2 Saˬmeuˬlaˆ 9 - Akha

Daˬbiˇ hawˇ-eu Meˬpiˇbawˇshehˆ

¹ Tiˬ nah keuˆ laˇ ngeh, Daˬbiˇ heu loꞈ-ehˇ ehˇ-eu meh. “Sawˇluˆ-euˬ nymˇ jiˇ laꞈ kʼoeˇ tsawˇ haˬ tiˬ gʼaˬ na dzeˇ-a siˬ loˇ. Dzeˇ lawˬ naˇ, Yawˇnaˆshaˬ-ahˇ ngaˇ noeˬ keuˆ-awˇ, tsawˇ haˬ kʼoeˇ gʼaˬ-ahˇ ngaˇ gʼawˬ shaˬ gaˬ nehˬ ma.”

² Kʼoeˇ ngeh, Sawˇluˆ-euˬ nymˇ jiˇ laꞈ kʼoeˇ zaˬ kʼaˆ geuꞈ-euˬ, Ziˇbaˬ lehˇ myahˇ-euˬ tsawˇ haˬ tiˬ gʼaˬ jawˇ-eu meh. Aˬ yawꞈ-ahˇ Daˬbiˇ jawˇ gaˇ aˬ cawˬ sheuˬ gʼeh nehˬ-euˬ meh. “Nawˇ Ziˇbaˬ ma loˇ” lehˇ, sahˬ paˬ aˬ yawꞈ-ahˇ naˇ haˬ ngeh, “Ngeuˇ ma” lehˇ aˬ yawꞈ ehˇ kʼoꞈ nehˬ-euˬ meh.

³ Sahˬ paˬ aˬ yawꞈ-ahˇ ehˇ nehˬ-eu, “Sawˇluˆ-euˬ nymˇ jiˇ laꞈ kʼoeˇ tsawˇ haˬ tiˬ gʼaˬ na dzeˇ-a siˬ loˇ. Dzeˇ lawˬ naˇ, Miˬyehˇ ngaˬ-ahˇ saˇ jaˇ dzaˬ taˬ-euˬ loꞈ-ehˇ, aˬ yawꞈ-ahˇ ngaˇ gʼawˬ shaˬ gaˬ nehˬ ma.” Ziˇbaˬ ehˇ-eu, “Yawˇnaˆshaˬ-euˬ aˬ li tiˬ li dzeˇ-a siˬ. Ehˇ kʼawꞈ, kuiˇ kuˆ kuˆ-eu tsawˇ haˬ tiˬ gʼaˬ meh.”

⁴ “Aˬ yawꞈ aˬ gaˇ jawˇ ta” lehˇ sahˬ paˬ naˇ haˬ ngeh, “Lawˇdeˬbaˬ pu-ahˇ Aˬmeˬlaˆ-euˬ aˬ li Maˬkiˬlaˇ nehˬ-ehˇ jawˇ meh” lehˇ Ziˇbaˬ ehˇ kʼoꞈ nehˬ-euˬ meh.

⁵ Kʼoeˇ ngeh, Lawˇdeˬbaˬ pu-ahˇ Aˬmeˬlaˆ-euˬ aˬ li Maˬkiˬlaˇ jawˇ gaˇ sahˬ paˬ Daˬbiˇ tsawˇ haˬ pyehˬ gʼeh-awˇ, Meˬpiˇbawˇshehˆ-ahˇ bi sheuˬ laˬ-iˇ-euˬ meh.

⁶ Sawˇluˆ-euˬ aˬ li Yawˇnaˆshaˬ-euˬ aˬ li Meˬpiˇbawˇshehˆ laˇ keuˆ-awˇ, Daˬbiˇ-euˬ mehˬ shi awˆ byaˆ-awˇ yaw zeu baw nehˬ-euˬ meh. “Nawˇ Meˬpiˇbawˇshehˆ ma loˇ” lehˇ Daˬbiˇ naˇ haˬ ngeh, “Ngeuˇ ma” lehˇ aˬ yawꞈ ehˇ-eu meh.

⁷ Daˬbiˇ ehˇ-eu, “Taˬ guˆ. Nawˬ da Yawˇnaˆshaˬ baˬ da neh ngaˇ nawˬ-ahˇ gʼawˬ shaˬ gaˬ nehˬ ma. Nawˬ bawˇ Sawˇluˆ-euˬ miˇ tsaˬ dawˬ tawˆ luꞈ nawˬ-ahˇ ngaˇ biꞈ kʼoꞈ-awˇ, nawˇ ngaˬ nehˬ-ehˇ aˬ myah luꞈ ya dzaˬ ya dawˇ taꞈ tehꞈ-a.”

⁸ Meˬpiˇbawˇshehˆ gʼaˬ tiˬ poˆ paˇ awˆ byaˆ-awˇ ehˇ-eu, “Sahˬ paˬ-oˇ, ngaˇ-aˬ shiˇ taˬ-euˬ aˬ kuiˬ tiˬ mawˇ taꞈ-ehˇ maˬ paˇ dzehˬ miˇ-a. Aˬ jeˬ miˇ neh nawˇ ngaˬ-ahˇ teu naˆ naˆ-ehˇ gʼawˬ shaˬ gaˬ nehˬ laꞈ te.”

⁹ Kʼoeˇ naˇ, Sawˇluˆ-euˬ zaˬ kʼaˆ Ziˇbaˬ-ahˇ sahˬ paˬ jawˇ gaˇ bi kuˇ laꞈ-awˇ ehˇ nehˬ-eu, “Nawˬ-euˬ sahˬ paˬ-euˬ oeˬ paˬ pyeuꞈ-eu Meˬpiˇbawˇshehˆ-ahˇ Sawˇluˆ hawˇ-eu aˬ yawꞈ-euˬ nymˇ jiˇ-ahˇ kʼaˇ taꞈ-eu jeˬ biˇ dawˬ tawˆ luꞈ ngaˇ biꞈ-eu ma.

¹⁰ Nawˇ hawˇ-eu nawˬ-euˬ aˬ li deuˬ maˬ ehˇ, nawˬ-euˬ zaˬ kʼaˆ deuˬ maˬ ehˇ, nawˬ-euˬ sahˬ paˬ Sawˇluˆ-euˬ deh yaˇ mˇ-awˇ, aˬ yawꞈ-euˬ oeˬ paˬ-euˬ nymˇ jiˇ ya dzaˬ ya dawˇ ni cehˇ tawˬ ahˇ nehˬ-awˬ. Ehˇ kʼawꞈ, Meˬpiˇbawˇshehˆ gʼaˬ-aˬ, aˬ myah luꞈ ngaˬ nehˬ-ehˇ ya dzaˬ ya dawˇ tehꞈ-a.” (Ziˇbaˬ-aˬ, aˬ li tseˇ nyiꞈ li jawˇ-awˇ, zaˬ kʼaˆ nyiˬ tseˇ gʼaˬ jawˇ-eu meh.)

¹¹ Ziˇbaˬ ehˇ-eu, “Sahˬ paˬ-oˇ, nawˬ neh kʼaˇ ehˇ-euˬ yawˬ jeˬ na luꞈ ngaˇ mˇ ma.” Kʼoeˇ naˇ, Meˬpiˇbawˇshehˆ-aˬ, sahˬ paˬ-euˬ aˬ li tiˬ gʼaˬ loꞈ-ehˇ, sahˬ paˬ nehˬ-ehˇ dzaˬ taꞈ dawˇ taꞈ-eu laꞈ kʼoeˇ dehꞈ-euˬ meh.

¹² Meˬpiˇbawˇshehˆ-aˬ, Miˇgaˬ lehˇ myahˇ-euˬ aˬ li li zaˬ tiˬ li jawˇ-eu meh. Ziˇbaˬ-euˬ nymˇ kʼahˬ zaˬ dawˬ tawˆ luꞈ, Meˬpiˇbawˇshehˆ-euˬ zaˬ kʼaˆ pyeuꞈ laˇ-euˬ meh.

¹³ Aˬ kuiˇ nyiˬ pyawˬ luꞈ kuiˇ kuˆ kuˆ-eu Meˬpiˇbawˇshehˆ-aˬ, hawˬ aˬ yawꞈ byawˇ yawꞈ sahˬ paˬ nehˬ-ehˇ dzaˬ dzaˬ-ehˇ, Yeˬluˇsaˬlehˬ meuˬ-ahˇ jawˇ-euˬ meh.