Nugana 13 - Buki Tabu Lowaenei 1919

‘UPWA 13.

¹ Ta Aberamo Aigupitoega ‘i tu‘e, tauna ta, mwanena ta, ‘ina iage iauiauna ta, Lota ma‘ieana ta, Iarasi ‘enaia.

² Ta Aberamo i ‘eesaesa sinabwana lagolagowa manuna ta, sileba manuna ta, gola manuna ta.

³ Ta ‘i tautauia Iarasiega ga Betela ‘enaia, esena nina ‘enaia ‘ina anua ‘ena ‘i gimi mia nugana, Betela ta Ai ta gamwagamwanaia;

⁴ ‘ebetaria ‘ana esena ‘enaia, tauna ‘ena ‘i gimi bubu nuganena: ta nada Aberamo Ieoba ‘ana esana i ‘inanena.

⁵ Ta Lota wate, tauna Aberamo ma‘ieana si tauia, ma‘ina sipiao be, bulomakau be, anuanaia be.

⁶ Ta bwa‘a nigea ‘i ewaiwai be ‘i da e‘enidi, be ‘enega si da miami rererea: ‘idi gwegwe ‘i sinabwana ta ‘enega, ta ‘enega nigea kapekapeana si da mia rua.

⁷ Ta Aberamo ‘ina lagolagowao ‘adi to ‘ita‘i‘itao ta Lota ‘ina lagolagowao ‘adi to‘itao si e‘upwa: ta me Kanania ta me Perisi tuta gote ‘asa nina ‘ena si miami.

⁸ Ta Aberamo Lota ‘ena ‘i ona, Ia sideio gea‘abo e‘upwa ‘i da apwesa, ‘eguia ta ‘emuia, ta ‘igu to‘ita‘i‘itao ta ‘imu to‘ita‘i‘itao ‘edia; ‘abo‘ada matasidao ta ‘enega.

⁹ ‘Asa maibo‘ana nigea nai matamuia? Ia sideio ‘eguiega ‘u da ‘upwaio: ‘abo gegeumidega nuanuaio, ga ‘abo‘agu ‘ataidega ia da tauia; nai ‘abo ‘oio ‘ataidega nuanuaio, ga gegeumidega ia da tauia.

¹⁰ Ta Lota i ‘itatu‘e, ta Ioridana Abatauna maibo‘ana i ‘itena, ‘aene esena iauna maboasina, muriega Ieoba Sodoma ta Gomora ‘i loesaooridi, Ieoba ‘ina bagura nadigega, ‘asa Aigupito nadigega, na‘ieana ‘u tautauia Soara ‘enaia.

¹¹ Ta ‘enega Lota Ioridana Abatauna maibo‘ana i ‘ita‘esi‘esinua manuna; ta Lota ‘i tautauia bomatu ‘ena: ta si wearidi ‘e bweuna ‘e bweuna ‘enega.

¹² Aberamo ‘asa Kanania ‘ena ‘i miami, ta Lota Abatau ‘asana ‘edia ‘i miami, ta ‘ina anua i ‘ewena ga i ‘abina Sodoma ‘enaia.

¹³ Ta tai Sodoma si to‘umali wawasae ta si guinua geiogeioi leoba ‘enaia.

¹⁴ Ta Ieoba ‘i ona Aberamo ‘enaia, ‘ena ni‘atu Lota ‘enega ‘i miadumaduma, Gete tuga ‘u da ‘ita tu‘e, ta esena nina ‘ena ‘u miami ‘enega ‘u da lo‘ita dadana, iaarata ‘ena be, iarasi ‘ena be, bomatu ‘ena be, ‘ebwaga ‘ena be:

¹⁵ ‘asa maibo‘ana u ‘itena ta ‘enega, ia da ‘ebwaemu, ta tubumuao ‘edia ‘ataia.

¹⁶ Ta tubumuao ia da bubudi be si da ‘e bare‘u nedilina ‘atua: ta ‘enega ‘abo tai bare‘u nedilina ‘i da sawa kapekapeana, ga tubumuao wate si da sawedi.

¹⁷ U da tooro, ‘asa ‘ana dudura ta ‘ana bababa ‘u da rubwarena; ia da ‘ebwaemu ta ‘enega.

¹⁸ Ta Aberamo ‘ina anua i ‘ewena, ta Mamire ‘ina keigwanao ‘edia ‘i mai ta ‘i miami, taudi Eberona ‘ena si miami, ta nada ‘ebetaria i ‘abina Ieoba ‘enaia.