Isaia 8 - Buki Tabu Lowaenei 1919

‘UPWA 8.

¹ Ta Ieoba ‘i ona ‘eguia, Sileti sinabwana ‘u da ‘ewa, ta ‘ena ‘u da ‘etoladi peni tomotai ‘enega, Maera‐salala‐asa‐basa manuna;

² Ta to ‘ita ‘ai‘ailidi ia da ‘au‘ewedi ‘eguia be si ‘etoladi, Uria totaria, ta Sekaria Ieberekia natuna.

³ Ta paropita me wainena ‘ena ia tauia; ta i ‘euwana, ta natuna me‘olotona ‘i enatunena. Ga Ieoba ‘eguia ‘i gwae, ‘U da eesena Maera‐salala‐asa‐basa.

⁴ Goama nina nigea ‘i da mwaratoni be ‘i bwau, Tamagu, ta, Sinagu, ga nugana Damaseko ‘ina oesi ta Samaria ‘ina gwegwe si da ‘ewedi Asiria ‘ana king matanaia ta ‘enega.

⁵ Ta Ieoba wate ‘i ona ‘eguia, ‘i gwae,

⁶ Nadigega tomota gete Siloa boasinao daudau manuaedi ni‘atu si guitoasedi, ta si guausoara Resina ta Remalia natuna ‘edia;

⁷ Gete enega wa ‘ita, ta ‘enega, ‘Inapwana Boasi‘awa nina boasinao i ‘ewa tu‘edima ‘edia, pa‘aridi ta ‘iauiaudi, tuga Asiria ‘ana king ta ‘ina esaesa maibo‘ana: ta ‘i da tu‘ema ‘ina boasi‘awa iauiaudi debadia, ta tupitupina iauiaudi debadia ‘i da tauia:

⁸ Ta ‘i da dau toilawa Iuda ‘ena; ‘i da dau‘apu‘apu ta ‘i da ‘etobwarena; ‘i da tu‘e ga otonaia; ta papena ‘idi tu‘e‘alele ‘asa ‘ana bababa ‘i da loemaa, Imanuela ie.

⁹ ‘Omi tomota, wa da bwau toila, ta wa da weara lelewana; ta wa da enonotenasi, iauiaumi ‘asa ‘edasorega: wa da logadiwanimi ta wa da weara lelewana; wa da logadiwanimi, ta wa da weara lelewana.

¹⁰ Wa da eonaona rererea, ta nigea ‘e bweu iage; ona wa oneone, ta gea‘abo ‘i da tooro: Eaubada ma‘eda ta ‘enega.

¹¹ Ieoba ‘i ona nadigega ‘eguia ta ‘enega nima pa‘ara ‘enega, ta ‘i e‘itegu ‘aene gea‘abo ia da tauia tomota gete ‘idi ‘eda ‘ena, ‘i ona,

¹² Gea‘abo wa da ona, Wasegigi ‘e bweu, iage iauiauna tomota gete si gwae manudi, Wasegigi ‘e bweu; ta gea‘abo ‘idi matauta wa da matautena, nai wa da ‘atesa‘ara manuna.

¹³ Bodao ‘idi Ieoba, tauna wa da etabuna: ta tauna ‘i da ‘imi matauta, ta tauna ‘i da ‘imi ‘ebe‘atesa‘ara.

¹⁴ Ta ‘i da anua tabu manuna; ta gurewa ‘ebeesetupe manuna ta gurewa ‘ebeloguitoasa manuna susu Iseraela ruarua manudi, dai manuna ta sikwa manuna to‐mia Ierusalema ‘edia.

¹⁵ Ta iauiaudi ‘ena si da esetupe, ta si da be‘u, ta si da lasedi, ta si da sikwedi, ta si da ‘ewedi.

¹⁶ Ona ‘ebe‘ita wa da nunumi, loina wa da giepa‘i ‘igu tononoiao ‘edia.

¹⁷ Ta ia da iamwaiamwa Ieoba manuna, tauna maninina ‘i e‘etokwaiena Iakobo ‘ina susu ‘enega, ta ia da ‘ebesena.

¹⁸ Wa ‘ita, ‘Abo‘agu ta gogama Ieoba ni‘atu i ‘ebwaegu taudi we‘iwe‘iiaia manudi ta ‘ebenua‘owanao manudi Iseraela ‘ena, bodao‘idi Ieoba ‘enega, tauna ‘oea Siona ‘ena ‘i miami.

¹⁹ Ta tuta ‘enega si da ona ‘emia, Taudi to lo iaruiarua besobeso ‘edia wa da ‘ebesa, to barau ‘edia be, taudi si gwanegwane ta si onamugimugi; gea‘abo nai tomota si da ‘ebesa ‘idi Eaubada ‘enaia? Maiawasidi manuna si da ‘ebesa nai to mwawasa ‘edia?

²⁰ Loina ‘ena ta ona ‘ebe‘ita ‘ena ta da tauia! ‘abo nigea si da gwae ona gete na‘ieana, nigea ‘ai‘aila ‘e bweu gonagona manudi.

²¹ Ta si da rubwarena, mwaumwau sinabwana ta botana: ta gete ‘i da apwesa, ‘ena si da botana, si da ‘eeiabedi taudi, ta si da elia ‘idi king ‘enega ta ‘idi Eaubada ‘enega, ta maninidi si da gisanatu‘e:

²² Ta bare‘u ‘ena si da ‘ita‘ita, ta wa ‘ita, ‘ate‘uia‘uia ta guguioi, elo‘uia ‘ina guguioi; ta si da pa‘iiauledi guguioi badona ‘enaia.