Luˇkaꞈ 3 - Akha

Iˇ cuꞈ shawˇ-eu Yoˇhaˬ dawˬ mehˬ mehˬ-euˬ

¹ Gehˇsaˬ Deˬbeˬliˇ dzoeˬ dzaˬ-eu tseˇ ngaˬ kʼoꞈ byah laˇ ngeh, Yuˇdaˆ miˇ kʼahˬ-ahˇ BoˬtiˆPiˇlaˆ uˆ lahˇ-awˇ, Gaˬliˬlehˇ miˇ kʼahˬ-ahˇ Heˬloˆ uˆ lahˇ-awˇ, Iˇtuˬlehˇ miˇ kʼahˬ hawˇ-eu Daˬlaˬgawˇniˇ miˇ kʼahˬ-ahˇ Heˬloˆ-euˬ aˇ doˆ Piˇliˇpuˆ uˆ lahˇ-awˇ, Aˬbiˇleˬ miˇ kʼahˬ-ahˇ Luˇsaˬniˇ uˆ lahˇ luꞈ-eu meh.

² Aˬnaˬ hawˇ-eu Gaˬyaˬpaˇ aˬ nyaꞈ-aˬ, piˇ ma yaw huiˬ geuꞈ luꞈ-eu meh. Kʼoeˇ ngeh, bawˇ tsahˬ bawˇ dahˇ-ahˇ Zaˬkaˬliˇ-euˬ aˬ li Yoˇhaˬ jawˇ gaˇ, Miˬyehˇ-euˬ dawˬ keuˆ le-euˬ meh.

³ Kʼoeˇ naˇ, Yawˇdaˬ lawˇ baˬ gahˬ kaˬ doe ni Yoˇhaˬ iˇ-awˇ, Miˬyehˇ neh iˬ baˇ pyehˬ nehˬ-euˬ jeˬ-ahˇ za nya ni, iˬ baˇ noeˬ poˆ-awˇ iˇ cuꞈ shawˇ-eu gʼaˇ duˬ dawˬ mehˬ mehˬ-euˬ meh.

⁴ Miˬyehˇ gʼaˇ duˬ ngehˬ dah-eu Iˇsaˬyaˇ-euˬ sahˬ boꞈ laꞈ kʼoeˇ heu loꞈ-ehˇ ehˇ taˬ-euˬ meh. “Bawˇ tsahˬ bawˇ dahˇ laꞈ kʼoeˇ jawˇ-awˇ, heu loꞈ-ehˇ tiˬ gʼaˬ guˇ luꞈ meh. ‘Sahˬpaˬ Miˬyehˇ oe-eu gʼaˇ duˬ, gaˇ ma lehˬ hmˬ laˆ saˆ taˬ-awˬ. Aˬ yawꞈ oe-eu gaˇ ma kʼoeˇ kahˇ, dawˇ coe ni shaˇ dahˇ doˆ taˬ-awˬ.

⁵ Gʼaˬ lawˬ dawˬ tawˆ luꞈ sheu dzm-awˇ, gawˬ jawˬ dawˬ tawˆ luꞈ seuˆ di-awˬ. Gaˇ gʼoꞈ gaˇ diˆ laˆ dawˇ jiˇ-awˇ, duˬ kʼawꞈ duˬ nyaꞈ yaˆ di jiˇ-awˬ.

⁶ Miˬyehˇ-euˬ ka kʼoꞈ-eu jeˬ-ahˇ, tsawˇ haˬ zaˬ deuˬ ya mawˇ tehꞈ-a.”’

⁷ Yoˇhaˬ neh iˇ cuꞈ bi shawˇ-eu gʼaˇ duˬ, tsawˇ haˬ aˇ maꞈ maꞈ ma Yoˇhaˬ jawˇ gaˇ oe doˆ-euˬ meh. Aˬ yawꞈ maꞈ-ahˇ aˬ yawꞈ ehˇ nehˬ-eu, “Aˇ lawˇ uiˇ naˆ deuˬ-oˇ, Miˬyehˇ neh bi keuˆ le-eu lehˇ lehˬ hmˬ taˬ-euˬ kʼehˬ-eu kʼaˆ-eu jeˬ-ahˇ cehˆ dzeuˇ nya tehꞈ-a lehˇ, naw maꞈ-ahˇ aˬ suˇ gʼaˬ neh mehˬ gahˇ nehˬ laꞈ taˬ.

⁸ Naw maꞈ iˬ baˇ noeˬ poˆ gʼaˬ-euˬ ngaˇ lehˇ yaw muiˬ paˬ-ehˇ siˬ duˬ mawˇ duˬ laˇ ni dehꞈ-awˬ. Aˬbyaˬhaˬ-aˬ, nga maꞈ-euˬ aˬ da yaw dzahˇ ma lehˇ, naw maꞈ-euˬ nui ma laꞈ kʼoeˇ yawˬ haˇ yawˬ ha ehˇ ehˇ-ehˇ taˬ jawˇ. Ngaˇ naw maꞈ-ahˇ ehˇ nehˬ nyaˇ. Miˬyehˇ-aˬ, kʼaˬ lo heu deuˬ yuˇ-awˇ, Aˬbyaˬhaˬ-euˬ oeˬ paˬ oeˬ ma jahˇ doˆ nya meh.

⁹ Nymˬ-mˇ mi naˆ-ehˇ, aˇ bawˇ duˬ ciˇ-ahˇ deuˆ haˬ baꞈ mawˬ taˬ-euˬ meh. Aˇ siˬ yaw muiˬ maˬ siˬ le-eu aˇ bawˇ yawˬ bawˇ na luꞈ bi tuˇ dzeh-awˇ, miˬ dzaˬ-ahˇ bi baꞈ puiˆ tehꞈ-a.”

¹⁰ Tsawˇ haˬ kʼoeˇ deuˬ aˬ yawꞈ-ahˇ naˇ haˬ-eu, “Toˆ-ehˇ ngeuˇ naˇ, nga maꞈ aˬ joˆ-ehˇ ya jahˇ nmˇ.”

¹¹ Aˬ yawꞈ ehˇ-eu, “Pehˇ kʼahˬ nyiˬ kahˇ jaˆ-eu tsawˇ haˬ, maˬ jaˆ-eu tsawˇ haˬ-ahˇ tiˬ kahˇ biˇ nehˬ-awˇ, dzaˬ dzaˬ dawˇ dawˇ jaˆ-eu tsawˇ haˬ kʼawꞈ, maˬ jaˆ-eu deuˬ-ahˇ biˇ nehˬ-awˬ.”

¹² Kawˬ taꞈ-eu tsawˇ haˬ deuˬ kʼawꞈ, aˬ yawꞈ neh iˇ cuꞈ bi shawˇ nehˬ-eu lehˇ, aˬ yawꞈ jawˇ gaˇ oe-awˇ ehˇ-eu, “Saˬ laˬ-oˇ, nga maꞈ aˬ joˆ-ehˇ ya jahˇ ta.”

¹³ Aˬ yawꞈ ehˇ-eu, “Naw maꞈ kawˬ taꞈ ngeh, taꞈ paˬ-ehˇ gʼeh-eu uˬ tahꞈ-ehˇ aˇ dzehˬ taˬ taꞈ.”

¹⁴ Yehˇdeuˬ kʼawꞈ aˬ yawꞈ-ahˇ naˇ haˬ-eu, “Nga maꞈ toe. Aˬ joˆ-ehˇ ya jahˇ nmˇ.” Aˬ yawꞈ ehˇ-eu, “Aˬ cawˬ-ahˇ nawˬ dzaˬ kʼaˆ dzaˬ-eu jeˬ hawˇ-eu, laˆ dzaˬ gahˇ dzaˬ-eu jeˬ taˬ mˇ. Yawˬ ha za luꞈ-eu ba la aˇ poeˬ-ahˇ nui kʼahˇ shiˇ-awˬ.”

¹⁵ Tsawˇ ha kʼoeˇ deuˬ-euˬ nui ma laꞈ kʼoeˇ noeˬ tmˬ-eu jeˬ ahˇ laˇ-awˇ, Yoˇhaˬ-ahˇ Ka li ngeuˇ law hawˇ maˬ siˬ lehˇ shaˇ noeˬ luꞈ-eu meh.

¹⁶ Kʼoeˇ ngeh, aˬ yawꞈ maꞈ dawˬ tawˆ luꞈ-ahˇ Yoˇhaˬ heu loꞈ-ehˇ ehˇ kʼoꞈ nehˬ-euˬ meh. “Ngaˇ naw maꞈ-ahˇ iˇ cuꞈ laꞈ kʼoeˇ iˇ cuꞈ shawˇ nehˬ-eu ma. Ehˇ kʼawꞈ, ngaˇ naˆ maˬ tseˇ huiˬ dzehˬ mahˇ dzehˬ-eu gʼaˬ oe luꞈ meh. Ngaˇ-aˬ, aˬ yawꞈ-euˬ sehˬ nawˆ aˇ caˆ puiˇ nehˬ-eu tehꞈ-ehˇ kʼawꞈ, mˇ-eu maˬ geuˇ nya. Aˬ yawꞈ-aˬ, Muiˬ-eu shawˇ-eu Yaw sahˇ Miˬyehˇ laꞈ kʼoeˇ hawˇ-eu miˬ dzaˬ laꞈ kʼoeˇ, naw maꞈ-ahˇ iˇ cuꞈ shawˇ nehˬ laꞈ tehꞈ-a.

¹⁷ Cehˇ baw shawˇ-awˇ, aˬ yawꞈ-euˬ cehˇ jiˇ laꞈ kʼoeˇ pi ahˇ taˬ-eu gʼaˇ duˬ, aˬ yawꞈ-euˬ aˬ laꞈ-ahˇ baw seu tuˆ tehˬ taˬ-euˬ meh. Ehˇ kʼawꞈ, cehˇ kʼawꞈ hawˇ-eu myaˆ pawꞈ deuˬ-ahˇ-aˬ,tiˬ jawˇ-iˬ maˬ miˆ-iˇ nya-eu miˬ dzaˬ laꞈ kʼoeˇ jehˆ puiˆ tehꞈ-a.”

¹⁸ Yoˇhaˬ-aˬ, tsawˇ haˬ kʼoeˇ deuˬ-ahˇ gaˇ kawˆ gʼawˬ mya jeˬ ja mehˬ-eu laꞈ kʼoeˇ gʼaˬ biꞈ-awˇ, Laˬ kʼaˬ cehˇ-eu Guiˬ lahˬ dawˬ mehˬ nehˬ-euˬ meh.

¹⁹ Ehˇ kʼawꞈ, sahˬ paˬ Heˬloˆ-aˬ, aˬ yawꞈ-euˬ aˇ doˆ-euˬ miˬ zaˬ pyeuꞈ-eu Heˬlawˇdiˇ-ahˇ sheuˬ-euˬ uˬ taꞈ, yaw haiˬ gʼawˬ mya jeˬ mˇ-euˬ miˇ neh, lehˬ dui dui meh lehˇ Yoˇhaˬ ehˇ-euˬ meh.

²⁰ Kʼoeˇ ngeh jawˇ, Heˬloˆ-aˬ, Yoˇhaˬ-ahˇ tawˬ-ahˇ nyehꞈ uˇ nehˬ-eu laꞈ kʼoeˇ, kʼoeˇ naˆ maˬ tseˇ haiˬ-eu jeˬ mˇ mehˬ nehˬ-euˬ meh.

Yoˇnaˬ neh Yeˬsuˇ-ahˇ iˇ cuꞈ shawˇ nehˬ-euˬ

²¹ Tsawˇ haˬ kʼoeˇ deuˬ dawˬ tawˆ luꞈ iˇ cuꞈ shawˇ gʼaˬ ngeh, Yeˬsuˇ iˇ cuꞈ shawˇ-euˬ meh. Aˬ yawꞈ guiˬ lahˬ shaˇ luꞈ ngeh, mˬ pah le-awˇ,

²² Muiˬ-eu shawˇ-eu Yaw sahˇ Miˬyehˇ kʼaˬ kʼoeˬ loꞈ-ehˇ aˬ yawꞈ-euˬ kʼoeˇ taˆ zaꞈ le-euˬ meh. Mˬ paw neh teˇ saˇ mahˇ doˆ le-awˇ ehˇ-eu, “Nawˇ-aˬ, ngaˇ zawˇ gaˬ-eu ngaˬ-euˬ Zaˬmaˇ ma. Nawˬ-ahˇ ngaˇnui kʼahˇ shiˇ dui dui ma.”

Yeˬsuˇ-euˬ tsuiꞈ

²³ Yeˬsuˇ gaˇ mˇ dahˬ beh ngeh, smˬ tseˇ kʼoꞈ ehˇ gʼaˬ ni byah laˇ-euˬ meh. Aˬ yawꞈ-euˬ aˬ da-aˬ, Iˇliˇ-euˬ aˬ li Yoˇsehˆ meh lehˇ aˬ cawˬ sawˇ taˬ-euˬ meh. Yeˬsuˇ-euˬ tsuiꞈ daˆ gui leꞈ ngeh, heu loꞈ-ehˇ meh. Yeˬsuˇ, Yoˇsehˆ, Iˇliˇ,

²⁴ Maˬdaˆ, Leˬbiˇ, Meˬlaˬkiˇ, Yaˬnaˆ, Yoˇsehˆ,

²⁵ Maˬdaˬtiˇ, Aˬmo, Naˬhmˬ, Iˇsaˬliˇ, Naˬgehˇ,

²⁶ Mawˇdaˆ, Maˬdaˬtiˇ, Seˬmiˇ, Yawˇsehˆ, Yoˇdaˆ,

²⁷ Yawˇnaˬ, Leˬsaˇ, Zeˬluˇbaˬbeˬlaˇ, Shaˬtiˇlaˆ, Neˬliˇ,

²⁸ Meˬlaˬkiˇ, Aˇdiˇ, Gawˇsaˬ, Eˇlaˬmaˬdaˬ, Iˇlehˆ,

²⁹ Yawˇshuˆ, Eˇliˇzaˬ, Yoˇlamˬ, Maˬdaˆ, Leˬbiˇ,

³⁰ Suˇmoˬ, Yuˇdaˆ, Yoˇsehˆ, Yoˇnamˬ, Eˇliˇkmˬ,

³¹ Meˬleˬ, Mehˇnaˬ, Maˬdaˬdaˇ, Naˬdaˬ, Daˬbiˇ,

³² Yeˬshehˇ, Awˇbehˆ, Bawˇza, Saˬlaˬmoˬ , Naˬshoˬ,

³³ Aˬmiˇnaˬdehˇ, Aˬdaˬmiˬ, Aˬlaˬniˬ, Heˬzaˬloˬ, Paˬyehˆ, Yuˇdaˆ,

³⁴ Yaˬkoˆ, Iˇtsaˆ, Aˬbyaˬhaˬ, Teˬlah, Naˬkawˬ,

³⁵ Seˬlawˇ, Yeˬuˇ, Pehˇlehˆ, Eˬbaˬ, Sheˬlahˬ,

³⁶ Gaˬiˇnaˬ, Aˬpaˬtsaˆ, Sheˬmaˇ, Noˇaˬ, Laˬmehˇ,

³⁷ Maˬtuˇseˬlah, Iˇnawˆ, Jaˬyehˆ, Maˬhaˬleˬliˆ, Geˇnaˬ,

³⁸ Iˇnoˆ, Seˬtaˆ, Aˬdaˬ, Miˬyehˇ.