Nugana 3 - Buki Tabu Lowaenei 1919

‘UPWA 3.

¹ Ta moata nuanuasinasinapuna bomitawa iauna Ieoba Eaubada ‘i bubudi ‘edia. Ta waine ‘ena ‘i ona, ‘Ai‘aila, Eaubada ni‘atu ‘i gwae, Kaiwe iauna baguraia gea‘abo ‘enega wa da ‘e‘a ga?

² Ta waine moata ‘ena ‘i ona, Bagura ‘ana kaiweiao uadiega ‘a da ‘e‘ai:

³ ta kaiwe bagura gamwanaia uana, Eaubada ni‘atu ‘i gwae, Gea‘abo ‘enega wa da ‘e‘ai, ta gea‘abo wa gitoo, nai wa mwawamwawasa.

⁴ Ta moata waine ‘ena ‘i ona, Gea‘abo wa da mwawamwawasa:

⁵ Eaubada ‘i mwaratoni ta ‘enega ‘aene asiata ‘enega wa ‘e‘ani, ga matami ‘i da ‘esasa, ta wa da Eaubada ‘atua, bobo‘ana be to‘umalina wa da sinapudi.

⁶ Ta ni‘atu waine i ‘itena ‘aene kaiwe nina ‘e‘ai bobo‘ana, ta ‘ana ‘ita ‘ebeguausoara, ta ‘aene kaiwe nina ‘ana ‘ita ‘ebesinapu, ga uana i ‘ewena, ta i ‘enina; ta mwanena wate ma‘ieana i ‘ebwaena, ta i ‘enina.

⁷ Ta siterua matadi i ‘esasena, ta ‘idi mabubugewana si sinapuna; ta bwainono iawana si sailina, ta ‘adi gadiwana si bubuna.

⁸ Ta Ieoba Eaubada ‘enana si nonona baguraia ‘i lopilidadana asuinuanuaia; ta tai mamwanena si ‘ekwaiedi Ieoba Eaubada matanega bagura kaiwenao ‘edia.

⁹ Ta Ieoba Eaubada tai ‘ena ‘i bwau, ta ‘i eonena, Mane ‘oio?

¹⁰ Ta ‘i gwae, ‘Enaio ia nonona baguraia, ga ia matauta, mabubugewagu ta ‘enega; ga ‘enega ia mia kwaia.

¹¹ Ta ‘i ona, Iaita ‘i simanemu ‘aene ‘u bubugewa? Kaiwe nina ‘enega u ‘e‘enina, tauna manuna ia eonemu ‘aene gea‘abo u ‘e‘ani?

¹² Ta tai ‘i gwae, Waine nina u ‘ebwaegu be ma‘ieagu ‘a da miami, tauna kaiwe ‘enega i ‘ebwaegu, ga ia ‘enina.

¹³ Ta Ieoba Eaubada waine ‘ena ‘i ona, To‘ase gete ‘u guinua ni‘atu? Ta waine ‘i gwae, Moata ‘i kaboegu, ta ia ‘enina.

¹⁴ Ta Ieoba Eaubada moata ‘ena ‘i ona, Iage gete ‘u guiguinuena, ga ‘enega ‘oio ‘u to‘umali wawasae iobai iauiauna ‘edia, bomitawa iauna ‘edia ta; gamwamuiega ‘u da tauia, ta nedila ‘u da ‘e‘ani ga ‘amu tuta iauiauna:

¹⁵ ta ‘oio ta waine wa da etarauwara, wate ‘imu susu ta ‘ina susu: tauna debaio ‘i da bwaruna, ta ‘oio ‘aeedueduna ‘u da bwaruna.

¹⁶ Waine ‘ena ‘i ona, ‘Imu dedoi ta ‘imu ‘euwana ia da giesinabwa wawasae; dedoi ‘enega natumuao ‘u da enatunedi; ‘imu nuanuana mwaneio ‘ena ‘i da miami, ta ‘emuia ‘i da loina.

¹⁷ Ta Adama ‘ena ‘i gwae, Mwaneio ‘enana ‘u nonona ta ‘enega, ta kaiwe ‘enega u ‘enina, tauna manuna ia eonemu, ia gwae, Gea‘abo ‘enega ‘u da ‘e‘a: bwa‘a ‘i to‘umali manuio; ma‘imu dedoi ‘u da ‘e‘a iawasio ‘ana tuta maibo‘anega;

¹⁸ kwakwakwara wate ta pwatura taritaridi ‘emuia ‘i da gietabwa; ta mitawa ‘ana pwatura ‘enega ‘u da ‘e‘ai;

¹⁹ maninio ‘ina amweai ‘enega masura ‘u da ‘e‘ai, ga bwa‘a ‘ena ‘u da ‘ila; ‘enega ‘u apwesama ta ‘enega: ‘oio nedila ta ‘enega, ta nedila ‘ena ‘u da ‘ila.

²⁰ Ta tai mwanena ‘i eesena Ebe; tauna iauiaudi maiawasidi sinadi ta ‘enega.

²¹ Ta Ieoba Eaubada Adama mamwanena manudi ‘oama bwara ‘i bubudi, ta ‘i e‘otedi.

²² Ta Ieoba ‘i gwae, Wa ‘ita, tai nina ni‘atu ‘abo‘ada ‘atua, bobo‘ana ta to‘umalina ‘i sinapudi; ta gete tuga, nai nimana ‘i da iasitoto, ta iawasina ‘ana kaiwe wate ‘i da ‘ewa, ta ‘i da ‘e‘ai, ta ‘i da bobo‘ana ‘ataia:

²³ ‘enega Ieoba Eaubada bagura Edena ‘enega ‘i etunena, be bwa‘a ‘enega ‘i apwesama ‘i da gesoi.

²⁴ Ga tai ‘i pa‘ina; ta bagura Edena matana bomatu ‘ena Tierubima ‘i sa‘udi, ta sisi‐saia ‘i sabesabelulu esena iauiauna ‘edia, be iawasina ‘ana kaiwe ‘ana ‘eda ‘i da ‘ita‘ita‘i‘isi.