Nugana 2 - Buki Tabu Lowaenei 1919

‘UPWA 2.

¹ Ta garewa ta bare‘u si gumwara, ta ‘adi iau maibo‘ana.

² Ta asiata ‘e sebeni nina Eaubada ‘ina guinua ni‘atu ‘i bubuna ‘i loegumwarina; ta asiata ‘e sebeni nina ‘enega ‘ina guinua iauna ni‘atu ‘i bubuna ‘enega ‘i eiawai‘ata.

³ Ta Eaubada asiata ‘e sebeni nina ‘i ona‐obobomena, ta ‘i etabuna: ‘ena ‘ina guinua iauna Eaubada ‘i mweruruina ta ‘i bubuna ‘enega ‘i eiawai‘ata ta ‘enega.

⁴ Getedi garewa ta bare‘u ‘idi ‘ebetubua tuta ‘enega si apwesa, asiata nina ‘enega Ieoba Eaubada bare‘u ta garewa ‘i bubudi.

⁵ Ta tanoa ‘ana kaiwe nigea ‘e bweu bare‘uia ‘i miami, ta tanoa ‘ana pwatura nigea ‘e bweu ‘i tabwa‐tabwa: Ieoba Eaubada nigea ‘usana ‘i giedaunama bare‘uia, ta nigea tai ‘e bweu be bwa‘a ‘i da gesoi;

⁶ ta bare‘uiega gaguna ‘i tu‘ema, ta bwa‘a matana maibo‘ana ‘i giepwasena.

⁷ Ta Ieoba Eaubada bwa‘a nedilina ‘enega tai ‘i bubuna, ta ubusuna iawasina ‘ena ‘i sa‘una; ta tai ni‘atu ‘i iaruiarua maiawasina.

⁸ Ta Ieoba Eaubada bagura ‘i e asona Bomatu ‘ena, Edena ‘enaia; ta tai nina ni‘atu ‘i bubuna ‘ena ‘i sa‘una.

⁹ Ta Ieoba Eaubada kaiwe iauna ‘adi ‘ita bobo‘adi, ta ‘e‘ai bobo‘ana bwa‘a ‘enega ‘i gietabwenama; wate iawasida ‘ana kaiwe bagura gamwanaia, ta bobo‘ana ta to‘umalina ‘adi ‘ebesinapu ‘ana kaiwe.

¹⁰ Ta boasi ‘e bweu Edenega ‘i apwesa be bagura ‘i giepwasena; ta gote ‘enega i ‘etoweara ga narinao ‘e ata.

¹¹ ‘E bweuna ‘ana esana Pisona: tauna ‘asa Abila maibo‘ana ‘i dausakowasiena, ‘asa nina gola ‘ena ‘i miami;

¹² ta ‘asa gote ‘ina gola bobo‘ana: ‘ena bedola ‘i miami ta gurewa berula.

¹³ Ta ‘awa ‘e ruena ‘ana esana Giona: tauna ‘asa Kusa maibo‘ana ‘i dausakowasiena.

¹⁴ Ta ‘awa ‘e tonina ‘ana esana Idekela: tauna Asiria matanaia ‘i daudau. Ta ‘awa ‘e atana Euperatesa.

¹⁵ Ta Ieoba Eaubada tai i ‘au‘ewena, ta bagura Edena ‘ena ‘i sa‘una be ‘i da gesoi ta ‘i da ‘ita‘i‘isina.

¹⁶ Ta Ieoba Eaubada tai ‘i eonena, ‘i gwae, Bagura ‘ina kaiwe iauna ‘enega ‘u da ‘e‘ai besobeso:

¹⁷ ta bobo‘ana be to‘umalina ‘adi ‘ebesinapu ‘ana kaiwe ‘enega, gea‘abo ‘enega u ‘e‘a: asiata ‘enega u ‘enina ‘u da mwawasa ‘ai‘aila ta ‘enega.

¹⁸ Ta Ieoba Eaubada ‘i ona, Nigea bobo‘ana tai ‘i da miami tebweuna: ‘ana ‘arau to‐lema ‘e bweu ia da bubuna.

¹⁹ Ta bwa‘a ‘enega Ieoba Eaubada bomitawa iauna ‘i mweruruidi, mwatui manuidi iauna ta; ta tai ‘ena ‘i me‘edi be ‘i da ‘ita nai to‘ase ‘i da eesedi: ta to‘ase nai tai iage mwerumweruruina iauna ‘i eesedi, tauna ‘ana esana.

²⁰ Ta tai iobai iauna ‘i eesedi, mwatui manuidi ta, bomitawa iauna ta; ta tai manuna nigea ‘e bweu ‘ana ‘araumo to leme.

²¹ Ta Ieoba Eaubada ‘eno‘eno sinabwana ‘enega tai ‘i ununa, ga i ‘enomwataia; ta asiana ‘e bweuna i ‘ewena, ta esionega ‘i sa‘u bodena ‘ana lopa‘eru;

²² ta asiana nina, tauna Ieoba Eaubada tai ‘enega i ‘ewe‘ewena, waine ‘enega ‘i bubuna, ta tai ‘ena i ‘au‘ewenama.

²³ Ta tai ‘i ona, Gete tuga lulugu luluna, ta esiogu esiona: ‘ana esana Waine, tai ‘enega ‘i apwesama ta ‘enega.

²⁴ ‘Enega tai tamana be sinana ‘i da pilisinedi, ta mwanena ‘ena ‘i da miaiaina: ta si da esio ‘e bweuna.

²⁵ Ta si bubugewa ruarua, tai ta mwanena, ta nigea si omaiamaia.