Nugana 17 - Buki Tabu Lowaenei 1919

‘UPWA 17.

¹ Ta ni‘atu Aberamo ‘ana tuta iakwara ‘e naineti‐naine, ga Ieoba Aberamo ‘ena ‘i apwesa, ta ‘ena ‘i ona, ‘Abo‘agu Eaubada Toewaiwaisana; mataguia ‘u da tauia, ta ‘u da bobo‘ana maibo‘ana.

² Ta ‘igu ona‘upa‘upa ia da bubuna ‘eguia ta ‘emuia, ta ia da gieiauiemu sinabwana.

³ Ta Aberamo ‘i be‘u sanamwa‘uta: ta Eaubada ‘i onaona ma‘ieana, ‘i gwae,

⁴ Manugu, u ‘ita, ‘igu ona‘upa‘upa ma‘ieaio, ta ‘oio ‘u da ‘asa e iau‘ena‘ina tamadi.

⁵ Ta gea‘abo wate ‘amu esana Aberamo ta ‘amu esana i da Aberaamo; ni‘atu ia bubuio ‘asa iau‘ena‘ina tamadi ta ‘enega.

⁶ Ta ia da bubuio be ‘u da uaua sinabwana, ta ‘ebeloinao ia da bubudi ‘emuiega, ta kiniao ‘emuiega si da apwesama.

⁷ Ta ‘igu ona‘upa‘upa ia da sa‘u ‘eguia ta ‘emuia ta tubumuao murimuia ‘idi epatatomota ‘edia be ‘i da ona‘upa‘upa ‘ataia, be ia da Eaubada ‘emuia ta tubumuao murimuia ‘edia.

⁸ Ta ‘asa nina ‘imu ‘ebetauia dadana, ‘asa Kanania maibo‘ana, ia da ‘ebwaemu, ta tubumuao murimuia ‘edia, ‘egu‘eguia ‘ataia manuna; ta ‘abo‘agu ia da e ‘idi Eaubada.

⁹ Ta Eaubada Aberaamo ‘ena ‘i ona, Ta manuio, ‘oio ‘igu ona‘upa‘upa ‘u da ‘ita‘i‘isi, ‘oio, ta tubumuao murimuia ‘idi epatatomota ‘edia.

¹⁰ Gete ‘igu ona‘upa‘upa, tauna wa da ‘ita‘i‘isi, ‘eguia ta ‘emuia ta tubumuao murimuia ‘edia; me‘olotodi iaudi ‘emia ‘i da daba.

¹¹ Ta bwarami matana esiona wa da daba; ta ‘i da ona‘upa‘upa ‘ana we‘iwe‘iiaia ‘eguia ta ‘emia.

¹² Ta tauna ‘ana tuta asiata ‘e eta ‘emia ‘i da daba, me‘olotodi iaudi ‘imi epatatomota ‘edia, tauna ‘imu susu ‘ena ‘i tubua, nai tauna to‘u‘umara ‘enega wa gimwagimwanena maniega, tauna nigea tubuio.

¹³ Tauna ‘imu susu ‘ena ‘i tubua, ta tauna ‘u gimwaniena ‘imu maniega, si da daba: ta ‘igu ona‘upa‘upa esiomi ‘ena ‘i da miami ona‘upa‘upa ‘ataia manuna.

¹⁴ Ta me‘olotona nigea lodabanamo tauna bwarana matana esiona nigea si dabadaba, iaruiarua gote si da ‘upwaiaulena ‘ina tomota ‘ediega; ‘igu ona‘upa‘upa ni‘atu ‘i li‘oena.

¹⁵ Ta Eaubada Aberaamo ‘ena ‘i ona, Sarai mwaneio manuna, gea‘abo ‘ana esana u ‘ina‘inana Sarai, ta ‘ana esana Sara.

¹⁶ Ta ia da onaobobomena, ta wate ‘enega natuio me‘olotona ia da ‘ebwaeio: tamo, ia da onaobobomena, ta tauna ‘i da ‘asa sinadi; ‘enega tomota ‘idi kiniao si da mai.

¹⁷ Ga Aberaamo ‘i be‘u sanamwa‘uta, ta ‘i edagi, ta ‘atenega ‘i gwae, Tauna ‘ana tuta iakwara ‘e anaredi goama ‘ena ‘i da tubua nai? ta Sara, tauna ‘ana tuta iakwara ‘e naineti, ‘i da enatuna nai?

¹⁸ Ta Aberaamo ‘i ona Eaubada ‘ena, Isimaela matamuia ‘i da bobo‘ana!

¹⁹ Ta Eaubada ‘i gwae, Nigea, ta Sara mwaneio natuio me‘olotona ‘i da enatunena; ta ‘u da eesena Isaako: ta ‘igu ona‘upa‘upa ia da sa‘u ma‘ieana ona‘upa‘upa ‘ataia manuna tubunao manudi murinega.

²⁰ Ta Isimaela manuna, ni‘atu ia nonomu: u ‘ita, ni‘atu ia onaobobomena, ta uana ia da bubuna, ta ia da gieiauiena sinabwana; ‘inapwanao ‘e twelu ‘ena si da tubua, ta ia da bubuna be ‘i da ‘asa sinabwana.

²¹ Ta ‘igu ona‘upa‘upa Isaako ma‘ieana ia da sa‘ui, tauna Sara ‘i da enatunena ‘emuia gete tuta nina iakwara nina ‘i memai ‘enaia.

²² Ta ‘ina ona ma‘ieana i pilisinena, ta Eaubada Aberaamo ‘enega ‘i tu‘e.

²³ Ta Aberaamo natuna Isimaela i ‘au‘ewena, iauiaudi ‘ina susu ‘ena si tubutubua ta, iauiaudi ‘inamaniega ‘i gimwagimwaniedi ta, Aberaamo ‘ina susu taidi me‘olotodi iauna, ta asiata ai‘aila gote bwaradi matana esiona i ‘edabena, na‘ieana Eaubada ‘i onaona ‘enaia.

²⁴ Ta Aberaamo ‘ana tuta iakwara ‘e naineti‐naine, ‘ena bwarana matana ‘i daba‐sakowasiena.

²⁵ Ta natuna me ‘olotona Isimaela ‘ana iakwara ‘e tatini, ‘ena bwarana matana si daba‐sakowasiena.

²⁶ Asiata ai‘aila gote ‘enega Aberaamo ‘i dabena, wate Isimaela natuna.

²⁷ Ta ‘ina susu taidi iauiaudi, taudi susu ‘ena si tubua ta taudi to‘u‘umara mani ‘enega ‘i gimwagimwaniedi, ma‘enao si dabedi.