Lucas 7 - Lalang Hu Dios

Sa Pagbulung Hu Suluguen Hu Kapitan

¹ Su makapenga si Jesus mag-ikagi duun hu mga etaw duminiyà dayun ta Capernaum.

² Amin diyà kapitan hu sundalu ta Roma na amin din pinalanggà ha suluguen ha apit en gayed agpatay hu dalu.

³ Su mapaliman ku kapitan sa mahitenged ki Jesus pinasuguan din haena hu mga magulang ha Judio ta daw mahangyù dan ha bulungen din haena sa suluguen.

⁴ Su makauma sidan diyà ki Jesus pinagayukan dan haena hu kagi dan, “Saini ha kapitan hu sundalu angayan ha buligan nu

⁵ ta palanggà kuy kandin sikuy sa mga Judio daw binuhatan kuy hu simbahan.”

⁶ Aman duminuma si Jesus kandan. Ba su ubay en sidan diyà ta balay amin impasal-aw kandan ku kapitan ta daw maikagiyan si Jesus, “Ginuu, bay-an kad agdayun ta agkagayhà a ku dumini ka ta balay ku

⁷ daw kenà a daan angayan hu pagdiyan ta ikaw. Ba bà nu dà ikagiya ha maulian en haini sa suluguen ku.

⁸ Natun-an ku ha mahimu nu haini ta siak suluguen a daan hu agalen ku ha sundalu daw amin daan mga sundalu ha sakup ku. Ku ipahipanaw ku sidan agtuu gayed sidan. Bisan inu sa igsugù ku hu suluguen ku agbuhaten din daan haena.”

⁹ Su mapaliman haena hi Jesus nabeleng gayed dayun sumininalu duun hu mga kaet-etawan ha namanduma kandin daw migyanaen, “Ikagiyen ku inyu ha hurà ku pa gayed naahà duun hu mga kaliwatan hi Israel ha agkailing taini sa pagtuu din.”

¹⁰ Su makalikù en haena sa mga sinugù diyà ta balay naahà dan ha naulian en su suluguen.

Sa Pagkabanhaw Hu Batà

¹¹ Hurà kalugay duminuun si Jesus hu banuwa ha tagngaranan ta Nain daw namanduma daan sa mga tinun-an din daw sa madakel ha mga etaw.

¹² Su ubay en sidan ta pultahan ta kutà taena ha banuwa amin dan naahà ha taglanting hu minatay. Saena ha minatay maama ha sabubuwa dà ha batà hu bahi ha balu, daw madakel ha mga etaw duun taena ha banuwa sa namanduma kandin.

¹³ Su maahà hi Jesus su bahi ha balu nahid-uwan din aman inikagiyan din, “Harì ka tag-agalà.”

¹⁴ Dayun inubayan din haena sa lungun daw ibiti aman nakataleen su taglanting duun. Minikagi si Jesus, “Bangun kad.”

¹⁵ Migbangun haena sa minatay ha tag-ikagi en, dayun indiyà hi Jesus ki Inay din.

¹⁶ Sa alan ha mga etaw nangahaldek daw dinayè dan sa Dios ha tagyanaen, “Sa labaw ha prupita nakauma dini ta kanuy daw duminini sa Dios hu pagbulig hu mga etaw din.”

¹⁷ Saena ha tultulanen mahitenged ki Jesus nakalekep duun hu alan ha mga banuwa diyà ta Judea daw hu ubayà taena.

Si Jesus Daw Si Juan Ha Tagpamautismu

¹⁸ Tinultulan si Juan Ha Tagpamautismu hu mga sumusunud din mahitenged hu alan ha binuhat hi Jesus.

¹⁹ Aman inumaw hi Juan sa daruwa ha sumusunud din daw sugua diyà ki Jesus ha insaan dan, “Iyan kad ba haena su intagnà ha makauma dini ta kalibutan daw ku amin pa ba lain ha pagsalapen day?”

²⁰ Aman su makadiyà en sidan ki Jesus minikagi sidan, “Impadini kay hi Juan hu pag-insà ku iyan kad ba haena su intagnà ha makauma dini ta kalibutan daw ku amin pa ba lain ha pagsalapen day.”

²¹ Duun taena ha panahun naulian hi Jesus sa madakel ha mga etaw ha amin dan mga dalu daw binugaw din sa mga busaw ha tuminagù duun hu mga etaw daw amin daan mga buta ha nakaindan.

²² Aman tinubag sidan hi Jesus, “Likù kaw diyà ki Juan daw tultuli hu napaliman nuy daw hu naahà nuy ha binuhat ku. Saena iyan sa nakaindan sa mga buta daw nakahipanaw sa mga pigket, nangaulian sa mga sanglahen daw nakapaliman en daan sa mga bengel. Amin en daan nabanhaw ha minatay daw sa Maayad ha Tultulanen insangyaw en daan duun hu mga makaluluuy ha mga etaw.

²³ Malipayen gayed sa etaw ha harì tagduwa-duwa hu pagsalig din kanak.”

²⁴ Su umulì en haena sa mga sumusunud hi Juan inikagiyan hi Jesus sa mga kaet-etawan, “Inu sa tuyù nuy su dumiyà kaw ki Juan duun taena ha pinakabulung-bulung ha lugar? Duminiyà kaw ba hu pag-ahà hu etaw ha agkailing hu salaysay ha ku agkalamagen agkahuyung dà?

²⁵ Duminiyà kaw ba daan ta daw maahà nuy sa tungkay madagway ha pinaksuy din? Hurà gayed ta sa etaw ha tagpinaksuy hu madagway daw mahayahay sa pagtimà din duun taw dà agkaahà hu mga balay hu harì.

²⁶ Kenà ba iyan man inahà nuy diyà sa prupita? Laus gayed ha prupita si Juan daw labaw pa haena

²⁷ ta iyan en su sinubay duun hu insulat ha lalang hu Dios ha tagyanaen, ‘Igpauna ku dì ikaw ta daw makapangandam hu ag-agiyan nu.’

²⁸ Ikagiyen ku inyu ha duun taini ha kalibutan hurà en labaw dì ki Juan, ba bisan sa kinaminusan ha tagharian hu Dios labaw pa daan dì ki Juan.”

²⁹ Su mapaliman haena hu mga etaw alan sidan bisan sa mga manunukut hu buhis ha nabautismuwan en hi Juan nakakilala ha hustu gayed sa mga paagi hu Dios.

³⁰ Ba sa mga Parisiyu daw sa mga manunudlù hu Kasuguan hurà dan dawata sa katuyuan kandan hu Dios aman hurà daan sidan kabautismuwi su anay hi Juan.

³¹ Dayun minikagi si Jesus, “Inu man sa agpailingan ku inyu?

³² Agkailing kaw hu mga batà ha tag-alù-alù duun hu baligyaanan ha tag-ikagi duun hu mga duma dan, ‘Tagkanta kay ba bà su hurà nuy duun labet. Taglugul kay ba harì kaw tag-agalà hu inyu.’

³³ Su makauma si Juan Ha Tagpamautismu sa tagsalang hu pagkaen daw hurà inum hu binu inikagi nuy ha bà dà haena agkalibeg.

³⁴ Siak sa Batà hu Etaw sa harì tagsalang hu pagkaen daw pag-inum kagi nuy paman, ‘Ahà kaw tayana ha agapan daw beleng-beleng, sa mga amigu din mga limbungan ha mga manunukut hu buhis daw mga masinupaken.’

³⁵ Ba saena ha duminawat hu katudluanan ku daw hu ki Juan nakakilala ha hustu gayed sa mga paagi hu Dios.”

Si Jesus Diyà Ta Balay Hi Simon Sa Parisiyu

³⁶ Amin Parisiyu ha mig-imbita ki Jesus hu pagkaen diyà ta balay din aman duminiyà si Jesus ta kandin daw kaen.

³⁷ Amin bahi duun taena ha banuwa ha makasasalà gayed. Su mapaliman din ha si Jesus tagkaen duun hu balay taena ha Parisiyu duminiyà daan haena ha tag-uwit hu pahumut ha intagù duun hu butilya ha alabastru.

³⁸ Luminuhud su bahi ha tag-agalà diyà ki Jesus aman nalemeg sa paa hi Jesus hu mga luhà din. Tinarapuwan din sa paa hi Jesus ta buhuk din daw hadeki dayun hudhudi hu pahumut.

³⁹ Su maahà haena ku Parisiyu ha mig-imbita ki Jesus nakahenà-henà haena, “Ku laus pa haini ha prupita matun-an din en ngaay ha makasasalà gayed haini sa bahi ha mig-ibit kandin.”

⁴⁰ Ba inikagiyan haena hi Jesus, “Simon, amin ku ag-ikagiyen ikaw.” Tuminubag si Simon, “Manunudlù, inu man?”

⁴¹ Minikagi si Jesus, “Amin daruwa ha etaw ha suminambay hu salapì duun hu sapian ha etaw, sa sabuwa suminambay hu lalima ha gatus daw sa sabuwa kalimahan dà.

⁴² Hurà sidan makailis aman bà din en haena linipati en. Sin-u man kandan sa adagi gayed sa pagpalanggà din ku sapian?”

⁴³ Tuminubag si Simon, “Iyan gid haena sa adagi sa sambay din ha linipatan.” Tuminubag daan si Jesus, “Laus hayan.”

⁴⁴ Dayun uminahà si Jesus duun ku bahi daw ikagiyi si Simon, “Naahà nu ba haini sa bahi? Sumineled a dini ta balay nu ba hurà nu buhata sa sumalà ha naanadan taw. Hurà a ikaw ilahi hu wahig ha ighenaw ku ta paa ku, ba saini ha bahi hinenawan din sa paa ku hu luhà din daw tinarapuwan din ta buhuk din.

⁴⁵ Hurà a ikaw tahuri ta hurà ka hadek kanak sumalà hu naanadan taw, ba saini ha bahi su pagseled din dini pighadekan din sa paa ku.

⁴⁶ Hurà nu daan lanahi sa ulu ku, ba saini ha bahi inugsakan din hu pahumut sa paa ku.

⁴⁷ Aman ikagiyen ku ikaw ha pinasaylu en sa madakel ha mga salà din ta adagi sa pagpalanggà din kanak. Ba saena ha atiyuay dà sa mga salà din ha napasaylu atiyuay dà daan sa pagpalanggà din.”

⁴⁸ Dayun inikagiyan hi Jesus haena sa bahi, “Pinasaylu en sa mga salà nu.”

⁴⁹ Sa duma ha tuminampu duun ku miggastu nakahenà-henà, “Inu gid haini ha etawa sa pakapasaylu hu salà?”

⁵⁰ Ba inikagiyan hi Jesus su bahi, “Sa ingkaluwas nu iyan sa pagsalig nu kanak aman ulì kad ha malinawen.”