Nugana 23 - Buki Tabu Lowaenei 1919

‘UPWA 23.

¹ Ta Sara iawasina iakwara ‘e wan anaredi ta tweniti ta sebeni: getedi Sara iawasina ‘ana iakwarao.

² Ta Sara ‘i mwawasa Kiriata‐aba ‘enaia (tauna Eberona), ‘asa Kanania ‘enaia: ta Aberaamo ‘i mai sabi ‘ewabamu Sara manuna, ta sabi dedoi manuna.

³ Ta Aberaamo ‘i tooro ‘ina tokwaia matanaia, ta Eta natunao ‘edia ‘i gwae, ‘i ona,

⁴ ‘Abo‘agu to‘u‘umara ta to sugaragara ‘emia: ‘ari‘ari ‘ana esena ‘e bweuna ‘emiega wa da ‘e bwaegu, be ‘enega ‘igu to‐kwaia ia da sa‘u mataguiega.

⁵ Ta Eta natunao Aberaamo ‘ena si onalimana, si eonena,

⁶ ‘U da nonoma, ‘igu ‘inapwana: ‘oio Eaubada ‘ina ‘inapwana gamwagamwanidaia: ‘ima ‘ari‘ari ‘ita‘esi‘esinuena ‘ena ‘imu tokwaia ‘u da sa‘u; nigea ‘e bweu ‘emega ‘emuia ‘ana ‘ari‘ari ‘i da egagarena, ta ‘imu to kwaia ‘u da sa‘u tugai.

⁷ Ta Aberaamo ‘i tooro, ta ‘asa mina ‘ina tomota ‘edia ‘i bwagobwago, taudi Eta natunao ‘edia.

⁸ Ta ma‘enao ‘i eonaona, ‘i gwae, ‘Abo nuami ‘aene ‘igu to‐kwaia ia da sa‘u mataguiega, wa da nonogu, ta manugu wa da ‘awanoi, Eperona Soaa natuna ‘enaia,

⁹ Be ‘enega gaula Makipela ‘i da ‘ebwaegu, tauna ‘ina gaula, tauna ‘ina tanoa ‘ana ‘ebelosa‘u ‘enaia; ‘ana e‘isa ‘ai‘aila manuna ‘i da ‘ebwaegu gamwagamwanimia ‘ari‘ari ‘ana esena manuna.

¹⁰ Ta Eperona Eta natunao gamwagamwanidia ‘i miatoa: ta Eperona goma Eta Aberaamo ‘ena ‘i onalimana ta Eta natunao si nonona, iauiaudi ‘ina ‘asa ‘ana ‘awa ‘ena si rugu, ‘i gwae,

¹¹ Nigea, ‘igu inapwana, ‘u da nonogu: tanoa ia ‘ebwaemu, ta gaula ‘ena ‘i miami, ia ‘ebwaemu; ‘igu tomota natunao matadia ia ‘ebwaemu: ‘imu to‐kwaia ‘u da sa‘u.

¹² Ta Aberaamo ‘i bwagobwago ‘asa ‘ina tomota matadia.

¹³ Ta ‘i ona Eperona ‘ena ta ‘asa ‘ina tomota si nonona, ‘i gwae, Ta ‘abo ‘u nuanuana, ia sideio, ‘u da nonogu: tanoa ‘ana e‘isa ia da ‘ebwaeio; ‘eguiega ‘u da ‘ewa, ta ‘igu to kwaia ‘ena ia da sa‘u.

¹⁴ Ta Eperona Aberaamo ‘ena ‘i onalimana, ‘ena ‘i gwaegwae,

¹⁵ ‘Igu ‘inapwana, ‘u da nonogu: bwa‘a tomwana sawesawenaia sileba sekeli ‘e poa anaredi, toase gote ‘eguia ta ‘emuia? ‘enega ‘imu to kwaia ‘u da sa‘u.

¹⁶ Ta Aberaamo Eperona ‘ena ‘i nono; ta Aberaamo sileba nina ‘i sanena Eperona ‘enaia, tauna ni‘atu i ‘inanena ta Eta natunao si nonona, sileba sekeli e poa anaredi, ‘ebegimwani to gimwani ‘enaia.

¹⁷ Ta ‘enega Eperona ‘ina tanoa, tauna Makipela ‘enaia, tauna Mamire matanaia, tanoa nina, ta gaula ‘ena ‘i miami, ta kaiwe iauiauna tanoa ‘ena si miami, ta tupitupina maibo‘ana si tooro sakowasiena, si sa‘u‐‘ai‘ailina

¹⁸ Aberaamo ‘enaia ‘ina esena manuna Eta natunao matadia, iauiaudi ‘ina ‘asa ‘ana ‘awa ‘ena si rugu matadia.

¹⁹ Ta gete ‘i gumwara, ga Aberaamo mwanena Sara ‘i sa‘una tanoa Makipela ‘ina gaula ‘enaia Mamire matanaia (tauna Eberona), ‘asa Kanania ‘enaia.

²⁰ Ta tanoa nina, ta gaula ‘ena ‘i miami, Eta natunao si bubuna ‘ai‘aila Aberaamo ‘enaia ‘ari‘ari ‘ana esena manuna.