Isaia 5 - Buki Tabu Lowaenei 1919

‘UPWA 5.

¹ Tauna ia obobomena sinabwana manuna ‘igu oboobobomina ‘ina wari ia da wariei ‘ina bagura‐oine manuna. Tauna ia obobomena sinabwana ma‘ina bagura oine ‘oea ua loebwaina ‘enaia:

² Ta ‘i sala sakowasiena, ta ‘ina gurewa ‘enega ‘i egogonedi, ta oine bobo‘ai‘ailina ‘ena ‘i asona, ta anua ‘etosorana i ‘abina gamwagamwanaia, ta wate oine ‘ina ‘ebedai ‘ena ‘i tai: ta i ‘ita ‘aene oine uana ‘i da uaua, ta ua mitawa ‘i uaua.

³ Ta gete ‘enega, Ierusalema ‘ana tomia ta Iuda ‘ina tai, ia sidemi, wa da etara, ‘abo‘agu ‘eguia ta ‘igu bagura‐oine ‘enaia.

⁴ To‘ase wate si da guinua ‘igu bagura‐oine ‘enaia, ta ‘abo‘agu nigea ia guinuena? To‘ase manuna, ‘ena ia ‘ita be oine uana ‘i da uaua, ga ua mitawa ‘i uaua?

⁵ Ta gete ‘enega wa da nono; iage ia da guinua ‘igu baguraoine ‘enaia ia da simana ‘emia: ‘ana ‘ari tabwatabwana ia da ‘ewena, ta si da e‘egumwarina; ‘ana ‘ari ia da wearina, ta si da ‘aiaina:

⁶ Ta ia da loegumwarina; gea‘abo si da ‘upwa‘upwa narina nai si da gesoa; ta kaiwe dakadakadi be kwakwakwara si da tabwa: wate poana ia da loinedi be gea‘abo si da ‘usa‘usana ‘enaia.

⁷ Bodao ‘idi Ieoba ‘ina bagura‐oine tauna Iseraela ‘ina susu ta ‘enega, ta tai me Iuda ‘ina kaiwe ‘ana ‘ita bobo‘ana: ta etara manuna i ‘ita, ta wa ‘ita! unua; bubuna paruparu manuna, ta wa ‘ita! bwau.

⁸ Oioi ‘edia anua si tubwe anua ‘enaia, bagura si sa‘u bagura ‘enaia, ga nigea ‘e bweu ‘ebemia namo, ta wa mia tebweuna ‘asa gamwanaia!

⁹ Bodao ‘idi Ieoba tenagu ‘edia ‘i gwae, Ona ‘ai‘aila anua iauiauna si da waborebore, tuga sinabwadi ta ‘adi ‘ita bobo‘ana, nigea ‘e bweu to mia.

¹⁰ Bagura Oine eka ‘e tenigaeba ‘e bweuna si da uaua, ta atuna omera ‘e bweuna epa ‘e bweuna ‘i da uaua.

¹¹ Oioi ‘edia si tooro manini gonagonaia, be boasi pa‘arina si da muria; taudi si mia lia boiboi ‘enaia, ga oine manuna si iaiiai!

¹² Ta api ta biola, sinaa ta lololi, ta oine, ‘idi sagari ‘edia si miami: ta Ieoba ‘ina guinua nigea si ‘amaiabena, nai nimana ‘ina guinua si da nuena.

¹³ Ta ‘enega ‘igu tomota si tauia ‘ebeiona ‘enaia, ‘idi mwaramwaratoni nigea ta ‘enega: ta ‘idi tai esaesa si botana, ta ‘idi boda tonaadi ‘i iapasa.

¹⁴ Ta ‘enega Seola ‘ina gewagewana ‘i sinabwa, ta ‘awana i ‘ebari toilina: ta ‘idi esaesa, ta ‘idi boda, ta ‘idi gagasa, ta tauna ‘i guausoara ‘edia, ‘ena si mwa‘uta.

¹⁵ Ta tai gomabeso i ‘opu‘opu, ta tai sinabwana ‘i mwa‘uta, ta to ‘ita tu‘e matadi si sana mwa‘uta:

¹⁶ Ta bodao ‘idi Ieoba ‘i mia tu‘e loina ‘enega, ta Eaubada tauna Tabu Tebweuna ‘i etabuna bubuna paruparu ‘enega.

¹⁷ Ga lamiao si da ‘e‘ai na‘ieana ‘adi pwatura ‘enaia, ta taudi si momonana ‘idi esena miadaita to‘u‘umara si da ‘enina.

¹⁸ Oioi ‘edia bubuna bokobokona si lisina bubuna besobeso ‘ana marakwega, ta loegesi ‘atua wagalisilisi ‘ana baraeega:

¹⁹ Taudi si gwae, ‘I da lomanini, ‘ina guinua ‘i da lomaniniena be ta da ‘ita: ta Iseraela ‘ina Tabu Tebweuna ‘ina nuena ‘i da doroma ta ‘i da mai, be ta da mwaratonina!

²⁰ Oioi ‘edia to‘umalina si ‘awabobo‘ana, ta bobo‘ana si ‘awato‘umalina; taudi guguioi si sa‘u ma‘edana ‘ana lopaeru, ta ma‘edana si sa‘u guguioi ‘ana lopa‘eru; taudi darere si sa‘u dibidibi ‘ana lopa‘eru, ta dibidibi si sa‘u darere ‘ana lopa‘eru!

²¹ Oioi ‘edia matadia taudi si sinasinapu, ta matadia taudi si nuanuasabwarena!

²² Oioi ‘edia si ewaiwai sabi numa oine, ta tai waiwaidi sabi ‘ilia boasi pa‘arina:

²³ Taudi to to‘umalidi si ‘awaparuparu e‘isa manuna, ta to paruparu ‘ina bubuna paruparu ‘enega si ‘ewena!

²⁴ Ta ‘enega na‘ieana awe meiana sumwana ‘i e‘egumwarina, ta na‘ieana nedu iadaiadana ‘i mwa‘uta awe sabelulu ‘ena, na‘ieana ramudi ‘i da bila ‘atua, ta senidi ‘i da tu‘e kau ‘atua: bodao ‘idi Ieoba ‘ina loina si e‘idi‘idiena ta ‘enega, ta Iseraela ‘ina Tabu Tebweuna ‘ina ona si sinarina.

²⁵ Ta ‘enega Ieoba ‘ina gamwasoara i ‘ara‘arata ‘ina tomota ‘edia, ta ni‘atu nimana ‘i gilagasina ‘edia, ta ‘i unudi, ta ‘oea gidaridi si dedera, ta ‘idi kokoao si esumwana ‘atua ‘eda gamwagamwanidia. Iage maibo‘ana gete manuna ‘ina gamwasoara nigea ‘i sana‘ilawa, ta nimana ‘i iasitoto ‘ataena.

²⁶ Ta doe ‘i da gilagasi ‘ebeloinao ‘edia ‘edasorega, ta manudi ‘i da losisi bare‘u ‘ana ‘ebelosaroniega: ta, wa ‘ita, si da pili maninima:

²⁷ Nigea ‘e bweu ‘ediega ‘i da lo‘ame‘ame nai ‘i da setupe; nigea ‘e bweu matana ‘i da losaduduna nai ‘i da ‘enomwataia; tolobwadi ‘adi gadiwana gea‘abo ‘i da loli‘ami, nai ‘adi ‘aeiapaiapa ‘adi ‘etoepa‘i ‘i da lasa:

²⁸ Taudi ‘idi gitao si mamatana, ta ‘adi tupu iauiauna si kokomi; ‘idi ose ‘aeiapaiapadi si da sawedi ‘aene nadigega ginausa, ta ‘idi wila nadigega bwawabwawa:

²⁹ ‘Idi bwau toila ‘i da, nadigega laione, si da bwau toila ‘atua laione menonoiadi: tamo, si da bwau toila, ta to esilae ‘ena si da giiaina, ta si da ‘ewa iaulei ‘ai‘aila, ta gea‘abo ‘e bweu ‘i da ‘eto‘etoseana.

³⁰ Ta si da bwautoila ‘edia asiata gote ‘enega nadigega ora ‘ana dududu: ta ‘abo ‘e bweu ‘asa ‘ena i ‘ita, wa ‘ita guguioi ta elo‘uia, ta ma‘edana ‘i guguioi ‘ana poanao ‘edia.