2 Saˬmeuˬlaˆ 20 - Akha

Sheˬba Daˬbiˇ-ahˇ puiˬ-euˬ

¹ Giˇlaˇgaˬlaˇ meuˬ laꞈ kʼoeˇ, Beˬyaˬmiˬ tsawˇ jeuˬ Biˇkaˬliˇ-euˬ aˬ li Sheˬba lehˇ myahˇ-euˬ aˬ dzawˬ aˇ gah tiˬ gʼaˬ jawˇ-eu meh. Aˬ yawꞈ daˇ heh baw-awˇ, “Daˬbiˇ-ahˇ aˬ dui maꞈ maˬ taꞈ. Yeˬshehˇ-euˬ aˬ li nehˬ-ehˇ aˬ dui maꞈ nui ma maˬ gm. Iˇsaˬleˬlaˆ tsawˇ haˬ deuˬ-oˇ, yawˬ ha-euˬ nymˇ-ahˇ yawˬ ha gʼoꞈ-iˇ jiˇ-awˬ” lehˇ guˇ-eu meh.

² Kʼoeˇ miˇ neh, Iˇsaˬleˬlaˆ tsawˇ haˬ deuˬ Daˬbiˇ-ahˇ byehˇ dzeh yaꞈ-awˇ, Sheˬba-euˬ mehˬ nah caw teh-iˇ-euˬ meh. Ehˇ kʼawꞈ, Yuˇdaˆ tsawˇ haˬ deuˬ Daˬbiˇ-ahˇ saˇ jaˇ ziꞈ-awˇ, Yawˇdaˬ lawˇ baˬ-ahˇ neh Yeˬluˇsaˬlehˬ meuˬ-ahˇ keuˆ ni, aˬ yawꞈ-euˬ mehˬ nah caw teh gʼeh-euˬ meh.

³ Yeˬluˇsaˬlehˬ meuˬ-ahˇ jaˆ-eu aˬ yawꞈ-euˬ hawˇ nymˇ-ahˇ Daˬbiˇ gʼoꞈ keuˆ leˇ ngeh, aˬ yawꞈ-euˬ nymˇ bi loꞈ yaꞈ-euˬ ma nyiˇ kʼoeˇ tseˇ gʼaˬ-ahˇ yaw muiˬ paˬ-ehˇ haw piˇ nehˬ-awˇ bi jawˇ-euˬ meh. Aˬ yawꞈ maꞈ kʼaˇ loˬ-eu jeˬ aˬ yawꞈ caw ba nehˬ-euˬ meh. Ehˇ kʼawꞈ, aˬ yawꞈ maꞈ nehˬ-ehˇ aˬ yawꞈ maˬ yuꞈ taꞈ-a. Aˬ yawꞈ maꞈ ziˇ dehꞈ jiˇ ngeh keuˆ ni, kʼoeˇ loꞈ-ehˇ ka lahˇ taˬ-awˇ, miˬ coeˬ miˬ ma loꞈ-ehˇ bi jawˇ-euˬ meh.

⁴ “Yuˇdaˆ tsawˇ haˬ deuˬ-ahˇ kuˇ uiˬ-awˇ, saˇ pehˬ nah ngaˇ jawˇ gaˇ sheuˬ keuˆ laꞈ-awˬ” lehˇ, Aˬmaˬsaˬ-ahˇ sahˬ paˬ ehˇ nehˬ-euˬ meh.

⁵ Aˬmaˬsaˬ doˆ-iˇ-awˇ, Yuˇdaˆ tsawˇ haˬ deuˬ-ahˇ kuˇ uiˬ laˬ-iˇ-euˬ meh. Ehˇ kʼawꞈ, sahˬ paˬ neh nah paˇ paˇ nehˬ taˬ-euˬ aˇ nah-ahˇ aˬ yawꞈ maˬ gʼoꞈ keuˆ laˇ-a.

⁶ Kʼoeˇ ngeh, Aˬbiˇshaiˇ-ahˇ sahˬ paˬ ehˇ nehˬ-eu, “Sheˬba gʼaˬ Aˬbaˇsaˬloˬ naˆ maˬ tseˇ aˬ dui-ahˇ laˆ bahˬ tehꞈ-a. Ngaˬ-euˬ tsawˇ haˬ deuˬ sheuˬ-awˇ aˬ yawꞈ-euˬ mehˬ nah teh-iˇ-awˬ. Kʼoeˇ loꞈ-ehˇ maˬ jahˇ naˇ, meuˬ meuˬ lahˇ yaw muiˬ paˬ-ehˇ gawˬ ziꞈ taˬ-euˬ meuˬ deuˬ-ahˇ aˬ yawꞈ cehˆ uˇ-iˇ-awˇ, aˬ dui-euˬ laꞈ-ahˇ neh cehˆ buˬ tehꞈ-a.”

⁷ Yoˇbaˬ-euˬ yehˇ deuˬ maˬ ehˇ, sahˬ paˬ-ahˇ loꞈ piˇ-eu yehˇ deuˬ maˬ ehˇ, yehˇ nui deuˬ maˬ ehˇ, Aˬbiˇshaiˇ nehˬ-ehˇ iˇ-awˇ, Sheˬba-euˬ mehˬ nah teh-iˇ-euˬ meh.

⁸ Giˇbyoˬ meuˬ dawˬ peh jaˆ-eu kʼaˬ lo lo ma dawˬ peh aˬ yawꞈ maꞈ iˇ keuˆ ngeh, Aˬmaˬsaˬ-ahˇ tahˬ puˬ-euˬ meh. Yoˇbaˬ gʼaˬ guiˇ deuˆ-eu keu ka dm luꞈ-awˇ, aˬ yawꞈ-euˬ joꞈ paꞈ-ahˇ mi cehˇ dawꞈ luꞈ-eu meh. Aˬ yawꞈ mehˬ hu paw doˆ laˇ-eu nehˬ-ehˇ, aˬ yawꞈ-euˬ mi cehˇ kʼoeˇ kahˇ ga doˆ le-euˬ meh.

⁹ “Cawˬ-oˇ, nawˇ jawˇ saˇ doˆ miˇ-a loˇ” lehˇ, Aˬmaˬsaˬ-ahˇ Yoˇbaˬ ehˇ nehˬ-awˇ, aˬ yawꞈ-euˬ aˇ maˇ laꞈ neh Aˬmaˬsaˬ-euˬ mehˬ mahˬ-ahˇ tsuˆ tehˬ-awˇ, mehˬ cuˇ cuˇ nehˬ-eu lehˇ gʼeh-euˬ meh.

¹⁰ Yoˇbaˬ-euˬ aˇ caˇ laꞈ-ahˇ tuˆ tehˬ taˬ-euˬ mi cehˇ-ahˇ Aˬmaˬsaˬ maˬ mawˇ nya-ehˇ, Yoˇbaˬ neh uˬ maˆ bi tsawˆ byoe-awˇ, baw uˇ miˇ tsa ga doˆ le-euˬ meh. Yoˇbaˬ gʼaˬ laꞈ lahˬ maˬ ka dah mi naˆ-ehˇ, aˬ yawꞈ tiˬ poˆ tehꞈ-ehˇ shiˇ tsehˆ-euˬ meh. Kʼoeˇ naˇ, Yoˇbaˬ hawˇ-eu Aˬbiˇshaiˇ aˬ nyaꞈ nmˇ Sheˬba-euˬ mehˬ nah teh-iˇ-eu lehˇ doˆ-iˇ-euˬ meh.

¹¹ Kʼoeˇ naˇ, Yoˇbaˬ-euˬ tsawˇ haˬ tiˬ gʼaˬ Aˬmaˬsaˬ ga gaˇ yawꞈ-awˇ, “Yoˇbaˬ hawˇ-eu Daˬbiˇ jawˇ paw pyawˬ-eu tsawˇ haˬ yawˬ gʼaˬ na luꞈ, Yoˇbaˬ-euˬ mehˬ nah caw teh-iˇ-awˬ” lehˇ guˇ-eu meh.

¹² Aˬmaˬsaˬ-euˬ gʼawˇ mawˇ-aˬ, shiˬ tehꞈ-ehˇ gaˇ ma nyiˬ paˆ-ehˇ ga-eu meh. Tsawˇ haˬ yawˬ gʼaˬ na luꞈ kʼoeˇ tsahˇ-ahˇ naˬ leˇ gaˇ Yoˇbaˬ-euˬ tsawˇ haˬ kʼoeˇ gʼaˬ ya mawˇ-eu miˇ neh, Aˬmaˬsaˬ-euˬ gʼawˇ mawˇ-ahˇ gaˇ ma gaˇ oˆ paw gʼeu ahˇ gʼeh-awˇ, aˇ bui sheu kaˬ taˬ-euˬ meh.

¹³ Gaˇ ma-ahˇ ga-eu Aˬmaˬsaˬ-euˬ gʼawˇ mawˇ-ahˇ gʼeu yawˬ gʼaˬ ngeh, tsawˇ haˬ yawˬ gʼaˬ na luꞈ Yoˇbaˬ nehˬ-ehˇ iˇ-awˇ, Sheˬba-euˬ mehˬ nah teh-iˇ-euˬ meh.

¹⁴ Sheˬba-aˬ, Iˇsaˬleˬlaˆ tsawˇ jeuˬ deuˬ-euˬ miˇ kʼahˬ dawˬ tawˆ luꞈ iˇ tsehˆ gʼeh-awˇ, Aˬbeˬlaˆbehˬmawˇkah lehˇ kuˇ-eu meuˬ-ahˇ iˇ keuˆ-euˬ meh. Biˇkaˬliˇ-euˬ aˇ jeuˬ aˇ ca dawˬ tawˆ luꞈ uiˬ laˇ-awˇ, aˬ yawꞈ nehˬ-ehˇ meuˬ kʼoeˇ meuˬ laꞈ kʼoeˇ uˇ leˇ-euˬ meh.

¹⁵ Sheˬba kʼoeˇ gaˇ jawˇ-eu gaˇ kawˆ Yoˇbaˬ-euˬ tsawˇ haˬ deuˬ ya gaˬ-euˬ miˇ neh, aˬ yawꞈ maꞈ iˇ-awˇ, meuˬ kʼoeˇ meuˬ-ahˇ jawˬ lahˇ-euˬ meh. Meuˬ meuˬ lahˇ laꞈ nyiˇ tiˆ-euˬ gaˇ dzeˇ aˬ yawꞈ maꞈ miˇ tsaˬ ciˬ goˇ daˆ leꞈ-awˇ, meuˬ meuˬ lahˇ kʼoeˇ bi coˬ-iˇ-eu gʼaˇ duˬ, dawˬ dah paw duˬ kʼeuꞈ kʼeuꞈ-euˬ meh.

¹⁶ Kʼoeˇ ngeh, meuˬ kʼoeˇ meuˬ-ahˇ jawˇ-eu tsawˇ gahˇ ahˇ-eu zaˬ miˬ zaˬ tiˬ gʼaˬ heu loꞈ-ehˇ guˇ-eu meh. “Aˬ ha maꞈ-oˇ, ngaˇ ehˇ gaˇ tiˬ poˆ naˇ haˬ sheˇ. Yoˇbaˬ-ahˇ heu gaˇ tiˬ poˆ laˇ sheˇ lehˇ ehˇ nehˬ-iˬ sheˇ. Aˬ yawꞈ-ahˇ ngaˇ dawˬ ngehˬ cawˬ mawꞈ nya.”

¹⁷ Yoˇbaˬ kʼoeˇ gaˇ le ngeh, “Nawˇ Yoˇbaˬ ma loˇ” lehˇ aˬ yawꞈ naˇ haˬ laˇ gaˇ “Ngeuˇ ma” lehˇ Yoˇbaˬ ehˇ kʼoꞈ nehˬ-euˬ meh. “Ngaˇ ehˇ gaˇ tiˬ poˆ naˇ haˬ nehˬ laꞈ sheˇ” lehˇ zaˬ miˬ zaˬ kʼoeˇ gʼaˬ ehˇ ngeh, “Ngaˇ naˇ haˬ luꞈ ma” lehˇ Yoˇbaˬ paˇ ehˇ kʼoꞈ nehˬ-euˬ meh.

¹⁸ Zaˬ miˬ zaˬ kʼoeˇ gʼaˬ ehˇ-eu, “Gaˇ yaw kʼaˆ doˆ laˇ naˇ, Aˬbeˬlaˆ meuˬ-ahˇ iˇ-awˇ naˇ haˬ-iˇ-awˬ lehˇ, aˇ hu ba neh dawˬ daˬ daˬ taˬ-euˬ jaˆ-eu loꞈ-ehˇ, kʼoeˇ loꞈ-ehˇ naˇ haˬ naˇ haˬ-ehˇ dehꞈ ka leꞈ-euˬ meh.

¹⁹ Nga maꞈ-euˬ meuˬ heu meuˬ-aˬ, huiˬ-eu meuˬ tiˬ meuˬ pyeuꞈ-awˇ, nui saˇ oꞈ-eu meuˬ tiˬ meuˬ pyeuꞈ-eu uˬ taꞈ, Iˇsaˬleˬlaˆ miˇ kʼahˬ laꞈ kʼoeˇ aˬ cawˬ naˆ maˬ tseˇ saˇ jaˇ ziꞈ-eu meuˬ tiˬ meuˬ kʼawꞈ pyeuꞈ-eu ma. Aˬ jeˬ miˇ neh meuˬ heu meuˬ-ahˇ laˆ cawˆ-eu lehˇ nawˇ leh jeh te. Sahˬpaˬ Miˬyehˇ-euˬ myawˬ-ahˇ nawˇ laˆ luˬ laˆ seˇ nehˬ mawꞈ te loˇ.”

²⁰ Yoˇbaˬ ehˇ-eu, “Kʼoeˇ loꞈ-ehˇ jahˇ-eu lehˇ maˬ ngeuˇ. Naw maꞈ-euˬ meuˬ heu cawˆ-iˇ-awˇ, bi luˬ bi seˇ-iˇ ni ngaˇ tiˬ jawˇ-iˬ maˬ mˇ.

²¹ Kʼoeˇ loꞈ-ehˇ mˇ-eu gʼaˇ duˬ nga maꞈ heu gaˇ oe-euˬ kʼawꞈ maˬ ngeuˇ. Eˇpaˬleˬ miˇ kʼahˬ gawˬ jawˬ gawˬ duˇ paw jawˇ-eu Biˇkaˬliˇ-euˬ aˬ li Sheˬba lehˇ myahˇ-euˬ tsawˇ haˬ tiˬ gʼaˬ sahˬ paˬ Daˬbiˇ-ahˇ puiˬ-eu meh. Tsawˇ haˬ kʼoeˇ tiˬ gʼaˬ nga maꞈ-ahˇ a nehˬ laꞈ naˇ, meuˬ heu meuˬ-ahˇ neh nga maꞈ gʼoꞈ leˇ ma.” Kʼoeˇ ngeh, zaˬ miˬ zaˬ kʼoeˇ gʼaˬ ehˇ-eu, “Aˬ yawꞈ-euˬ uˬ duˬ-ahˇ meuˬ-euˬ lahˇ kʼehˬ laꞈ nyiˇ paw nga maꞈ biˬ doˆ nehˬ ma.”

²² Kʼoeˇ naˇ, meuˬ laꞈ kʼoeˇ jawˇ-eu tsawˇ haˬ deuˬ nehˬ-ehˇ zaˬ miˬ zaˬ kʼoeˇ gʼaˬ mehˬ bawˬ mˇ-awˇ, Sheˬba-euˬ uˬ duˬ deuˆ tsehˆ-awˇ, meuˬ-euˬ lahˇ kʼehˬ laꞈ nyiˇ paw Yoˇbaˬ jawˇ gaˇ biˬ doˆ nehˬ-euˬ meh. Kʼoeˇ naˇ, Yoˇbaˬ daˇ heh baw ngeh, aˬ yawꞈ-euˬ tsawˇ haˬ deuˬ meuˬ kʼoeˇ meuˬ-ahˇ neh doˆ-iˇ-awˇ, yawˬ ha-euˬ nymˇ-ahˇ yawˬ ha gʼoꞈ-iˇ-euˬ meh. Yoˇbaˬ gʼaˬ Yeˬluˇsaˬlehˬ meuˬ-ahˇ sahˬ paˬ jawˇ gaˇ gʼoꞈ leˇ-euˬ meh.

Daˬbiˇ-euˬ gaˇ mˇ-eu yaw huiˬ yaw mahˇ deuˬ

²³ Yoˇbaˬ-aˬ, Iˇsaˬleˬlaˆ miˇ kʼahˬ-euˬ guiˇ maꞈ kʼoeˇ taˆ uˆ lahˇ-eu gʼaˬ pyeuꞈ-eu meh. Yeˬhawˇyaˬdaˬ-euˬ aˬ li Baˬnaˇyaˬ-aˬ, Daˬbiˇ-ahˇ loꞈ piˇ-eu guiˇ maꞈ kʼoeˇ taˆ uˆ lahˇ-eu gʼaˬ pyeuꞈ-eu meh.

²⁴ Aˬdawˇniˇlamˬ-aˬ, myawˬ kʼaˆ bi mˇ-euˬ deuˬ kʼoeˇ taˆ haw-eu pyaˆ-eu gʼaˬ pyeuꞈ-eu meh. Aˬhiˇluˆ-euˬ aˬ li Yeˬhawˇshaˬpaˇ gʼaˬ, jaˇ laˇ yuˇ-eu paw aˬ yuiꞈ geuꞈ-euˬ meh.

²⁵ Sheˬbaˇ-aˬ, saˇ naˇ gaˇ mˇ-eu paw aˬ yuiꞈ geuꞈ-euˬ meh. Zaˬdoˆ hawˇ-eu Aˬbyaˬdaˬ aˬ nyaꞈ-aˬ, piˇ ma pyeuꞈ-eu meh.

²⁶ Yaˬiˇlaˆ meuˬ-ahˇ jawˇ-eu Iˇyaˬ gʼaˬ kʼawꞈ, Daˬbiˇ-euˬ piˇ ma tiˬ gʼaˬ pyeuꞈ-eu meh.