Nugana 21 - Buki Tabu Lowaenei 1919

‘UPWA 21.

¹ Ta Ieoba Sara ‘ena ‘i apwesa na‘ieana ‘i onaona, ta Ieoba Sara ‘ena ‘i guinua na‘ieana ‘i gwaegwae ni‘atu.

² Ta Sara i ‘euwana, ta Aberaamo ‘ena iawasina dudurana ‘ena me‘olotona ‘i enatunena, tuta ‘ai‘aila nina manuna Eaubada ‘ena ‘i ona ni‘atu.

³ Ta Aberaamo natuna me‘olotona ‘ena ‘i tubua, tauna Sara ‘ena ‘i enatunena, ‘i eesena Isaako.

⁴ Ta Aberaamo natuna Isaako ‘ena ‘ana asiata ‘e eta ga ‘i dabena, na‘ieana Eaubada ‘ena ‘i loina.

⁵ Ta Aberaamo, ‘ena natuna Isaako ‘i tubua ‘enaia, ‘ana iakwara ‘e wan anaredi.

⁶ Ta Sara ‘i gwae, Eaubada edagi ‘i sa‘u ‘eguia; iauiaudi si nonona ma‘ieagu ‘a da edagi.

⁷ Ta ‘i ona, Iaita nai Aberaamo ‘ena ‘i da gwae, ‘aene Sara gogama ‘i da esusu? Iawasina dudurana ga natuna me‘olotona ‘ena ia enatunena ta enega.

⁸ Ta goama ‘i sinabwa, ta si gagina: ta asiata ‘enega Isaako si gagina Aberaamo sagari sinabwana ‘i bubuna.

⁹ Ta Sara, Agari kena Aigupito natuna me‘olotona, tauna Aberaamo ‘ena ‘i enatunena, i ‘itena ‘i tuietuiea.

¹⁰ Ta ‘enega Aberaamo ‘ena ‘i ona, waine‐ioniionina gete ta natuna me‘olotona ‘u da pa‘i iaulei: waine‐ioniionina gete natuna gea‘abo ‘i da to‘ewa‐gwegwe natugu ma‘ieana, tauna Isaako ma‘ieana.

¹¹ Ta iage nina ‘i mwauwawasae Aberaamo matanaia natuna manuna.

¹² Ta Eaubada Aberaamo ‘ena ‘i ona, Gea‘ abo matamuia ‘i da mwau goama me‘olotona nina manuna, ta ‘imu waine‐ioniionina manuna; iage iauiauna ‘enega Sara ‘i eonaio, ‘enana ‘u da nono; Isaako ‘ena tubumuao si da eesedi.

¹³ Ta wate waine‐ioniionina natuna ‘enega ‘asa ia da bubuna, tauna natuio ta ‘enega.

¹⁴ Ta Aberaamo ‘i unuboi, ta masura ta boasi mabwarana i ‘ewedi, ta Agari ‘ena i ‘ebwaena, ‘a‘aranaia i sa‘una, ta goama, ta ‘i etunena: ta ‘i tauia, ta mitawa Beeriseba ‘ena ‘i lopilidadana.

¹⁵ Ta boasi bwara ‘ena ‘i gumwara, ta goama ‘i sa‘una kaiwe ‘e bweu ‘agaraunaia.

¹⁶ Ta ‘i tauia, ta ‘edasoraia mariesenaia ‘i miatoa, ‘atua tupu ‘ina pili ‘edasora: ‘i gwae ta ‘enega, Goama ‘ina mwawasa gea‘abo ia da ‘ita‘ita. Ta mariesenaia ‘i miatoa, ta ‘enana ‘i tu‘e, ta ‘i dedoi.

¹⁷ Ta Eaubada goama ‘enana ‘i nonona; ta Eaubada ‘ina anelose Agari ‘ena ‘i bwau garewega, ta ‘i eonena, Agari ie, mwa‘adega ‘oio? gea‘abo ‘u da ‘atesa‘ara; Eaubada goama ‘enana ‘i nonona ‘ena ‘i miami ta ‘enega.

¹⁸ ‘U da tooro, goama ‘u da ‘a‘ari, ta nimamuiega ‘u da giiaina; ia da bubuna be ‘i da e ‘asa sinabwana ta ‘enega.

¹⁹ Ta Eaubada matana ‘i gie‘esasena, ta boasi wewerupwa i ‘itena; ta ‘i tauia, ta bwara ‘i loemaa boasiega, ta goama ‘i enumena.

²⁰ Ta Eaubada goama ma‘ieana, ta ‘i sinabwa; ta mitawaia ‘i miami, ta i ‘e to tupu.

²¹ Ta mitawa Parana ‘ena ‘i miami: ta sinana mwanena ‘e bweuna i ‘au‘ewena ‘enaia Aigupito ‘enega.

²² Ta tuta gote gete ‘i apwesa, Abimeleka ta ‘ina boda ‘idi tonugana Pikola Aberaamo ‘ena si gwae, si ona, Iage iauiauna ‘u guiguinue Eaubada ma‘ieaio:

²³ ta ‘enega gete tuga ‘u da ‘ona‘upa‘upa gete ‘ena ‘eguia Eaubada ‘enega ‘aene gea‘abo ‘u da bubuna kakokabo ma‘ieagu, nai natugu ma‘ieaio, nai tubugu ma‘ieaio: ta na‘ieana nua‘ole‘ole ‘emuia ia guinua, ‘oio ‘u da guinua ‘eguia, ta bwa‘a nina ‘enaia ‘ena ni‘atu ‘u miami.

²⁴ Ta Aberaamo ‘i ona, Ia da ona‘upa‘upa.

²⁵ Ta Aberaamo Abimeleka ‘i ba‘ena wewerupwa manuna, tauna Abimeleka ‘ina toguinuao si ‘oae‘oaena.

²⁶ Ta Abimeleka ‘i gwae, Nigea ia mwaratoni iaita nai iage gete ‘i guinuena: ta nigea ‘u eonagu, ta nigea ia nonona, ta batua tugaesi.

²⁷ Ta Aberaamo sipi ta bulomakau i ‘ewedi, ta Abimeleka ‘ena i ‘ebwaea‘edi; ta siterua ‘ona‘upa‘upa si bubuna.

²⁸ Ta Aberaamo iau ‘ina lami me wainedi ‘e sebeni ‘i sa‘u dumedumedi.

²⁹ Ta Abimeleka Aberaamo ‘ena ‘i ona, Lami me wainedi ‘e sebeni getedi ni‘atu ‘u sa‘u dumedumedi mwa‘adega?

³⁰ Ta ‘i gwae, Lami me wainedi getedi ‘e sebeni nimaguiega ‘u da ‘ewa, be ‘i da ‘ebe‐ita ‘eguia, ‘aene ‘abo‘agu wewerupwa gete ni‘atu ia salena.

³¹ Ta ‘enega esena gote ‘i eesena Beeriseba; siterua si ona‘upa‘upa ruarua ta ‘enega.

³² Ta ‘enega ‘ona‘upa‘upa si bubuna Beeriseba ‘enaia: ta Abimeleka ‘i tooro, ta Pikola ‘ina boda ‘idi tonugana, ta ‘asa Pilisitia ‘ena si ‘ila.

³³ Ta Aberaamo kaiwe tamarika ‘i asona Beeriseba ‘enaia, ta ‘ena Ieoba ‘ana esana ‘ena ‘i bwauiena, Eaubada Tomia Ataia.

³⁴ Ta Aberaamo me Pilisitia ‘idi ‘asa ‘ena ‘i miami ga asiata iauna.