Ebire 1 - Diiloŋ-nelma Tobisĩfɛlɛnni

Diiloŋo puɔraa u Biɛŋo‑i baa u nuŋ-ãndaaŋgu‑i

¹ Yiinaa‑i-na, Diiloŋo taa u ce u *pɔpuɔrbiemba yaa ta ba piiye baa i bĩncuɔmba‑i. Baŋ piiye baa-ba ku yuu niele, aa ba piiye baa-ba sĩnni bɔi-na.

² Ŋga fiɛfiɛ‑i-na, yiperieŋ daani-na, u ciɛ u Biɛŋo yaa piiye baa-ye. Diiloŋo curaa baa u yaa‑i a hiel miwaaŋo‑i, aa bir bĩmbĩnni‑i hiere dii u naŋ-na.

³ Diiloŋo bɔbɔima da u yaa nuɔ‑i, u fũnuŋ ko Tuoŋo‑i. U nuŋ-ãndaaŋgu dii baa fɔ̃ŋgũɔ. U bilaaya bĩmbĩnni‑i hiere baa ku yaa‑i. U pirii nelbiliemba ãmbabalma‑i aa nyugũŋ ka tĩɛna Diiloŋo‑i Wɛimantieŋo caaŋ-nu dii dɔrɔ‑i-na.

⁴ Diiloŋ-Biɛŋoŋ maaraa *dɔrpɔpuɔrbiemba‑i dumaa, u yerre bi maaraa ba yirɛiŋa‑i dumɛi.

Diiloŋ-Biɛŋo maaraa dɔrpɔpuɔrbiemba‑i

⁵ Na daa Diiloŋo gbĩɛ *dɔrpɔpuɔrbiloŋ hayo‑i dede wuɔ: «Mi Biɛŋo yaa nuɔŋo‑i. Muɔmɛi huɔŋ-ni nyuŋgo‑i-na.» Sisɔ u piiye dɔrpɔpuɔrbiloŋ hayo‑i maama‑i dede wuɔ: «Mi ka ce u To muɔ, u ka waa mi biɛŋo.» Na nuɔ-ma dede wɛi?

⁶ Ŋga uŋ'a u saaŋ u Bɛpoldĩɛlãŋo‑i hĩɛma-na, u ciɛra wuɔ: «Dɔrpɔpuɔrbiemba‑i hiere ba ta ba dũuna ba jaal-o.»

⁷ Uŋ waaŋ mamaŋ dɔrpɔpuɔrbiemba kũŋgu-na, u ciɛra wuɔ: «Mi gbãa ce mi dɔrpɔpuɔrbiemba bir fafalmu, mi gbãa ce mi maacembiemba bir dãamu.»

⁸ Ŋga u Biɛŋo kũŋgu-na, u ciɛra: «Nuɔŋo‑i Diiloŋ nuɔ, ŋ yuntesĩnni dii gbula. Ŋ sa ce ŋ fãamaansĩnni‑i baa huhurma.

⁹ Kumaŋ vii, ku yaa dɔlaanuŋ-niɛ, ŋ bigãaŋ ãmbabalma fuɔ. Diilo, ku'i ciɛ ŋ Diiloŋo hiel nuɔnɛi ŋ nabaamba hɔlma-na a hure namma‑i niɛ a ce-ni nelbuɔ nuɔ a fɛ̃ ŋ huɔŋga‑i.»

¹⁰ U bi tiraa cira: «Itie, nuɔnɛi hielaa hĩɛma‑i dii ku domma-na, naŋ fɛrɛŋ nammu yaa maa dɔrɔ‑i.

¹¹ Nifanni‑i daani‑i hiere ni ka gbuo, ŋga nuɔ fuɔ ŋ sa ji gbuo dede. Ni ka vãa hiere ŋaa kompammu.

¹² Ŋ ka pumannu-niɛ ŋaa baŋ pumannuŋ joŋgoruo dumaa jĩna kɔtuɔŋgu. Ŋ ka hor-ni ŋaa baŋ hor niidiini dumaa. Ŋga nuɔ nii dii ŋ temma‑i ŋ sa ji kã terieŋgu.»

¹³ Diiloŋo gbĩɛ dɔrpɔpuɔrbiloŋ hayo‑i dede wuɔ: «Jo ŋ ji tĩɛna mi caaŋ-nu; aa ŋ yaŋ mi mal ŋ bigãarãamba‑i hã ŋ ce ŋ bãaŋgu‑i bɛi.»

¹⁴ Dɔrpɔpuɔrbiemba dii yoŋ ta ba ce Diiloŋo maacemma; molo sa da ba yufelle. Diiloŋo puɔr-ba ba ta ba jo ba kãyã uŋ ka kor bamaŋ.