யோவானு 10 - Moundadan Chetty

ஆடும், ஆடுமேசாவனும்

¹ “நா நிங்களகூடெ ஒறப்பாயிற்றெ ஹளுதாப்புது; ஆடு கொட்டாயிக பாகுலுகூடி ஒளெயெ ஹுக்காதெ பேறெ பட்டெகூடி ஹுக்காவாங் கள்ளனும், கொள்ளெக்காறனும் தென்னெயாப்புது.

² பாகுலுகூடி ஹுக்காவனாப்புது ஆடின ஒடமஸ்தனும் மேசாவனுமாயி இப்பாவாங்.

³ காவல்காறங் அவங்ங பாகுலு தொறதுகொடுவாங்; அவன ஒச்செத ஆடு திரிச்சறிகு; அவங் தன்ன ஆடின ஹெசறு எத்தி ஊது ஹொறெயெ கூட்டிண்டுஹோப்பாங்.

⁴ அவங் தன்ன ஆடின ஒக்க ஹொறெயெ கூட்டிண்டுஹோயிட்டு, அதன முந்தோடெ ஹோப்பாங், ஆடுகூட்ட அவன ஹிந்தோடெ ஹோக்கு; ஏனாக ஹளிங்ங, ஆடிக அவன ஒச்செ கொத்துட்டு.

⁵ அறியாத்த ஒப்பன ஹிந்தாக ஆடு ஹோக; அவன கண்டங்ஙே அவெ ஓடுகு; ஏனாக ஹளிங்ங அவன ஒச்செ அவேக கொத்தில்லல்லோ!”

⁶ ஏசு இந்த்தெ ஒந்து கதெ ஹளா ஹாற ஆக்களகூடெ கூட்டகூடிதாங்; எந்நங்ங ஏசு ஹளிதன அர்த்த ஆக்க மனசிலுமாடிபில்லெ.

ஏசு தென்னெ, ஒள்ளெமேசாவாங்

⁷ ஹிந்திகும் ஏசு ஆக்களகூடெ, “ஆடுகூட்ட எல்லதங்ஙும் நா தென்னெ பாகுலு ஹளி ஒறப்பாயிற்றெ ஹளுதாப்புது.

⁸ நன்னமுச்செ பந்தாக்க ஒக்க கள்ளம்மாரும், கொள்ளெக்காரும் ஆப்புது; அதுகொண்டாப்புது ஆடு ஆக்கள ஒச்செத கேளாத்துது.

⁹ நா தென்னெ பாகுலு; நன்னகூடி ஒளெயெ ஹுக்காவாங் ரெட்ச்செபடுவாங்; அவங் ஒளெயும் ஹொறெயும் ஹோயி, ஜீவுசத்தெ ஆவிசெ உள்ளுதொக்க கண்டுஹிடுத்தம்ம.

¹⁰ கள்ளங் பொப்புது, கள்ளத்தெகும், கொலெ கீவத்தெகும், நாசமாடத்தெகும் ஆப்புது, அல்லாதெ பேறெ ஒந்நங்ஙும் அல்ல; எந்நங்ங ஆடின ஹாற இப்பா நிங்காக ஜீவித தப்பத்தெகும், ஆ ஜீவித பூரணமாயிற்றெ தப்பத்தெகும் ஆப்புது நா பந்திப்புது.

¹¹ ஆடின ஒக்க காப்பத்தெபேக்காயி தன்ன ஜீவதகூடிங் கொடாவனாப்புது ஒள்ளெமேசாவாங்; ஆ ஒள்ளெமேசாவாங் நா தென்னெயாப்புது.

¹² கூலிகபேக்காயி மேசாவாங், செந்நாயெ பொப்புது கண்டட்டு ஆடின ஒக்க அல்லிதென்னெ புட்டட்டு ஓடியுடுவாங்; அம்மங்ங செந்நாயெ ஆடின கச்சிகீறி கொல்லுகு; ஏனாக ஹளிங்ங, அவங் ஒள்ளெ மேசாவனும் அல்ல, ஆடு அவந்தும் அல்ல.

¹³ கூலிக்காறங் கூலிகபேக்காயி மேசுதுகொண்டு ஆடினபற்றி ஒந்து பேஜாரும் இல்லெ; அவங் ஆடின அல்லிதென்னெ புட்டட்டு ஓடியுடுவாங்.

^14-15 நானாப்புது ஒள்ளெமேசாவாங்; அப்பாங் நன்ன அருதிப்பாஹாரும், நா அப்பன அருதிப்பாஹாரும், நன்ன ஆடினபற்றி நனங்ஙும் கொத்துட்டு; நன்ன ஆடிக நன்னபற்றியும் கொத்துட்டு; அதுகொண்டு நா அதங்ஙபேக்காயி நன்ன ஜீவதும் கொடத்தெ தயாராயி இத்தீனெ.

¹⁶ ஈ கொட்டாயாளெ மாத்ற அல்ல பேறெ ஆடும் நனங்ங உட்டு; அது எல்லதனும் நனங்ங ஒந்தாயி கூட்டுக்கு; அதொக்க நா ஹளுதன கேளுகு; அம்மங்ங எல்லதும் ஒப்பனே மேசா ஹாற உள்ளா ஒந்தே ஆடுகூட்ட ஆக்கு.

¹⁷ நன்ன ஜீவங் நனங்ங திரிச்சும் கிட்டத்தெபேக்காயி, நன்ன ஜீவன நா கொட்டீனெ; அதுகொண்டு நன்ன அப்பாங் நன்னமேலெ சினேகமாயிற்றெ இத்தீனெ.

¹⁸ நன்ன ஜீவத நன்னகையிந்த ஒப்பனும் எத்தத்தெ பற்ற; நா நன்ன சொந்த இஷ்டப்பிரகார அதன கொடுதாப்புது; ஜீவத கொடத்தெகும் நனங்ங அதிகார உட்டு, அதன திரிச்சு எத்தத்தெகும் நனங்ங அதிகார உட்டு. ஈ நேமத நன்ன அப்பாங் நனங்ங தந்துதாப்புது” ஹளி ஹளிதாங்.

¹⁹ ஏசு ஹளிதா ஈ வாக்கினகொண்டு யூதம்மாரா எடேக ஹிந்திகும் ஜெகள உட்டாத்து.

²⁰ ஆக்களாளெ கொறே ஆள்க்காரு “இவங் பேயி ஹிடுத்தாவனாப்புது, ஹுச்சு ஹிடுத்தாவனாப்புது, இவங் ஹளுது ஏனாக கேளுது?” ஹளி ஹளிரு.

²¹ பேறெ செலாக்க, “பேயி ஹிடுத்தாவன கூட்ட இந்த்தெ உட்டாக, பேயி எந்த்தெ குருடங்ங காழ்ச்செ கொடத்தெபற்றுகு?” ஹளி ஹளிரு.

ஏசின பேட ஹளி தள்ளுது

²² அதுகளிஞட்டு, எருசலேமாளெ அம்பல சுத்திகரணத ஓர்மெபடுசா உல்சாக பந்துத்து; அது மளெகாலதாளெ ஆயித்து.

²³ ஏசு அம்பலதாளெ சாலமோன் மண்டகதாளெ நெடதண்டித்தாங்.

²⁴ அம்மங்ங யூதம்மாரு ஏசின சுத்தூடும் பந்து நிந்தட்டு, “எல்லட்ட நங்க காத்திருக்கு? நீ கிறிஸ்து ஆயித்தங்ங நங்காக அதன தெளிவாயிற்றெ ஹளு” ஹளி ஹளிரு.

²⁵ ஏசு ஆக்களகூடெ, “நா நிங்களகூடெ நேரத்தே ஹளிதிங்; நிங்க நம்பிப்பில்லெ; நன்ன அப்பன அதிகாரதாளெ நா கீவா காரெ தென்னெயாப்புது நன்னபற்றிட்டுள்ளா சாட்ச்சி.

²⁶ நிங்க நன்ன ஆடு அல்லாத்துதுகொண்டு நன்ன நம்புதில்லெ.

²⁷ நன்ன ஆடு நன்ன வாக்கின அனிசரிசி நெடதாதெ; நா அவெ எல்லதனும் அருதுபீத்து ஹடதெ; அவெ ஒக்க நன்ன ஹிந்தோடெ பந்தாதெ.

²⁸ நா அவேக நித்திய ஜீவித கொட்டீனெ; அது ஒரிக்கிலும் நசிச்சு ஹோக; நன்ன ஆடின ஒப்புரும் நன்னகையிந்த ஹிடுத்துபறிச்சு கொண்டுஹோகாரு.

²⁹ ஈ ஆடின நனங்ங தந்தா நன்ன அப்பாங் எல்லாரினகாட்டிலும் தொட்டாவனாப்புது; அவேத நன்ன அப்பனகையிந்த ஒப்புரும் ஹிடுத்துபறிச்சு கொண்டுஹோப்பத்தெ பற்ற.

³⁰ நானும் நன்ன அப்பனும் ஒந்தே ஹாற தென்னெயாப்புது இப்புது” ஹளி ஏசு ஹளிதாங்.

³¹ அம்மங்ங யூதம்மாரு, ஏசினமேலெ எறிவத்தெ பேக்காயி, ஹிந்திகும் கல்லு எத்திரு.

³² ஏசு ஆக்களகூடெ, “நன்ன அப்பாங் ஹளிதந்தா ஹாற ஒந்துபாடு ஒள்ளெ காரெத நா நிங்காக கீதிங், அதனாளெ ஏது காரேக பேக்காயிற்றெ நிங்க நன்னமேலெ கல்லெறிவத்தெ நோடுது?” ஹளி கேட்டாங்.

³³ அம்மங்ங யூதம்மாரு ஏசினகூடெ, “ஒள்ளெ காரெ கீதுதுகொண்டல்ல, நீ நின்ன தெய்வாக சமமாயிற்றெ மாடி, தெய்வத மதிப்பின கொறச்சுட்டெ; அதங்ங பேக்காயிற்றெ ஆப்புது நின்னமேலெ கல்லெறிவுது; நீ மனுஷனாயி இப்பங்ங நின்னும் தெய்வ ஹளி ஹளுது எந்த்தெ?” ஹளி ஹளிரு.

³⁴ ஏசு ஆக்களகூடெ, “நிங்களும் தெய்வங்ஙளாப்புது ஹளி நா ஹளிதிங் ஹளி நிங்கள நேமதாளெ எளிதி ஹடதெயல்லோ?

³⁵ தெய்வத வாக்கு சீகரிசிதாக்க தெய்வங்ஙளாப்புது ஹளி தெய்வதென்னெ ஹளிஹடதெ; தெய்வத புஸ்தகதாளெ எளிதிப்பா வாக்கு ஒரிக்கிலும் நசிச்சுஹோகல்லோ!

³⁶ அந்த்தெ இப்பங்ங, அப்பாங் நன்ன தெரெஞ்ஞெத்தி, ஈ லோகாக ஹளாய்ச்சுதுகொண்டும், ‘நா தெய்வத மங்ஙனாப்புது’ ஹளி ஹளிதுகொண்டும், ‘நீ தெய்வத மதிப்பு கொறச்சுட்டெ’ ஹளி நிங்க ஹளுது ஏனாக?

³⁷ நன்ன அப்பாங் ஹளிதா காரெ நா கீதுபில்லிங்ஙி நிங்க நன்ன நம்பத்துள்ளா ஆவிசெ இல்லெ.

³⁸ நன்ன அப்பாங் ஹளிதா காரெ நா கீதிப்பங்ங, நிங்க நன்ன நம்பித்தில்லிங்ஙிலுங்கூடி நா கீதா காரெத ஆதங்ஙும் நம்பிவா; அதனகொண்டு அப்பாங் நன்னகூடெ இப்புதும், நா அப்பனகூடெ இப்புதும் நிங்காக மனசிலாக்கு” ஹளி ஹளிதாங்.

³⁹ அது கேட்டட்டு ஆக்க ஹிந்திகும் ஏசின ஹிடிப்பத்தெ நோடிரு; எந்நங்ங ஏசு ஆக்களகையி குடுங்ஙாதெ அல்லிந்த ஹோயுட்டாங்.

⁴⁰ எந்தட்டு ஏசு, நேரத்தெ யோர்தான் பொளெத அக்கரெ யோவானு ஸ்நானகர்ம கீதுகொட்டண்டித்தா சலாக ஹிந்திகும் ஹோயி அல்லி தங்கிதாங்.

⁴¹ பல ஆள்க்காரும் ஏசினப்படெ பந்துரு; “யோவானு ஒந்து அல்புதும் கீதுபில்லெ; எந்நங்ங அவங், ஈ ஏசினபற்றி ஹளிது ஒக்க நேருதென்னெ ஆப்புது” ஹளி ஆக்க கூட்டகூடிண்டித்துரு.

⁴² அல்லி பந்தா பலரும் ஏசினமேலெ நம்பிக்கெ பீத்துரு.