Nugana 29 - Buki Tabu Lowaenei 1919

‘UPWA 29.

¹ Ga Iakobo ‘i tauia, ta bomatu natunao ‘idi ‘asa ‘ena ‘i mai.

² Ta i ‘ita, ta wa ‘ita mitawaia wewerupwa, ta, wa ‘ita, sipi iau ‘e toi deinaia si ‘eno‘eno; wewerupwa nina ‘enega iau si enumadi: ta gurewa wewerupwa ‘awanaia sinabwana.

³ Ta gote ‘ena iau iauiaudi si egogona: ta gurewa si puli ‘ilena wewerupwa ‘awanega, ta sipi si enumadi, ta gurewa si sa‘u limena ‘ana ebesa‘u ‘enaia wewerupwa ‘awanaia.

⁴ Ta Iakobo ‘edia ‘i ona, Tasiguao, mwa‘adega omi? Ta si ona, ‘Abo‘ama Aranega.

⁵ Ta ‘i eonedi, Labana Naora natuna wa mwaratoninaia? Ta si gwae, ‘A mwaramwaratonina.

⁶ Ta ‘i eonedi, ‘I bobo‘ana? Ta si gwae, ‘I bobo‘ana: ta, u ‘ita, natuna me wainena Rakela ‘i mema sipi ma‘edi.

⁷ Ta ‘i ona, Wa ‘ita, gete asuoreore, ta nigea ‘ana tuta be iobai si da egogona: sipi wa da enumedi, ta wa da tauia be wa da e‘enidi.

⁸ Ta si ona, Nigea kapekapeana, ga iau iauiaudi si da egogona, ta gurewa si da puli‘ilena wewerupwa ‘awanega; ga sipi ‘a enumedi.

⁹ Ma‘edi ‘i onaona, ga Rakela ‘i mai tamana ‘ina sipi ma‘edi; tauna i ‘ita‘ita‘i‘isidi ta ‘enega.

¹⁰ Ta gete ‘i apwesa, ni‘atu Iakobo Rakela Labana sinana nuuna natuna me wainena i ‘itena, ta Labana sinana nuuna ‘ina sipi, ga Iakobo ‘i tauia serabenaia, ta gurewa ‘i puli‘ilena wewerupwa ‘awanega, ta Labana sinana nuuna ‘ina iau ‘i enumedi.

¹¹ Ta Iakobo Rakela i ‘awamuina, ta i ‘ara bwau, ga ‘i dedoi.

¹² Ta Iakobo Rakela ‘ena ‘i simana ‘aene tauna tamana tasina, ta tauna Rebeka natuna: ta waine ‘i pili ta tamana ‘ena ‘i simana.

¹³ Ta gete ‘i apwesa, ni‘atu Labana Iakobo nuuna natuna ‘ana tetera ‘i nonona, ga ‘i pili sabi lobena, ta i ‘atubwailina, ta i ‘awamuina, ta ‘ina anua ‘ena ‘i me‘ena. Ta iage getedi iauiauna ‘i simana Labana ‘enaia.

¹⁴ Ta Labana ‘ena ‘i ona, ‘Ai‘aila ‘oio lulugu ta esiogu. Ta ‘i miami ma‘ieana ta tuta nawarae ‘e bweuna.

¹⁵ Ta Labana Iakobo ‘ena ‘i ona, ‘Oio tasigu, ta ‘enega ‘aene ‘eguia ‘u da guinua daita? ‘U da eonegu, to‘ase ‘amu e‘isa?

¹⁶ Ta Labana natunao me wainedi ‘e rua: me sinabwana ‘ana esana Lea, ta me goamana ‘ana esana Rakela.

¹⁷ Ta Lea mata ‘atana; ta Rakela ‘ana ‘ita bobo‘ana ta sinesinebwainina.

¹⁸ Ta Iakobo Rakela ‘i obobomena, ta ‘i gwae, Ia da guinua ‘emuia ga iakwara ‘e sebeni Rakela natuio me goamana manuna.

¹⁹ Ta Labana ‘i gwae, ‘I bobo‘ana ia da ‘ebwaea‘ena ‘emuia, ta gea‘abo mari tai ‘ena ia da ‘ebwa‘ebwae: ‘u da miami ma‘ieagu.

²⁰ Ta Iakobo ‘i guinua iakwara ‘e sebeni Rakela manuna; ta ‘ina nuena ‘aene ‘asiata pu‘epu‘edi, ‘ina oboboma ‘enaia manuna.

²¹ Ta Iakobo ‘i ona Labana ‘ena, Mwanegu ‘u da ‘ebwa‘egu, ‘igu tuta ni‘atu si gumwara, be ‘ena ia da rugu.

²² Ta Labana tai iauiauna esena nina ‘enega ‘i egogonedi, ta sagari ‘i bubuna.

²³ Ta boiboia gete ‘i apwesa, natuna me wainena Lea i ‘au‘ewena, ta ‘ena ‘i me‘ena; ta ‘ena ‘i rugu.

²⁴ Ta Labana ‘ina toguinua me wainena Silipa natuna Lea ‘ena i ‘ebwaea‘ena ‘ina toguinua mewainena manuna.

²⁵ Ta gonagonaia gete ‘i apwesa, wa ‘ita, tauna Lea: ta Labana ‘ena ‘i ona, To‘ase gete ‘eguia ‘u guinuena? nigea nai ia guinua ma‘ieaio Rakela manuna? ‘Enega to‘ase manuna ‘u kaboegu?

²⁶ Ta Labana ‘i ona, ‘Ima esena nigea nadigega ‘a bubuna, be megoamana ‘a da gimi ‘ebwaea‘ena tomatua nuganaia,

²⁷ Tauna gete ‘ana wiki ‘u da loegumwarina, ta ‘ana e rua wate ‘a da ‘ebwaemu guinua nina ‘u da guinua ‘eguia iakwara wate e sebeni.

²⁸ Ta Iakobo ‘i bubuna nadigega, ta ‘ina wiki ‘i loegumwarina: ta natuna Rakela i ‘ebwaena be ‘i mwanena.

²⁹ Ta Labana natuna Rakela ‘ina toguinua me wainena Bila i ‘ebwaena be ‘i da e‘ina toguinua me wainena.

³⁰ Ta Rakela wate ‘ena ‘i rugu, ta Rakela wate ‘i obobomena wawasae Lea ‘enaia, ta wate iakwara ‘e sebeni ‘i guinua ma‘ieana.

³¹ Ta Ieoba i ‘itena ‘aene Iakobo Lea ‘i guitoasena, ta gamwana ‘ebetubua ‘i gigegena: ta Rakela ‘i megagara.

³² Ta Lea i ‘euwana, ta natuna me‘olotona ‘i enatunena, ta ‘i eesena, Rubena: ‘i ona ta ‘enega, Ieoba ‘igu elo‘uia i ‘itena ta ‘enega; gete tuga mwanegu ‘i da obobomegu ta ‘enega.

³³ Ta i ‘euwana limana, ta natuna me‘olotona ‘i enatunena; ta ‘i ona, Ieoba ‘i nonona mwanegu ‘i guitoasegu ta ‘enega, ta ‘enega gete wate natugu i ‘ebwaegu: ta ‘i eesena Simeona.

³⁴ Ta i ‘euwana limana, ta natuna me‘olotona ‘i enatunena; ta ‘i gwae, Gete tuta gete mwanegu ‘i da mia ma‘ieagu, natunao me‘olotodi ‘etoi ‘ena ia enatunedi ta ‘enega: ‘enega si eesena Lebi.

³⁵ Ta i ‘euwana limana, ta natuna me‘olotona ‘i enatunena: ta ‘i gwae, Tuta gete Ieoba ia da tupuna: ta ‘enega ‘i eesena Iuda; ta enatuna ‘i sa‘una.