Nugana 11 - Buki Tabu Lowaenei 1919

‘UPWA 11.

¹ Ta bare‘u maibo‘ana ‘enadi ‘e bweuna ta ‘idi ona ‘e bweuna.

² Ta gete ‘i apwesa, si tautauia bomatu ‘ena, ga abatau ‘e bweu si lobena ‘asa Sinaa ‘enaia; ta ‘ena si miami.

³ Ta si onaona ‘e bweuna ‘e bweuna ‘enaia, Ta da iage, bwa‘a‐gabugabuna ta da bubu, be ta gabu ‘ai‘ailidi. Ta bwa‘a‐gabugabunina ‘idi gurewa, ta bitumena ‘idi bwada.

⁴ Ta si ona, Ta da iage, ‘asa ta da lolia ta anua kesorana, tauna anua nina debana ‘i da tu‘e ga garewaia, ta ‘ada esana ta da bubuna; ‘abona nai ta sawara lelewana bare‘u maibo‘ana matanaia.

⁵ Ta Ieoba ‘i mwa‘uta sabi ‘ita ‘asa nina ta anua kesorana nina, taudi tomota natunao si ‘abina.

⁶ Ta Ieoba ‘i ona, wa ‘ita, tomota ‘e bweuna, ta iauiaudi ‘enadi ‘e bweuna; ta gete ‘enega nigea ‘e bweu iage ta da egagarena ‘ediega, ‘abo iage nina si nuena si da guinua.

⁷ Ta da iage, ta da mwa‘uta, ta ‘enadi ‘ena ta da giekwanikwani, be ‘enega ‘enadi ‘e bweuna ‘e bweuna gea‘abo si da sinasinapu.

⁸ Ga Ieoba gote ‘enega ‘i lolelewana dadanedi bare‘u maibo‘ana matanega: ta ‘asa nina ‘ana lolia si sa‘una.

⁹ ‘Enega si eesena Babela; gote ‘ena Ieoba bare‘u maibo‘ana ‘enana ‘i giekwanikwanina: ta gote ‘enega Ieoba ‘i lolelewana dadanedi bare‘u maibo‘ana matanaia.

¹⁰ Getedi Sema tubunao. Sema ‘ana iakwara ‘e wani anaredi, ga Apakasada ‘ena ‘i tubua murua murinaia iakwara ‘e rua:

¹¹ Ta ni‘atu Apakasada ‘i tubua ga Sema ‘i miami ga iakwara ‘e paibe anaredi, ta natunao me‘olotodi ta natunao me wainedi si tubua.

¹² Ta Apakasada ‘i miami ga iakwara ‘e tati paibe, ga Sela ‘ena ‘i tubua:

¹³ ta ni‘atu Sela ‘i tubua ga Apakasada ‘i miami ga iakwara ‘e poa anaredi ta teri, ta natunao me‘olotodi ta natunao me wainedi si tubua.

¹⁴ Ta Sela iakwara ‘e tati ‘i miami, ga Ebera ‘ena ‘i tubua:

¹⁵ Ta ni‘atu Ebera ‘i tubua ga Sela ‘i miami ga iakwara ‘e poa anaredi ta teri, ta natunao me‘olotodi ta natunao me wainedi si tubua.

¹⁶ Ta Ebera ‘i miami ga iakwara ‘e tati poa, ta Pelega ‘ena ‘i tubua:

¹⁷ ta ni‘atu Pelega ena ‘i tubua ga Ebera ‘i miami ga iakwara ‘e poa anaredi ta tati, ta natunao me‘olotodi ta natunao mewainedi si tubua.

¹⁸ Ta Pelega ‘i miami ga iakwara ‘e tati, ta Reu ‘ena ‘i tubua:

¹⁹ ta ni‘atu Reu ‘i tubua ga Pelega ‘i miami ga iakwara ‘e tu anaredi ta naine, ta natunao me‘olotodi ta natunao mewainedi si tubua.

²⁰ Ta Reu ‘i miami ga iakwara ‘e tati tu, ta Seruga ‘ena ‘i tubua:

²¹ Ta ni‘atu Seruga ‘i tubua ga Reu ‘i miami ga iakwara ‘e tu anaredi ta sebeni, ta natunao me‘olotodi ta natunao me wainedi si tubua.

²² Ta Seruga ‘i miami ga iakwara ‘e tati, ta Naora ‘ena ‘i tubua:

²³ Ta ni‘atu Naora ‘i tubua ga Seruga ‘i miami ga iakwara ‘e tu anaredi, ta natunao me‘olotodi ta natunao mewainedi si tubua.

²⁴ Ta Naora ‘i miami ga iakwara ‘e tweniti naine, ta Tera ‘ena ‘i tubua:

²⁵ ta ni‘atu Tera ‘i tubua ga Naora ‘i miami ga iakwara ‘e wani anaredi ta nainetini, ta natunao me‘olotodi ta natunao me wainedi si tubua.

²⁶ Ta Tera ‘i miami ga iakwara ‘e sebeniti ta Aberamo be, Naora be, Arana be, ‘ena si tubua.

²⁷ Ta getedi Tera tubunao. Tera natunao Aberamo be, Naora be, Arana be; ta Arana natuna Lota.

²⁸ Ta Arana ‘i mwawasa tamana Tera matanaia ‘ina ‘asa ‘ina ‘ebetubua ‘enaia, me Kaladea ‘idi Ura ‘enaia.

²⁹ Ta Aberamo ta Naora si ai: Aberamo mwanena ‘ana esana Sarai; ta Naora mwanena ‘ana esana, Milika, Arana natuna, tauna Arana nina Milika tamana, ta Isaka tamana,

³⁰ ta Sarai ‘i megagara; nigea ‘e bweu natunamo.

³¹ Ta Tera natuna Aberamo i ‘au‘ewena, ta Lota Arana natuna, natuna natuna, ta Sarai lawana, tauna natuna Aberamo mwanena; ta ma‘ediao si tauiawa me Kaladea ‘idi Ura ‘enega, sabi tauia ‘asa Kanania ‘enaia; ta ‘asa Arana ‘ena si mai, ta ‘ena si miami.

³² Ta Tera ‘ana tuta iakwara ‘e tu anaredi ta paibe: ta Tera ‘i mwawasa Arana ‘enaia.