2 Saˬmeuˬlaˆ 3 - Akha

¹ Sawˇluˆ-euˬ aˬ yuiꞈ aˬ nyiˇ deuˬ jawˇ paw pyawˬ-eu tsawˇ haˬ deuˬ hawˇ-eu, Daˬbiˇ jawˇ paw pyawˬ-eu tsawˇ haˬ deuˬ, aˇ yamˬ gʼawˬ myahˇ ni guiˇ deuˆ deuˆ-ehˇ jawˇ-euˬ meh. Daˬbiˇ tiˬ jawˇ saˇ-iˬ tiˬ jawˇ gʼaˬ kʼaˆ laˇ luꞈ-awˇ, Sawˇluˆ-euˬ aˬ yuiꞈ aˬ nyiˇ deuˬ tiˬ jawˇ saˇ-iˬ tiˬ jawˇ gʼaˬ teˬ-iˇ luꞈ-eu meh.

Daˬbiˇ-euˬ aˬ li deuˬ

² Heˬbyoˬ meuˬ-ahˇ jawˇ ngeh tiˬ gʼaˬ mehˬ nah tiˬ gʼaˬ dehꞈ le-euˬ Daˬbiˇ-euˬ aˬ li koꞈ li-aˬ, heu loꞈ-ehˇ meh. Yeˬzaˬleˬlaˇ meuˬ-ahˇ jawˇ-eu Aˬhiˇnoˬ o neh dehꞈ le-euˬ Aˬmaˬnoˬ,

³ Gaˬlaˬmeˬlaˇ meuˬ-ahˇ jawˇ-eu Naˬbaˬlaˇ-euˬ miˬ coeˬ Aˬbiˇgeˬlaˆ o neh dehꞈ le-euˬ Ciˇleh, Geˬshuˇlaˆ sahˬ paˬ Taˬlaˬmehˇ-euˬ aˬ buˇ Mawˇkah o neh dehꞈ le-euˬ Aˬbaˇsaˬloˬ,

⁴ Haˬgiˇdaˇ o neh dehꞈ le-euˬ Aˬdawˇniˇyaˆ, Aˬbiˇtaˬlaˆ o neh dehꞈ le-euˬ Sheˬpaˬtiˇ,

⁵ Eˇgaˬlahˬ o neh dehꞈ le-euˬ Iˇdaˬlamˬ aˬ ha mehˇ nmˇ meh. Daˬbiˇ-euˬ aˬ li heu deuˬ dawˬ tawˆ luꞈ, Heˬbyoˬ meuˬ-ahˇ dehꞈ le-euˬ meh.

Aˬbaˬnaˬ Daˬbiˇ jawˇ paw cehˆ uˇ laˇ-euˬ

⁶ Daˬbiˇ-euˬ guiˇ maꞈ deuˬ hawˇ-eu Sawˇluˆ-euˬ aˬ yuiꞈ aˬ nyiˇ jawˇ paw pyawˬ-eu tsawˇ haˬ deuˬ maˬ tsehˆ leˇ ni guiˇ deuˆ luꞈ ngeh, Sawˇluˇ-euˬ mehˬ nah caw teh-eu tsawˇ haˬ deuˬ laꞈ kʼoeˇ, Aˬbaˬnaˬ gʼaˬ aˬ cawˬ naˆ maˬ tseˇ baoˬ jaˆ laˇ luꞈ-eu meh.

⁷ Tiˬ nah keuˆ laˇ ngeh, Aˬbaˬnaˬ-ahˇ Aˬiˇyaˬ-euˬ aˬ buˇ pyeuꞈ-eu Sawˇluˆ-euˬ ma nyiˇ Yiˇzaˬpaˬ nehˬ-ehˇ yuꞈ taꞈ-euˬ meh lehˇ, Sawˇluˆ-euˬ aˬ li Iˇshaˬbawˇshehˆ neh bi dehˬ lehꞈ-euˬ meh.

⁸ Kʼoeˇ ngeh, Aˬbaˬnaˬ nui ma pehˇ laˇ-awˇ ehˇ-eu, “Ngaˇ Sawˇluˆ-ahˇ saˇ jaˇ maˬ ziꞈ nga lehˇ nawˇ noeˬ te loˇ. Yuˇdaˆ miˇ kʼahˬ gʼaˇ duˬ ngaˇ dehꞈ luꞈ-eu nga lehˇ nawˇ aˬ diˇ noeˬ te loˇ. Aˇ dahˬ beh ngeh neh, nawˬ da Sawˇluˆ-ahˇ maˬ ehˇ, aˬ yawꞈ-euˬ mehˇ nmˇ deuˬ-ahˇ maˬ ehˇ, aˬ yawꞈ-euˬ cawˬ deuˬ-ahˇ maˬ ehˇ, ngaˇ saˇ jaˇ ziꞈ-awˇ, nawˬ-ahˇ kʼawꞈ Daˬbiˇ-euˬ aˬ laꞈ laꞈ kʼoeˇ maˬ a nehˬ ni ngaˬ neh sheuˬ buˬ nehˬ-euˬ ma. Ehˇ kʼawꞈ, iˬ nah-aˬ, zaˬ miˬ zaˬ tiˬ gʼaˬ nehˬ-ehˇ bahˬ-euˬ nga lehˇ dehˬ lehꞈ-awˇ, nawˇ ngaˬ-ahˇ iˬ baˇ poˆ-eu gʼeh te loˇ.

^9-10 Daˬbiˇ-ahˇ Sahˬpaˬ Miˬyehˇ heu loꞈ-ehˇ saˇ jaˇ biꞈ taˬ-euˬ meh. Miˇ kʼahˬ heu kʼahˬ-ahˇ, Sawˇluˆ hawˇ-eu aˬ yawꞈ-euˬ zaˬ deuˬ uˆ deuˬ-euˬ aˬ laꞈ laꞈ kʼoeˇ neh yuˇ doˆ-awˇ, Iˇsaˬleˬlaˆ miˇ kʼahˬ hawˇ-eu Yuˇdaˆ miˇ kʼahˬ heu nyiˬ kʼahˬ luꞈ ahˇ leˇ-ehˇ, heu dzeˇ kʼoeˇ dzeˇ doˆ ni Daˬbiˇ neh tehꞈ-ehˇ bi uˆ lahˇ ma lehˇ saˇjaˇ biꞈ taˬ-euˬ meh. Dawˬ heu dawˬ aˬ diˇ aˬ maˇ pyeuꞈ laˇ ni ngaˇ maˬ mˇ naˇ, Miˬyehˇ ngaˬ-ahˇ sehꞈ luꞈ-uˇ.”

¹¹ Iˇshaˬbawˇshehˆ-aˬ, Aˬbaˬnaˬ-ahˇ guˆ dui dui-eu miˇ neh, dawˬ tiˬ dawˬ-iˬ maˬ ngehˬ peuˬ-a.

¹² Heˬbyoˬ meuˬ-ahˇ Daˬbiˇ jawˇ gaˇ Aˬbaˬnaˬ tsawˇ haˬ pyehˬ gʼeh-awˇ, heu loꞈ-ehˇ bi tsaꞈ gaˬ leˇ-euˬ meh. “Miˇ kʼahˬ heu kʼahˬ-ahˇ aˬ geu gʼaˬ uˆ lahˇ-eu gʼeh te. Ngaˬ nehˬ-ehˇ ja tsaˬ geuꞈ nya tehꞈ-a. Iˇsaˬleˬlaˆ miˇ kʼahˬ kʼahˬ lah ni nawˇ jawˇ paw ahˇ laˇ ni ngaˇ caw ba nehˬ nya ma.”

¹³ Daˬbiˇ ehˇ kʼoꞈ nehˬ-eu, “Muiˬ tehꞈ-a. Nawˬ nehˬ-ehˇ ngaˇ ja tsaˬ geuꞈ ma. Nawˇ ngaˇ jawˇ gaˇ laˇ ngeh, Sawˇluˆ-euˬ aˬ buˇ Miˇkaˬlaˇ maˬ sheuˬ laꞈ ni taˬ byehˇ.”

¹⁴ Kʼoeˇ naˇ, Iˇshaˬbawˇshehˆ jawˇ gaˇ Daˬbiˇ tsawˇ haˬ pyehˬ gʼeh-awˇ, heu loꞈ-ehˇ bi ehˇ gaˬ leˇ-euˬ meh. “Ngaˬ-euˬ miˬ zaˬ Miˇkaˬlaˇ ngaˬ-ahˇ biꞈ kʼoꞈ laꞈ-awˬ. Piˇliˇtiˆ tsawˇ haˬ-euˬ baˆ kʼoˆ mehˬ dzaˬ tiˬ yaˇ hmˬ biꞈ-awˇ, aˬ yawꞈ-ahˇ ngaˇ sheuˬ-euˬ ma.”

¹⁵ Kʼoeˇ ngeh, Iˇshaˬbawˇshehˆ-aˬ, Laˬiˇshaˆ-euˬ aˬ li Paˬlaˬteˬlaˇ-ahˇ dahˬ dzaˬ-iˇ taˬ-euˬ Miˇkaˬlaˇ-ahˇ sheuˬ kʼoꞈ laꞈ-awˇ, Daˬbiˇ jawˇ gaˇ bi sheuˬ gʼeh-euˬ meh.

¹⁶ Aˬ yawꞈ-euˬ kʼaˬ dzeˇ zaˬ gʼaˬ ngoeˇ ngoeˇ-ehˇ, Baˬhuˇleˬ meuˬ-ahˇ keuˆ ni caw teh keuˆ le-euˬ meh. Ehˇ kʼawꞈ, “Nawˇ gʼoꞈ leˇawˬ” lehˇ, Aˬbaˬnaˬ ehˇ nehˬ ngeh, Paˬlaˬteˬlaˇ gʼoꞈ leˇ-euˬ meh.

¹⁷ Iˇsaˬleˬlaˆ tsawˇ haˬ aˬ yuiꞈ aˬ tsu deuˬ jawˇ gaˇ Aˬbaˬnaˬ iˇ-awˇ, heu loꞈ-ehˇ ehˇ nehˬ-euˬ meh. “Naw maꞈ Daˬbiˇ-ahˇ naw maꞈ-euˬ sahˬ paˬbi geuꞈ mawꞈ-eu gʼawˬ myahˇ ni keuˆ laˇ-euˬ meh.

¹⁸ Nymˬ-mˇ naw maꞈ kʼoeˇ loꞈ-ehˇ jahˇ pyeuꞈ-eu aˇ yamˬ tsaˬ laˇ-euˬ meh. ‘Ngaˬ-euˬ zaˬ kʼaˆ Daˬbiˇ-ahˇ gʼoe-awˇ, ngaˬ-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ deuˬ-ahˇ, Piˇliˇtiˆ tsawˇ jeuˬ-euˬ aˬ laꞈ laꞈ kʼoeˇ maˬ ehˇ, aˬ yawꞈ maꞈ-ahˇ muiˇ-eu tsawˇ jeuˬ nui deuˬ dawˬ tawˆ luꞈ-euˬ aˬ laꞈ laꞈ kʼoeˇ maˬ ehˇ, ngaˇ ka kʼoꞈ ma’ lehˇ ehˇ taˬ-euˬ Sahˬpaˬ Miˬyehˇ-euˬ dawˬ-ahˇ noeˬ keuˆ-awˬ.”

¹⁹ Aˬbaˬnaˬ-aˬ, Beˬyaˬmiˬ tsawˇ jeuˬ-ahˇ kʼawꞈ dawˬ ngehˬ cawˬ gʼaˬ-awˇ, Beˬyaˬmiˬ tsawˇ jeuˬ hawˇ-eu Iˇsaˬleˬlaˆ tsawˇ haˬ deuˬ nui ma tsaˬ-eu gaˇ kawˆ Daˬbiˇ-ahˇ ehˇ nehˬ leˇ-eu lehˇ, Heˬbyoˬ meuˬ-ahˇ iˇ-euˬ meh.

²⁰ Aˬbaˬnaˬ tsawˇ haˬ nyiˬ tseˇ gʼaˬ sheuˬ-awˇ, Heˬbyoˬ meuˬ-ahˇ Daˬbiˇ jawˇ gaˇ oe ngeh, Daˬbiˇ dzaˬ byawˇ laˆ dawˆ-awˇ aˬ yawꞈ maꞈ-ahˇ bi dzaˬ bi dawˇ-euˬ meh.

²¹ Daˬbiˇ-ahˇ Aˬbaˬnaˬ ehˇ nehˬ-eu, “Sahˬ paˬ-oˇ, nymˬ-mˇ ngaˇ iˇ-awˇ, Iˇsaˬleˬlaˆ tsawˇ haˬ dawˬ tawˆ luꞈ nawˇ jawˇ paw uˇ laˇ ni jahˇ ma. Nawˬ-ahˇ sahˬ paˬ bi geuꞈ-eu gʼaˇ duˬ, aˬ yawꞈ maꞈ ha geuꞈ tehꞈ-a. Kʼoeˇ ngeh poˆ jawˇ, nawˬ neh kʼaˇ noeˬ-euˬ loꞈ-ehˇ pyeuˬ laˇ-awˇ, miˇ kʼahˬ heu kʼahˬ kʼahˬ lah ni-ahˇ nawˇ ya uˆ lahˇ tehꞈ-a.” Kʼoeˇ ngeh, Aˬbaˬnaˬ kʼoeˇ taˆ tiˬ jeˬ-iˬ maˬ bi keuˆ le-eu gʼaˇ duˬ Daˬbiˇ kamˬ-awˇ, Aˬbaˬnaˬ-ahˇ bi doˆ-iˇ-euˬ meh.

Yoˇbaˬ neh Aˬbaˬnaˬ-ahˇ sehꞈ-euˬ

²² Gʼawˬ myahˇ maˬ gʼeh-ehˇ, Yoˇbaˬ hawˇ-eu Daˬbiˇ-euˬ guiˇ maꞈ kʼoeˇ taˆ aˬ yuiꞈ geuꞈ-eu deuˬ guiˇ deuˆ-iˇ-euˬ myawˬ gahˬ gʼawˬ mya ni deuˆ za laꞈ-awˇ gʼoꞈ keuˆ laˇ-euˬ meh. Kʼoeˇ ngeh, Aˬbaˬnaˬ gʼaˬ Daˬbiˇ nehˬ-ehˇ Heˬbyoˬ meuˬ-ahˇ maˬ paˇ jawˇ ni doˆ-iˇ dzeuˇ-euˬ meh. Aˬ jeˬ miˇ neh ehˇ naˇ, aˬ yawꞈ-euˬ kʼoeˇ taˆ tiˬ jeˬ-iˬ maˬ bi keuˆ le-eu gʼaˇ duˬ, Daˬbiˇ neh kamˬ jiˇ-awˇ pyehˬ gʼeh-euˬ meh.

²³ Yoˇbaˬ hawˇ-eu aˬ yawꞈ-euˬ tsawˇ haˬ deuˬ gʼoꞈ keuˆ laˇ ngeh, Aˬbaˬnaˬ sahˬ paˬ Daˬbiˇ jawˇ gaˇ oe-awˇ, aˬ yawꞈ-euˬ kʼoeˇ taˆ tiˬ jeˬ-iˬ maˬ bi keuˆ le-eu gʼaˇ duˬ sahˬ paˬ Daˬbiˇ neh kamˬ nehˬ-awˇ pyehˬ gʼeh-euˬ gaˇ kawˆ, Yoˇbaˬ-ahˇ aˬ cawˬ tsaꞈ nehˬ-euˬ meh.

²⁴ Kʼoeˇ ngeh, sahˬ paˬ Daˬbiˇ jawˇ gaˇ Yoˇbaˬ le-awˇ ehˇ nehˬ-eu, “Nawˇ teu loꞈ-ehˇ aˬ jeˬ jahˇ te.

²⁵ Aˬ yawꞈ nawˬ-ahˇ mehˇ shuiˇ shuiˇ-eu lehˇ heu gaˇ oe-awˇ, nawˇ kʼaˇ mˇ kʼaˇ shaˇ kʼaˇ iˇ kʼaˇ laˇ-eu gaˇ kawˆ-ahˇ pyehˆ tseˇ haw laˇ-euˬ tehꞈ-a. Nawˇ kʼoeˇ loꞈ-ehˇ aˬ diˇ aˬ maˇ maˬ siˬ nya te loˇ.”

²⁶ Yoˇbaˬ Daˬbiˇ jawˇ gaˇ neh gʼoꞈ le naˇ, Aˬbaˬnaˬ-euˬ mehˬ nah bi caw teh iˇ-eu tsawˇ haˬ pyehˬ gʼeh-awˇ, Siˬlahˬ lah duˬ-ahˇ neh Aˬbaˬnaˬ-ahˇ sheuˬ kʼoꞈ leꞈ-euˬ meh. Ehˇ kʼawꞈ, gaˇ kawˆ kʼoeˇ Daˬbiˇ tiˬ pawꞈ-iˬ maˬ siˬ nya-a.

²⁷ Aˬbaˬnaˬ Heˬbyoˬ meuˬ-ahˇ gʼoꞈ keuˆ le ngeh, Yoˇbaˬ gʼaˬ Aˬbaˬnaˬ nehˬ-ehˇ, nyiˬ gʼaˬ yaw kaˬ ciˬ cuˇ ni dawˬ ngehˬ cawˬ mawꞈ nya lehˇ ehˇ-awˇ, meuˬ-euˬ lahˇ kʼehˬ paw sheuˬ ceuˆ gʼeh-awˇ, uˬ maˆ-ahˇ mi cehˇ jiˇ baˆ tsawˆ tsoˆ nehˬ-euˬ meh. Yoˇbaˬ-euˬ aˬ nyiˇ Aˬsaˬheˬlaˇ-ahˇ Aˬbaˬnaˬ neh sehꞈ-euˬ miˇ neh, aˬ yawꞈ-ahˇ kʼoeˇ loꞈ-ehˇ paˇ sehꞈ poˆ nehˬ gaˇ ya daˬ-euˬ meh.

²⁸ Gaˇ kawˆ kʼoeˇ Daˬbiˇ ya gaˬ ngeh, heu loꞈ-ehˇ ehˇ-eu meh. “Aˬbaˬnaˬ-ahˇ sehꞈ-euˬ iˬ baˇ heu, ngaˇ hawˇ-eu ngaˬ-euˬ miˇ kʼahˬ zaˬ deuˬ kʼoeˇ taˆ maˬ jaˆ-eu gaˇ kawˆ, Sahˬpaˬ Miˬyehˇ siˬ duˬ meh.

²⁹ Iˬ baˇ kʼoeˇ baˬ da neh keuˆ le-eu kʼehˬ-eu kʼaˆ-eu jeˬ, Yoˇbaˬ hawˇ-eu aˬ yawꞈ-euˬ nymˇ jiˇ kʼoeˇ taˆ tehꞈ-ehˇ jaˆ luꞈ-uˇ. Tiˬ ziˇ saˇ-iˬ tiˬ ziˇ, aˬ yawꞈ-euˬ aˇ jeuˬ aˇ ca deuˬ laꞈ kʼoeˇ, maˇ uiˇ yoeˇ-eu, coiˬ doi naˇ-eu, daˇ tsuiꞈ kʼoꞈ-eu, miˬ siˬ miˬ kaˆ-euˬ mehˬ kʼehˬ-ahˇ shiˇ-eu, hawˬ mehꞈ shaˬ-eu, heu loꞈ-ehˇ gʼeh-eu tiˬ jeˬ paˬ guˬ leˇ-euˬ tsawˇ haˬ tiˬ gʼaˬ, aˬ myah luꞈ maˬ tsehˆ leˇ ni jawˇ luꞈ-uˇ.”

³⁰ Yoˇbaˬ hawˇ-eu Aˬbiˇshaiˇ aˬ nyaꞈ nmˇ-aˬ, kʼoeˇ loꞈ-ehˇ jahˇ-awˇ, Giˇbyoˬ meuˬ-ahˇ guiˇ deuˆ ngeh aˬ yawꞈ nyaꞈ nmˇ-euˬ aˬ nyiˇ Aˬsaˬheˬlaˇ-ahˇ Aˬbaˬnaˬ neh sehꞈ-euˬ aˇ poeˬ, Aˬbaˬnaˬ-ahˇ paˇ sehꞈ poˆ-euˬ meh.

Aˬbaˬnaˬ-ahˇ baꞈ pahˬ-euˬ

³¹ Kʼoeˇ naˇ, “Yawˬ ha-euˬ mehˬ tsoeˬ cehˬ pyaˬ cehˬ shaˇ-awˇ, guˬ daˇ pehˇ zeuˇ mehˬ tsoeˬ dm-awˇ, Aˬbaˬnaˬ gʼaˇ duˬ tsawˇ ngoeˇ ngoeˇ-awˬ” lehˇ, Yoˇbaˬ hawˇ-eu aˬ yawꞈ-euˬ tsawˇ haˬ deuˬ-ahˇ Daˬbiˇ dawˬ biꞈ-euˬ meh. Aˬbaˬnaˬ-ahˇ baꞈ pahˬ-iˇ ngeh, sahˬ paˬ Daˬbiˇ gʼaˬ mawˇ dmˬ-euˬ mehˬ nah cah-euˬ meh.

³² Aˬbaˬnaˬ-ahˇ Heˬbyoˬ meuˬ-ahˇ baꞈ pahˬ-awˇ, Aˬbaˬnaˬ-euˬ lmˬ bymˇ-ahˇ sahˬ paˬ Daˬbiˇ guˇ guˇ-ehˇ ngoeˇ-euˬ meh. Tsawˇ haˬ dawˬ tawˆ luꞈ kʼoeˇ loꞈ-ehˇ ngoeˇ-euˬ meh.

³³ Aˬbaˬnaˬ gʼaˇ duˬ Daˬbiˇ heu loꞈ-ehˇ dawˬ kawˬ kawˬ kawˬ-ehˇ ngoeˇ-euˬ meh. “Aˬ jeˬbaˬda neh Aˬbaˬnaˬʼ aˬdzawˬ loꞈ-ehˇ bi sehꞈ-euˬ ta.

³⁴ Aˬ laꞈ aˇ caˆ maˬ bi paꞈ-ehˇ, aˬ kuiˇkuiˇ dzahˬ maˬ bi dzahˬ ni, tahˇ joe neh bi sehꞈ-euˬ loꞈ-ehˇ, aˬ yawꞈ ziˇ ya jiˇ leˇ-euˬ meh.”

³⁵ Daˬbiˇ tiˬ jeˬ paˬ dzaˬ ni, aˬ yawꞈ maꞈ nah ga-ehˇ gʼaˬ biꞈ-euˬ meh. Ehˇ kʼawꞈ, “Aˇ nah heu nah maˬ dzeuˇ-iˇ mi naˆ-ehˇ ngaˇ tiˬ jeˬ paˬ dzaˬ naˇ, Miˬyehˇ ngaˬ-ahˇ sehꞈ luꞈ-uˇ” lehˇ aˬ yawꞈ saˇ jaˇ dzaˬ-euˬ meh.

³⁶ Aˬ yawꞈ maꞈ kʼoeˇ gaˇ haw siˬ-awˇ, nui saˇ za-euˬ meh. Aˬ diˇ aˬ maˇ sahˬ paˬ neh kʼaˇ mˇ-euˬ jeˬ-ahˇ, miˇ kʼahˬ zaˬ deuˬ nui kʼahˇ shiˇ-euˬ meh.

³⁷ Aˬbaˬnaˬ-ahˇ sehꞈ-euˬ deuˬ jawˇ paw Daˬbiˇ maˬ pyawˬ-eu gaˇ kawˆ, Daˬbiˇ-euˬ tsawˇ haˬ dawˬ tawˆ luꞈ maˬ ehˇ, Iˇsaˬleˬlaˆ miˇ kʼahˬ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ maˬ ehˇ, yaw muiˬ paˬ-ehˇ siˬ duˬ-euˬ meh.

³⁸ Aˬ yawꞈ-euˬ gaˇ mˇ-eu yaw huiˬ yaw mahˇ deuˬ-ahˇ sahˬ paˬ Daˬbiˇ ehˇ nehˬ-eu, “Iˬ nah Iˇsaˬleˬlaˆ miˇ kʼahˬ gʼaˇ duˬ huiˬ dui dui-eu aˬ yuiꞈ aˬ tsu tiˬ gʼaˬ shiˇ-euˬ meh lehˇ naw maꞈ maˬ noeˬ siˬ te loˇ.

³⁹ Ngaˇ-aˬ, Miˬyehˇ neh tseˇ doˆ-euˬ sahˬ paˬ tiˬ gʼaˬ pyeuꞈ kʼawꞈ, iˬ nah ngaˬ-ahˇ gʼaˬ byehˆ byehˆ dui dui nya. Zeˬluˇyaˆ-euˬ aˬ li heu deuˬ ngaˬ-euˬ mehˬ shi yaw haiˬ jeˬ mˇ-euˬ heu aˇ dzehˬ dzeuˇ nya. Yaw haiˬ jeˬ mˇ-eu deuˬ-ahˇ aˬ yawꞈ ha mehˇ nmˇ neh kʼaˇ mˇ neh-euˬ loꞈ-ehˇ, aˬ yawꞈ ha mehˇ nmˇ-ahˇ Sahˬpaˬ Miˬyehˇ kʼehˬ nehˬ kʼaˆ nehˬ luꞈ-uˇ.”