2 Saˬmeuˬlaˆ 21 - Akha

Sawˇluˆ-euˬ zaˬ deuˬ uˆ deuˬ-ahˇ sehꞈ-euˬ

¹ Daˬbiˇ sahˬ paˬ geuꞈ-awˇ uˆ lahˇ-euˬ aˇ yamˬ laꞈ kʼoeˇ, mehꞈ dui shuꞈ dui dui-eu aˇ kʼoꞈ smˇ kʼoꞈ keuˆ le-euˬ meh. Gaˇ kawˆ kʼoeˇ Sahˬpaˬ Miˬyehˇ-ahˇ Daˬbiˇ naˇ haˬ ngeh, “Sawˇluˆ hawˇ-eu aˬ yawꞈ-euˬ nymˇ kʼahˬ zaˬ deuˬ aˬ cawˬ-ahˇ sehꞈ-euˬ iˬ baˇ pi luꞈ-eu meh. Giˇbyoˬ meuˬ-ahˇ jawˇ-eu tsawˇ haˬ deuˬ-ahˇ aˬ yawꞈ sehꞈ-euˬ meh” lehˇ, Sahˬpaˬ Miˬyehˇ ehˇ-eu meh.

² Giˇbyoˬ meuˬ-ahˇ jawˇ-eu tsawˇ haˬ deuˬ-aˬ, Iˇsaˬleˬlaˆ tsawˇ haˬ maˬ ngeuˇ-a. Aˬ yawꞈ maꞈ-aˬ, Iˇsaˬleˬlaˆ tsawˇ haˬ deuˬ neh haw piˇ nehˬ ma lehˇ kamˬ-awˇ bi jawˇ-euˬ Aˬmawˇliˆ tsawˇ jeuˬ aˇ maꞈ tiˬ maꞈ pyeuꞈ-eu meh. Ehˇ kʼawꞈ, Sawˇluˆ-aˬ, Iˇsaˬleˬlaˆ tsawˇ haˬ hawˇ-eu Yuˇdaˆ tsawˇ haˬ deuˬ gʼaˇ duˬ nui ma keuˆ-eu laꞈ kʼoeˇ, aˬ yawꞈ maꞈ-ahˇ laˆ piˬ laˆ byoˆ nehˬ jiˇ-eu lehˇ leh jeh-euˬ meh.

³ Giˇbyoˬ meuˬ-ahˇ jawˇ-eu tsawˇ haˬ deuˬ-ahˇ Daˬbiˇ neh bi kuˇ laˬ-iˇ-awˇ, “Naw maꞈ-ahˇ ngaˇ aˬ joˆ-ehˇ ya mˇ nehˬ nmˇ. Sahˬpaˬ Miˬyehˇ-euˬ tsawˇ jeuˬ-ahˇ naw maꞈ guiˬ lahˬ biꞈ nya ni, naw maꞈ kʼoeˇ taˆ mˇ lehˬ taˬ-euˬ jeˬ-ahˇ ngaˇ mˇ tsoeˬ nehˬ mawꞈ-eu ma” lehˇ ehˇ nehˬ-euˬ meh.

⁴ Giˇbyoˬ meuˬ-ahˇ jawˇ-eu tsawˇ haˬ deuˬ ehˇ-eu, “Sawˇluˆ-euˬ nymˇ jiˇ hawˇ-eu nga maꞈ-euˬ yaw kaˬ-ahˇ doˆ laˇ taˬ-euˬ yaw lehˬ yaw ca heu-aˬ, pyuˇ hawˇ-eu shuiˇ neh jahˇ jiˇ nya-eu jeˬ maˬ ngeuˇ-eu uˬ taꞈ, Iˇsaˬleˬlaˆ tsawˇ haˬ-ahˇ kʼawꞈ nga maꞈ maˬ sehꞈ mawꞈ nya.” Daˬbiˇ ehˇ-eu, “Toˆ-ehˇ ngeuˇ naˇ, naw maꞈ gʼaˇ duˬ ngaˇ aˬ joˆ-ehˇ ya jahˇ nehˬ nmˇ.”

⁵ Aˬ yawꞈ maꞈ ehˇ-eu, “Sawˇluˆ-aˬ, Iˇsaˬleˬlaˆ miˇ kʼahˬ laꞈ kʼoeˇ nga maꞈ-euˬ tsawˇ haˬ tiˬ gʼaˬ-iˬ maˬ bi dzeˇ yaꞈ ni sehꞈ jiˇ mawꞈ-eu meh.

⁶ Kʼoeˇ miˇ neh, aˬ yawꞈ-euˬ zaˬ deuˬ uˆ deuˬ laꞈ kʼoeˇ, kʼaˬ dzeˇ zaˬ shiꞈ gʼaˬ nga maꞈ-ahˇ a nehˬ laꞈ-awˬ. Sahˬpaˬ Miˬyehˇ neh tseˇ doˆ-euˬ sahˬ paˬ pyeuꞈ-eu Sawˇluˆ jawˇ-euˬ Giˇbyoˬ meuˬ-ahˇ, Sahˬpaˬ Miˬyehˇ mehˬ shi aˬ yawꞈ maꞈ-ahˇ nga maꞈ paꞈ gʼeu sehꞈ ma.” Sahˬ paˬ ehˇ-eu, “Aˬ yawꞈ maꞈ-ahˇ naw maꞈ-euˬ aˬ laꞈ laꞈ kʼoeˇ ngaˇ a nehˬ-eu ma.”

⁷ Ehˇ kʼawꞈ, Yawˇnaˆshaˬ-euˬ aˬ li pyeuꞈ-eu Sawˇluˆ-euˬ oeˬ paˬ Meˬpiˇbawˇshehˆ gʼaˬ-ahˇ Daˬbiˇ bi dzeuˇ-iˇ-euˬ meh. Aˬ jeˬ miˇ neh ehˇ naˇ, Yawˇnaˆshaˬ aˬ yawꞈ nyaꞈ yaw kaˬ muiˬ-eu shawˇ-eu saˇ jaˇ dzaˬ taˬ-eu jaˆ-eu meh.

⁸ Aˬiˇyaˬ-euˬ aˬ buˇ Yiˇzaˬpaˬ o neh dehꞈ le-euˬ Sawˇluˆ-euˬ aˬ li Aˬmoˇniˇ hawˇ-eu Meˬpiˇbawˇshehˆ aˬ nyaꞈ nmˇ maˬ ehˇ, Meˬhawˇlaˬ meuˬ-ahˇ jawˇ-eu Baˬziˇlehˇ-euˬ aˬ li Aˬdaˬleˬlaˇ-ahˇ dahˬ dzaˬ-iˇ-euˬ Sawˇluˆ-euˬ aˬ buˇ Meˬlaˇ-euˬ aˬ li ngaˬ gʼaˬ-ahˇ maˬ ehˇ,

⁹ Giˇbyoˬ meuˬ-ahˇ jawˇ-eu tsawˇ haˬ deuˬ-euˬ aˬ laꞈ laꞈ kʼoeˇ Daˬbiˇ neh a nehˬ-awˇ, aˬ ha shiꞈ gʼaˬ-ahˇ Sahˬpaˬ Miˬyehˇ-euˬ mehˬ shi gawˬ jawˬ kʼoeˇ taˆ aˬ yawꞈ maꞈ paꞈ gʼeu nehˬ-awˇ, shiꞈ gʼaˬ luꞈ tiˬ poˆ tehꞈ-ehˇ shiˇ-euˬ meh. Aˬ yawꞈ maꞈ shiˇ-euˬ aˇ yamˬ kʼoeˇ yamˬ-aˬ, lawˬ loeˇ keuˆ dahˬ beh le-eu yamˬ meh.

¹⁰ Sawˇluˆ-euˬ ma nyiˇ pyeuꞈ-eu Aˬiˇyaˬ-euˬ aˬ buˇ Yiˇzaˬpaˬ gʼaˬ, tsawˇ shiˇ kʼoeˇ deuˬ ga-eu dawˬ peh kʼaˬ lo kʼoeˇ taˆ guˬ daˇ pehˇ zeuˇ saˬ paˇ neh sehˬ gʼawˆ gʼawˆ-awˇ, cehˇ yehˬ dahˬ beh ngeh yamˬ-ahˇ neh yehˇ gʼahˇ ahˇ le ngeh keuˆ ni loꞈ-euˬ meh. Shiˇ taˬ-euˬ tsawˇ haˬ kʼoeˇ deuˬ-ahˇ, nah gʼahˇ paw aˇ jiˇ maˬ ya bi dzaˬ-eu gʼaˇ duˬ maˬ ehˇ, uˬ ciꞈ paw haiˬ-eu jeˬ zaˬ deuˬ maˬ ya bi dzaˬ-eu gʼaˇ duˬ maˬ ehˇ, aˬ yawꞈ loꞈ piˇ-euˬ meh.

¹¹ Sawˇluˆ-euˬ ma nyiˇ pyeuꞈ-eu Aˬiˇyaˬ-euˬ aˬ buˇ Yiˇzaˬpaˬ kʼoeˇ loꞈ-ehˇ jahˇ luꞈ-eu gaˇ kawˆ Daˬbiˇ ya gaˬ ngeh,

¹² Giˇlaˆ miˇ kʼahˬ Jaˬbehˆ meuˬ-ahˇ jawˇ-eu tsawˇ haˬ deuˬ jawˇ gaˇ aˬ yawꞈ iˇ-awˇ, Sawˇluˆ hawˇ-eu aˬ yawꞈ-euˬ aˬ li Yawˇnaˆshaˬ-euˬ shaˬ yoeˬ yuˇ laˬ-iˇ-euˬ meh. Giˇlaˬbawˬ gawˬ jawˬ-ahˇ Sawˇluˆ-ahˇ sehꞈ ngeh nah, aˬ yawꞈ nyaꞈ da za-euˬ gʼawˇ mawˇ-ahˇ Piˇliˇtiˆ tsawˇ haˬ deuˬ neh Behˬshaˬ meuˬ laꞈ kʼoeˇ jaˆ-eu tsawˇ haˬ uiˬ leˇ bymˇ leˇ duˬ-ahˇ paꞈ gʼeu taˬ-euˬ gaˇ, Jaˬbehˆ meuˬ-ahˇ jawˇ-eu tsawˇ haˬ deuˬ neh baꞈ kʼoeˬ kʼoꞈ laꞈ-euˬ meh.

¹³ Sawˇluˆ hawˇ-eu Yawˇnaˆshaˬ-euˬ shaˬ yoeˬ-ahˇ Daˬbiˇ yuˇ-awˇ, bi paꞈ gʼeu sehꞈ-euˬ tsawˇ haˬ kʼoeˇ shiꞈ gʼaˬ-euˬ shaˬ yoeˬ deuˬ kʼawꞈ gʼoˆ uiˬ-euˬ meh.

¹⁴ Kʼoeˇ naˇ, sahˬ paˬ neh dawˬ kʼaˇ biꞈ-euˬ loꞈ-ehˇ aˬ yawꞈ maꞈ mˇ-awˇ, Sawˇluˆ hawˇ-eu Yawˇnaˆshaˬ aˬ nyaꞈ da zaˬ-euˬ shaˬ yoeˬ-ahˇ, Beˬyaˬmiˬ miˇ kʼahˬ Zeˬlaˬ meuˬ-ahˇ jaˆ-eu Sawˇluˆ-euˬ aˬ da Giˇshaˆ-euˬ lmˬ bymˇ-ahˇ baꞈ pahˬ-euˬ meh. Kʼoeˇ loꞈ-ehˇ jahˇ gʼaˬ ngeh, aˬ yawꞈ maꞈ miˇ kʼahˬ gʼaˇ duˬ aˬ yawꞈ maꞈ neh shaˇ-euˬ guiˬ lahˬ shaˇ dawˬ-ahˇ Miˬyehˇ naˇ haˬ nehˬ-euˬ meh.

Huiˬ dui dui-eu Piˇliˇtiˆ tsawˇ haˬ deuˬ-ahˇ guiˇ deuˆ-euˬ

¹⁵ Piˇliˇtiˆ tsawˇ haˬ hawˇ-eu Iˇsaˬleˬlaˆ tsawˇ haˬ yaw kaˬ guiˇ paˇ mˇ-awˇ, Daˬbiˇ hawˇ-eu aˬ yawꞈ-euˬ tsawˇ haˬ deuˬ Piˇliˇtiˆ tsawˇ haˬ deuˬ-ahˇ guiˇ deuˆ-iˇ-euˬ meh. Guiˇ deuˆ luꞈ ngeh, Daˬbiˇ gʼaˬ doeˇ doeˇ laˇ-euˬ meh.

¹⁶ Nyiˬ jawꞈ-i dzehˬ ni kah-eu guiˬ shuiˇ gahˬ baꞈ luꞈ-awˇ, mi cehˇ yaw shuiꞈ tiˬ kahˇ shaꞈ luꞈ-eu Iˇshaˬbiˇbeˬnoˆ lehˇ myahˇ-euˬ huiˬ dui dui-eu tsawˇ haˬ tiˬ gʼaˬ, Daˬbiˇ-ahˇ aˬ yawꞈ sehꞈ nya ma lehˇ noeˬ luꞈ-eu meh.

¹⁷ Ehˇ kʼawꞈ, Zeˬluˇyaˆ-euˬ aˬ li Aˬbiˇshaiˇ gʼaˬ Daˬbiˇ-ahˇ caw ba le-awˇ, huiˬ dui goˇ dui dui-eu tsawˇ haˬ kʼoeˇ gʼaˬ-ahˇ deuˆ ceh ceh-awˇ sehꞈ-euˬ meh. Kʼoeˇ ngeh poˆ neh naˇ, guiˇ deuˆ gaˇ Daˬbiˇ-euˬ gʼawˇ mawˇ tiˬ jawˇ-iˬ maˬ paˇ bi oe-eu gʼaˇ duˬ, Daˬbiˇ-euˬ tsawˇ haˬ deuˬ neh Daˬbiˇ-ahˇ saˇ jaˇ bi dzaˬ-euˬ meh. “Nawˇ-aˬ, Iˇsaˬleˬlaˆ miˇ kʼahˬ-euˬ nui ma taˬ duˬ pyeuꞈ-eu miˇ neh, nawˬ-ahˇ nga maꞈ maˬ bi shiˇ peuˬ nya” lehˇ aˬ yawꞈ maꞈ ehˇ-eu meh.

¹⁸ Kʼoeˇ naˇ kʼah, Goˇbaˆ meuˬ-ahˇ Piˇliˇtiˆ tsawˇ haˬ deuˬ nehˬ-ehˇ guiˇ tiˬ poˆ paˇ deuˆ-awˇ, Huˇshahˬ meuˬ-ahˇ jawˇ-euˬ Siˇbeˬkehˇ neh, Saˇpaˬ lehˇ myahˇ-euˬ huiˬ dui goˇ dui dui-eu tsawˇ haˬ tiˬ gʼaˬ sehꞈ-euˬ meh.

¹⁹ Kʼoeˇ naˇ, Goˇbaˆ meuˬ-ahˇ Piˇliˇtiˆ tsawˇ haˬ nehˬ-ehˇ guiˇ tiˬ poˆ paˇ deuˆ-awˇ, Behˬlehˬhehˬ meuˬ-ahˇ jawˇ-eu Yaˬiˇlaˆ-euˬ aˬ li Eˇlaˬhaˬnaˬ neh, gahˬ yoeˬ saˬ nmˇ bahˬ yoˆ hui ni ahˇ-eu gahˬ baꞈ luꞈ-eu Gaˬdaˇ meuˬ-ahˇ jawˇ-eu Gawˇliˇyaˆ lehˇ myahˇ-euˬ gʼaˬ-ahˇ sehꞈ-euˬ meh.

²⁰ Kʼoeˇ naˇ, Gaˬdaˇ meuˬ-ahˇ guiˇ tiˬ poˆ paˇ deuˆ-euˬ meh. Meuˬ kʼoeˇ meuˬ laꞈ kʼoeˇ, guiˇ deuˆ-eu nui ma ahˇ dui dui-eu tsawˇ haˬ tiˬ gʼaˬ jawˇ-eu meh. Aˬ yawꞈ-aˬ, huiˬ dui goˇ dui dui-eu tsawˇ haˬ tiˬ gʼaˬ pyeuꞈ-awˇ, aˬ laꞈ nyiˬ laꞈ luꞈ laꞈ noeˇ koꞈ noeˇ tsoꞈ-awˇ, aˬ kuiˇ nyiˬ kuiˇ luꞈ kuiˇ noeˇ koꞈ noeˇ tsoꞈ-eu meh.

²¹ Iˇsaˬleˬlaˆ tsawˇ haˬ deuˬ-ahˇ aˬ yawꞈ yehˬ bawˬ sehˇ lu-ehˇ ehˇ-awˇ lmˬ lmˬ-ehˇ jawˇ ngeh, Daˬbiˇ-euˬ aˇ doˆ Shaˬmahˇ-euˬ aˬ li Yawˇnaˆshaˬ neh aˬ yawꞈ-ahˇ sehꞈ-euˬ meh.

²² Tsawˇ haˬ kʼoeˇ oeˬ gʼaˬ-aˬ, Gaˬdaˇ meuˬ-ahˇ jawˇ-eu huiˬ dui goˇ dui dui-eu tsawˇ haˬ deuˬ-euˬ zaˬ deuˬ uˆ deuˬ pyeuꞈ-awˇ, Daˬbiˇ hawˇ-eu aˬ yawꞈ-euˬ tsawˇ haˬ deuˬ neh aˬ ha oeˬ gʼaˬ-ahˇ sehꞈ-euˬ meh.