Nugana 22 - Buki Tabu Lowaenei 1919

‘UPWA 22.

¹ Ta iage getedi si gumwara ga gete ‘i apwesa, Eaubada Aberaamo ‘i toona, ta ‘i eonena, Aberaamo; ta ‘i ona, ‘Abo‘agu.

² Ta ‘i ‘ona, Gete tuga natuio ‘u da ‘au‘ewa, natuio me‘olotona tebweuna, tauna ‘u obobomena, tauna Isaako, ta ‘asa Moria ‘ena ‘u da tauia; ta ‘ena ‘u da ‘ebwaea‘ena ‘ebwaeadaita gabugabuna manuna ‘e bweu ‘oea manuna ‘emuia ia da simana ‘enaia.

³ Ta Aberaamo ‘i unuboi, ta ‘ina ase ‘ana ‘ebegeru ‘i sa‘una, ta ‘ina tubuau ‘e rua i ‘au‘ewedi ma‘enao, ta Isaako natuna; ta kaiwe ‘i gesina ‘ebwaeadaita gabugabuna manuna, ta ‘i tooro, ta esena nina manuna Eaubada ‘ena ‘i simana ‘ena ‘i tauia.

⁴ Asiata ‘e toninaia Aberaamo i ‘ita tu‘e, ta esena nina i ‘itena ‘edasoraia.

⁵ Ta Aberaamo ‘ina tubuau ‘edia ‘i ona, Gete bada wa da miami ase ma‘emiao, ta ‘abo‘agu ta goama me‘olotona gote ‘ena ‘a da tauia; ta ‘a da bwagobwago, ta ‘a da ‘ila limanama ‘emia.

⁶ Ta Aberaamo ‘ebwaeadaita gabugabuna ‘ana kaiwe i ‘ewena, ta natuna Isaako ‘ena ‘i e‘a‘arina; ta nimanega awe ‘ara‘arata ta sisi i ‘ewedi; ta siterua si arua ga si tauia rererea.

⁷ Ta Isaako tamana Aberaamo ‘ena ‘i ona, ta ‘i gwae, Tamagu: ta ‘i ona, Gete ‘abo‘agu, natugu. Ta ‘i ona, U ‘ita, awe ‘ara‘arata ta kaiwe: ta mane lami ‘ebwaeadaita gabugabuna manuna?

⁸ Ta Aberaamo ‘i gwae, Natugu, Eaubada tauna lami ‘ebwaeadaita gabugabuna manuna ‘i da e‘itai: ta ‘enega siterua si arua ga si tauia rererea.

⁹ Ta esena nina manuna Eaubada ‘ena ‘i simana ‘ena si apwesa; ta ‘ena Aberaamo ‘ebetaria i ‘abina, ta kaiwe ‘i sa‘u ‘ai‘ailina, ta natuna Isaako ‘i ionina, ta ‘ebetaria ‘ena ‘i e‘enoina, kaiwe ‘enaia.

¹⁰ Ta Aberaamo nimana ‘i gilagasi, ta sisi i ‘ewa natuna sabi ununa.

¹¹ Ta Ieoba ‘ina anelose garewega ‘ena ‘i bwau, ta ‘i gwae, Aberaamo, Aberaamo: ta ‘i ona, Abo‘agu.

¹² Ta ‘i gwae, Gea‘abo nimamuiega goama ‘u unuunui, ta gea‘abo ‘e bweu iage ‘ena ‘u da guiguinue: gete ‘enega ia mwaratoni ta ‘enega ‘oio Eaubada ‘u matautena, natuio me‘olotona, natuio tebweuna, ‘eguiega nigea ‘u egagare ta enega.

¹³ Ta Aberaamo i ‘etatu‘e, ta ‘i dune, ta wa ‘ita, murinaia sipi me‘olotona ‘e bweuna kunanega kaiwe ‘ena ‘i loetaia: ta Aberaamo ‘i tauia ta sipi nina i ‘ewena, ta i ‘ebwaea‘ena ‘ebwaeadaita gabugabuna manuna natuna ‘ana lopa‘eru.

¹⁴ Ta Aberaamo esena gote ‘i eesena Ieobaire: na‘ieana si gwae ga batua, Ieoba ‘oeana ‘ena si da ‘itena.

¹⁵ Ta Ieoba ‘ina anelose garewega ‘i bwau e ruama Aberaamo ‘ena,

¹⁶ ta ‘i gwae, Ieoba ‘i ona, Taugu ‘enega ia ona‘upa‘upa ni‘atu, iage gete ni‘atu ‘u guinuena ta ‘enega, ta natuio me‘olotona, natuio tebweuna nigea ‘u egagarena,

¹⁷ ga onaoboboma ‘enega ia da onaobobomeio, ta gieiau ‘enega tubumuao ia da gieiau na‘ieana kwadimao garewaia, ta na‘ieana kaukau le‘awa ‘enaia; ta tubuio ‘ana tarauwarao ‘adi ‘awa ‘i da ‘ewena;

¹⁸ ta tubuio ‘enega ‘asa iauiauna bare‘uia si da bobo‘ana; ‘enagu ‘u nonona ta ‘enega.

¹⁹ Ta ‘enega Aberaamo i ‘ila ‘ina tubuauiao ‘edia, ta si tooro ta si tauia rererea Beeriseba ‘enaia; ta Aberaamo Beeriseba ‘ena ‘i miami.

²⁰ Ta iage getedi si gumwara ga gete ‘i apwesa, si simana Aberaamo ‘enaia, si gwae, U ‘ita, Milika, tauna wate waine nina tasio Naora ‘ena natunao ‘i enatunedi;

²¹ Usa ‘ina tomatua, ta Busi tasina, ta Kemuela Arama tamana;

²² Keseda ta, Aso ta, Piladasa ta, Idilapa ta, Betuela ta.

²³ Ta Betuela natuna Rebeka: site eta getedi Milika ‘i enatunedi Naora ‘ena, Aberaamo tasina.

²⁴ Ta mwanena megidarina, tauna ‘ana esana Reuma, tauna wate Teba ta, Gaama ta, Taasa ta, Maaka ta, ‘i enatunedi.