Nugana 16 - Buki Tabu Lowaenei 1919

‘UPWA 16.

¹ Ta Sarai Aberamo mwanena nigea ‘e bweu goama ‘i enatunena ‘enaia: ta Sarai ‘ina toguinua mewainena ‘e bweuna kena Aigupito, ‘ana esana Agari.

² Ta Sarai Aberamo ‘ena ‘i ona, Gete u ‘ita, Ieoba i ‘etobodegu be gea‘abo ia e enatuna; ia sideio, ‘igu toguinua mewainena ‘ena ‘u da rugu; nai waine nina ‘enega gogama ia da ‘ewedi. Ta Aberamo Sarai ‘enana ‘i nonona.

³ Ta ni‘atu Aberamo ‘asa Kanania ‘ena ‘i miami ga iakwara ‘e teni, ga Sarai Aberamo mwanena Agari kena Aigupito, ‘ina toguinua mewainena, i ‘au‘ewa, ta mwanena Aberamo i ‘ebwaena be ‘i da emwanena.

⁴ Ta Agari ‘ena ‘i rugu, ta i ‘euwana: ta ni‘atu i ‘itena ‘aene i ‘euwana, ga ‘ina ilemwaia ‘i sinarina.

⁵ Ta Sarai Aberamo ‘ena ‘i ona, ‘Igu loegesi ‘emuia ‘i miami: lumalumaio ‘igu toguinua mewainena ‘ena ia ‘ebwaea‘ena; ta ni‘atu i ‘itena i ‘euwana, ga ‘i sinarigu: Ieoba ‘i da loina ‘eguia ta ‘emuia.

⁶ Ta Aberamo Sarai ‘ena ‘i ona, U ‘ita, ‘imu toguinua nimaio ‘ena; iage ‘i bobo‘ana matamuia ‘u da guinua. Ta Sarai ‘i guinua pa‘arina ‘enaia, ta matanega ‘i dena.

⁷ Ta Ieoba ‘ina anelose ‘i lobena wewerupwa deinaia mitawaia, wewerupwa ‘eda Sura ‘ena deinaia.

⁸ Ta ‘i gwae, Agari, Sarai ‘ina toguinua mewainena, mwa‘adega ‘u mai? ta mwa‘o ‘u tautauia? Ta ‘i gwae, ‘Igu ilemwaia Sarai matanega ia denama.

⁹ Ta Ieoba ‘ina anelose ‘ena ‘i gwae, ‘Imu ilemwaia ‘ena ‘u da ‘ila, ta nimanaia ‘u da tagwareio.

¹⁰ Ta Ieoba ‘ina anelose ‘ena ‘i ona, Tubumuao ia da gieiauiau sinabwana, be ‘enega ‘adi‐iau ‘iaudidigana manuna gea‘abo si da sawedi.

¹¹ Ta Ieoba ‘ina anelose ‘ena ‘i gwae, U ‘ita, u ‘euwana, ta me‘olotona ‘u da enatunena: ta ‘u da eesena Isimaela, ‘imu elo‘uia Ieoba ‘i nonona ni‘atu ta ‘enega.

¹² Ta ‘i da e ‘asebomitawa ‘atua tomota gamwanidia; nimana tai iauna ‘edia, ta tai iauna nimadi ‘enaia; ta tasinao iauiaudi matadia ‘i da miami.

¹³ Ta Ieoba tauna ‘i eonena ‘ana esana i ‘inanena, ‘Oio Eaubada to‘ita: ‘i gwae ta ‘enega, Ni‘atu tauna i ‘itegu gete tuga nai ia dune murigwaiabu?

¹⁴ Ta ‘enega boasigaula nina si eesena Beeri‐laai‐roi; wa ‘ita, Kadesa ta Bereda ta gamwagamwanaia ‘i miami.

¹⁵ Ta Agari me‘olotona ‘i enatunena Aberamo ‘enaia: ta Aberamo natuna ‘i eesena, tauna Agari ‘i enatunena, Isimaela.

¹⁶ Ta Aberamo ‘ana tuta iakwara ‘e etisikisi, ‘ena Agari Isimaela ‘i enatunena Aberamo ‘enaia.