1 Saˬmeuˬlaˆ 6 - Akha

Dawˬ ma saˇ jaˇ Bahˬ keuˆ tawˬ kʼoꞈ ha leˇ-euˬ

¹ Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ kʼoeˇ, Piˇliˇtiˆ miˇ kʼahˬ laꞈ kʼoeˇ ba la shiꞈ siˬ keuˆ ni jaˆ-euˬ meh.

² Kʼoeˇ naˇ, piˇ ma hawˇ-eu nyiˇ paˬ deuˬ-ahˇ Piˇliˇtiˆ tsawˇ haˬ deuˬ kuˇ uiˬ-awˇ, “Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ-ahˇ aˬ joˆ-ehˇ jahˇ nmˇ. Aˬ yawꞈ jaˆ duˬ-ahˇ paˇ sha ha kʼoꞈ nehˬ leˇ mawꞈ naˇ, aˬ jeˬ biꞈ caw-awˇ yaˬ sha ha kʼoꞈ nehˬ leˇ nmˇ” lehˇ naˇ haˬ-euˬ meh.

³ Aˬ yawꞈ maꞈ ehˇ-eu, “Iˇsaˬleˬlaˆ Miˬyehˇ-euˬ Dawˬ ma saˇ jaˇ Bahˬ keuˆ-ahˇ naw maꞈ sha ha kʼoꞈ leˇ mawꞈ naˇ, naw maꞈ-euˬ iˬ baˇ gʼaˇ duˬ damˬ nehˬ-eu tiˬ jeˬ paˬ nehˬ-ehˇ ya sha ha kʼoꞈ nehˬ leˇ tehꞈ-a. Damˬ-eu tiˬ jeˬ paˬ maˬ ahˇ-ehˇ, Dawˬ ma saˇ jaˇ Bahˬ keuˆ tehꞈ-ehˇ maˬ sha ha kʼoꞈ leˇ kʼmˬ-aˇ. Damˬ-eu tiˬ jeˬ paˬ nehˬ-ehˇ sha ha kʼoꞈ nehˬ leˇ naˇ, naw maꞈ naˇ gawˇ taˬ leˇ-awˇ, aˬ jeˬ baˬ da neh aˬ yawꞈ naw maꞈ-ahˇ kʼehˬ luꞈ-eu gaˇ kawˆ naw maꞈ ya siˬ tehꞈ-a.”

⁴ Piˇliˇtiˆ tsawˇ haˬ deuˬ ehˇ-eu, “Nga maꞈ-euˬ iˬ baˇ gʼaˇ duˬ damˬ-eu aˬ geu jeˬ Dawˬ ma saˇ jaˇ Bahˬ keuˆ nehˬ-ehˇ ya biꞈ caw gʼeh nmˇ.” Piˇ ma hawˇ-eu nyiˇ paˬ kʼoeˇ deuˬ ehˇ-eu, “Piˇliˇtiˆ sahˬ paˬ tiˬ gʼaˬ-euˬ tiˬ hmˬ doˇ ni, shuiˇ maˇ cuˬ maˇ lu mawˇ kawˇ ngaˬ hmˬ hawˇ-eu shuiˇ ho caꞈ aˇ baˇ ngaˬ hmˬ ya biꞈ caw meh. Aˬ jeˬ miˇ neh ehˇ naˇ, naw maꞈ dawˬ tawˆ luꞈ kʼoeˇ taˆ maˬ ehˇ, sahˬ paˬ ngaˬ gʼaˬ kʼoeˇ taˆ maˬ ehˇ, shaˬ zahˬ naˇ gawˇ tiˬ kawˆ loꞈ-ehˇ keuˆ le-euˬ meh. Naw maꞈ-euˬ miˇ kʼahˬ-ahˇ laˆ cawˆ luꞈ-eu maˇ cuˬ maˇ lu hawˇ-eu ho caꞈ aˇ baˇ naw maꞈ tehˆ-awˇ, Iˇsaˬleˬlaˆ tsawˇ jeuˬ-euˬ Miˬyehˇ-ahˇ naw maꞈ ya taˬ huiˬ yaˬ taˬ mahˇ nehˬ meh.

⁵ Kʼoeˇ loꞈ-ehˇ jahˇ naˇ, naw maꞈ-ahˇ maˬ ehˇ, naw maꞈ-euˬ miˬ yehˇ deuˬ-ahˇ maˬ ehˇ, naw maꞈ-euˬ miˇ kʼahˬ-ahˇ maˬ ehˇ, aˬ yawꞈ maˬ paˇ kʼehˬ nehˬ laꞈ ni byehˇ-eu duˇ.

⁶ Aˬ jeˬ miˇ neh Iˇjiˇtuˆ tsawˇ haˬ deuˬ loꞈ-ehˇ naw maꞈ-euˬ nui ma gʼahˇ te. Iˇsaˬleˬlaˆ tsawˇ haˬ deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh maˬ bi doˆ-iˇ kʼoeˇ keuˆ ni, Iˇjiˇtuˆ tsawˇ haˬ deuˬ-ahˇ Miˬyehˇ neh yaw kʼaˆ-ehˇ kʼehˬ nehˬ-euˬ gaˇ naw maꞈ taˬ ngehˇ.

⁷ Laˆ lawˬ yaw shuiꞈ tiˬ laˇ hawˇ-eu tiˬ jawˇ-iˬ maˬ gʼoe dzaˬ haw-euˬ mawˇ zaˬ ahˇ-eu mawˇ neˇ mawˇ ma nyiˬ ma nymˬ-mˇ mi naˆ-ehˇ lehˬ hmˬ taˬ-awˬ. Mawˇ neˇ mawˇ ma kʼoeˇ nyiˬ ma-ahˇ laˆ lawˬ tsoꞈ-awˇ, mawˇ neˇ mawˇ zaˬ-ahˇ mawˇ neˇ mawˇ kuˆ laꞈ kʼoeˇ teh uˇ kʼoꞈ yaꞈ-awˬ.

⁸ Kʼoeˇ naˇ, Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ-ahˇ laˆ lawˬ kʼoeˇ taˆ baꞈ daˆ-awˬ. Naw maꞈ-euˬ iˬ baˇ aˇ poeˬ aˬ yawꞈ-ahˇ biꞈ-eu lehˇ gʼeh-eu shuiˇ mawˇ kawˇ kʼoeˇ deuˬ kʼawꞈ, bahˬ keuˆ tiˬ keuˆ laꞈ kʼoeˇ dawˆ ahˇ-awˇ, laˆ lawˬ kʼoeˇ taˆ Dawˬ ma saˇ jaˇ Bahˬ keuˆ gaˇ dzeˇ baꞈ daˆ taˬ-awˬ. Kʼoeˇ naˇ, laˆ lawˬ kʼoeˇ laˇ-ahˇ teh luˆ-awˇ, aˬ yawˇ yawꞈ bi iˇ gʼeh-awˬ.

⁹ Laˆ lawˬ kʼoeˇ laˇ aˬ geu paw iˇ nga lehˇ haw taˬ-awˬ. Behˬsheˬmehˇ meuˬ paw iˇ naˇ, aˬ dui kʼoeˇ taˆ sahˬ zahˬ naˇ gawˇ bi keuˆ le-euˬ gʼaˬ-aˬ, Iˇsaˬleˬlaˆ tsawˇ jeuˬ-euˬ Miˬyehˇ meh. Ehˇ kʼawꞈ, yawˬ paw yawˬ iˇ naˇ, aˬ dui ya daˬ luꞈ-eu naˇ gawˇ heu aˬ yawꞈ neh bi keuˆ le-euˬ maˬ ngeuˇ-ehˇ, aˬ yawˇ yawꞈ seu doˆ laˇ-euˬ naˇ gawˇ meh.”

¹⁰ Piˇ ma hawˇ-eu nyiˇ paˬ kʼoeˇ deuˬ neh kʼaˇ ehˇ nehˬ-euˬ loꞈ-ehˇ, Piˇliˇtiˆ tsawˇ haˬ deuˬ jahˇ-euˬ meh. Tiˬ jawˇ-iˬ maˬ gʼoe dzaˬ haw-euˬ mawˇ zaˬ ahˇ-eu mawˇ neˇ mawˇ ma nyiˬ ma aˬ yawꞈ maꞈ tsahˇ laꞈ-awˇ, laˆ lawˬ tsoꞈ gʼaˬ-awˇ, mawˇ neˇ mawˇ zaˬ-ahˇ kuˆ laꞈ kʼoeˇ teh uˇ kʼoꞈ-euˬ meh.

¹¹ Dawˬ ma saˇ jaˇ Bahˬ keuˆ-ahˇ laˆ lawˬ kʼoeˇ taˆ baꞈ daˆ-awˇ, shuiˇ ho caꞈ mawˇ kawˇ hawˇ-eu shuiˇ maˇ cuˬ maˇ lu mawˇ kawˇ dawˆ ahˇ taˬ-euˬ bahˬ keuˆ kʼoeˇ keuˆ kʼawꞈ, laˆ lawˬ kʼoeˇ taˆ baꞈ daˆ-euˬ meh.

¹² Kʼoeˇ naˇ, mawˇ neˇ mawˇ ma kʼoeˇ nyiˬ ma Behˬsheˬmehˇ meuˬ-ahˇ iˇ-eu gaˇ ma paw luˆ-iˇ-awˇ, tiˬ paw-iˬ maˬ iˇ pyawˇ ni, gaˇ ma kʼoeˇ kahˇ caw caw-ehˇ, mahˇ mahˇ-ehˇ iˇ gʼeh-euˬ meh. Piˇliˇtiˆ sahˬ paˬ kʼoeˇ ngaˬ gʼaˬ, Behˬsheˬmehˇ meuˬ-euˬ miˇ kaˬ-ahˇ keuˆ ni, mawˇ neˇ kʼoeˇ nyiˬ mawˇ-euˬ mehˬ nah caw teh haw-euˬ meh.

¹³ Kʼoeˇ ngeh, Behˬsheˬmehˇ meuˬ-ahˇ jawˇ-eu tsawˇ haˬ deuˬ deh kʼawꞈ-ahˇ cehˇ yehˬ luꞈ-eu meh. Aˬ yawꞈ maꞈ gʼawˇ leuˇ haw ngeh, Dawˬ ma saˇ jaˇ Bahˬ keuˆ-ahˇ ja pyuˬ ni aˬ yawꞈ maꞈ ya mawˇ-awˇ, laˬ kʼaˬ cehˇ dui dui-euˬ meh.

¹⁴ Laˆ lawˬ kʼoeˇ laˇ Behˬsheˬmehˇ meuˬ-ahˇ jawˇ-eu Yawˇshuˆ lehˇ myahˇ-euˬ gʼaˬ-euˬ deh yaˇ-ahˇ oe-awˇ, kʼaˬ lo lo ma tiˬ siˬ-euˬ dawˬ peh naˬ leˇ-euˬ meh. Daˇ kawˬ neh jahˇ taˬ-euˬ laˆ lawˬ kʼoeˇ laˇ-ahˇ aˬ yawꞈ maꞈ deh kʼehꞈ deh kʼoeˆ-awˇ, mawˇ neˇ mawˇ ma kʼoeˇ nyiˬ ma sehꞈ-awˇ, miˬ dzaˬ dzah puiˆ-awˇ lawˇ-eu jeˬ Sahˬpaˬ Miˬyehˇ-ahˇ lawˇ nehˬ-euˬ meh.

¹⁵ Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ hawˇ-eu shuiˇ mawˇ kawˇ deuˬ dawˆ ahˇ taˬ-euˬ bahˬ keuˆ kʼoeˇ keuˆ-ahˇ Leˬbiˇ tsawˇ haˬ deuˬ neh baꞈ doˆ-awˇ, kʼaˬ lo lo ma kʼoeˇ siˬ kʼoeˇ taˆ baꞈ daˆ taˬ-euˬ meh. Kʼoeˇ naˇ, Behˬsheˬmehˇ meuˬ-ahˇ jawˇ-eu tsawˇ haˬ deuˬ, miˬ dzaˬ dzah puiˆ-awˇ lawˇ-eu jeˬ hawˇ-eu miˬ dzaˬ maˬ dzah puiˆ-ehˇ lawˇ-eu jeˬ, Sahˬpaˬ Miˬyehˇ-ahˇ lawˇ nehˬ-euˬ meh.

¹⁶ Piˇliˇtiˆ sahˬ paˬ kʼoeˇ ngaˬ gʼaˬ aˬ yawꞈ maꞈ kʼoeˇ loꞈ-ehˇ mˇ gaˇ haw yaꞈ-awˇ, kʼoeˇ ngeh nah laꞈ kʼoeˇ Eˇkaˬloˬ meuˬ-ahˇ gʼoꞈ-iˇ-euˬ meh.

¹⁷ Piˇliˇtiˆ tsawˇ haˬ deuˬ-aˬ, Aˬshaˬdoˇ meuˬ, Gaˬzaˬ meuˬ, Aˬshaˇgaˬloˇ meuˬ, Gaˬdaˇ meuˬ hawˇ-eu, Eˇkaˬloˬ meuˬ heu ngaˬ meuˬ, tiˬ meuˬ-euˬ mawˇ kawˇ tiˬ kawˇ doˇ-ehˇ, aˬ yawꞈ maꞈ-euˬ iˬ baˇ aˇ poeˬ shuiˇ maˇ cuˬ maˇ lu mawˇ kawˇ ngaˬ hmˬ Sahˬpaˬ Miˬyehˇ-ahˇ biꞈ gʼeh-euˬ meh.

¹⁸ Meuˬ meuˬ lahˇ yaw muiˬ paˬ-ehˇ gawˬ ziꞈ taˬ-euˬ meuˬ deuˬ maˬ ehˇ, meuˬ meuˬ lahˇ maˬ baw-eu pu deuˬ maˬ ehˇ, Piˇliˇtiˆ sahˬ paˬ ngaˬ gʼaˬ kʼaˇ uˆ lahˇ luꞈ-eu meuˬ aˬ yawꞈ meuˬ yawꞈ-euˬ dah zaˇ mawˇ kawˇ tiˬ kawˇ doˇ-ehˇ, shuiˇ ho caꞈ mawˇ kawˇ deuˬ kʼawꞈ, aˬ yawꞈ maꞈ biꞈ gʼeh-euˬ meh. Behˬsheˬmehˇ meuˬ-ahˇ jawˇ-eu Yawˇshuˆ-euˬ deh yaˇ-ahˇ jaˆ-eu, aˬ yawꞈ maꞈ neh Dawˬ ma saˇ jaˇ Bahˬ keuˆ baꞈ daˆ taˬ-euˬ kʼaˬ lo lo ma kʼoeˇ siˬ, iˬ nah keuˆ ni kʼoeˇ gaˇ jaˆ luꞈ-awˇ, pyeuꞈ dzeuˇ yaꞈ-euˬ gaˇ kawˆ kʼoeˇ-euˬ saˇ kiˇ loꞈ-ehˇ pyeuꞈ-eu meh.

¹⁹ Behˬsheˬmehˇ meuˬ-ahˇ jawˇ-eu tsawˇ haˬ shiꞈ tseˇ gʼaˬ-ahˇ Sahˬpaˬ Miˬyehˇ sehꞈ-euˬ meh. Aˬ jeˬ miˇ neh ehˇ naˇ, Dawˬ ma saˇ jaˇ Bahˬ keuˆ-euˬ laꞈ kʼoeˇ paw aˬ yawꞈ maꞈ cu hu-euˬ meh. Aˬ yawꞈ maꞈ-euˬ tsawˇ haˬ kʼoeˇ myaˆ ni Sahˬpaˬ Miˬyehˇ neh bi sehꞈ-euˬ miˇ neh, aˬ yawꞈ maꞈ tsawˇ ngoeˇ ngoeˇ-euˬ meh.

Giˇliˇyaˆyeˬlmˬ meuˬ-ahˇ Dawˬ ma saˇ jaˇ Bahˬ keuˆ baꞈ gʼeh-euˬ

²⁰ Kʼoeˇ naˇ, Behˬsheˬmehˇ meuˬ-ahˇ jawˇ-eu tsawˇ haˬ deuˬ ehˇ-eu, “Muiˬ-eu shawˇ-eu Miˬyehˇ pyeuꞈ-eu Sahˬpaˬ Miˬyehˇ-euˬ mehˬ shi aˬ suˇ gʼaˬ jawˇ tehˬ peuˬ nmˇ. Aˬ yawꞈ-ahˇ aˬ dui-euˬ dawˬ peh maˬ bi jawˇ ni aˬ geu paw bi iˇ nmˇ.”

²¹ Kʼoeˇ naˇ, Giˇliˇyaˆyeˬlmˬ meuˬ-ahˇ jawˇ-eu tsawˇ haˬ deuˬ jawˇ gaˇ aˬ yawꞈ maꞈ tsawˇ haˬ pyehˬ gʼeh-awˇ, “Piˇliˇtiˆ tsawˇ haˬ deuˬ Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ baꞈ kʼoꞈ ha laˇ gʼaˬ-euˬ meh. Naw maꞈ oe-awˇ baꞈ kʼoꞈ laˬ le-awˬ” lehˇ bi ehˇ gaˬ-iˇ-euˬ meh.