Iˇsaˬtaˆ 2 - Akha

Iˇsaˬtaˆ sahˬ paˬ miˬ zaˬ pyeuꞈ laˇ-euˬ

¹ Aˇ nah, sahˬ paˬ Dzeuˬsehˆ nui ma pehˇ taˬ gʼaˬ-euˬ kʼawꞈ, Baˬshaˬtiˇ neh mˇ-euˬ jeˬ hawˇ-eu aˬ yawꞈ neh Baˬshaˬtiˇ-ahˇ yaˇ kʼaˬ daˇ nehˬ-euˬ gaˇ kawˆ-ahˇ aˬ yawꞈ maˬ ngehˇ leˇ coeˇ-a.

² Kʼoeˇ miˇ neh sahˬ paˬ-euˬ dawˬ peh jawˇ-awˇ nui noeˬ nui duˇ biꞈ-eu deuˬ sahˬ paˬ-ahˇ heu loꞈ-ehˇ ehˇ nehˬ-euˬ meh. “Nawˬ-euˬ gʼaˇ duˬ aˇ gʼehˇ muiˬ-eu miˬ daꞈ daꞈ shuiꞈ deuˬ-ahˇ bi poˆ uiˬ-awˬ.

³ Nawˬ-euˬ miˇ kʼahˬ kʼahˬ ma laꞈ kʼoeˇ jaˆ-eu miˇ kʼahˬ aˬ yawꞈ kʼahˬ yawꞈ laꞈ kʼoeˇ yaw huiˬ yaw mahˇ deuˬ-ahˇ nawˇ tseˇ doˆ-awˇ, miˬ daꞈ daꞈ shuiꞈ kʼoeˇ deuˬ-ahˇ heu gaˇ Suˇsaˬ meuˬ-ahˇ jaˆ-eu miˬ daꞈ deuˬ bi jawˇ-euˬ nawˬ-euˬ nymˇ-ahˇ bi sheuˬ uiꞈ laꞈ-awˇ, nawˬ-euˬ zaˬ miˬ zaˬ deuˬ-ahˇ haw-eu pyaˆ-eu gʼaˬ pyeuꞈ-eu Heˬgehˇ-ahˇ a nehˬ-awˇ, yaw muiˬ paˬ-ehˇ bi laˆ muiˬ-awˬ.

⁴ Kʼoeˇ naˇ, nawˇ mawꞈ dzehˬ leˇ-eu gʼaˬ-ahˇ sheuˬ-awˇ, Baˬshaˬtiˇ-euˬ jawˇ duˬ-ahˇ sahˬ paˬ miˬ zaˬ bi geuꞈ-awˬ.” Aˬ yawꞈ maꞈ kʼoeˇ loꞈ-ehˇ ja noeˬ ja duˇ nehˬ-euˬ gaˇ sahˬ paˬ nui kʼahˇ shiˇ-awˇ, kʼoeˇ loꞈ-ehˇ mˇ-euˬ meh.

⁵ Kʼoeˇ ngeh yamˬ-ahˇ, Yaˬiˇlaˆ-euˬ aˬ li Mawˬdaˬkehˇ lehˇ myahˇ-euˬ Yuˇdaˆ tsawˇ haˬ tiˬ gʼaˬ Suˇsaˬ meuˬ-ahˇ jawˇ luꞈ-eu meh. Aˬ yawꞈ-aˬ, Beˬyaˬmiˬ tsawˇ jeuˬ pyeuꞈ-awˇ, Giˇshaˆ hawˇ-eu Shiˇmiˇ-euˬ aˇ jeuˬ aˇ ca pyeuꞈ-eu meh.

⁶ Baˬbuˇloˬ sahˬ paˬ Neˬbuˬkaˬneˬzaˬ neh Yuˇdaˆ sahˬ paˬ Yeˬhawˇyaˬciˬ hawˇ-eu aˬ yawꞈ-euˬ miˇ kʼahˬ zaˬ tiˬ paˆ na deuˬ-ahˇ nyehꞈ ka gʼeh ngeh, Mawˬdaˬkehˇ gʼaˬ kʼawꞈ bi nyehꞈ ahˇ gʼeh-euˬ meh.

⁷ Iˇsaˬtaˆ lehˇ myahˇ-euˬ aˬ yawꞈ-euˬ dmˇ ma tiˬ gʼaˬ aˬ yawꞈ nehˬ-ehˇ jawˇ luꞈ-eu meh. Iˇsaˬtaˆ-euˬ Heˬbyehˇ tsawˇ myahˇ-aˬ, Haˬdaˬsaˬ meh. Aˬ yawꞈ-aˬ, seuˆ dzeuꞈ aˇ gʼehˇ muiˬ dui dui-eu zaˬ miˬ aˬ buˇ tiˬ gʼaˬ pyeuꞈ-eu meh. Aˬ yawꞈ-euˬ aˬ da aˬ ma bi shiˇ jiˇ-awˇ, Mawˬdaˬkehˇ neh aˬ yawꞈ-ahˇ cu huiˬ-euˬ meh.

⁸ Sahˬ paˬ neh dawˬ biꞈ-awˇ, zaˬ miˬ aˬ buˇ gʼawˬ mya ni Suˇsaˬ meuˬ-ahˇ bi sheuˬ uiˬ laꞈ ngeh. Iˇsaˬtaˆ kʼawꞈ ahˇ leˇ-euˬ meh. Aˬ yawꞈ-ahˇ kʼawꞈ sahˬ paˬ-euˬ nymˇ-ahˇ sheuˬ ahˇ taˬ-awˇ, sahˬ paˬ-euˬ zaˬ miˬ zaˬ deuˬ-ahˇ haw-eu pyaˆ-eu gʼaˬ pyeuꞈ-eu Heˬgehˇ uˆ lahˇ-eu uˬ moˆ bi jawˇ-euˬ meh.

⁹ Iˇsaˬtaˆ-ahˇ Heˬgehˇ nui ma tsaˬ-awˇ, yaw muiˬ paˬ-ehˇ ngehˬ gʼeh caw ba nehˬ-euˬ meh. Iˇsaˬtaˆ-euˬ gʼawˇ mawˇ bi muiˬ dzehˬ laˇ-eu gʼaˇ duˬ, dzaˬ dzaˬ dawˇ dawˇ laˆ saˆ nehˬ-eu hawˇ-eu jaˆ gʼaˬ lehꞈ nehˬ-eu gaˇ-ahˇ, aˇ yamˬ maˬ bi smˬ-iˇ ni aˬ yawꞈ mˇ-euˬ meh. Sahˬ paˬ-euˬ zaˬ miˬ zaˬ deuˬ jawˇ-eu jawˇ duˬ kʼaˇ muiˬ dzehˬ-eu tsahˇ-ahˇ Iˇsaˬtaˆ-ahˇ bi jawˇ-awˇ, sahˬ paˬ-euˬ nymˇ laꞈ kʼoeˇ jawˇ-eu zaˬ miˬ aˬ buˇ shiꞈ gʼaˬ tseˇ doˆ-awˇ bi bo saˆ-euˬ meh.

¹⁰ Iˇsaˬtaˆ-aˬ, Mawˬdaˬkehˇ neh aˬ yawꞈ-ahˇ mehˬ gahˇ nehˬ taˬ-euˬ loꞈ-ehˇ, aˬ yawꞈ Yuˇdaˆ tsawˇ jeuˬ pyeuꞈ-eu gaˇ kawˆ aˬ cawˬ maˬ bi siˬ ni zaꞈ taˬ-euˬ meh.

¹¹ Aˬ yawꞈ nah yawꞈ, sahˬ paˬ-euˬ zaˬ miˬ zaˬ deuˬ taˬ taˬ-euˬ nymˇ-euˬ pu ka, Mawˬdaˬkehˇ gʼoꞈ laˆ gʼoꞈ dmˇ-ehˇ cah cah-ehˇ, Iˇsaˬtaˆ aˬ joˆ-ehˇ jawˇ luꞈ nga lehˇ haw-euˬ meh.

¹² Zaˬ miˬ zaˬ tiˬ gʼaˬ-ahˇ laˆ muiˬ-eu gʼaˇ duˬ aˇ yamˬ tiˬ kʼoꞈ jiˇ leˇ-eu meh. Ba la koꞈ siˬ byah ni muˇ laˬ tsiˇ lehꞈ lehꞈ-ehˇ ya nyehꞈ nehˬ-awˇ, dzaiˇ ba la koꞈ siˬ byah ni tsiˇ yaw saw gʼawˬ mya jeˬ hawˇ-eu, shaˬ jiˇ bi muiˬ laˇ-eu tsiˇ gʼawˬ mya jeˬ lehꞈ lehꞈ-ehˇ paˇ ya nyehꞈ nehˬ-eu meh. Kʼoeˇ loꞈ-ehˇ laˆ muiˬ nehˬ gʼaˬ miˇ tsa, tiˬ gʼaˬ saˇ-iˬ tiˬ gʼaˬ-ahˇ sahˬ paˬ Dzeuˬsehˆ jawˇ gaˇ ya sheuˬ ha nehˬ leˇ-eu meh.

¹³ Sahˬ paˬ-euˬ zaˬ miˬ zaˬ deuˬ jawˇ-eu nymˇ-ahˇ neh sahˬ paˬ-euˬ nymˇ-ahˇ le ngeh, yawˬ ha kʼaˇ dm kʼaˇ geuꞈ mawꞈ-eu jeˬ dm-awˇ geuꞈ-awˇ le-eu meh.

¹⁴ Uˬ ciꞈ paw aˬ yawꞈ kʼoeˇ gaˇ le-awˇ, yawˬ shawˬ yawˬ aˬ yawꞈ-ahˇ sahˬ paˬ-euˬ zaˬ miˬ zaˬ deuˬ jawˇ-eu nymˇ nyiˬ nymˇ tiˬ nymˇ-ahˇ sheuˬ gʼeh-awˇ, sahˬ paˬ-euˬ ma nyiˇ deuˬ-ahˇ haw-eu pyaˆ-eu gʼaˬ pyeuꞈ-eu Shaˬshaˇgaˬ uˆ lahˇ-eu laꞈ oˆ ya bi jawˇ-eu meh. Sahˬ paˬ aˬ yawꞈ-ahˇ mawꞈ-awˇ paˇ bi kuˇ laˬ-iˇ ngeh maˬ ngeuˇ naˇ, sahˬ paˬ jawˇ gaˇ maˬ paˇ ya le meh.

¹⁵ Iˇsaˬtaˆ sahˬ paˬ jawˇ gaˇ le-eu aˇ yamˬ tsaˬ laˇ-euˬ meh. Iˇsaˬtaˆ-aˬ, Aˬbiˇheˬlaˇ-euˬ aˬ buˇ pyeuꞈ-awˇ Mawˬdaˬkehˇ-euˬ dmˇ ma tsaˬ-eu meh. Mawˬdaˬkehˇ neh aˬ yawꞈ-ahˇ gʼoˆ cu-euˬ meh. Iˇsaˬtaˆ-ahˇ kʼaˇ mawˇ-euˬ tsawˇ haˬ yawˬ gʼaˬ na luꞈ, aˬ yawꞈ-ahˇ gʼawˬ shaˬ gaˬ-eu nui ma ahˇ-eu meh. Aˬ yawꞈ ya le-eu aˇ yamˬ tsaˬ laˇ ngeh, aˬ yawˇ yawꞈ tiˬ jeˬ-iˬ maˬ dm maˬ geuꞈ ni, sahˬ paˬ-euˬ zaˬ miˬ zaˬ deuˬ jawˇ-eu nymˇ-ahˇ haw-eu pyaˆ-eu gʼaˬ pyeuꞈ-eu Heˬgehˇ neh bi dm di geuꞈ-euˬ loꞈ-ehˇ dm-awˇ geuꞈ-awˇ le-euˬ meh.

¹⁶ Sahˬ paˬ Aˬtaˬdzeuˬsehˆ sahˬ paˬ geuꞈ-eu shiꞈ kʼoꞈ tiˬ kʼoꞈ ba la tseˇ siˬ tiˬ siˬ pyeuꞈ-eu Teˬbehˆ ba la-ahˇ, sahˬ paˬ Aˬtaˬdzeuˬsehˆ jawˇ-eu sahˬ paˬ-euˬ hawˇ nymˇ-ahˇ, Iˇsaˬtaˆ-ahˇ sheuˬ gʼeh-euˬ meh.

¹⁷ Zaˬ miˬ aˬ buˇ zaˬ guˬ dawˬ tawˆ luꞈ laꞈ kʼoeˇ, aˬ yawꞈ-ahˇ sahˬ paˬ mawꞈ dzehˬ leˇ-awˇ, dawˬ tawˆ luꞈ naˆ maˬ tseˇ aˬ yawꞈ-ahˇ gaˬ dzehˬ-euˬ meh. Aˬ yawꞈ-euˬ uˬ duˬ-ahˇ sahˬ paˬ miˬ zaˬ kʼoˆ-eu shuiˇ uˬ kʼoˆ nyehꞈ kʼoˆ nehˬ-awˇ, Baˬshaˬtiˇ-euˬ dah zaˇ sahˬ paˬ miˬ zaˬ bi geuꞈ-euˬ meh.

¹⁸ Iˇsaˬtaˆ-ahˇ taˬ huiˬ-eu laꞈ kʼoeˇ huiˬ dui dui-eu dzaˬ byawˇ tiˬ byawˇ sahˬ paˬ lawˇ-awˇ, aˬ yawꞈ-euˬ gaˇ mˇ-eu yaw huiˬ yaw mahˇ deuˬ hawˇ-eu miˇ kʼahˬ-ahˇ uˆ lahˇ-eu sahˬ paˬ sahˬ ma bi geuꞈ-euˬ deuˬ dawˬ tawˆ luꞈ-ahˇ kuˇ uiˬ-euˬ meh. Aˇ nah kʼoeˇ nah laꞈ kʼoeˇ aˬ yawꞈ-euˬ miˇ kʼahˬ kʼahˬ lah ni gaˇ maˬ mˇ ni bi naˬ-awˇ, sahˬ paˬ tiˬ gʼaˬ biꞈ-eu geuˇ-eu laꞈ sawˬ deuˬ, miˇ kʼahˬ zaˬ deuˬ-ahˇ bi biˇ nehˬ-euˬ meh.

Mawˬdaˬkehˇ neh sahˬ paˬ-ahˇ ka kʼoꞈ-euˬ

¹⁹ Aˇ yamˬ kʼoeˇ yamˬ-ahˇ, sahˬ paˬ neh Mawˬdaˬkehˇ-ahˇ miˇ kʼahˬ-ahˇ uˆ lahˇ-eu gaˇ bi mˇ-euˬ meh.

²⁰ Kʼoeˇ ngeh keuˆ ni, Iˇsaˬtaˆ gʼaˬ, yawˬ ha Yuˇdaˆ tsawˇ jeuˬ pyeuꞈ-eu gaˇ kawˆ maˬ bi siˬ ni zaꞈ taˬ-euˬ meh. Aˬ yawꞈ yaw nyiˇ ngeh neh Mawˬdaˬkehˇ-euˬ ehˇ dawˬ naˇ haˬ-euˬ loꞈ-ehˇ, yawˬ ha Yuˇdaˆ tsawˇ haˬ pyeuꞈ-eu gaˇ kawˆ aˬ cawˬ-ahˇ taˬ bi siˬ lehˇ Mawˬdaˬkehˇ neh aˬ yawꞈ-ahˇ ehˇ nehˬ-euˬ dawˬ kʼoeˇ dawˬ-ahˇ aˬ yawꞈ maˬ ngehˇ-a.

²¹ Sahˬ paˬ-euˬ nymˇ laꞈ kʼoeˇ Mawˬdaˬkehˇ gaˇ mˇ luꞈ-eu yamˬ-ahˇ, sahˬ paˬ jawˇ-eu lawˆ-ahˇ uˇ leˇ-eu laˇ gʼoˆ-ahˇ loꞈ-awˇ sahˬ paˬ-euˬ zaˬ miˬ zaˬ deuˬ-ahˇ haw-eu pyaˆ-eu Biˇdaˬnaˬ hawˇ-eu Teˬlehˆ aˬ nyaꞈ sahˬ paˬ Dzeuˬsehˆ-ahˇ muiˇ-awˇ, aˬ yawꞈ-ahˇ sehꞈ kʼoeˬ-eu lehˇ lehˬ hmˬ luꞈ-eu meh.

²² Gaˇ kawˆ kʼoeˇ Mawˬdaˬkehˇ ya siˬ-awˇ, sahˬ paˬ miˬ zaˬ Iˇsaˬtaˆ-ahˇ ehˇ nehˬ-awˇ, Iˇsaˬtaˆ gʼaˬ Mawˬdaˬkehˇ neh ya siˬ ya mawˇ-euˬ gaˇ kawˆ kʼoeˇ sahˬ paˬ-ahˇ tiˬ poˆ paˇ dzawˇ nehˬ-euˬ meh.

²³ Gaˇ kawˆ kʼoeˇ-ahˇ yaw muiˬ paˬ-ehˇ pyehˆ tseˇ duˬ haw ngeh, Mawˬdaˬkehˇ ehˇ-eu loꞈ-ehˇ tsaˬ gaˇ ya mawˇ-awˇ, tsawˇ haˬ kʼoeˇ nyiˬ gʼaˬ-ahˇ tsawˇ haˬ paꞈ gʼeu sehꞈ-eu kʼawˇ zeuˇ-ahˇ paꞈ sehꞈ nehˬ-euˬ meh. Gaˇ kawˆ kʼoeˇ miˇ kʼahˬ-euˬ sahˬ boꞈ laꞈ kʼoeˇ bi boꞈ ahˇ taˬ-eu gʼaˇ duˬ, sahˬ paˬ dawˬ biꞈ-euˬ meh.