E'ita'ita 7 - Loina Tabu Auwauna NT

Me Isileli debadiya Yaubada 'ana we'iwe'iyaya situtu epa'iyena

¹ Yage gete mulinaya aniloseyao ata ya'itedi sitootoolo bale'u senanao 'adi yau ata 'ediya. Anilose nidi yagila 'adi yau ata sigiyaidi be 'aene geya'abo bale'uya nai olaya nai kaiwe 'ediya sitowatowa,

² manuna gete Yaubada 'ina tagwala be 'aene yagila nidi bale'u be ola sida gieto'umaliyedi. 'Enega 'ebweu wate anilose ya'itena sinala 'ina 'ebesae 'enega 'imeemai ma ina 'ebe tu'epa'i be 'aene Yaubada miyamiya atayana 'ana we'iwe'iyaya 'ida sa'u tomota debadiya. Anilose nina 'ibwau anilose ata nidi 'ediya,

³ 'igwae, “Geya'abo bale'u nai ola nai kaiweyao wagiegie to'umaliyedi 'ana laba 'ida Yaubada 'ina toguinuwao 'adi we'iwe'iyaya 'ada sa'u debadiya.”

⁴ 'Enega we'iwe'iyaya nina sisa'una 'aina me Isileli debadiya, ga muliyega me Isileli nidi 'adi yau yanonodi, nate wani analedi be potipowa tausani 'ana maibo'ana, boda Isileli nidi 'ediyega.

⁵ Susu Yuda 'ediyega we'iwe'iyaya nina tomota tuwelo tausani debadiya sisa'una, be Lubeni tuwelo tausani, be Gada tuwelo tausani,

⁶ wate Aseli tuwelo tausani, be Napitalai tuwelo tausani, be Manase tuwelo tausani,

⁷ wate Simioni tuwelo tausani, be Libai tuwelo tausani, be Isaka tuwelo tausani,

⁸ wate Sebuloni tuwelo tausani, be Yosepa tuwelo tausani, be wate Beniamina tuwelo tausani.

Pwalu sinabwa wawasae

⁹ Muliyega, yadunedune ga pwalu sinabwa wawasae ya'itedi, nigeya aisawa. Tomota nidi 'ebeloina 'ebweuna 'ebweuna 'ediyega, be susu 'ebweuna 'ebweuna 'ediyega be boda 'ebweuna 'ebweuna 'ediyega be 'enana 'ebweuna 'ebweuna 'ediyega, maibo'adi 'ebemi esaesa matanaya be wate Lami matanaya sitootoolo ma 'adi 'oama wakewakekedi, ta magimagi yawadi sigiyaidi,

¹⁰ ga 'enadi sinabwanega sibwaubwau, sigwae, “'Ada 'etoseyana 'ida Yaubada 'enega, tauna 'ebemi esaesa 'ena 'imiyatowa, ta wate Lami nina 'enega.”

¹¹ Ga aniloseyao nidi 'ebemi esaesa nina be wate 'inapwanao nidi be yobai nidi ata sitoolo sakowasiyedi, ga maibo'adi sibe'u sanamwa'uta ga Yaubada 'ena sibwagobwago,

¹² sigwaegwae, “Ona'ai'aila, 'ida Yaubada nina 'ena tada lotuputupu, be 'awa esaesa be mwalatoi be lokagutoki be 'amayaba be waiwai sida miyaataya 'enaya.”

¹³ 'Enega 'inapwanao nidi 'ediyega 'ebweuna 'ienaida 'eguya, 'igwae, “Yaisigedi getedi ma 'adi 'oama wakewakekedi? Ta mane 'enega simai?”

¹⁴ Ga 'ena yagwae, “'Inapwana 'oyo 'umwalamwalatonidi, 'abo'agu nigeya.” 'Enega 'ieonegu, 'igwae, “Gete tomota nidi bale'u 'elouyanao 'ediyega situpwa, ta 'adi 'oamao nidi Lami nina lalanega si'utudi ga siwakekedi.

¹⁵ Nate 'alena 'enega Yaubada 'ina 'ebemi esaesa matanaya simiyami, ta 'asiyata be boiboi 'ediya 'ina guinuwao siguiguinuwedi 'ina Anuwa Tabu solanaya. Ta wate Yaubada nina 'ina 'ebemi esaesa 'ena 'imiyatowa, tauna 'ida 'ita'i'isidi,

¹⁶ be geya'abo wate sibotabotana nai tona'adi 'iyapayapasa, ta geya'abo wate ala nai to'ase yaiyaina 'enega si'elo'elouya.

¹⁷ Manuna Lami nina, tauna 'ebemi esaesa solanaya 'imiyami, tauna 'adi to'ita'i'ita, be 'enega 'ida anuganedi bwasi bobo'adi 'ediya, yawasidi manuna, ta Yaubada tauna mataseludi 'ida lo'i'ilidi.”