Loina 2 - Buki Tabu Lowaenei 1919

‘UPWA 2.

¹ Ta ‘ena ‘e bweu ‘ebwaeadaita palaua i ‘ebwaea Ieoba ‘enaia, ‘ina ‘ebwaeadaita ‘i da epalaua ‘esasena; ta bunama ‘i da siwa ‘enaia, ta mu‘ana ‘ena ‘i da sa‘u:

² Ta Aarona natunao me‘olotodi to taria nidi ‘edia ‘i da me‘ena: ta ‘enega palaua ‘esasena nimanega ‘i sapwasapwarina ‘enega ‘i da ‘ewa, ta bunama ‘enega, ma‘ina mu‘ana maibo‘ana ‘enega; ta to taria ‘i da gabuna ‘ana ‘ebenua‘i‘isi ‘ebetaria ‘enaia, ‘ebwaeadaita aweiega, maina dibidibina Ieoba ‘enaia:

³ Ta ‘ebwaeadaita palaua ‘i tupwatupwa tauna ‘i da Aarona ‘ana iage ta natunao ‘adi iage: tauna iage tabu wawasae Ieoba ‘ana ‘ebwaeadaita aweiega ‘ediega.

⁴ Ta ‘ena ‘ebwaeadaita palaua umura ‘ena si gabuna ‘ana ‘ebwaeadaita u ‘ebwaea, ‘i da e keke nigea malebeninamo palaua ‘esasena bunama ma‘ieana si ilienoenowena, nai iage dedeadi nigea malebenidimo bunamega si bunamina.

⁵ Ta ‘abo ‘imu ‘ebwaeadaita ‘i e ‘ebwaeadaita palaua tegategana ‘enega dedeana, tauna ‘i da e palaua ‘esasena nigea lolebeninamo ‘enega, si ilienoenowena bunama ma‘ieana.

⁶ ‘U da tomwa be tomwatomwana, ta bunama ‘ena ‘u da siwa: tauna ‘ebwaeadaita palaua.

⁷ Ta ‘abo ‘imu ‘ebwaeadaita ‘i da ‘ebwaeadaita palaua tegategana ‘enega, tauna ‘i da e palaua ‘esasenega bunama ma‘ieana.

⁸ Ta ‘ebwaeadaita palaua tauna si bubuna iage gete ‘ediega Ieoba ‘ena ‘u da me‘ena: ta si da ‘ebwaeae to taria ‘enaia, ta tauna ‘i da me‘ena ‘ebetaria ‘enaia.

⁹ Ta to taria ‘ebwaeadaita palaua ‘enega ‘ina ‘ebenua‘i‘isi ‘i da ‘ewena, ta ‘ebetaria ‘ena ‘i da gabuna: ‘ebwaeadaita aweiega, maina dibidibina Ieoba ‘enaia.

¹⁰ Ta tauna ‘i tupwatupwa ‘ebwaeadaita palaua ‘enega ‘i da Aarona ‘ina iage ta natunao ‘idi iage: tauna iage tabu wawasae Ieoba ‘ana ‘ebwaeadaita aweiega ‘ediega.

¹¹ ‘Ebwaeadaita palaua, tauna wa da ‘ebwaeae Ieoba ‘enaia, gea‘abo ‘e bweu si bubu lebeniega: gea‘abo ‘e bweu lebeni wa gabugabu, nai mu‘awa ‘e bweu, be i ‘ebwaeadaita aweiega Ieoba ‘enaia.

¹² Gimi uana ‘adi ‘ebwaeadaita nadigega wa da ‘ebwaea‘edi Ieoba ‘enaia: ta gea‘abo si da tu‘etu‘ema maina dibidibina manuna ‘ebetaria ‘enaia.

¹³ Ta ‘ebwaeadaita palaua ‘ana ‘ebwaea iauna ‘u da loorena orega; wate gea‘abo ‘imu Eaubada ‘ina ona‘upa‘upa ‘ana ora ‘u tagwatagware be ‘i kakae ‘imu ‘ebwaeadaita palaua ‘enega: ‘imu ‘ebwaeadaita iauiauna looradi ‘u da ‘ebwaea.

¹⁴ Ta ‘abo gimi uanao ‘adi ‘ebwaeadaita palaua u ‘ebwaea Ieoba ‘enaia, ‘imu gimi‐uanao ‘ana ‘ebwaeadaita palaua manuna pesapesa masoruna si ‘ara‘arasina aweiega ‘u da ‘ebwaea, pesapesa soruna tututu auaunega.

¹⁵ Ta bunama ‘ena ‘u da sa‘ui, ta mu‘ana ‘ena ‘u da sa‘u: tauna ‘ebwaeadaita palaua.

¹⁶ Ta totaria ‘ana ‘ebenua‘i‘isi ‘i da gabuna, ‘ina pesapesa tututuna tomwana, ta ‘ina bunama tomwana, ta ‘ina mu‘ana maibo‘ana: tauna ‘ebwaeadaita aweiega Ieoba ‘enaia.