Yuˇdaˆ 1 - Akha

¹ Yeˬsuˇ Ka li-euˬ zaˬ kʼaˆ hawˇ-eu Yaˬkoˆ-euˬ mehˇ nmˇ pyeuꞈ-eu ngaˇ Yuˇdaˆ, Aˬda Miˬyehˇ-euˬ gʼoeˇ-eu gaˬ-eu jeˬ hawˇ-eu Yeˬsuˇ Ka li-euˬ bo saˆ haw piˇ-eu jeˬ laꞈ kʼoeˇ jawˇ luꞈ-eu, Miˬyehˇ neh kuˇ doˆ taˬ-euˬ tsawˇ haˬ deuˬ jawˇ gaˇ sahˬ boꞈ boꞈ ahˇ laꞈ-eu ma.

² Miˬyehˇ-euˬ gʼawˬ shaˬ gaˬ-eu jeˬ, nui saˇ oꞈ-eu jeˬ hawˇ-eu gʼoeˇ-eu gaˬ-eu jeˬ, naw maꞈ kʼoeˇ taˆ tiˬ byah tiˬ loꞈ jaˆ luꞈ-uˇ.

Maˬ ngeuˇ-eu saˬ laˬ deuˬ

³ Ngaˇ gaˬ dui dui-eu aˬ yuiꞈ aˬ nyiˇ Ka li zaˬ deuˬ-oˇ, aˬ dui dawˬ tawˆ luꞈ-ahˇ taꞈ-eu ka kʼoꞈ-eu jeˬ gaˇ kawˆ, ngaˇ kʼaˇ gʼeh nya-eu loꞈ-ehˇ boꞈ ahˇ laꞈ-eu ma. Miˬyehˇ neh aˬ yawꞈ-euˬ tsawˇ haˬ deuˬ-ahˇ mˬ maˬ maˬ byaˆ zaˇ ziˇ tiˬ poˆ tehꞈ-ehˇ biꞈ-euˬ jah-eu jeˬ gʼaˇ duˬ leh jeh dui dui-awˇ deuˆ ceh ceh paˬ-ehˇ gʼeh-eu gaˇ kawˆ, naw maꞈ-ahˇ gʼaˬ biꞈ-eu sahˬ boꞈ yaw kawˇ-ehˇ boꞈ paˬ-ehˇ gʼeh-eu meh lehˇ ngaˇ noeˬ-eu ma.

⁴ Aˬ jeˬ miˇ neh ehˇ naˇ, Miˬyehˇ-ahˇ yaw zeu maˬ baw-eu tsawˇ haˬ tiˬ paˆ na deuˬ, aˬ dui laꞈ kʼoeˇ ciˬ cuˇ ni uˇ kʼoeˬ laˇ taˬ-euˬ meh. Tsawˇ haˬ kʼoeˇ deuˬ-aˬ, yawˬ ha maˬ tsaˬ maˬ dawˇ-eu laꞈ kʼoeˇ yaw dehꞈ dehꞈ-eu jeˬ-ahˇ yaw tsaˬ yaw dawˇ jeˬ bi pyeuꞈ laˇ-eu gʼaˇ duˬ Miˬyehˇ-euˬ guiˬ lahˬ yaw dzahˇ-ahˇ yuˇ pyawˆ-eu uˬ taꞈ, aˬ dui-ahˇ uˆ lahˇ-eu gʼaˬ hawˇ-eu aˬ dui-euˬ Sahˬpaˬ pyeuꞈ-eu Yeˬsuˇ Ka li-ahˇ maˬ ha geuꞈ-a. Aˬ yawꞈ maꞈ yaˇ kʼaˬ daˇ nehˬ gaˇ ya daˬ-eu gaˇ kawˆ, aˇ hu ba neh Jaˇliꞈ laꞈ kʼoeˇ ehˇ taˬ-euˬ jaˆ-eu meh.

⁵ Iˇsaˬleˬlaˇ tsawˇ haˬ deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh Sahˬpaˬ Miˬyehˇ aˬ joˆ-ehˇ ka kʼoꞈ nehˬ-awˇ, aˇ nah ba, aˬ yawꞈ maꞈ laꞈ kʼoeˇ maˬ jah-eu tsawˇ haˬ deuˬ laˆ luˬ laˆ seˇ nehˬ gaˇ ya daˬ-euˬ gaˇ kawˆ heu naw maꞈ siˬ nya meh. Ehˇ kʼawꞈ, ngaˇ naw maꞈ-ahˇ tiˬ poˆ paˇ ja noeˬ nehˬ mawꞈ-eu ma.

⁶ Yawˬ ha-ahˇ biꞈ taˬ-euˬ baoˬ laꞈ kʼoeˇ maˬ jawˇ-ehˇ, yawˬ ha-ahˇ bi jawˇ-euˬ jawˇ duˬ-ahˇ byehˇ dzeh-euˬ mˬ taˆ gʼaˬ kʼehˇ kʼoeˇ deuˬ-euˬ gaˇ kawˆ shaˇ noeˬ haw sheˇ. Miˇ oˆ yaw zahˇ laꞈ kʼoeˇ aˬ yawꞈ maꞈ-ahˇ mˬ maˬ maˬ byaˆ zaˇ ziˇ shmˇ caˆ neh paꞈ tawꞈ taˬ-awˇ, aˬ yawꞈ maꞈ-ahˇ yaˇ kʼaˬ daˇ nehˬ-eu Aˇ nah nah huiˬ kʼoeˇ Nah-ahˇ bi dawˬ-euˬ meh.

⁷ Sawˇdoˬ meuˬ, Gawˇmawˇlaˆ meuˬ hawˇ-eu dawˬ peh jaˆ-eu meuˬ kʼoeˇ deuˬ-euˬ gaˇ kawˆ shaˇ noeˬ haw sheˇ. Kʼoeˇ gaˇ jawˇ-euˬ tsawˇ haˬ kʼoeˇ deuˬ mˬ taˆ gʼaˬ kʼehˇ kʼoeˇ deuˬ loꞈ-ehˇ dehꞈ-awˇ, maˬ tsaˬ maˬ dawˇ-eu laꞈ kʼoeˇ kʼaˬ miˬ sheu-eu jeˬ hawˇ-eu bahˬ dui jawꞈ dui dui-eu jeˬ mˇ-euˬ meh. Tsawˇ haˬ zaˬ dawˬ tawˆ luꞈ-ahˇ bi siˬ leˇ-eu gʼaˇ duˬ, mˬ maˬ maˬ byaˆ zaˇ ziˇ miˬ dzaˬ neh aˬ yawꞈ maꞈ-ahˇ kʼehˬ nehˬ kʼaˆ nehˬ-euˬ meh.

⁸ Kʼoeˇ gaˇ duˇ ni, tsawˇ haˬ heu deuˬ kʼawꞈ, yuꞈ maˆ maˆ mawˇ-eu laꞈ kʼoeˇ yawˬ ha-euˬ gʼawˇ mawˇ-ahˇ yawˬ ha iˬ baˇ mˇ-eu meh. Miˬyehˇ uˆ lahˇ-eu baoˬ-ahˇ aˬ yawꞈ maꞈ yehˬ bawˬ sehˇ lu-ehˇ gʼeh-awˇ, mˬ kʼoeˇ taˆ jawˇ-eu yaw shehꞈ kʼahˬ sehˇ huiˬ-eu deuˬ-ahˇ ngehˬ doeˇ ehˇ doeˇ-eu meh.

⁹ Mˬ taˆ gʼaˬ kʼehˇ deuˬ laꞈ kʼoeˇ, aˬ cawˬ naˆ maˬ tseˇ huiˬ dzehˬ mahˇ dzehˬ-eu gʼaˬ pyeuꞈ-eu Miˇkeˬlaˇ kʼawꞈ kʼoeˇ loꞈ-ehˇ maˬ ehˇ-a. Moˇseˬ-euˬ gʼawˇ mawˇ-ahˇ aˬ geu gʼaˬ geuꞈ-eu tsaˬ-eu gaˇ kawˆ-ahˇ taꞈ leˇ-awˇ, Nehꞈ sahˬ paˬ nehˬ-ehˇ aˬ yawꞈ ceh dzaˬ ngeh, Miˇkeˬlaˇ aˬ yawꞈ Nehꞈsahˬpaˬ-ahˇ dawˬ doeˇ maˬ ngehˬ nehˬ peuˬ ni, “Sahˬpaˬ Miˬyehˇ neh bi dehˬ luꞈ-uˇ” lehˇ tehꞈ-ehˇ ehˇ nehˬ-euˬ meh.

¹⁰ Ehˇ kʼawꞈ, tsawˇ haˬ heu deuˬ-aˬ, yawˬ ha maˬ siˬ nya-eu yawˬ jeˬ na luꞈ-ahˇ dawˬ doeˇ ngehˬ daˆ-eu meh. Bawˇ tsahˬ jeˬ zaˬ deuˬ siˬ nya-eu loˆ ni tehꞈ-ehˇ aˬ yawꞈ maꞈ siˬ nya-eu kʼoeˇ-aˬ, aˬ yawꞈ maꞈ-ahˇ laˆ cawˆ-eu jeˬ pyeuꞈ-eu meh.

¹¹ Aˬ yawꞈ maꞈ aˇ naˆ ni ya noeˬ shaˬ paˬ-ehˇ gʼeh-eu nga. A yawꞈ maꞈ-aˬ, Gaˬiˇnaˆ-euˬ kuiˇ toꞈ mehˬ nah caw teh luꞈ-eu meh. Pyuˇ shuiˇ-ahˇ nui kʼahˇ jaˆ-eu laꞈ kʼoeˇ Baˬlamˬ neh mˇ lehˬ-euˬ jeˬ-ahˇ aˬ yawꞈ maꞈ mˇ-eu meh. Gawˇlaˆ neh Miˬyehˇ-ahˇ puiˬ-euˬ loꞈ-ehˇ aˬ yawꞈ maꞈ kʼawꞈ puiˬ-awˇ, Gawˇlaˆ loꞈ-ehˇ laˆ luˬ laˆ seˇ nehˬ-eu jeˬ-ahˇ ya daˬ-euˬ meh.

¹² Aˬ yawꞈ maꞈ yawˬ ha uˬ maˆ dehˆ ni tehꞈ-ehˇ shaˇ sawˇ-awˇ, shaꞈ dawˇ-eu maˬ baw ni dzaˬ-eu dawˇ-eu aˇ dzehˬ-ehˇ gʼeh-eu kʼoeˇ-aˬ, naw maꞈ gʼoeˇ-eu gaˬ-eu laꞈ kʼoeˇ dzaˬ taꞈ dawˇ taꞈ-eu hawˬ byawˇ-ahˇ laˆ jawꞈ gaˇ duˇ-eu meh. Aˬ yawꞈ maꞈ-aˬ, jaˬ lehˇ neh bi baw ha gʼeh-euˬ uˬ yehˇ maˬ ahˇ-eu mˬ dmˇ-ahˇ duˇ-eu meh. Aˇ siˬ siˬ yamˬ-ahˇ maˬ siˬ le-eu miˇ neh puˇ ngawˬ ciˇ lehˆ-ehˇ bi gʼawˇ dzeh-awˇ nyiˬ poˆ shiˇ-euˬ aˇ siˬ aˇ bawˇ-ahˇ duˇ-eu meh.

¹³ Aˬ yawꞈ maꞈ-aˬ, iˬ ma laˆ shaˆ iˇ luˆ dzeh gaˇ duˇ-awˇ, yawˬ ha neh mˇ-euˬ shaꞈ dawˇ dui dui paˬ-ehˇ gʼeh-eu jeˬ boeˇ loeˇ yoˆ-i bi siˬ bi mawˇ-eu meh. Miˬyehˇ neh lehˬ hmˬ taˬ-euˬ yaw zahˇ zahˇ dui dui-eu jawˇ duˬ-ahˇ mˬ maˬ maˬ byaˆ zaˇ ziˇ ya jawˇ leˇ-eu, gaˇ ma maˬ poˆ ni doe doe gʼa gʼa-ehˇ cah luꞈ-eu aˬ guiˇ-ahˇ duˇ-eu meh.

¹⁴ Aˇ hu ba, Aˬdaˬ-ahˇ neh shiꞈ tsuiꞈ tiˬ tsuiꞈ-ahˇ dehꞈ yaꞈ-euˬ Iˇnawˆ neh, aˬ yawꞈ maꞈ-euˬ gaˇ kawˆ heu loꞈ-ehˇ ngehˬ dah yaꞈ-euˬ jaˆ-eu meh. “Sahˬpaˬ Miˬyehˇ-aˬ, muiˬ-eu shawˇ-eu mˬ taˆ gʼaˬ kʼehˇ aˇ muiˇ aˇ seh nehˬ-ehˇ oe tehꞈ-a.

¹⁵ Tsawˇ haˬ dawˬ tawˆ luꞈ-ahˇ yaˇ kʼaˬ daˇ-eu lehˇ oe-awˇ, aˬ yawꞈ maꞈ Miˬyehˇ-ahˇ yaw zeu maˬ baw ni mˇ taˬ shaˇ taˬ-euˬ miˇ neh maˬ ehˇ, Miˬyehˇ-ahˇ yaw zeu maˬ baw-eu iˬ baˇ zaˬ deuˬ neh aˬ yawꞈ-ahˇ ngehˬ doeˇ ehˇ doeˇ-euˬ miˇ neh maˬ ehˇ, aˬ yawꞈ maꞈ-ahˇ kʼehˬ nehˬ kʼaˆ nehˬ tehꞈ-a.”

¹⁶ Tsawˇ haˬ kʼoeˇ deuˬ-aˬ, aˬ myah luꞈ aˬ cawˬ-ahˇ toˇ toˇ-ehˇ iˬ baˇ taˬ-eu meh. Yawˬ ha-euˬ maˬ muiˬ maˬ jaˬ-eu nui kʼahˇ mehˬ nah caw teh-eu meh. Yawˬ ha-euˬ gaˇ kawˆ kʼahˬ sehˇ jehˆ-awˇ, yawˬ ha-ahˇ muiˬ laˇ ni aˬ cawˬ-ahˇ ja poeˬ nehˬ nya-eu meh.

Yahˇ-eu dawˬ hawˇ-eu dawˬ mehˬ dawˬ tsoˆ

¹⁷ Ehˇ kʼawꞈ ngaˇ gaˬ-eu cawˬ deuˬ-oˇ, dzeuˇ laˇ ngeh aˬ dui-euˬ Sahˬpaˬ Yeˬsuˇ Ka li-euˬ gʼaˬ kʼehˇ deuˬ neh naw maꞈ-ahˇ ehˇ nehˬ-euˬ dawˬ kʼoeˇ deuˬ-ahˇ taˬ ngehˇ.

¹⁸ “Aˇ saˬ saˬ-eu aˇ nah aˇ yamˬ keuˆ le ngeh, naw maꞈ-ahˇ kʼaˇ ehˇ mawꞈ-eu ehˇ niˇ gʼa-awˇ Miˬyehˇ-ahˇ yaw zeu maˬ baw-eu jeˬ pyeuꞈ-eu yawˬ ha-euˬ nui kʼahˇ mehˬ nah caw teh-eu tsawˇ haˬ deuˬ doˆ le tehꞈ-a” lehˇ, naw maꞈ-ahˇ ehˇ taˬ-euˬ meh.

¹⁹ Tsawˇ haˬ kʼoeˇ deuˬ-aˬ, aˇ maꞈ aˇ muˇ laˆ paˆ-eu jeˬ mˇ-eu, shiˬ shaˬ jiˇ nui noeˬ nui loˆ mˇ-eu, yawˬ ha laꞈ kʼoeˇ Yaw sahˇ Miˬyehˇ maˬ jawˇ-eu, kʼoeˇ loꞈ-ehˇ gʼeh-eu tsawˇ haˬ pyeuꞈ-eu meh.

²⁰ Ehˇ kʼawꞈ, ngaˇ gaˬ-eu cawˬ deuˬ-oˇ, naw maꞈ-aˬ, yawˬ ha-euˬ muiˬ dui shawˇ dui dui-eu jah-eu jeˬ huiˬ laˇ mahˇ laˇ nya ni leh jeh-awˬ. Muiˬ-eu shawˇ-eu Yaw sahˇ Miˬyehˇ-euˬ baoˬ laꞈ kʼoeˇ guiˬ lahˬ shaˇ-awˬ.

²¹ Aˬ dui-euˬ Sahˬpaˬ Yeˬsuˇ Ka li gʼawˬ shaˬ gaˬ nehˬ laꞈ-eu laꞈ kʼoeˇ mˬ maˬ maˬ byaˆ zaˇ ziˇ dehꞈ-eu jeˬ biꞈ laꞈ gaˇ naw maꞈ loꞈ luꞈ-eu loꞈ-ehˇ, Miˬyehˇ-euˬ gʼoeˇ-eu gaˬ-eu jeˬ laꞈ kʼoeˇ naw maꞈ yaw muiˬ-ehˇ jawˇ-awˬ.

²² Jah-eu yaw muiˬ paˬ-ehˇ maˬ ziꞈ laˇ-euˬ tsawˇ haˬ deuˬ-ahˇ gʼawˬ shaˬ gaˬ-awˬ.

²³ Tiˬ paˆ na deuˬ-ahˇ-aˬ, miˬ dzaˬ laꞈ kʼoeˇ neh gʼeu doˆ-awˇ ka kʼoꞈ nehˬ-awˬ. Tiˬ paˆ na deuˬ-ahˇ-aˬ, guˆ-eu nui ma ahˇ-eu laꞈ kʼoeˇ gʼawˬ shaˬ gaˬ nehˬ-awˬ. Ehˇ kʼawꞈ, shiˬ shaˬ jiˇ-euˬ nui kʼahˇ mˇ-eu jeˬ laˆ lehꞈ taˬ-euˬ aˬ yawꞈ maꞈ-euˬ mehˬ tsoeˬ-ahˇ nui daˆ daˆ-awˬ.

²⁴ Naw maꞈ-ahˇ maˬ bi coˬ-iˇ ni bo saˆ hehˇ tehˇ nya-awˇ, yaw shehꞈ kʼahˬ sehˇ tiˬ byah ni jaˆ-eu aˬ yawꞈ jawˇ gaˇ naw maꞈ-ahˇ iˬ baˇ taˬ kʼaˇ maˬ za-ehˇ laˬ kʼaˬ tiˬ cehˇ sheuˬ keuˆ nehˬ nya-eu Miˬyehˇ-ahˇ, aˬ dui-euˬ Sahˬpaˬ Yeˬsuˇ Ka li baˬ da neh, yaw shehꞈ kʼahˬ sehˇ maˬ ehˇ, huiˬ-eu mahˇ-eu jeˬ maˬ ehˇ, baoˬ maˬ ehˇ, uˆ lahˇ-eu dzoeˬ dzaˬ maˬ ehˇ, aˇ hu-euˬ ziˇ, heu ziˇ, aˬ kaˇ mˬ maˬ maˬ byaˆ zaˇ ziˇ keuˆ ni jaˆ luꞈ-uˇ. Aˬ miˬ.