Nugana 28 - Buki Tabu Lowaenei 1919

‘UPWA 28.

¹ Ta Isaako Iakobo ‘i bwauiena, ta ‘i onaobobomena, ta ‘i emataruena, ta ‘ena ‘i ona, Kanania natunao me wainedi ‘ediega gea‘abo mwaneio u ‘au‘au‘ewa.

² ‘U da tooro, ta Padanarama ‘ena ‘u da tauia, Botuela sinaio tamana ‘ina anua ‘enaia; ta gote ‘enega mwaneio ‘u da ‘au‘ewa Labana sinaio nuuna natunao ‘ediega.

³ Ta Eaubada Toewaiwaisana ‘i da onaobobomeio, ta ‘i da bubuio be ‘u da uaua, ta ‘i da gieiauiemu, be ‘enega ‘u da e tomota mabodana;

⁴ ta Aberaamo ‘ina onaoboboma ‘i da ‘ebwaemu, ‘emuia, ta tubuio ma‘emuao; be ‘enega ‘imu mia dadana ‘adi esena ‘u da ‘ewena, tauna Eaubada i ‘ebwaea Aberaamo ‘ena.

⁵ Ta Isaako Iakobo i ‘etunena: ta Padanarama ‘ena ‘i tauia, Labana ‘enaia, tauna Betuela goma Siria natuna, Rebeka, Iakobo ta Esau sinadi, nuuna.

⁶ Ta Esau i ‘itena ni‘atu Isaako Iakobo ‘i onaobobomena ta i ‘etunena Padanarama ‘enaia, be gote ‘enega mwanena ‘i da ‘au‘ewa; ta ‘ena ‘i onaobobomena ‘i emataruena, ‘i ona, Kanania natunao me wainedi ‘ediega gea‘abo mwaneio u ‘au‘au‘ewa;

⁷ ta Iakobo tamana ta sinana ‘edia ‘i ematamatana, ta ni‘atu ‘i tauia Padanarama ‘enaia:

⁸ Ta Esau i ‘itena Kanania natunao me wainedi nigea si bobo‘ana tamana Isaako ‘ena;

⁹ Ta Esau Isimaela ‘ena ‘i tauia, ta mwanenao ‘edia Maalata i ‘ewena ta ‘i aina, tauna Aberaamo natuna Isimaela natuna me wainena, Nebaiota nuuna.

¹⁰ Ta Iakobo Beerisebega ‘i tauia, ta Arana ‘ena ‘i tautauia.

¹¹ Ta ‘e bweu esena ‘ena ‘i apwesa, ta ‘ena ‘i mia masarina, sinara ni‘atu ‘i sopu ta ‘enega; ta esena nina gurewana ‘e bweu i ‘ewena, ta debana ‘agaraunaia ‘i sa‘una, ta ‘esena gote ‘ena i ‘eno‘eno sabi ‘enomwataia.

¹² Ta ‘i madawara, ta wa ‘ita waisana si etoorona bare‘uiega, ga garuna garewaia ‘i apwesa: ta wa ‘ita Eaubada ‘ina aneloseao si mwa‘umwa‘uta ta si tu‘etu‘e ‘enaia.

¹³ Ta, wa ‘ita, Ieoba debanaia ‘i tooro, ta ‘i ona, ‘Abo‘agu Ieoba, Aberaamo tubuio ‘ina Eaubada, ta Isaako ‘ina Eaubada: bwa‘a ‘ena u ‘eno‘eno, ia da ‘ebwaemu, ta tubuio ‘enaia:

¹⁴ Ta tubumuao si da ‘e bare‘u ‘ina nedila ‘atua, ta ‘u da weara dadana ‘ebwaga ‘enaia be, bomatu ‘enaia be, iaarata ‘enaia be, iarasi ‘enaia be: ta ‘emuia ta tubuio ‘enaia bare‘u ‘ina susu iauiaudi onaoboboma si da lobena.

¹⁵ Ta, u ‘ita, ‘Abo‘agu ma‘ieaio, ta ‘ena ‘u tatauia ‘ena ia da ‘ita‘i‘isio, ta ‘asa gete ‘ena ia da ‘au‘ewalimemuma; gea‘abo ia da e‘idi‘idieio, ga iage ni‘atu manuna ‘emuia ia onaona ia da guinue.

¹⁶ Ta Iakobo ‘ina ‘enomwataia ‘enega ‘i tooro, ta ‘i ona, ‘Ai‘aila Ieoba esena gete ‘ena ‘i miami; ta nigea ia mwaratonina.

¹⁷ Ta ‘i matauta, ta ‘i ona, Esena gete ‘ebe‘atesa‘ara! gete nigea wate ta Eaubada ‘ina anuaia, ta gete garewa ‘ana ‘awa ‘eberugu.

¹⁸ Ta Iakobo ‘i unuboi, ta gurewa nina ‘i gedugeduiena i ‘ewena, ta ‘i gietoorona ‘ora manuna, ta bunama debanaia ‘i siwena.

¹⁹ Ta esena nina ‘i eesena Betela: ta ‘asa nina ‘ana esana nugana Lusa.

²⁰ Ta Iakobo ona‘upa‘upa i ‘inanena, ‘i gwae, ‘Abo Eaubada ma‘ieagu, ta ‘eda gete ‘enega ia tautauia ‘ena ‘i da ‘ita‘i‘isigu, ta masura ‘i da ‘ebwaegu be ia da ‘e‘ai, ta ‘oama be ia da ‘otena,

²¹ ta ‘enega tamagu ‘ina anua ‘ena ia da mai guguiega, ga Ieoba ‘i da e‘igu Eaubada,

²² Ta gurewa gete, tauna ia etoorona ‘ora manuna, ‘i da ‘e Eaubada ‘ina anua: ta iage iauiauna ‘u da ‘ebwaegu ‘ediega ‘ana ‘upwasanau ia da ‘ebwaea ‘ai‘aila ‘emuia.