Isaia 3 - Buki Tabu Lowaenei 1919

‘UPWA 3.

¹ Wa ‘ita, ta enega, ‘Inapwana, bodao ‘idi Ieoba, Ierusalemega ta Iudega ‘ebeleme ta ‘ebe‘emisa i ‘ewedi, ‘ebeleme‐masura maiboa‘na, ta ‘ebeleme‐boasi maibo‘ana;

² Tai waiwaina, be tai tolosaia; to loina, paropita be, to oba be, ‘ina‘inapwanina be;

³ Pipiti ‘idi kapeteni, tai loesaesana be, to ona leme be, toguinua panapana‘isina be, to oba sinasinapuna be.

⁴ Ta gogama ia da ‘ebwaeaedi ‘idi ‘inapwanao, ta meameadi si da loinedi.

⁵ Ta tomota si da miamia mwaumwau, mari tai mari tai ‘enega, ta ‘e bweuna ‘e bweuna gosiana ‘enega; goama ‘i da bubuna gagasa ‘ina‘inapwana matanaia, ta tai besobeso to esaesa matanaia.

⁶ Tuta ‘enega tai tasina ‘i da giiaina tamana ‘ina anua ‘enaia, ta ‘i gwae, ‘Oio ma‘amu ‘oama, ‘u da ‘ima toloina, ta saoora gete nimaio ‘ubuninaia:

⁷ Asiata gote ‘enega ‘i da ‘arabwau, ‘i da gwae, ‘Abo‘agu gea‘abo ia da ‘e to‐gile‘oasa; Nigea ‘e bweu masura nai ‘oama ‘igu anua ‘enaia ta ‘enega: gea‘abo wa da bubugu be ‘abo‘agu tomota ‘idi to‐loina.

⁸ Ierusalema ‘i saoora ta ‘enega, ta Iuda ‘i be‘u: meiadi ta ‘idi bubuna si tooro Ieoba matanaia ta ‘enega, be ‘ina esaesa matana si da gieiabadi.

⁹ Maninidi ‘adi ‘ita tauna to‐‘ita ‘edia; ta ‘idi loegesi si simana Sodoma ‘atua, nigea si sa‘u kwaia. Oioi iaruiaruadi ‘enaia! Bubuna to‘umalina si e‘isa taudimo ‘edia ta ‘enega.

¹⁰ To paruparu ‘ena ‘u da gwae, ‘i da mia bobo‘ana: ‘idi bubuna uanega si da ‘e‘ai ta ‘enega.

¹¹ Oioi to to‘umali ‘enaia! ‘i da mia to‘umalina: nimana ‘adi e‘isa si da bubuna ‘enaia ta ‘enega.

¹² Ta ‘igu tomota manudi, gogama si unuedi, ta iine si loinaedi. ‘Igu tomota ie, taudi si nuganeio si gieloegesiemi, ta ‘imu ‘eda ‘aredi si giesaooridi.

¹³ Ieoba ‘i tooro sabi onaona, ta ‘i tooro be tomota ‘i loinedi.

¹⁴ Ieoba ‘i da etara ‘ina tomota ‘idi to nuganao ma‘edi, ta ‘ina ‘inapwanao ma‘edi: ‘Omi baguraoine wa e‘e gumwarina; gomabeso ‘idi gwegwe ‘oae‘oaena ‘imi anua ‘edia ‘i miami:

¹⁵ To‘ase ‘imi nuanua ‘igu tomota wa e‘upwe‘upwedi ta gomabeso maninidi wa dai? ‘Inapwana, Bodao ‘idi Ieoba, ‘i gwae.

¹⁶ Wate Ieoba ‘i gwae, Siona natunao me wainedi si gagasa manuna, ta si tautauia ‘oto dudura ta mata dunedune ‘ediega, si tautauia gigino ‘idi tauia, ta ‘aedi si kikokiko:

¹⁷ Ta ‘enega ‘Inapwana Siona natunao me wainedi deba gamwadi ‘i da ununa ‘isi‘isiega, ta Ieoba ‘idi esena kwaia ‘i da gieapwesedi.

¹⁸ Asiata gote ‘Inapwana ‘adi ‘aepasapasa ‘adi gagasa ‘i da ‘ewa iaulei, gomanao be, iaiara mwe‘imwe‘iinao be;

¹⁹ bagiao be, nimapasapasao be, lobodabodaiao be;

²⁰ peaulao be, ‘aekuku ‘adi iaiara be, gadiwanao be, ani madedewaganao be, iaiara tabetabedi be;

²¹ mwe‘imwe‘iidiao be, mwauu be;

²² sagari ‘ana dobeao be; pinapoao be, tara‘apwarao be, tanao be;

²³ ma‘ama‘aiau kapekapeadi be, kaleko matagidara be, deba ‘ana ‘ebepaimaiao be, ‘aubodabodao be.

²⁴ Ta gete ‘i da apwesa, mu‘ana dibidibi ‘adi lopa‘eru bila; ta gadiwana ‘ana lopa‘eru barae; ta uiauia pa‘arina ‘ana lopa‘eru debadebana; ta gadiwana bababana ‘ana lopa‘eru gadiwana ‘oausa: ‘ita bobo‘ana ‘ana lopa‘eru ‘ara‘arasina.

²⁵ ‘Imu tai si da be‘u sisi‐saiega, ta ‘imu waiwai saia ‘ena.

²⁶ Ta ‘ari ‘ana ‘auboda si da dedoi ta si da ‘ewabamu; ta tauna ‘i da waborebore ta bare‘uia ‘i da miatoa.