2 Saˬmeuˬlaˆ 8 - Akha

Piˇliˇtiˆ tsawˇ haˬ deuˬ-ahˇ Daˬbiˇ guiˇ deuˆ gʼaˬ-euˬ

¹ Aˇ yamˬ ui cuiˆ myahˇ laˇ ngeh jawˇ, Piˇliˇtiˆ tsawˇ haˬ deuˬ-ahˇ Daˬbiˇ guiˇ deuˆ-iˇ-euˬ meh. Piˇliˇtiˆ tsawˇ haˬ-ahˇ aˬ yawꞈ deuˆ gʼaˬ-awˇ, miˇ kʼahˬ kʼoeˇ kʼahˬ-ahˇ aˬ yawꞈ uˆ lahˇ-euˬ meh.

² Kʼoeˇ naˇ, Mawˇbaˆ tsawˇ haˬ deuˬ-ahˇ aˬ yawꞈ guiˇ deuˆ gʼaˬ-euˬ meh. Guiˇ deuˆ ngeh nyehꞈ mi-euˬ deuˬ-ahˇ miˇ tsa bi yuꞈ-awˇ, smˬ bymˇ nyiˬ bymˇ sehꞈ-euˬ meh. Kʼoeˇ ngeh, Mawˇbaˆ tsawˇ haˬ deuˬ aˬ yawꞈ uˆ lahˇ-eu uˬ moˆ ya jawˇ-awˇ, aˬ yawꞈ-ahˇ kawˬ doˆ nehˬ-euˬ meh.

³ Suˇliˆ miˇ kʼahˬ Zoˇbaˬ sahˬ paˬ Leˬhawˇbaˆ-euˬ aˬ li Maˬdaˬdeˬzaˬ-aˬ, Uˇpaˬlaˇ lawˇ baˬ laꞈ taˆ paw dzaˬ-ahˇ jaˆ-eu miˇ kʼahˬ deuˆ geuꞈ le-eu lehˇ oe gaˇ, Daˬbiˇ neh bi deuˆ gʼaˬ-euˬ meh.

⁴ Mahˬ dziˬ luꞈ-eu yehˇ tiˬ heˇ shiꞈ yaˇ gʼaˬ hawˇ-eu, kuiˇ zoˬ cah-eu yehˇ nyiˬ muiˇ gʼaˬ-ahˇ Daˬbiˇ nyehꞈ mi-euˬ meh. Mahˬ laˆ lawˬ tiˬ yaˇ laˇ bi gʼeu-eu gʼaˇ duˬ loˬ-eu mahˬ deuˬ tehꞈ-ehˇ aˬ yawꞈ yuˇ-awˇ, dzeˇ-eu mahˬ dawˬ tawˆ luꞈ-ahˇ aˬ yawꞈ kuiˇ guˬ yuˇ-euˬ meh.

⁵ Sahˬ paˬ Haˬdaˬdeˬzaˬ-ahˇ bi caw ba le-eu gʼaˇ duˬ, Daˬmaˬsehˇ meuˬ-ahˇ jawˇ-eu Suˇliˆ tsawˇ haˬ deuˬ neh pyehˬ gʼeh leꞈ-euˬ guiˇ maꞈ-ahˇ Daˬbiˇ deuˆ ceh ceh-awˇ, nyiˬ muiˇ nyiˬ heˇ gʼaˬ paˇ deuˆ sehꞈ nehˬ-euˬ meh.

⁶ Aˬ yawꞈ maꞈ-euˬ miˇ kʼahˬ laꞈ kʼoeˇ Daˬbiˇ taˆ tsoˆ-awˇ, aˬ yawꞈ-euˬ yehˇ deuˬ bi jawˇ-euˬ meh. Aˬ yawꞈ maꞈ Daˬbiˇ uˆ lahˇ-eu uˬ moˆ ya jawˇ-awˇ, Daˬbiˇ-ahˇ kawˬ doˆ nehˬ-euˬ meh. Sahˬ paˬ Miˬyehˇ neh Daˬbiˇ-ahˇ yawˬ paw na luꞈ guiˇ bi deuˆ gʼaˬ-euˬ meh.

⁷ Haˬdaˬdeˬzaˬ-euˬ guiˇ maꞈ-ahˇ uˆ lahˇ-eu yaw huiˬ yaw mahˇ deuˬ zmˬ-eu, shuiˇ neh jahˇ taˬ-euˬ dehˬ daˬ duˬ tiˬ deuˬ Daˬbiˇ deuˆ za-awˇ, Yeˬluˇsaˬlehˬ meuˬ-ahˇ yuˇ kʼoꞈ gʼeh-euˬ meh.

⁸ Kʼoeˇ uˬ taꞈ, Haˬdaˬdeˬzaˬ uˆ lahˇ-eu Beˬtah meuˬ hawˇ-eu Beˬlawˇdehˇ meuˬ-ahˇ jaˆ-eu guiˬ shuiˇ gʼawˬ mya ni, aˬ yawꞈ yuˇ geuꞈ gʼeh-euˬ meh.

⁹ Haˬdaˬdeˬzaˬ-euˬ guiˇ maꞈ dawˬ tawˆ luꞈ-ahˇ Daˬbiˇ deuˆ gʼaˬ-euˬ gaˇ kawˆ, Haˬmaˆ meuˬ-ahˇ jawˇ-eu sahˬ paˬ Tawˇiˆ ya gaˬ-euˬ meh.

¹⁰ Tawˇiˆ nehˬ-ehˇ tiˬ kʼehˬ maˬ taˬ ni guiˇ deuˆ ceh ceh luꞈ-eu sahˬ paˬ Haˬdaˬdeˬzaˬ-ahˇ sahˬ paˬ Daˬbiˇ deuˆ gʼaˬ-euˬ miˇ neh, Tawˇiˆ-euˬ aˬ li Yoˇlamˬ-ahˇ sahˬ paˬ Daˬbiˇ jawˇ gaˇ bi le-awˇ, Haˬdaˬdeˬzaˬ-ahˇ deuˆ gʼaˬ-euˬ baˬ da neh, laˬ kʼaˬ cehˇ-awˇ guiˬ lahˬ huiˬ-eu gaˇ kawˆ bi tsaꞈ gaˬ leˇ-euˬ meh. Shuiˇ, pyuˇ hawˇ-eu, guiˬ shuiˇ neh jahˇ taˬ-euˬ laꞈ sawˬ deuˬ-ahˇ, Daˬbiˇ jawˇ gaˇ Yoˇlamˬ yuˇ gʼeh nehˬ-euˬ meh.

¹¹ Laꞈ sawˬ kʼoeˇ deuˬ-ahˇ sahˬ paˬ Daˬbiˇ yuˇ-awˇ, aˬ yawꞈ guiˇ deuˆ gʼaˬ-euˬ miˇ kʼahˬ deuˬ-ahˇ neh yuˇ kʼoꞈ laꞈ-euˬ shuiˇ hawˇ-eu pyuˇ deuˬ nehˬ-ehˇ tiˬ kawˆ loꞈ-ehˇ, uˬ duˬ tahˬ gaˇ zmˬ-eu gʼaˇ duˬ damˬ-euˬ meh.

¹² Shuiˇ hawˇ-eu pyuˇ kʼoeˇ deuˬ-aˬ, Eˬdoˬ miˇ kʼahˬ, Mawˇbaˆ miˇ kʼahˬ, Aˬmoˬ miˇ kʼahˬ, Piˇliˇtiˆ miˇ kʼahˬ hawˇ-eu, Aˬmaˬlehˇ miˇ kʼahˬ-ahˇ neh yuˇ kʼoꞈ laꞈ-euˬ deuˬ uˬ taꞈ, Zoˇbaˬ sahˬ paˬ Leˬhawˇbaˆ-euˬ aˬ li Haˬdaˬdeˬzaˬ-ahˇ deuˆ za-euˬ deuˬ tiˬ paˆ paˆ ahˇ-eu meh.

¹³ Saˬdeuꞈ deh kʼawꞈ-ahˇ, Eˬdoˬ tsawˇ haˬ tiˬ muiˇ yehꞈ heˇ gʼaˬ-ahˇ Daˬbiˇ deuˆ sehꞈ-awˇ gʼoꞈ laˇ ngeh, aˬ yawꞈ tsawˇ myahˇ paˇ doˆ dzehˬ laˇ-euˬ meh.

¹⁴ Eˬdoˬ miˇ kʼahˬ doe ni taˆ tsoˆ-awˇ, aˬ yawꞈ-euˬ yehˇ deuˬ-ahˇ bi jawˇ-awˇ, kʼoeˇ gaˇ jawˇ-eu miˇ kʼahˬ zaˬ deuˬ-ahˇ aˬ yawꞈ uˆ lahˇ-euˬ meh. Sahˬ paˬ Miˬyehˇ neh Daˬbiˇ-ahˇ yawˬ gaˇ na luꞈ guiˇ bi deuˆ gʼaˬ-euˬ meh.

¹⁵ Iˇsaˬleˬlaˆ miˇ kʼahˬ kʼahˬ lah ni-ahˇ Daˬbiˇ uˆ lahˇ-awˇ, aˬ yawꞈ-euˬ tsawˇ haˬ deuˬ kʼoeˇ taˆ aˬ myah luꞈ yaw tsaˬ yaw dawˇ dawˇ-ehˇ uˆ lahˇ-euˬ meh.

¹⁶ Zeˬluˇyaˆ-euˬ aˬ li Yoˇbaˬ gʼaˬ, Daˬbiˇ-euˬ guiˇ guiˇ maꞈ dawˬ tawˆ luꞈ kʼoeˇ taˆ uˆ lahˇ-eu gʼaˬ geuꞈ-euˬ meh. Aˬhiˇluˆ-euˬ aˬ li Yeˬhawˇshaˬpaˇ gʼaˬ-aˬ, jaˇ laˇ yuˇ-eu paw aˬ yuiꞈ geuꞈ-euˬ meh.

¹⁷ Aˬhiˇtuˆ-euˬ aˬ li Zaˬdoˆ hawˇ-eu Aˬbyaˬdaˬ-euˬ aˬ li Aˬhiˇmaˬlehˇ aˬ nyaꞈ-aˬ, piˇ ma geuꞈ-euˬ meh. Seˬlehˇyaˬ gʼaˬ-aˬ, saˇ naˇ-ahˇ gaˇ tuˆ tehˬ-eu gʼaˬ geuꞈ-euˬ meh.

¹⁸ Yeˬhawˇyaˬdaˬ-euˬ aˬ li Baˬnaˇyaˬ gʼaˬ-aˬ, Daˬbiˇ-ahˇ loꞈ piˇ-eu guiˇ maꞈ kʼoeˇ taˆ aˬ yuiꞈ geuꞈ-awˇ, Daˬbiˇ-euˬ aˬ li deuˬ-aˬ, piˇ ma geuꞈ-euˬ meh.