2 Saˬmeuˬlaˆ 7 - Akha

Daˬbiˇ-ahˇ Naˬdaˬ dawˬ tsaꞈ tsaꞈ nehˬ le-euˬ

¹ Sahˬ paˬ Daˬbiˇ-aˬ, aˬ yawꞈ-euˬ hawˇ nymˇ laꞈ kʼoeˇ jawˇ luꞈ-awˇ, aˬ yawꞈ-euˬ tiˬ jawˬ jawˇ-eu aˬ yawꞈ-ahˇ muiˇ-eu deuˬ-euˬ aˬ laꞈ laꞈ kʼoeˇ, Sahˬpaˬ Miˬyehˇ aˬ yawꞈ-ahˇ haw piˇ nehˬ-euˬ miˇ neh, saˇ lehˆ ni dehꞈ luꞈ-eu meh.

² Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Naˬdaˬ-ahˇ aˬ yawꞈ ehˇ nehˬ-eu, “Shuˬ liˇ neh tsoˆ taˬ-euˬ nymˇ laꞈ kʼoeˇ ngaˇ jawˇ luꞈ-eu ma. Ehˇ kʼawꞈ, Miˬyehˇ-euˬ Dawˬ ma saˇ jaˇ Bahˬ keuˆ-aˬ, sehˬ gʼawˆ laꞈ kʼoeˇ tehꞈ-ehˇ jaˆ luꞈ-a siˬ.”

³ Naˬdaˬ ehˇ-eu, “Nawˬ neh kʼaˇ noeˬ-euˬ loꞈ-ehˇ mˇ-awˬ. Aˬ jeˬ miˇ neh ehˇ naˇ, Sahˬpaˬ Miˬyehˇ nawˬ nehˬ-ehˇ jawˇ meh.”

⁴ Ehˇ kʼawꞈ, kʼoeˇ ngeh miˇ Naˬdaˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

⁵ “Ngaˬ-euˬ zaˬ kʼaˆ Daˬbiˇ jawˇ gaˇ-iˇ-awˇ, ngaˇ heu loꞈ-ehˇ ehˇ-eu meh lehˇ ehˇ nehˬ-iˇ-awˬ. ‘Ngaˇ jawˇ-eu gʼaˇ duˬ uˬ duˬ tahˬ nymˇ ya tsoˆ-eu gʼaˬ nawˇ maˬ ngeuˇ-a.

⁶ Iˇsaˬleˬlaˆ tsawˇ jeuˬ-ahˇ Iˇjiˇtuˆ miˇ kʼahˬ laꞈ kʼoeˇ neh ngaˇ ka kʼoꞈ doˆ nehˬ laꞈ-euˬ nah-ahˇ neh aˇ dahˬ beh-awˇ, iˬ nah keuˆ ni uˬ duˬ tahˬ nymˇ laꞈ kʼoeˇ ngaˇ maˬ ya jawˇ haw-aˬ. Sehˬ gʼawˆ laꞈ kʼoeˇ tehꞈ-ehˇ jawˇ jawˇ-ehˇ cah-euˬ ma.

⁷ Iˇsaˬleˬlaˆ tsawˇ jeuˬ nehˬ-ehˇ ngaˇ cah cah-ehˇ jawˇ-euˬ aˇ yamˬ kʼoeˇ myah ni gʼeh-eu laꞈ kʼoeˇ, Iˇsaˬleˬlaˆ tsawˇ jeuˬ-euˬ aˬ yuiꞈ aˬ tsu tiˬ gʼaˬ-ahˇ-iˬ, aˬ jeˬ miˇ neh ngaˬ-euˬ gʼaˇ duˬ shuˬ liˇ neh uˬ duˬ tahˬ nymˇ tiˬ nymˇ maˬ tsoˆ nehˬ laꞈ te lehˇ ngaˇ maˬ ehˇ nehˬ haw-aˬ’ lehˇ ehˇ-eu meh lehˇ ehˇ nehˬ-awˬ.

⁸ “Kʼoeˇ miˇ neh, Baoˬ huiˬ-eu, Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu meh lehˇ, ngaˬ-eu zaˬ kʼaˆ Daˬbiˇ-ahˇ ehˇ nehˬ-awˬ. ‘Deh ga-ahˇ yawˇ bo luꞈ-eu gʼaˬ pyeuꞈ-eu nawˬ-ahˇ ngaˇ kuˇ-awˇ, ngaˬ-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ deuˬ kʼoeˇ taˆ bi uˆ lahˇ-euˬ ma.

⁹ Nawˇ kʼaˇ iˇ kʼaˇ laˇ gaˇ nawˬ nehˬ-ehˇ ngaˇ jawˇ-awˇ, nawˇ iˇ-eu gaˇ ma mehˬ hu jawˇ-eu nawˬ-ahˇ muiˇ-eu tsawˇ haˬ dawˬ tawˆ luꞈ-ahˇ ngaˇ deuˆ gʼaˬ nehˬ-euˬ ma. Miˇ tsaˬ kʼoeˇ taˆ huiˬ dui dui-eu aˬ yuiꞈ aˬ tsu geuꞈ-eu deuˬ loꞈ-ehˇ, nawˬ-ahˇ ngaˇ tsawˇ myahˇ bi doˆ ma.

^10-11 Ngaˬ-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ deuˬ aˬ cawˬ kʼehˬ-eu kʼaˆ-eu uˬ moˆ maˬ paˇ ya jawˇ ni, aˬ yawꞈ maꞈ gʼaˇ duˬ ngaˬ neh jawˇ duˬ tiˬ tsahˇ poˆ nehˬ-awˇ bi jawˇ-euˬ ma. Miˇ kʼahˬ heu kʼahˬ-ahˇ aˬ yawꞈ maꞈ jawˇ keuˆ laˇ-euˬ tiˬ nah neh, haiˬ-eu tsawˇ haˬ deuˬ neh kʼehˬ nehˬ kʼaˆ nehˬ-euˬ jeˬ-ahˇ aˬ yawꞈ maꞈ ya daˬ-euˬ meh. Ehˇ kʼawꞈ, aˬ kaˇ naˇ kʼoeˇ loꞈ-ehˇ maˬ paˇ bi gʼeh ma. Muiˇ-eu deuˬ nawˬ-ahˇ maˬ ya laˆ luˬ laˆ seˇ-eu gʼaˇ duˬ maˬ ehˇ, nawˬ-euˬ zaˬ nawˬ-euˬ uˆ deuˬ bi myaˬ bi behˇ laˇ-eu gʼaˇ duˬ maˬ ehˇ, nawˬ nehˬ-ehˇ ngaˇ saˇ jaˇ dzaˬ-eu ma.

¹² Nawˇ ziˇ dehꞈ jiˇ-awˇ, nawˬ-euˬ aˬ poeˬ aˬ bawˇ deuˬ nehˬ-ehˇ gʼaˬ naˬ ya naˬ ngeh, nawˬ-euˬ aˬ li tiˬ gʼaˬ-ahˇ ngaˇ sahˬ paˬ ka nehˬ-awˇ, aˬ yawꞈ-euˬ miˇ kʼahˬ-ahˇ baoˬ huiˬ-eu miˇ kʼahˬ tiˬ kʼahˬ bi pyeuꞈ laˇ ma.

¹³ Aˬ yawꞈ-aˬ, ngaˬ-euˬ gʼaˇ duˬ uˬ duˬ tahˬ nymˇ ya tsoˆ-eu gʼaˬ pyeuꞈ-awˇ, aˬ yawꞈ-euˬ dzoeˬ dzaˬ ziꞈ ni ngaˇ caw ba nehˬ ma.

¹⁴ Ngaˇ aˬ yawꞈ-euˬ aˬ da pyeuꞈ-awˇ, aˬ yawꞈ ngaˬ-euˬ aˬ li pyeuꞈ tehꞈ-a. Aˬ yawꞈ yaw lehˬ jeˬ mˇ ngeh, aˬ da tiˬ gʼaˬ zaˬ-ahˇ diˬ-awˇ dzaw paˇ-eu loꞈ-ehˇ, aˬ yawꞈ-ahˇ ngaˇ mehˬ paˇ tsoˆ paˇ ma.

¹⁵ Ehˇ kʼawꞈ, nawˇ sahˬ paˬ pyeuꞈ laˇ ni Sawˇluˆ-ahˇ ngaˬ neh byehˇ dzeh-euˬ loꞈ-ehˇ, aˬ yawꞈ-ahˇ ngaˇ maˬ byehˇ dzeh.

¹⁶ Nawˬ-euˬ zaˬ nawˬ-euˬ uˆ deuˬ aˬ myah luꞈ maˬ tsehˆ leˇ ni dehꞈ-awˇ, nawˬ-euˬ dzoeˬ dzaˬ mˬ maˬ maˬ byaˆ zaˇ ziˇ ziꞈ tehꞈ-a. Nawˬ neh nuiˇ-euˬ dzoeˬ dzaˬ nuiˇ mahˬ kʼawꞈ, tiˬ jawˇ-iˬ aˇ saˬ saˬ-euˬ maˬ baw-aˇ’ lehˇ, ngaˬ-euˬ zaˬ kʼaˆ Daˬbiˇ-ahˇ ehˇ nehˬ-awˬ.”

¹⁷ Miˬyehˇ neh kʼaˇ pah mehˬ nehˬ-euˬ jeˬ, Daˬbiˇ-ahˇ Naˬdaˬ dzawˇ mehˬ nehˬ-euˬ meh.

Daˬbiˇ guiˬ lahˬ shaˇ-euˬ

¹⁸ Kʼoeˇ naˇ, Sahˬpaˬ Miˬyehˇ jawˇ-eu Sehˬ gʼawˆ-ahˇ sahˬ paˬ Daˬbiˇ uˇ leˇ-awˇ, nuiˇ-awˇ heu loꞈ-ehˇ guiˬ lahˬ shaˇ-euˬ meh. “Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, ngaˇ maˬ ehˇ, ngaˬ-euˬ nymˇ jiˇ maˬ ehˇ, nawˬ neh mˇ nehˬ laꞈ-euˬ guiˬ lahˬ-ahˇ za-eu maˬ geuˇ-a.

¹⁹ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, kʼoeˇ naˆ tehꞈ-ehˇ nawˇ maˬ juˬ-ehˇ, kʼoeˇ naˆ maˬ tseˇ gʼeh-eu jeˬ ngaˬ-euˬ kʼoeˇ taˆ nawˇ paˇ mˇ nehˬ-eu lehˇ gʼeh-eu meh. Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, mehˬ hu paw dehꞈ daˆ leꞈ-eu ngaˬ-euˬ zaˬ ngaˬ-euˬ uˆ deuˬ gʼaˇ duˬ, nawˇ ngaˬ-ahˇ saˇ jaˇ dzaˬ-awˇ, aˬ kaˇ pyeuꞈ laˇ-eu gaˇ kawˆ deuˬ nawˇ ngaˬ-ahˇ bi siˬ bi mawˇ laꞈ-euˬ meh.

²⁰ Heu naˆ maˬ tseˇ nawˬ-ahˇ ngaˇ aˬ joˆ-ehˇ ya ehˇ nmˇ. Nawˬ-euˬ zaˬ kʼaˆ pyeuꞈ-eu ngaˬ-ahˇ nawˇ siˬ nya luꞈ meh.

²¹ Nawˬ-euˬ saˇ jaˇ baˬ da neh maˬ ehˇ, nawˇ nui ma keuˆ-eu baˬ da neh maˬ ehˇ, huiˬ-eu gaˇ heu deuˬ nawˇ mˇ-awˇ, ngaˬ-ahˇ mehˬ nehˬ tsoˆ nehˬ laꞈ-euˬ meh.

²² Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, nawˇ-aˬ, huiˬ dui mahˇ dui dui-eu meh. Nawˬ-ahˇ duˇ-eu tiˬ gʼaˬ-iˬ maˬ jawˇ-a. Nawˇ tiˬ gʼaˬ tehꞈ-ehˇ Miˬyehˇ pyeuꞈ-eu meh lehˇ, nga maꞈ aˬ myah luꞈ siˬ nya-euˬ ma.

²³ Nawˬ-euˬ tsawˇ jeuˬ bi pyeuꞈ laˇ-eu gʼaˇ duˬ, aˬ cawˬ tsawˇ jeuˬ-euˬ zaˬ kʼaˆ geuꞈ luꞈ ngeh nawˬ neh ka kʼoꞈ nehˬ laꞈ-euˬ Iˇsaˬleˬlaˆ tsawˇ jeuˬ-ahˇ duˇ-eu tsawˇ jeuˬ tiˬ jeuˬ-iˬ, miˇ tsaˬ kʼoeˇ taˆ maˬ jawˇ-a. Nawˬ neh aˬ yawꞈ maꞈ gʼaˇ duˬ mˇ-euˬ, huiˬ dui dui-eu gaˇ deuˬ hawˇ-eu, zahˬ leˇ paˬ-ehˇ gʼeh-eu gaˇ deuˬ baˬ da neh, miˇ tsaˬ kʼoeˇ taˆ nawˬ-euˬ tsawˇ myahˇ doˆ luꞈ meh. Nawˬ-euˬ tsawˇ jeuˬ bi pyeuꞈ laˇ-eu gʼaˇ duˬ, Iˇjiˇtuˆ miˇ kʼahˬ laꞈ kʼoeˇ nawˬ neh ka kʼoꞈ doˆ laꞈ-euˬ tsawˇ haˬ deuˬ mehˬ hu paw laˇ luꞈ ngeh, aˬ cawˬ tsawˇ jeuˬ hawˇ-eu aˬ yawꞈ maꞈ-euˬ miˬyehˇ deuˬ-ahˇ nawˇ teh dzeh-euˬ meh.

²⁴ Sahˬpaˬ Miˬyehˇ-oˇ, nawˇ-aˬ, Iˇsaˬleˬlaˆ tsawˇ jeuˬ-ahˇ, mˬ maˬ maˬ byaˆ zaˇ ziˇ nawˬ-euˬ tsawˇ jeuˬ bi pyeuꞈ laˇ-awˇ, nawˇ aˬ yawꞈ maꞈ-euˬ Miˬyehˇ pyeuꞈ laˇ-euˬ meh.

²⁵ “Sahˬpaˬ Miˬyehˇ pyeuꞈ-eu Miˬyehˇ-oˇ, ngaˬ-ahˇ maˬ ehˇ, ngaˬ-euˬ zaˬ deuˬ uˆ deuˬ-ahˇ maˬ ehˇ, nawˬ neh saˇ jaˇ dzaˬ taˬ-euˬ jeˬ aˬ myah luꞈ bi keuˆ le-awˇ, nawˬ neh mˇ ma lehˇ ehˇ taˬ-euˬ loꞈ-ehˇ mˇ nehˬ laꞈ-awˬ.

²⁶ Nawˇ tsawˇ myahˇ doˆ dui dui tehꞈ-a. Baoˬ huiˬ-eu Sahˬpaˬ Miˬyehˇ-aˬ, Iˇsaˬleˬlaˆ miˇ kʼahˬ-euˬ Miˬyehˇ meh lehˇ, mˬ maˬ maˬ byaˆ zaˇ ziˇ aˬ cawˬ ja tehꞈ-a. Ngaˬ-euˬ dzoeˬ dzaˬ kʼawꞈ, mˬ maˬ maˬ byaˆ zaˇ ziˇ nawˇ bi ziꞈ laꞈ tehꞈ-a.

²⁷ Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ-oˇ, gaˇ kawˆ heu deuˬ dawˬ tawˆ luꞈ, nawˬ-euˬ zaˬ kʼaˆ pyeuꞈ-eu ngaˬ-ahˇ pah mehˬ nehˬ laꞈ-awˇ, ngaˬ-euˬ zaˬ deuˬ uˆ deuˬ-ahˇ dzoeˬ dzaˬ bi oꞈ ma lehˇ nawˇ ngaˬ-ahˇ ehˇ-eu miˇ neh, ngaˇ nawˬ-ahˇ heu loꞈ-ehˇ guiˬlahˬ shaˇ peuˬ-eu ma.

²⁸ “Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, nawˇ-aˬ, Miˬyehˇ pyeuꞈ-eu meh. Nawˬ-euˬ saˇ jaˇ-ahˇ nawˇ aˬ myah luꞈ ziꞈ-awˇ, zahˬ leˇ paˬ-ehˇ gʼeh-eu saˇ jaˇ heu, nawˇ ngaˬ-ahˇ biꞈ laꞈ-euˬ meh.

²⁹ Ngaˬ-euˬ zaˬ ngaˬ-euˬ uˆ deuˬ aˬ myah luꞈ nawˇ nui ma tsaˬ-eu tsawˇ haˬ deuˬ pyeuꞈ ni, aˬ yawꞈ maꞈ-ahˇ guiˬ lahˬ biꞈ nehˬ-awˬ lehˇ ngaˇ nawˬ-ahˇ shaˇ-eu ma. Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, nawˬ neh saˇ jaˇ dzaˬ taˬ-euˬ jaˆ-eu loꞈ-ehˇ, nawˬ-euˬ guiˬ lahˬ yaw dzahˇ deuˬ, ngaˬ-euˬ zaˬ deuˬ uˆ deuˬ kʼoeˇ taˆ, mˬ maˬ maˬ byaˆ zaˇ ziˇ jaˆ luꞈ-uˇ.”