2 Saˬmeuˬlaˆ 5 - Akha

Daˬbiˇ Iˇsaˬleˬlaˆ miˇ kʼahˬ hawˇ-eu Yuˇdaˆ miˇ kʼahˬ-euˬ sahˬ paˬ pyeuꞈ laˇ-euˬ

¹ Kʼoeˇ naˇ, Iˇsaˬleˬlaˆ tsawˇ jeuˬ dawˬ tawˆ luꞈ, Heˬbyoˬ meuˬ-ahˇ Daˬbiˇ jawˇ gaˇ laˇ-awˇ, heu loꞈ-ehˇ ehˇ-eu meh. “Nga maꞈ-aˬ, nawˬ-euˬ shiˬ shaˬ pyeuꞈ-eu ma.

² Dzeuˇ laˇ ngeh, Sawˇluˆ nga maꞈ-euˬ sahˬ paˬ geuꞈ luꞈ ngeh kʼawꞈ, guiˇ deuˆ-eu paw Iˇsaˬleˬlaˆ tsawˇ jeuˬ-ahˇ nawˇ sheuˬ gʼeh-awˇ, Sahˬpaˬ Miˬyehˇ-euˬ tsawˇ jeuˬ-ahˇ nawˬ neh bi sheuˬ gʼeh-awˇ, aˬ yawꞈ maꞈ kʼoeˇ taˆ bi uˆ lahˇ ma lehˇ, Sahˬpaˬ Miˬyehˇ neh saˇ jaˇ dzaˬ taˬ-euˬ jaˆ-eu meh.”

³ Kʼoeˇ loꞈ-ehˇ, Iˇsaˬleˬlaˆ miˇ kʼahˬ-euˬ aˬ yuiꞈ aˬ tsu dawˬ tawˆ luꞈ, Heˬbyoˬ meuˬ-ahˇ sahˬ paˬ Daˬbiˇ jawˇ gaˇ laˇ-awˇ, aˬ yawꞈ hawˇ-eu aˬ yawꞈ maꞈ yaw kaˬ saˇ jaˇ dzaˬ taꞈ-euˬ meh. Kʼoeˇ naˇ, aˬ yawꞈ maꞈ aˬ yawꞈ-ahˇ tsiˇ shehˆ daˆ nehˬ-awˇ, Iˇsaˬleˬlaˆ miˇ kʼahˬ-euˬ sahˬ paˬ ka nehˬ-euˬ meh.

⁴ Daˬbiˇ sahˬ paˬ pyeuꞈ laˇ ngeh, aˇ kʼoꞈ smˬ tseˇ byah-awˇ, oeˬ tseˇ kʼoꞈ ehˇ gʼaˬ ni sahˬ paˬ geuꞈ-awˇ uˆ lahˇ-euˬ meh.

⁵ Aˬ yawꞈ Heˬbyoˬ meuˬ-ahˇ jawˇ-awˇ, Yuˇdaˆ miˇ kʼahˬ kʼoeˇ taˆ shiꞈ kʼoꞈ uˬ taꞈ ba la koꞈ siˬ uˆ lahˇ-euˬ meh. Kʼoeˇ naˇ, Yeˬluˇsaˬlehˬ meuˬ-ahˇ jawˇ-awˇ, Iˇsaˬleˬlaˆ miˇ kʼahˬ dawˬ tawˆ luꞈ hawˇ-eu, Yuˇdaˆ miˇ kʼahˬ-ahˇ smˬ tseˇ smˇ kʼoꞈ uˆ lahˇ-euˬ meh.

⁶ Sahˬ paˬ Daˬbiˇ hawˇ-eu aˬ yawꞈ-euˬ tsawˇ haˬ deuˬ, Yeˬluˇsaˬlehˬ meuˬ-ahˇ guiˇ deuˆ leˇ-euˬ meh. Kʼoeˇ gaˇ jawˇ-eu Yeˬbuˇ tsawˇ haˬ deuˬ meuˬ kʼoeˇ meuˬ-ahˇ Daˬbiˇ maˬ deuˆ gʼaˬ nya-aˇ lehˇ noeˬ-awˇ, “Meuˬ heu meuˬ-ahˇ nawˇ maˬ uˇ laˇ nya-aˇ. Myaˆ behꞈ hawˇ-eu kuiˇ kuˆ deuˬ tehꞈ-ehˇ kʼawꞈ, nawˬ-ahˇ heu gaˇ maˬ bi uˆ keuˆ laˇ ni deuˆ gʼaˬ nya meh” lehˇ, Daˬbiˇ-ahˇ ehˇ nehˬ-euˬ meh.

⁷ Ehˇ kʼawꞈ, ziꞈ dah ni tsoˆ taˬ-euˬ Ziˇoˬ taˆ-ahˇ Daˬbiˇ neh deuˆ gʼaˬ-awˇ, jawˇ duˬ kʼoeˇ tsahˇ Daˬbiˇ-euˬ meuˬ lehˇ tsawˇ myahˇ doˆ-euˬ meh.

⁸ Kʼoeˇ ngeh nah, aˬ yawꞈ-euˬ tsawˇ haˬ deuˬ-ahˇ Daˬbiˇ ehˇ nehˬ-eu, “Yeˬbuˇ tsawˇ haˬ deuˬ-ahˇ ngaˇ kʼaˇ bye-eu naˆ ni bye-awˇ sehꞈ leˇ mawꞈ-eu tsawˇ haˬ jawˇ naˇ, miˇ tsaˬ dawˬ dah pahˬ doˆ laꞈ-euˬ iˇ cuꞈ uiˇ kʼehˬ caw caw-ehˇ le-awˇ, myaˆ behꞈ hawˇ-eu kuiˇ kuˆ kʼoeˇ deuˬ-ahˇ deuˆ leˇ-awˬ.” Kʼoeˇ ngeh neh naˇ, “Myaˆ behꞈ hawˇ-eu kuiˇ kuˆ deuˬ Sahˬpaˬ Miˬyehˇ-euˬ nymˇ-ahˇ maˬ ya uˇ leˇ-a” lehˇ ehˇ-eu dawˬ jaˆ laˇ-euˬ meh.

⁹ Taˆ nymˇ nymˇ ma kʼoeˇ nymˇ-ahˇ deuˆ gʼaˬ ngeh, Daˬbiˇ kʼoeˇ gaˇ jawˇ le-awˇ, Daˬbiˇ-euˬ meuˬ lehˇ myahˇ nehˬ-euˬ meh. Kʼoeˇ naˇ, gawˬ duˇ-euˬ nahˇ ma doˆ kʼehˬ paw dzeˇ jaˆ-eu tsaˬ duˬ duˬ dzm taˬ-euˬ tsahˇ-ahˇ neh aˇ dahˬ beh-awˇ, taˆ nymˇ nymˇ ma kʼoeˇ nymˇ-euˬ jawˬ jawˬ-ehˇ, aˬ yawꞈ meuˬ tsoˆ-euˬ meh.

¹⁰ Baoˬ huiˬ-eu Miˬyehˇ pyeuꞈ-eu Sahˬpaˬ Miˬyehˇ aˬ yawꞈ nehˬ-ehˇ jawˇ-eu miˇ neh, aˬ yawꞈ tiˬ jawˇ saˇ-iˬ tiˬ jawˇ gʼaˬ kʼaˆ laˇ luꞈ-eu meh.

¹¹ Duˇlu sahˬ paˬ Hiˇlamˬ-aˬ, jeˬ gaꞈ gaꞈ taꞈ-eu gʼaˇ duˬ Daˬbiˇ jawˇ gaˇ tsawˇ haˬ pyehˬ gʼeh-awˇ, sahˬ paˬ-euˬ nymˇ tsoˆ-eu gʼaˇ duˬ shuˬ liˇ daˇ kawˬ maˬ ehˇ, laꞈ myawˬ laꞈ sawˆ nya-eu tsawˇ haˬ deuˬ maˬ ehˇ, kʼaˬ lo tsaˬ byaˆ gawˬ-eu paw tsawˇ gahˇ ahˇ-eu deuˬ maˬ ehˇ, kʼehˇ gʼeh-euˬ meh.

¹² Kʼoeˇ ngeh, Daˬbiˇ-aˬ, Sahˬpaˬ Miˬyehˇ neh aˬ yawꞈ-ahˇ sahˬ paˬ ka nehˬ-awˇ, aˬ yawꞈ-euˬ tsawˇ jeuˬ gʼaˇ duˬ aˬ yawꞈ-euˬ miˇ kʼahˬ baw le za le ni mˇ nehˬ laꞈ luꞈ-eu gaˇ kawˆ noeˬ siˬ-euˬ meh.

¹³ Heˬbyoˬ meuˬ-ahˇ neh Yeˬluˇsaˬlehˬ meuˬ-ahˇ Daˬbiˇ jawˇ-iˇ gʼaˬ ngeh, ma nyiˇ gʼawˬ mya gʼaˬ sheuˬ lahˬ-awˇ, aˬ buˇ aˬ li gʼawˬ mya ni jawˇ le-euˬ meh.

¹⁴ Yeˬluˇsaˬlehˬ meuˬ-ahˇ dehꞈ le-euˬ aˬ yawꞈ-euˬ zaˬ deuˬ-aˬ, Shaˬmeuˬ, Shawˇbaˆ, Naˬdaˬ, Sawˇlaˬmoˬ,

¹⁵ Iˇbaˬhaˬ, Eˇliˇshuˆ, Neˬpehˆ, Jaˬpiˇyaˬ,

¹⁶ Eˇliˇshaˬmaˇ, Eˇleˬdaˬ, Eˇliˇpaˬlehˇ aˬ ha mehˇ nmˇ meh.

Piˇliˇtiˆ tsawˇ haˬ deuˬ-ahˇ guiˇ deuˆ gʼa-euˬ

¹⁷ Daˬbiˇ Iˇsaˬleˬlaˆ sahˬ paˬ pyeuꞈ laˇ-euˬ gaˇ kawˆ Piˇliˇtiˆ tsawˇ haˬ deuˬ ya gaˬ ngeh, Daˬbiˇ-ahˇ nyehꞈ-eu lehˇ aˬ yawꞈ maꞈ-euˬ guiˇ maꞈ deuˬ oe-euˬ meh. Gaˇ kawˆ kʼoeˇ Daˬbiˇ ya gaˬ ngeh, ziꞈ dah ni gʼeh-eu jawˇ duˬ-ahˇ yahˇ jawˇ-euˬ meh.

¹⁸ Piˇliˇtiˆ tsawˇ haˬ deuˬ-aˬ, Leˬpeˬ deh kʼawꞈ-ahˇ oe keuˆ-awˇ, kʼoeˇ gaˇ jawˇ-euˬ meh.

¹⁹ “Piˇliˇtiˆ tsawˇ haˬ deuˬ-ahˇ ngaˇ guiˇ deuˆ-iˇ-awˬ loˇ. Nawˇ ngaˬ-ahˇ bi gʼaˬ leˇ nehˬ laꞈ ma loˇ” lehˇ, Sahˬpaˬ Miˬyehˇ-ahˇ Daˬbiˇ naˇ haˬ ngeh, “Deuˆ-iˇ-awˬ. Nawˬ-ahˇ ngaˇ bi gʼaˬ leˇ ma” lehˇ, Sahˬpaˬ Miˬyehˇ ehˇ-eu meh.

²⁰ Kʼoeˇ naˇ, Baˬlaˇpeˬlaˬzmˬ-ahˇ Daˬbiˇ iˇ-awˇ, Piˇliˇtiˆ tsawˇ haˬ deuˬ-ahˇ deuˆ gʼaˬ-euˬ meh. “Ngaˬ-ahˇ muiˇ-eu deuˬ-ahˇ Sahˬpaˬ Miˬyehˇ neh iˇ jeuˬ jeuˬ-eu loꞈ-ehˇ tahˬ paˆ gʼeh-euˬ meh” lehˇ Daˬbiˇ ehˇ-eu meh. Kʼoeˇ miˇ neh, jawˇ duˬ kʼoeˇ tsahˇ-ahˇ Baˬlaˇpeˬlaˬzmˬ lehˇ kuˇ-euˬ meh.

²¹ Piˇliˇtiˆ tsawˇ haˬ deuˬ cehˆ byaˆ ngeh, aˬ yawꞈ maꞈ-euˬ tahˬ pahˬ aˬ ma mawˇ kawˇ byehˇ dzeh yaꞈ-awˇ, Daˬbiˇ hawˇ-eu aˬ yawꞈ-euˬ tsawˇ haˬ deuˬ tahˬ pahˬ aˬ ma mawˇ kawˇ kʼoeˇ deuˬ yuˇ kʼoꞈ gʼeh-euˬ meh.

²² Kʼoeˇ naˇ, Piˇliˇtiˆ tsawˇ haˬ deuˬ Leˬpeˬ deh kʼawꞈ-ahˇ paˇ oe-awˇ paˇ jawˇ le-euˬ meh.

²³ Sahˬpaˬ Miˬyehˇ-ahˇ Daˬbiˇ mehˬ bawˬ tiˬ poˆ paˇ mˇ haw ngeh, Sahˬpaˬ Miˬyehˇ heu loꞈ-ehˇ ehˇ-eu meh. “Heu paw dzeˇ coeˇ-ahˇ neh aˬ yawꞈ maꞈ-ahˇ guiˇ taˬ deuˆ-iˇ. Boeˬ dzaˇ aˇ bawˇ bawˇ yaˇ paw neh iˇ jaw gʼeh-awˇ, aˬ yawꞈ maꞈ-ahˇ guiˇ deuˆ-eu gʼaˇ duˬ lehˬ hmˬ dah taˬ-awˇ jawˇ-awˬ.

²⁴ Kʼoeˇ naˇ, boeˬ dzaˇ aˇ bawˇ kʼoeˇ deuˬ-euˬ uˬ du, guiˇ deuˆ gaˇ iˇ luꞈ-eu teˇ saˇ loꞈ-ehˇ nawˬ-ahˇ gaˬ laˇ naˇ, guiˇ deuˆ-iˇ-awˬ. Aˬ jeˬ miˇ neh ehˇ naˇ, Piˇliˇtiˆ tsawˇ haˬ deuˬ-ahˇ deuˆ gʼaˬ-eu gʼaˇ duˬ, nawˬ-euˬ mehˬ hu ngaˇ iˇ luꞈ-eu ma.”

²⁵ Sahˬpaˬ Miˬyehˇ neh dawˬ kʼaˇ biꞈ taˬ-euˬ loꞈ-ehˇ Daˬbiˇ mˇ-awˇ, Piˇliˇtiˆ tsawˇ haˬ deuˬ-ahˇ, Geˬbaˬ meuˬ-ahˇ neh Geˬzeuˬ meuˬ-ahˇ keuˆ ni teh kʼoꞈ gʼeh-euˬ meh.