‘ewena. Iakobo nigea ‘i sinapuna ‘aene Rakela i ‘ipwaridi ta ‘enega.

³³ Ta Labana Iakobo ‘ina anua ‘enaia ‘i rugu, ga Lea ‘ina anuaia, ta toguinua mewainedi ‘e rua ‘idi anuaia; ta nigea ‘i lobalobadi. Ta Lea ‘ina anuega ‘i apwesa, ta Rakela ‘ina anuaia ‘i rugu.

³⁴ Ta Rakela goamamea i ‘ewedi, ta kameli ‘ana iage ‘edia ‘i sa‘udi, ta ‘edia ‘i miaiaidi. Ta Labana anua maibo‘ana ‘ena ‘i gidadana, ga nigea ‘i lobalobadi.

³⁵ Ta waine nina tamana ‘ena ‘i ona, Gea‘abo ‘igu ‘inapwana ‘i da gamwasoara nigea kapekapeana ia da tooro matamuia ta ‘enega; iine ‘idi bubuna ‘eguia ‘i miami ta ‘enega. Ta i ‘ebesa ioge, ta goamamea nigea ‘i lobalobadi.

³⁶ Ta Iakobo ‘i gamwasoara, ta Labana ma‘ieana si losaia: ta Iakobo ‘i ona limana ta Labana ‘ena ‘i ona, To‘ase ‘igu bubuna geiogeioi? ta to‘ase ‘igu bubuna to‘umalina, ta ‘enega ‘u pili‐pili muri‘oaiabugu?

³⁷ ‘Igu gwegwe iauiauna ‘edia ‘u gidadana, ta ‘imu anua ‘ana gwegwe iauiauna ‘ediega to‘ase ‘u lobena? Gete ‘ena ‘u da sa‘ui tasiguao ta tasimuao matadia, be ‘enega si da loina taterua ‘edia.

³⁸ Iakwara ‘e tweniti ma‘ieaio ia miami; ‘imu sipi sinadi ta ‘imu gota mewainedi nigea natudiao si be‘u daita, ta ‘imu iau ‘ina sipi me‘olotodi nigea ia ‘enidi.

³⁹ Tauna bomitawa si sabuna nigea ia da me‘ena ‘emuia; ‘abo‘agu ia loseena; nimaguiega u ‘eonegu, nai ‘asiata si ‘ipwa‘ipwarina nai boiboia si ‘ipwa‘ipwarina,

⁴⁰ Gote nadigega ‘Abo‘agu; asiataia ‘ara ‘i loiisigu, ta boiboia gogai ‘i loeloesawarigu; ta ‘igu ‘enomwataia mataguiega ‘i dena,

⁴¹ Iakwara ‘e tweniti getedi ‘imu anuaia ia miamiana; iakwara ‘e potini ‘emuia ia guinua natumuao mewainedi ‘e rua manudi, ta iakwara ‘e sikisi ‘imu iau manuna: ta tuta ‘e sanau ‘agu e‘isa ‘u gibunina.

⁴² ‘Abo tamagu ‘ina Eaubada, Aberaamo ‘ina Eaubada, ta Isaako ‘ina ‘Ebematauta, nigea ma‘ieagu, ‘ai‘aila ‘u da etunegu manimenimegumo. Eaubada ‘igu elo‘uia i ‘itena ta nimagu ‘idi guinua, ta guruwana ‘i ba‘emu.

⁴³ Ta Labana ‘i onalimana ta Iakobo ‘ena ‘i gwae, Mewainedi natuguao mewainedi, ta gogama ‘igu gogama, ta iau ‘igu iau, ta maibo‘ana u ‘itena ‘igu iage: ta to‘ase ia da guinua batua natuguao mewainedi getedi ‘edia, nai gogama ‘edia taudi si enatunedi?

⁴⁴ Ta gete tuga ‘u da mai, ‘ona‘upa‘upa ta da bubuna, ‘abo‘agu ta ‘oio; ‘i da ‘ebe‘ita ‘eguia ta ‘emuia.

⁴⁵ Ta Iakobo gurewa i ‘ewena, ta ‘i gietooro ‘ora manuna.

⁴⁶ Ta Iakobo tasinao ‘edia ‘i ona, Gurewa wa da egogonedi; ta gurewa si ‘ewedi, ta da‘oa si bubuna: ta da‘oa deinaia si ‘e‘ai.

⁴⁷ Ta Labana ‘i eesena Iega‐saaduta: ta Iakobo ‘i eesena Galeeda.

⁴⁸ Ta Labana ‘i gwae, Da‘oa gete ‘ebe‘ita ‘eguia ta ‘emuia batua. Ta ‘enega ‘ana esana si ‘inanena Galeeda:

⁴⁹ Ta Misipa, ‘i ona ta ‘enega, Eaubada ‘i da ‘ita‘i‘isi ‘eguia ta ‘emuia, ‘ena ta miakwaia ‘e bweuna ‘e bweuna ‘enega.

⁵⁰ ‘Abo natuguao me wainedi ‘u giedeedonidi, ta ‘abo wate mwanemuao u ‘au‘ewa ta nigea natuguaodimo, nigea ‘e bweu tai ma‘eda; u ‘ita, Eaubada to‘ita ‘eguia ta ‘emuia mwatuidaia.

⁵¹ Ta Labana Iakobo ‘ena ‘i ona, Da‘oa gete ‘u da ‘itena, ta ‘ora ‘u da ‘ita, tauna ia sa‘u ‘eguia ta ‘emuia mwatuidaia.

⁵² Da‘oa gete ‘i da ‘ebe‘ita, ta ‘ora ‘i da ‘ebe‘ita, ‘aene gea‘abo da‘oa gete ia da ataona ‘emuia, ta ‘oio gea‘abo da‘oa gete ta ‘ora gete ‘u da ataona ‘eguia, ‘eunua manuna.

⁵³ Aberaamo ‘ina Eaubada, Naora ‘ina Eaubada, tubudi ‘idi Eaubada, ‘i da loina mwatuidaia. Ta Iakobo ‘i ona‘upa‘upa tamana Isaako ‘ina ‘Ebematauta ‘enega.

⁵⁴ Ta Iakobo taria i ‘ebwaea ‘oea ‘enaia, ta tasinao ‘i bwauiedi be palaua si da ‘e‘ai: ta palaua si ‘enina, ta si mia masarina ‘oeaia.

⁵⁵ Ta Labana ‘i unuboi, ta natunao me‘olotodi ta natunao mewainedi i ‘awamuidi, ta ‘i onaobobomedi: ta Labana ‘i tauia, ta ‘ina esena ‘ena i ‘ila.