Nugana 26 - Buki Tabu Lowaenei 1919

‘UPWA 26.

¹ Ta ‘asa nina botana ‘i apwesa, lowa wate ‘e bweu gimi botana Aberaamo ‘ina tuta. Ta Isaako Abimeleka me Pilisitia ‘idi king ‘ena ‘i tauia Gerara ‘enaia.

² Ta Ieoba ‘i apwesa ‘enaia, ta ‘i gwae, Gea‘abo ‘u da mwa‘umwa‘uta Aigupito ‘enaia; ‘asa nina manuna ia da simana ‘emuia ‘ena ‘u da miami:

³ ‘asa gete ‘ena ‘u da mia, ta abo‘agu ma‘ieaio, ta ia da onaobobomeio; ‘emuia ta ‘enega, ta tubumuao ‘edia, ‘asa iauiauna getedi ia da ‘ebwaea‘edi, ta ‘ona‘upa‘upa tauna tamaio Aberaamo ‘ena ia ona‘upa‘upa ia da giepa‘ari;

⁴ ta tubumuao ia da gieiau ‘atua garewa ‘ina kwadimao, ta ‘asa iauiauna getedi tubumuao ‘edia ia da ‘ebwaeaedi; ta tubuio ‘enega bare‘u ‘ina ‘asa iauiauna si da bobo‘ana;

⁵ Aberaamo ‘enagu ‘ena ‘i ematamatana ta ‘enega, ta ‘igu ematarua be, ‘igu ona be, ‘igu aseiana be, ‘igu loina be, i ‘ita‘i‘isidi.

⁶ Ta Isaako Gerara ‘ena ‘i miami:

⁷ ta tai toni ‘asa mwanena manuna si eonena; ta ‘i gwae, Tauna nuugu: ‘i matauta be ‘i da gwae, Mwanegu, ta ‘enega; nai, ‘i ona, tai toni ‘asa si da unugu Rebeka manuna: sinesinebwainina ta ‘enega.

⁸ Ta gete ‘i apwesa, ni‘atu tuta dudurana ‘ena ‘i miami, ga Abimeleka me Pilisitia ‘idi king ‘awega i ‘ita apwesa, ta i ‘itena, ta, wa ‘ita, Isaako i ‘eeguausoara mwanena Rebeka ma‘ieana.

⁹ Ta Abimeleka Isaako ‘i bwauiena, ta ‘i gwae, U ‘ita, mwane‘ai‘ailio tauna: ta mwa‘adega ‘u ona, Tauna nuugu? Ta Isaako ‘i ona ‘enaia, Ia ona ta ‘enega, Nai manuna ia da mwawasa.

¹⁰ Ta Abimeleka ‘i gwae, To‘ase gete ‘u guinua ni‘atu ‘emaia? tomota ‘ediega ‘e bweu nai ‘i da ‘eno mwaneio ma‘ieana, ta to‘umalina arena ‘u da me‘ena ‘emaia.

¹¹ Ta Abimeleka tomota iauiauna ‘i emataruedi, ‘i ona, Tauna tai gete nai mwanena ‘i gitoona ‘i da mwawasa ‘ai‘aila.

¹² Ta Isaako ‘asa gote ‘ena ‘i lelewana, ta iakwara gote ‘ana sinabwa iau e anaredi ‘i lobena: ta Ieoba ‘i onaobobomena.

¹³ Ta tai nina ‘i sinabwa, ta ‘i sinabwawate‐wawasae ga ‘i tosinabwasana:

¹⁴ ta ma‘ina sipi iau, ta ma‘ina bulomakau iau, ta tomia anua iauiaudi: ta me Pilisitia si e‘ipi‘ipi manuna.

¹⁵ Ta wewerupwa iauiauna tamana ‘ina to‐guinuao si saledi tamana Aberaamo ‘ina tutega, me Pilisitia si ‘aubodedi, ta bare‘uiega si siudi.

¹⁶ Ta Abimeleka Isaako ‘ena ‘i ona, ‘Emega ‘u da tauia; ‘oio toewaiwai sana ‘emaia ta ‘enega.

¹⁷ Ta gote ‘enega Isaako ‘i tauia, ta abatau Gerara ‘ena i ‘abi anua, ta ‘ena ‘i miami.

¹⁸ Ta Isaako boasi wewerupwa i ‘esala limedi, taudi si salena tamana Aberaamo ‘ina tutega; Aberaamo ‘ina mwawasa murinaia me Pilisitia si e ‘aubodedi ta ‘enega: ta ‘i eesedi ‘atua ‘adi esana ‘ediega tamana ‘i eesedi.

¹⁹ Ta Isaako ‘ina to‐guinuao abatau ‘ena si sala, ta wewerupwa boasi ‘i ‘apwa‘apwaiama si lobena.

²⁰ Ta me Gerara to ‘ita‘i‘isi‐bulomakau ma‘ediao si losaia, si gwae, Boasi nina ‘ima boasi: ta wewerupwa nina ‘i eesena Eseka; ma‘enao si ‘eupwa ta ‘enega.

²¹ Ta wate ‘e bweu wewerupwa si salena, ta gote wate manuna si losaia: ta ‘i eesena Sitenaa.

²² Ta gote ‘enega ‘i logara, ta wate ‘e bweu wewerupwa ‘i salena; ta gote manuna nigea si e‘upwa: ta si eesena Reobota; ta ‘i gwae, Gete tuga Ieoba ‘ida ‘ebemia ‘i bubuna, be ta da losiwa ‘asa ‘enaia.

²³ Ta gote ‘enega ‘i tu‘e Beeri‐seba ‘enaia.

²⁴ Ta boiboi nina Ieoba ‘i apwesa ‘enaia, ta ‘i gwae, ‘Abo‘agu tamaio Aberaamo ‘ina Eaubada: gea‘abo ‘u matauta, ‘abo‘agu ma‘ieaio ta ‘enega, ta ia da onaobobomeio, ta tubumuao ia da gieiau ‘igu to‐guinua Aberaamo manuna.

²⁵ Ta ‘ebetaria i ‘abina ‘enaia, ta Ieoba ‘ana esana i ‘inanena, ta ‘ina anua i ‘abina ‘enaia: ta Isaako ‘ina toguinuao wewerupwa ‘ena si salena.

²⁶ Ga Abimeleka Gerarega ‘ena ‘i tauia, gosiana Ausata ta, Pikola ‘ina boda ‘idi tonugana ta.

²⁷ Ta Isaako ‘i eonedi, To‘ase manuna wa mai ‘eguia, nuami ‘i to‘umalina ‘eguia ta ‘enega, ta ‘emiega wa ‘etunegu?

²⁸ Ta si ona, A ‘ita ‘ai‘aila Ieoba ma‘ieaio: ta ‘a ona, Gete tuga ona‘upa‘upa ‘edaia ‘i da miami, ‘abo‘ama ta ‘oio gamwagamwanidaia, ta ona‘upa‘upa ‘a da bubuna ma‘ieaio;

²⁹ ‘Aene gea‘abo to‘umalina ‘e bweu ‘u da guinua ‘emaia, na‘ieana nigea ‘e bweu to‘umalina ‘emuia ‘a guiguinue, ta na‘ieana bubuna bobo‘ananamo ‘emuia ‘a guinuena, ta a ‘etunemu guguiega: ‘oio gete tuga Ieoba oboobobomina.

³⁰ Ta sagari ‘i sa‘u ‘edia, ta si ‘e‘ai ta si numa.

³¹ Ta gonagonaia si tooro, ta ‘e bweuna ‘ebweuna ‘ena si ona‘upa‘upa: ta Isaako i ‘etunedi, ta guguiega si pilisinena.

³² Ta tauna ‘asiata nina gete ‘i apwesa, Isaako ‘ina toguinuao si mai, ta wewerupwa ni‘atu si salena manuna ‘ena si simana, ta si eonena, Ni‘atu boasi ‘a lobena.

³³ Ta ‘i eesena Siba: ‘enega ‘asa nina ‘ana esana Beeri‐seba ga batua.

³⁴ Ta Esau ‘ena ‘ana iakwara ‘e poti ga Iudita Beeri goma Eta natuna, ta Basemata Elona goma Eta natuna ‘i aidi:

³⁵ ta siterua ‘ebenuadarere Isaako ‘ena ta Rebeka ‘ena.