2 Saˬmeuˬlaˆ 4 - Akha

Iˇshaˬbawˇshehˆ-ahˇ sehꞈ-euˬ

¹ Heˬbyoˬ meuˬ-ahˇ Aˬbaˬnaˬ bi sehꞈ-euˬ gaˇ kawˆ ya gaˬ ngeh, Sawˇluˆ-euˬ aˬ li Iˇshaˬbawˇshehˆ guˆ laˇ-awˇ, Iˇsaˬleˬlaˆ miˇ kʼahˬ zaˬ dawˬ tawˆ luꞈ luiˬ gʼa laˇ-euˬ meh.

² Iˇshaˬbawˇshehˆ-aˬ, aˬ yawꞈ-euˬ guiˇ maꞈ kʼoeˇ taˆ bi uˆ lahˇ-euˬ, Baˬnahˬ hawˇ-eu Leˬkaˆ lehˇ myahˇ-euˬ aˬ yuiꞈ aˬ tsu nyiˬ gʼaˬ jawˇ-eu meh. Aˬ nyaꞈ nmˇ-aˬ, Biˇyoˆ meuˬ-ahˇ jawˇ-eu Beˬyaˬmiˬ tsawˇ jeuˬ Leˬmoˬ-euˬ zaˬ meh. (Biˇyoˆ meuˬ-aˬ, Beˬyaˬmiˬ miˇ kʼahˬ-ahˇ taꞈ-eu meuˬ tiˬ meuˬ lehˇ sawˇ taˬ-euˬ meh.)

³ Yaw beh kʼoeˇ gaˇ jawˇ-euˬ tsawˇ haˬ deuˬ Giˇdeˬmeuˬ-ahˇ cehˆ jawˇ-iˇ-euˬ meh.

⁴ Sawˇluˆ-euˬ aˬ li Yawˇnaˆshaˬ o neh aˬ li tiˬ li jawˇ yaꞈ-euˬ meh. Aˬ li kʼoeˇ li-aˬ, kuiˇ shiˇ shiˇ-eu tsawˇ haˬ meh. Sawˇluˆ hawˇ-eu Yawˇnaˆshaˬ aˬ nyaꞈ da zaˬ shiˇ-euˬ gaˇ kawˆ Yeˬzaˬleˬlaˇ meuˬ-ahˇ gaˬ keuˆ laˇ ngeh, aˬ yawꞈ-euˬ aˇ kʼoꞈ ngaˬ kʼoꞈ byah-eu meh. Kʼoeˇ ngeh, aˬ yawꞈ-ahˇ haw-eu zaˬ miˬ zaˬ gʼaˬ neh, aˬ yawꞈ-ahˇ ciˬ-awˇ cehˆ-euˬ meh. Ehˇ kʼawꞈ, tehˬ law tsaˇ law-ehˇ cehˆ-euˬ miˇ neh bi ga ka-awˇ, aˬ kuiˇ kuiˇ shiˇ ga shiˇ-euˬ meh. Aˬ yawꞈ-euˬ tsawˇ myahˇ-aˬ, Meˬpiˇbawˇshehˆ meh.

⁵ Biˇyoˆ meuˬ-ahˇ jawˇ-eu Leˬmoˬ-euˬ aˬ li Leˬkaˆ hawˇ-eu Baˬnahˬ aˬ nyaꞈ nmˇ Iˇshaˬbawˇshehˆ-euˬ nymˇ-ahˇ le-awˇ, nah gʼahˇ paw nahˇ tsaˇ kʼaˆ dui dui ngeh le keuˆ-euˬ meh. Nah loˆ ceh laˇ-euˬ miˇ neh, Iˇshaˬbawˇshehˆ gʼaˬ naˬ naˬ luꞈ-eu aˇ yamˬ pyeuꞈ-eu meh.

⁶ Laˇ gʼoˆ-ahˇ jawˇ-eu zaˬ miˬ zaˬ kʼoeˇ gʼaˬ cehˇ zaˇ zaˇ luꞈ-eu yuꞈ yoeˇ laˇ-awˇ yuꞈ kʼaˆ-euˬ meh. Kʼoeˇ miˇ neh, Leˬkaˆ hawˇ-eu Baˬnahˬ aˬ nyaꞈ nmˇ iˇ kahˇ laꞈ kʼoeˇ aˬ za za-ehˇ le uˇ-euˬ meh.

⁷ Laꞈ kʼoeˇ uˇ keuˆ leˇ-eu nehˬ-ehˇ, Iˇshaˬbawˇshehˆ yuꞈ luꞈ-eu lawˆ-ahˇ uˇ leˇ-awˇ, yuꞈ kʼaˆ taˬ-euˬ Iˇshaˬbawˇshehˆ-ahˇ sehꞈ-awˇ, uˬ duˬ toˆ tsehˆ-euˬ meh. Kʼoeˇ naˇ, uˬ duˬ kʼoeˇ siˬ yuˇ-awˇ, uˬ ciꞈ miˇ lah-ehˇ Yawˇdaˬ lawˇ baˬ deh kʼawꞈ iˇ tsehˆ-euˬ meh.

⁸ Aˬ yawꞈ nyaꞈ nmˇ Heˬbyoˬ meuˬ-ahˇ sahˬ paˬ Daˬbiˇ jawˇ gaˇ uˬ duˬ kʼoeˇ siˬ yuˇ gʼeh nehˬ-awˇ, “Uˬ duˬ heu siˬ-aˬ, nawˬ-ahˇ muiˇ-awˇ sehꞈ-eu lehˇ leh jeh yaꞈ-eu Sawˇluˆ-euˬ aˬ li Iˇshaˬbawˇshehˆ-euˬ uˬ duˬ ma. Iˬ nah Sahˬpaˬ Miˬyehˇ nawˬ-euˬ gʼaˇ duˬ Sawˇluˆ hawˇ-eu aˬ yawꞈ-euˬ zaˬ deuˬ-ahˇ laꞈ poˆ poˆ nehˬ-euˬ meh” lehˇ ehˇ nehˬ-euˬ meh.

⁹ Biˇyoˆ meuˬ-ahˇ jawˇ-eu Leˬmoˬ-euˬ aˬ li Leˬkaˆ hawˇ-eu Baˬnahˬ aˬ nyaꞈ nmˇ-ahˇ, Daˬbiˇ heu loꞈ-ehˇ ehˇ kʼoꞈ nehˬ-euˬ meh. “Shaˬ zahˬ guˆ gaˆ dawˬ tawˆ luꞈ laꞈ kʼoeˇ ngaˬ-ahˇ ka kʼoꞈ nehˬ laꞈ-euˬ gʼaˬ pyeuꞈ-eu dehꞈ luꞈ-eu Sahˬpaˬ Miˬyehˇ mehˬ shi ngaˇ heu loꞈ-ehˇ ehˇ-eu ma.

¹⁰ Ziˇkaˬlehˆ meuˬ-ahˇ ngaˇ jawˇ gaˇ oe-awˇ, Sawˇluˆ-euˬ gaˇ kawˆ ngaˬ-ahˇ tsaꞈ gaˬ le-euˬ tsawˇ haˬ kʼoeˇ gʼaˬ, ngaˇ laˬ kʼaˬ bi cehˇ-eu dawˬ tsaꞈ gaˬ le-euˬ ma lehˇ aˬ yawˇ yawꞈ noeˬ-euˬ meh. Ehˇ kʼawꞈ, aˬ yawꞈ-ahˇ ngaˇ nyehꞈ-awˇ sehꞈ-euˬ ma. Aˬ yawꞈ neh tsaꞈ gaˬ le-euˬ laˬ kʼaˬ cehˇ-eu dawˬ kʼoeˇ dawˬ aˇ poeˬ, ngaˇ aˬ yawꞈ-ahˇ kʼoeˇ loꞈ-ehˇ jahˇ kʼoꞈ nehˬ-euˬ ma.

¹¹ Yawˬ ha-euˬ nymˇ laꞈ kʼoeˇ yuꞈ kʼaˆ taˬ-euˬ yaw lehˬ yaw ca maˬ jaˆ-eu tsawˇ haˬ-ahˇ sehꞈ-euˬ gaˇ kawˆ heu aˇ naˆ ni paˇ doeˇ dzehˬ-eu nga. Naw nyaꞈ aˬ yawꞈ-ahˇ sehꞈ-euˬ baˬ da neh, naw nyaꞈ-ahˇ miˇ tsaˬ tahˬ kʼawˇ heu siˬ kʼoeˇ taˆ maˬ paˇ bi dehꞈ ni, nymˬ-mˇ ngaˇ naw nyaꞈ-ahˇ laꞈ poˆ poˆ ma.”

¹² Daˬbiˇ aˬ yawꞈ-euˬ yehˇ deuˬ-ahˇ dawˬ biꞈ-awˇ, Leˬkaˆ hawˇ-eu Baˬnahˬ aˬ nyaꞈ nmˇ-ahˇ bi sehꞈ-euˬ meh. Aˬ yawꞈ maꞈ aꞈ yawꞈ nyaꞈ nmˇ-euˬ aˬ kuiˇ aˬ laꞈ toˆ tsehˆ-awˇ, Heˬbyoˬ lah lah dzeˇ paꞈ gʼeu taˬ-euˬ meh. Iˇshaˬbawˇshehˆ-euˬ uˬ duˬ-ahˇ aˬ yawꞈ maꞈ yuˇ-awˇ, Heˬbyoˬ meuˬ-ahˇ jaˆ-eu Aˬbaˬnaˬ-euˬ lmˬ bymˇ-ahˇ baꞈ pahˬ-euˬ meh.