Nugana 1 - Buki Tabu Lowaenei 1919

‘UPWA 1.

¹ Nuganaia Eaubada garewa ta gabura ‘i mweruruidi.

² Ta bare‘u waboreborena ta kakaena; ta guguioi ni‘u ‘etanaia ‘i miami: ta Eaubada iaruiaruana ni‘u ‘etanaia ‘i alealeledadana.

³ Ta Eaubada ‘i ona Ma‘edana ‘i da apwesa: ta ma‘edana ‘i apwesa.

⁴ Ta Eaubada ma‘edana i ‘itena, ‘aene ‘i bobo‘ana: ta Eaubada ma‘edana ‘i wearina guguioiega.

⁵ Ta Eaubada ma‘edana ‘i eesena Asiata, ta guguioi ‘i eesena Boiboi. Ta ni‘atu asuinuanua ta ni‘atu gonagona, ‘asiata ‘e bweuna.

⁶ Ta Eaubada ‘i ona, Bwagabwaga ‘i da apwesa ni‘u gamwagamwanaia, ta ni‘u be ni‘u ‘i da weari.

⁷ Ta Eaubada bwagabwaga ‘i bubuna, ta ni‘u bwagabwaga ‘ubunaia ta ni‘u bwagabwaga debanaia ‘i wearidi: ta nadigega ‘i apwesa.

⁸ Ta Eaubada bwagabwaga nina ‘i eesena Garewa. Ta ni‘atu asuinuanua ta ni‘atu gonagona, ‘asiata ‘eruena.

⁹ Ta Eaubada ‘i ona, Ni‘u garewa ‘ubuninaia si da egogona esena ‘e bweuna ‘ena, ta bwa‘a iadaiadana ‘i da apwesa: ta ni‘atu nadigega.

¹⁰ Ta Eaubada bwa‘a iadaiadana ‘i eesena Bare‘u; ta ni‘u ‘idi egogona ‘i eesena Ora: ta Eaubada i ‘itena ‘i bobo‘ana.

¹¹ Ta Eaubada ‘i ona, Bare‘uiega nedu ‘i da tabwama, pwatura maatuna, kaiwe uauana uana ‘i da uaua adelina nadigega, maatuna, bare‘uia: ta ni‘atu nadigega.

¹² Ta bare‘uiega nedu ‘i tabwama, pwatura maatuna adelina nadigega, ta kaiwe uauana, maatuna, adelina nadigega: ta Eaubada i ‘itena ‘i bobo‘ana.

¹³ Ta ni‘atu asuinuanua ta nia‘tu gonagona, ‘asiata ‘etonina.

¹⁴ Ta Eaubada ‘i ona, Maiare si da apwesa garewa bwagabwagana ‘enaia be ‘enega asiata si da weari boiboiega; ta si da ‘ewe‘iwe‘iiaia manudi be, tuta manudi be, asiata ta iakwara manudi be:

¹⁵ ta si da emaiare garewa bwagabwagana ‘enaia be bare‘u si da tuema‘edanina: ta ni‘atu ‘i nadigega.

¹⁶ Ta Eaubada maiare sinabwadi ‘e rua ‘i bubudi; maiare me sinabwana asiata ‘i da loine, ta maiare me gidarina boiboi ‘i da loine: wate kwadima ‘i bubudi.

¹⁷ Ta Eaubada garewa bwagabwagana ‘ena ‘i sa‘udi be ‘enega bare‘u si da tuema‘edanina,

¹⁸ ta asiata be boiboi si da loinedi, ta ma‘edana si da weari guguioiega: ta Eaubada i ‘itena ‘i bobo‘ana.

¹⁹ Ta ni‘atu ‘asuinuanua ta ni‘atu gonagona, asiata ‘e atana.

²⁰ Ta Eaubada ‘i ona, Ni‘uia iage mwerumweruruidi maiawasidi si da iaudidigana, ta manua si da taea bare‘u ‘etanaia garewa bwagabwagana matanaia.

²¹ Ta Eaubada rabarabaoo sinabwadi ‘i mweruruidi, iage mwerumweruruidi maiawasidi iauiaudi si ‘eetapewa ta, taudi ni‘uia iaudidigadi, adelidi nadigega, manua mapapedi adelina nadigega ta: ta Eaubada i ‘itena ‘i bobo‘ana.

²² Ta Eaubada ‘i ona obobomedi, ‘i gwae, Wa da losiwa, ta wa da eiau, ta ni‘u oraia wa da loemae, ta manua si da eiau bare‘uia.

²³ Ta ni‘atu asuinuanua ta ni‘atu gonagona, asiata ‘e nimana.

²⁴ Ta Eaubada ‘i ona, Bare‘u ‘enega iage mwerumweruruina maiawasina ‘i da apwesama adelina nadigega, iobai, iage lookawarina ta, bare‘u bomitawana adelina nadigega ta: ta ni‘atu ‘i nadigega.

²⁵ Ta Eaubada bare‘u bomitawana adelina nadigega ‘i bubuna, iobai adelidi nadigega ta, iage iauiauna bare‘uia si elookawara adelina nadigega ta: ta Eaubada i ‘itena ‘i bobo‘ana.

²⁶ Ta Eaubada ‘i ona, Tai ta da bubuna ‘ada ma‘ama‘aiau ‘atua, ‘ada ‘ita nadigega; ta si da loina ora ianina ‘edia be, mwatui manuina ‘edia be, iobai ‘edia be, bare‘u maibo‘ana ‘ena be, iage iauna si lookawara bare‘uia si kawakawara ‘edia be.

²⁷ Ta Eaubada tai ‘i mweruruina ‘ana ma‘ama‘aiau tauna ‘atua, Eaubada ‘ana ma‘ama‘aiau ‘atua ‘i mweruruina; me‘olotona ta mewainena ‘i mweruruidi.

²⁸ Ta Eaubada ‘i ona‐obobomedi: ta Eaubada ‘i eonedi, wa da losiwa, ta wa da eiau, ta bare‘u wa da loemae, ta ‘ena wa da ewaiwai; ta wa da loina ora ‘ana iana ‘edia be, mwatui manuina ‘edia be, iage iauna maiawasidi bare‘uia si looniu ‘edia be.

²⁹ Ta Eaubada ‘i ona, Wa ‘ita, pwatura iauna maatuna ia ‘ebwaemi, taudi bare‘u maibo‘ana matanaia si miami, kaiwe iauna ta, kaiwe maatuna uana ‘ena ‘i miami; ‘ami masura manuna,

³⁰ ta bare‘u bomitawana iauna ‘enaia, mwatui manuina iauna ‘enaia ta, iage iauna ‘i elookawara bare‘uia ‘enaia ta, ‘edia iawasidi ‘i miami, ni‘atu pwatura karakarawina iauna ia ‘ebwaedi ‘adi masura manuna: ta ni ‘atu ‘i nadigega.

³¹ Ta Eaubada iage ‘e bweuna ‘e bweuna ni‘atu ‘i bubuna i ‘itena, ta, wa ‘ita, ‘i to bobo‘ana sana. Ta ni‘atu asuinuanua ta ni‘atu gonagona, asiata ‘e sikisi nina.