2 Saˬmeuˬlaˆ 11 - Akha

Daˬbiˇ hawˇ-eu Baˬsheˬba

¹ Tsahˬ gaˆ ahˇ le-awˇ, miˇ kʼahˬ sahˬ paˬ deuˬ guiˇ mˇ-eu aˇ yamˬ keuˆ laˇ ngeh, Daˬbiˇ-aˬ, aˬ yawꞈ-euˬ guiˇ maꞈ kʼoeˇ taˆ aˬ yuiꞈ geuꞈ-eu deuˬ hawˇ-eu Yoˇbaˬ-ahˇ, Iˇsaˬleˬlaˆ guiˇ maꞈ bi sheuˬ-awˇ pyehˬ gʼeh-euˬ meh. Aˬmoˬ tsawˇ haˬ deuˬ-ahˇ aˬ yawꞈ maꞈ guiˇ deuˆ gʼaˬ-awˇ, Laˬbah meuˬ-ahˇ loꞈ jawˬ-euˬ meh. Ehˇ kʼawꞈ, Daˬbiˇ aˬ yawꞈ gʼaˬ-aˬ, Yeˬluˇsaˬlehˬ meuˬ-ahˇ jawˇ yaꞈ-euˬ meh.

² Tiˬ nah-aˬ, uˬ ciꞈ uˬ taw taw le ngeh Daˬbiˇ yuꞈ cawˬ-awˇ gʼaˬ naˬ naˬ luꞈ-eu tuˇ laˇ-awˇ, aˬ yawꞈ jawˇ-eu sahˬ paˬ hawˇ nymˇ-euˬ nymˇ mˬ-ahˇ le daˆ-euˬ meh. Aˬ yawꞈ kʼoeˇ gaˇ cah niˇ gʼa luꞈ ngeh, zaˬ miˬ zaˬ tiˬ gʼaˬ iˇ cuꞈ dzuiꞈ shawˇ luꞈ gaˇ ya mawˇ-euˬ meh. Zaˬ miˬ zaˬ kʼoeˇ gʼaˬ aˇ gʼehˇ muiˬ dui dui-eu meh.

³ Kʼoeˇ miˇ neh, aˬ yawꞈ tsawˇ haˬ pyehˬ gʼeh-awˇ, zaˬ miˬ zaˬ kʼoeˇ gʼaˬ aˬ suˇ gʼaˬ nga lehˇ bi pyehˆ tseˇ haw-iˇ ngeh, Eˇlamˬ-euˬ aˬ buˇ Baˬsheˬba pyeuꞈ-awˇ, Heˬtaˆ tsawˇ jeuˬ Uˇliˇyaˆ-ahˇ dahˬ dzaˬ-iˇ taˬ-euˬ gaˇ kawˆ ya siˬ-euˬ meh.

⁴ Daˬbiˇ tsawˇ haˬ pyehˬ gʼeh-awˇ, zaˬ miˬ zaˬ kʼoeˇ gʼaˬ-ahˇ bi sheuˬ laˬ-iˇ-awˇ, yuꞈ taꞈ jawˇ taꞈ-euˬ meh. (Zaˬ miˬ zaˬ kʼoeˇ gʼaˬ ba la mawˇ le gʼaˬ-awˇ, aˬ yawˇ yawꞈ mˇ shawˇ gʼaˬ-euˬ tiˬ dehˬ pyeuꞈ-eu meh.) Kʼoeˇ loꞈ-ehˇ yuꞈ taꞈ jawˇ taꞈ gʼaˬ-awˇ, zaˬ miˬ zaˬ kʼoeˇ gʼaˬ gʼoꞈ-iˇ-euˬ meh.

⁵ Aˇ nah, aˬ yawꞈ zaˬ tsehˆ leˇ-euˬ gaˇ kawˆ ya siˬ ngeh, tsawˇ haˬ pyehˬ gʼeh-awˇ, Daˬbiˇ-ahˇ bi tsaꞈ gaˬ leˇ-euˬ meh.

⁶ Kʼoeˇ naˇ, Yoˇbaˬ jawˇ gaˇ Daˬbiˇ dawˬ tsaꞈ tsaꞈ ahˇ gʼeh-awˇ, “Heˬtaˆ tsawˇ haˬ Uˇliˇyaˆ-ahˇ bi gʼoꞈ laˇ-awˬ” lehˇ ehˇ nehˬ-euˬ meh. Kʼoeˇ ngeh, Yoˇbaˬ neh Uˇliˇyaˆ-ahˇ Daˬbiˇ jawˇ gaˇ bi gʼoꞈ leˇ-euˬ meh.

⁷ Uˇliˇyaˆ gʼoꞈ keuˆ laˇ ngeh, Yoˇbaˬ hawˇ-eu aˬ yawꞈ-euˬ guiˇ maꞈ deuˬ aˬ joˆ-ehˇ jawˇ luꞈ-eu gaˇ kawˆ hawˇ-eu, guiˇ aˬ joˆ-ehˇ deuˆ luꞈ-eu gaˇ kawˆ deuˬ, aˬ yawꞈ-ahˇ Daˬbiˇ naˇ haˬ-euˬ meh.

⁸ Kʼoeˇ naˇ, “Gʼoꞈ-iˇ-awˇ tiˬ kʼehˬ naˬ-iˇ-awˬ” lehˇ, Uˇliˇyaˆ-ahˇ Daˬbiˇ ehˇ nehˬ-euˬ meh. Uˇliˇyaˆ gʼoꞈ-iˇ ngeh, aˬ yawꞈ-euˬ nymˇ jiˇ gʼaˇ duˬ Daˬbiˇ neh laꞈ sawˬ bi biꞈ ha-iˇ-euˬ meh.

⁹ Ehˇ kʼawꞈ, Uˇliˇyaˆ gʼaˬ iˇ kahˇ maˬ gʼoꞈ-iˇ ni, sahˬ paˬ-ahˇ loꞈ piˇ-eu guiˇ maꞈ nehˬ-ehˇ, sahˬ paˬ-euˬ hawˇ nymˇ gʼoˆ kʼehˬ dawˬ peh yuꞈ-euˬ meh.

¹⁰ Uˇliˇyaˆ iˇ kahˇ maˬ gʼoꞈ-iˇ ni jawˇ-eu gaˇ kawˆ Daˬbiˇ ya gaˬ ngeh, “Nawˇ doˆ-iˇ-euˬ gʼawˬ myahˇ ni keuˆ laˇ-awˇ, gʼoꞈ keuˆ laˇ-euˬ tiˬ dehˬ maˬ ngeuˇ te loˇ. Aˬ jeˬ miˇ neh iˇ kahˇ-ahˇ maˬ gʼoꞈ-iˇ ni jawˇ te” lehˇ naˇ haˬ nehˬ-euˬ meh.

¹¹ Uˇliˇyaˆ ehˇ-eu, “Iˇsaˬleˬlaˆ tsawˇ haˬ deuˬ hawˇ-eu Yuˇdaˆ tsawˇ haˬ deuˬ aˬ cawˬ-ahˇ guiˇ deuˆ luꞈ-awˇ, Dawˬ ma saˇ jaˇ Bahˬ keuˆ kʼawꞈ, aˬ yawꞈ maꞈ nehˬ-ehˇ jaˆ-eu meh. Nga maꞈ kʼoeˇ taˆ uˆ lahˇ-eu Yoˇbaˬ hawˇ-eu aˬ yawꞈ-euˬ guiˇ maꞈ deuˬ kʼoeˇ taˆ aˬ yuiꞈ geuꞈ luꞈ-eu deuˬ, deh ga-ahˇ guiˇ daˬ daˬ-awˇ jawˇ luꞈ-eu meh. Aˬ yawꞈ maꞈ kʼoeˇ loꞈ-ehˇ guiˇ deuˆ deuˆ-ehˇ jawˇ ngeh, ngaˇ iˇ kahˇ-ahˇ gʼoꞈ-iˇ-awˇ dzaˬ byawˬ dawˇ byawˬ-eu laꞈ kʼoeˇ, ngaˬ-euˬ miˬ zaˬ nehˬ-ehˇ aˬ joˆ-ehˇ yuꞈ taꞈ-iˇ nmˇ. Yawˬ ha-euˬ gʼawˇ mawˇ yaw muiˬ yaw shawˇ shawˇ-ehˇ ya jawˇ-eu, heu loꞈ-ehˇ gʼeh-eu guiˇ deuˆ luꞈ-eu aˇ yamˬ-ahˇ, kʼoeˇ loꞈ-ehˇ gʼeh-eu jeˬ ngaˇ maˬ mˇ.”

¹² Uˇliˇyaˆ-ahˇ Daˬbiˇ ehˇ nehˬ-eu, “Toˆ-ehˇ ngeuˇ naˇ, iˬ nah heu gaˇ jawˇ naˬ-awˬ. Niˬ shawˬ nah nawˬ-ahˇ ngaˇ bi gʼoꞈ-iˇ ma” lehˇ ehˇ nehˬ-euˬ meh. Kʼoeˇ ngeh nah hawˇ-eu yawˬ nah yawˬ-ahˇ keuˆ ni, Yeˬluˇsaˬlehˬ meuˬ-ahˇ Uˇliˇyaˆ jawˇ naˬ-euˬ meh.

¹³ Daˬbiˇ aˬ yawꞈ-ahˇ ciꞈ hawˬ kuˇ dzaˬ-awˇ, aˬ gaꞈ dzaˇ uiˇ bi dawˇ yehꞈ-euˬ meh. Ehˇ kʼawꞈ, kʼoeˇ ngeh miˇ kʼawꞈ Uˇliˇyaˆ iˇ kahˇ maˬ gʼoꞈ-iˇ-ehˇ, sahˬ paˬ-euˬ nymˇ-ahˇ loꞈ piˇ-eu guiˇ maꞈ jawˇ-eu lawˆ-ahˇ, guiˇ deuˆ ngeh yuꞈ-eu aˬ yawꞈ-eu yuꞈ zaˇ aˇ bui kʼoeˇ taˆ yuꞈ-euˬ meh.

¹⁴ Yawˬ nah yawˬ uˬ shawˬ paw, Yoˇbaˬ jawˇ gaˇ Daˬbiˇ sahˬ boꞈ tiˬ taꞈ boꞈ-awˇ, Uˇliˇyaˆ gʼoꞈ-iˇ gaˇ dawˆ ahˇ gʼeh-euˬ meh.

¹⁵ “Guiˇ yaw kʼaˆ-ehˇ deuˆ-eu tsahˇ-ahˇ Uˇliˇyaˆ guiˇ daˬ bi daˬ-awˇ, naw maꞈ jeˬ nah paw jiˆ kʼoꞈ nehˬ-awˇ, aˬ yawꞈ-ahˇ bi deuˆ sehꞈ-awˬ” lehˇ boꞈ ahˇ nehˬ-euˬ meh.

¹⁶ Kʼoeˇ naˇ, meuˬ kʼoeˇ meuˬ-ahˇ Yoˇbaˬ guiˇ deuˆ luꞈ ngeh, muiˇ-eu deuˬ gʼaˬ kʼaˆ dzehˬ-eu tsahˇ meh lehˇ aˬ yawꞈ siˬ nya-eu tsahˇ-ahˇ, Uˇliˇyaˆ-ahˇ pyehˬ gʼeh-euˬ meh.

¹⁷ Muiˇ-eu deuˬ-euˬ guiˇ maꞈ deuˬ meuˬ laꞈ kʼoeˇ neh doˆ le-awˇ, Yoˇbaˬ-euˬ guiˇ maꞈ-ahˇ deuˆ ceh ceh le-euˬ meh. Daˬbiˇ-euˬ yaw huiˬ yaw mahˇ tiˬ paˆ na deuˬ shiˇ-awˇ, Uˇliˇyaˆ gʼaˬ kʼawꞈ kʼoeˇ gaˇ bi deuˆ sehꞈ-euˬ meh.

¹⁸ Kʼoeˇ naˇ, Yoˇbaˬ tsawˇ haˬ pyehˬ kʼoꞈ gʼeh-awˇ, guiˇ deuˆ gaˇ kʼaˇ pyeuꞈ laˇ-euˬ gaˇ kawˆ deuˬ, Daˬbiˇ-ahˇ bi tsaꞈ gaˬ leˇ-euˬ meh.

¹⁹ Dawˬ tsaꞈ bi tsaꞈ gaˬ leˇ-euˬ gʼaˬ-ahˇ Yoˇbaˬ heu loꞈ-ehˇ mehˬ nehˬ-euˬ meh. “Guiˇ deuˆ luꞈ gaˇ pyeuꞈ laˇ-euˬ gaˇ kawˆ heu deuˬ dawˬ tawˆ luꞈ, sahˬ paˬ-ahˇ nawˇ dzawˇ nehˬ gʼaˬ ngeh,

²⁰ sahˬ paˬ nui ma pehˇ laˇ-awˇ, ‘Aˬ jeˬ miˇ neh naw maꞈ meuˬ dawˬ peh tehˬ ni iˇ-awˇ guiˇ deuˆ-iˇ teˬ. Aˬ yawꞈ maꞈ meuˬ meuˬ lahˇ kʼoeˇ taˆ jawˇ-awˇ, naw maꞈ-ahˇ kaˆ neh beuˆ tehꞈ-a lehˇ maˬ siˬ nya te loˇ.

²¹ Giˇdoˬ-euˬ aˬ li Aˬbiˇmaˬlehˆ-ahˇ aˬ joˆ-ehˇ jahˇ-awˇ bi deuˆ sehꞈ-euˬ gaˇ kawˆ naw maꞈ maˬ noeˬ nya loˇ. Deˬbehˇ meuˬ-euˬ meuˬ lahˇ kʼoeˇ taˆ daˆ-eu zaˬ miˬ zaˬ tiˬ gʼaˬ neh, aˬ yawꞈ-ahˇ lo lehˬ pyehˬ deh sehꞈ-euˬ maˬ ngeuˇ-a loˇ. Toˆ-ehˇ ngeuˇ naˇ, aˬ jeˬ miˇ neh naw maꞈ meuˬ meuˬ lahˇ dawˬ peh teu naˆ naˆ-ehˇ iˇ peh teˬ’ lehˇ sahˬ paˬ ehˇ laˇ naˇ, ‘Nawˬ-euˬ guiˇ maꞈ kʼoeˇ taˆ yaw huiˬ yaw mahˇ geuꞈ luꞈ-eu Uˇliˇyaˆ gʼaˬ kʼawꞈ bi deuˆ sehꞈ-euˬ meh’ lehˇ ehˇ kʼoꞈ nehˬ-awˬ.”

²² Dawˬ tsaꞈ bi tsaꞈ gaˬ leˇ-euˬ tsawˇ haˬ kʼoeˇ gʼaˬ Daˬbiˇ jawˇ gaˇ le-awˇ, Yoˇbaˬ neh kʼaˇ bi ehˇ-euˬ loꞈ-ehˇ ehˇ nehˬ leˇ-euˬ meh.

²³ Aˬ yawꞈ ehˇ-eu, “Nga maꞈ-ahˇ muiˇ-eu deuˬ nga maꞈ naˆ maˬ tseˇ tsawˇ haˬ myaˬ dzehˬ-awˇ, meuˬ laꞈ kʼoeˇ neh deh ga-ahˇ doˆ le-awˇ, nga maꞈ-ahˇ guiˇ deuˆ le-euˬ meh. Ehˇ kʼawꞈ, meuˬ-euˬ lahˇ kʼehˬ-ahˇ keuˆ ni aˬ yawꞈ maꞈ-ahˇ nga maꞈ teh kʼoꞈ gʼeh-euˬ ma.

²⁴ Kʼoeˇ ngeh, aˬ yawꞈ maꞈ meuˬ meuˬ lahˇ kʼoeˇ taˆ daˆ-awˇ, nga maꞈ-ahˇ kaˆ beuˆ gʼeh leꞈ-euˬ miˇ neh, nawˬ-euˬ guiˇ maꞈ kʼoeˇ taˆ aˬ yuiꞈ geuꞈ-eu yaw huiˬ yaw mahˇ tiˬ paˆ na deuˬ bi beuˆ sehꞈ-euˬ meh. Nawˬ-euˬ guiˇ maꞈ kʼoeˇ taˆ aˬ yuiꞈ geuꞈ-eu yaw huiˬ yaw mahˇ tiˬ gʼaˬ pyeuꞈ-eu Heˬtaˆ tsawˇ haˬ Uˇliˇyaˆ kʼawꞈ, kʼoeˇ gaˇ bi beuˆ sehꞈ-euˬ meh.”

²⁵ Dawˬ tsaꞈ tsaꞈ gaˬ laˇ-euˬ tsawˇ haˬ kʼoeˇ gʼaˬ-ahˇ Daˬbiˇ ehˇ nehˬ-eu, “Yoˇbaˬ-ahˇ gʼaˬ biꞈ nehˬ-awˇ, nui ma taˬ cawˆ lehˇ ehˇ nehˬ-awˬ. Aˬ jeˬ miˇ neh ehˇ naˇ, guiˇ deuˆ-eu lehˇ ehˇ-eu jeˬ-aˬ, heu gʼaˬ kʼoeˇ gʼaˬ shiˇ meh lehˇ ehˇ tsehˆ nya-eu jeˬ maˬ ngeuˇ-a. Yaw kʼaˆ kʼaˆ-ehˇ paˇ leh jeh-awˇ, meuˬ kʼoeˇ meuˬ-ahˇ deuˆ gʼaˬ-awˬ lehˇ ehˇ nehˬ-awˬ.”

²⁶ Aˬ yawꞈ-euˬ kʼaˬ dzeˇ zaˬ bi beuˆ sehꞈ-euˬ gaˇ kawˆ Baˬsheˬba ya gaˬ ngeh, tsawˇ ngoeˇ ngoeˇ-euˬ meh.

²⁷ Tsawˇ ngoeˇ ngoeˇ-euˬ aˇ nah aˇ yamˬ dzeuˇ-iˇ ngeh, Daˬbiˇ tsawˇ haˬ pyehˬ gʼeh-awˇ, aˬ yawꞈ-ahˇ bi sheuˬ laˬ-iˇ-euˬ meh. Aˬ yawꞈ Daˬbiˇ-euˬ miˬ zaˬ pyeuꞈ laˇ-awˇ, Daˬbiˇ gʼaˇ duˬ aˬ li tiˬ li ciˬ-euˬ meh. Ehˇ kʼawꞈ, Daˬbiˇ kʼoeˇ loꞈ-ehˇ mˇ gaˇ Sahˬpaˬ Miˬyehˇ nui ma maˬ tsaˬ-a.