Nugana 19 - Buki Tabu Lowaenei 1919

‘UPWA 19.

¹ Ta anelose nidi ‘e rua Sodoma ‘ena si mai asuinuanuaia; ta Lota Sodoma ‘ana ‘awa ‘ena ‘i miatoa: ta Lota i ‘itedi, ta ‘i tooro sabi lobedi; ta ‘i bwagobwago sana mwa‘uta bare‘uia;

² ta ‘i gwae, Gete ‘enega wa ‘ita, ‘igu ‘inapwanao, ia sidemi, ‘imi ‘ari‘ei ‘ina anuaia wa da rugu, ta wa da mia masari, ta ‘aemi wa da ‘utui, ta wa da ‘unuboi, ta wa da tauia. Ta si gwae, Nigea; ta ‘atamanaia ‘a da mia masari.

³ Ta ‘i eonedi sinabwana; ta ‘ena si nao, ta ‘ina anua ‘ena si rugu; ta ‘e‘ai sinabwana ‘edia ‘i bubuna, ta palaua nigea malebeninamo ‘i gabuna, ta si ‘ai.

⁴ Ta nigea si ‘eno‘eno, ga ‘asa ‘ana taiao, tai Sodoma, anua si sakowasi‘ena, tubuau ta tai sinabwadi, tomota iauiauna esena iauna ‘enega;

⁵ ta Lota ‘ena si bwau, ta ‘ena si gwae, Tai nidi ‘emuia si rugurugua boiboi gete mwa‘o si miami? ‘emaia ‘u da ‘au‘ewa apwesedima, be ‘enega ‘a da mwaratonidi.

⁶ Ta Lota ‘edia ‘i apwesa ‘auboda ‘enaia, ta murinega ‘awa ‘i gibodenama.

⁷ Ta ‘i gwae, Tasiguao, ia sidemi, gea‘abo wa guinua to‘umalina nadigega.

⁸ Gete ‘enega wa ‘ita, natuguao me wainedi ‘e rua nigea tai si mwaratoni; ia sidemi, wa da tagwara be ia da ‘au‘ewedima ‘emia, ta iage ‘i bobo‘ana matamia ‘edia wa da guinua: ta tai getedi tuga gea‘abo ‘e bweu iage ‘edia wa da guinua; ‘igu ‘atoa iauiaukwina ‘ena si mai ta ‘enega.

⁹ Ta si gwae, ‘U da mia ‘ila. Ta si gwae, Tai gete ‘e bweuna ‘i ruguma sabi miabaula, ta ‘aene ‘i da to‐loina: gete tuga ‘emuia ‘a da guinua geiogeioi wawasae, ta ‘edia gidarina, Ta si gewagewana tai nina ‘ena, tauna Lota, ta serabenaia si nao ‘aene ‘auboda si da ‘auweari.

¹⁰ Ga tai nidi nimadi si iasitotodi, ta Lota si ‘au‘ewena ‘edia anua gamwanaia, ta ‘awa si gibodena.

¹¹ Ta tai ‘auboda ‘ena si miamiana matakebokeboega si unudi, me gidaridi ta me sinabwadi: ta ‘enega si ietupataudadana ‘auboda si ‘ebesa iogenena.

¹² Ta tai nidi Lota ‘ena si ona, Eisa wate gete ‘ena ma‘emuao? bwasiaio be, natumuao me‘olotodi be, natumuao mewainedi be, ta iaisigei wate ma‘emuao ‘asa ‘enaia; esena gete ‘enega ‘u da ‘au‘ewedima:

¹³ esena gete ‘a da loesaoori ta ‘enega, ‘idi bwau ni‘atu ‘i sinabwa Ieoba matanaia; ta Ieoba ‘i etunema be ‘a da loesaoorina.

¹⁴ Ta Lota ‘i apwesa, ta bwasianao, taudi natunao me wainedi ‘i abe ma‘ediao si da ai, ‘edia ‘i ona, ta ‘i gwae, Wa da tooro, ta esena gete ‘enega wa da apwesa; Ieoba ‘asa ‘i da loesaoori ta ‘enega. Ta tauna bwasianao ‘edia ‘atua ‘e bweu ‘i tuietuiea.

¹⁵ Ta ni‘atu tomwa‘iulisina, ga aneloseao nidi Lota si au‘ewa manini‘ena, si gwae, ‘U da tooro, mwaneio ‘u da ‘au‘ewa, ta natumuao mewainedi ‘e rua gete ‘ena si miamiana; nai wa ‘arasi ‘asa ‘ina to‘umalina ‘enaia.

¹⁶ Ta ‘i miamia lia; ta tai nidi nimanaia si ‘abi, ta mwanena nimanaia, ta natunao mewainedi ‘e rua nimadia; Ieoba i ‘atenua‘ole‘oleina ta ‘enega: ta si ‘au‘ewa apwesena, ta ‘asa etaulunaia si sa‘una.

¹⁷ Ta gete ‘i apwesa, ni‘atu si ‘au‘ewedima apwesaia, ga ‘i gwae, Iawasio manuna ‘u da dena; gea‘abo murimuia u ‘ita‘ita ‘ila, Abatau maibo‘ana ‘ena gea‘abo ‘u da miamia lia; ‘oea ‘ena ‘u da dena, nai i ‘arasiio.

¹⁸ Ta Lota ‘i eonedi, Ie, gea‘abo nadigega, ‘igu ‘inapwana:

¹⁹ U ‘ita, ‘imu toguinua ni‘atu nua‘ole‘ole ‘i lobena matamuia, ta ‘imu nua‘ole‘ole ‘u giesinabwa, tauna ‘eguia ‘u e‘ita iawasigu u ‘etoseena ta ‘enega; ta nigea kapekapeana ‘oea ‘ena ia da dena, nai to‘umalina ‘i unugu, ga ia mwamwawasa:

²⁰ gete ‘enega ‘u da ‘ita, ‘asa gete serabemaia be ‘ena ‘a da dena, ta gidarina: Ie, ‘ena ia da dena, (nigea nai gidarina?) ta iaruiaruagu ‘i da bobo‘ana.

²¹ Ta ‘i eonena, U ‘ita, gete iage nina wate manuna ia nonoio, be ‘enega ‘asa nina manuna ni‘atu ‘u gwae gea‘abo ia da ununa.

²² ‘U da lomanini, ‘ena ‘u da dena; nigea kapekapeana ‘e bweu iage ia da guinua ga ‘oio ‘ena ‘u da apwesa bemi. Ta ‘enega ‘asa nina si eesena Soara.

²³ Sinara ni‘atu ‘i sae bare‘uia ga Lota ‘i mai Soara ‘enaia.

²⁴ Ga Ieoba Sodoma ta Gomora ‘edia mepulupulua ta awe ‘ara‘arata ‘i giesagudima Ieoba ‘enega garewega;

²⁵ ta ‘asa gotedi ‘i unudi, Abatau maibo‘ana be, ‘asa nidi ‘idi tomota iauiauna be, iage bare‘uia ‘i tabwa‐tabwa be.

²⁶ Ta mwanena murinega i ‘ita ‘ila, ta ‘i e ‘ora kalita.

²⁷ Ta Aberaamo gonagonaia ‘i tu‘e ‘esena nina ‘ena ‘i tooro Ieoba matanaia:

²⁸ ta Sodoma ta Gomora ‘edia i ‘ita, ta Abatau maibo‘ana ‘enaia, ta ‘i dune, ta, wa ‘ita, ‘asa ‘asuna ‘i tu‘etu‘e ‘atua umura ‘asuna.

²⁹ Ta gete ‘i apwesa, ni‘atu Eaubada Abatau ‘asana ‘i loesaooridi, ga Eaubada Aberaamo ‘i nua ‘i‘isina, ta Lota ‘i etunena esilae gamwagamwaninega, ‘ena ‘asa Lota ‘edia ‘i miamiana ‘i unudi.

³⁰ Ta Lota Soarega ‘i tu‘e, ta ‘oeaia ‘i miami, ta natunao me wainedi ‘e rua ma‘enao; si miami Soara ‘enaia ‘i matautena: ta gaula ‘e bweu ‘ena ‘i miami, tauna ta natunao me wainedi ‘e rua.

³¹ Ta tomatua megoamana ‘ena ‘i ona, Tamada ni‘atu ‘i e tai sinabwana, ta bare‘uia nigea ‘e bweu tai ‘edaia ‘i da ruguma bare‘u maibo‘ana ‘ina bubuna ‘atua:

³² ‘u da ma, tamada ta da enumena oineega, ta ma‘ieana ta da ‘eno, be ‘enega tamada ‘enega ta da ‘euwana.

³³ Ta boiboi nina tamadi si enumena oineega: ta tomatua ‘i rugu, ta i ‘eno tamana ma‘ieana; ta ‘ena waine i ‘eno, nai ‘ena ‘i tooro, tauna nigea ‘i mwaratonina.

³⁴ Ta ulisi, ga tomatua megoamana ‘ena ‘i ona, U ‘ita, guruwana tamagu ma‘ieagu a ‘eno: boiboi gete wate ta da enumena oineega; ta ‘oio ‘u da rugu, ta ‘u da ‘eno ma‘ieana, be ‘enega ta da ‘euwana tamada ‘enega.

³⁵ Ta boiboi gote wate tamadi si enumena oineega: ta megoamana ‘i tooro, ta i ‘eno ma‘ieana; ta ‘ena waine i ‘eno, nai ‘ena ‘i tooro, nigea ‘i mwaratonina.

³⁶ Nadigega Lota natunao me wainedi ruarua si ‘euwana tamadi ‘enega.

³⁷ Ta tomatua me‘olotona ‘i enatunena, ta ‘i eesena Moaba: tauna me Moaba tubudi ga batua.

³⁸ Ta me goamana, tauna wate natuna me‘olotona ‘i enatunena, ta ‘i eesena Benami: tauna me Amona tubudi ga batua.