1 Saˬmeuˬlaˆ 4 - Akha

Piˇliˇtiˆ tsawˇ haˬ deuˬ Dawˬ ma saˇ jaˇ Bahˬ keuˆ deuˆ za-euˬ

¹ Aˇ nah aˇ yamˬ kʼoeˇ yamˬ laꞈ kʼoeˇ, Iˇsaˬleˬlaˆ tsawˇ haˬ deuˬ-ahˇ guiˇ deuˆ-eu gʼaˇ duˬ, Piˇliˇtiˆ tsawˇ haˬ deuˬ uiˬ leˇ taˬ-euˬ meh. Kʼoeˇ miˇ neh, Iˇsaˬleˬlaˆ tsawˇ haˬ deuˬ kʼawꞈ, aˬ yawꞈ maꞈ-ahˇ guiˇ deuˆ-iˇ-eu lehˇ doˆ-iˇ-euˬ meh. Iˇsaˬleˬlaˆ tsawˇ haˬ deuˬ Eˇbaˬneˬzaˬ lehˇ kuˇ-eu jawˇ duˬ-ahˇ taˆ tsoˆ-awˇ jawˇ-awˇ, Piˇliˇtiˆ tsawˇ haˬ deuˬ Aˬpyehˇ meuˬ-ahˇ taˆ tsoˆ-awˇ jawˇ-euˬ meh.

² Piˇliˇtiˆ tsawˇ haˬ deuˬ Iˇsaˬleˬlaˆ tsawˇ haˬ deuˬ-ahˇ deuˆ le-awˇ yaw kʼaˆ-ehˇ deuˆ ceh ceh-euˬ meh. Piˇliˇtiˆ tsawˇ haˬ deuˬ neh Iˇsaˬleˬlaˆ tsawˇ haˬ deuˬ-ahˇ deuˆ gʼaˬ-awˇ, Iˇsaˬleˬlaˆ tsawˇ haˬ oeˬ heˇ gʼaˬ ehˇ gʼaˬ ni bi deuˆ sehꞈ-euˬ meh.

³ Maˬ shiˇ-ehˇ dzeˇ-eu deuˬ taˆ-ahˇ gʼoꞈ keuˆ laˇ ngeh, Iˇsaˬleˬlaˆ tsawˇ haˬ aˬ yuiꞈ aˬ tsu deuˬ ehˇ-eu, “Iˬ nah aˬ jeˬ miˇ neh Sahˬpaˬ Miˬyehˇ Piˇliˇtiˆ tsawˇ haˬ deuˬ neh aˬ dui maꞈ-ahˇ bi deuˆ gʼaˬ-euˬ maˬ siˬ ngaˇ. Sahˬpaˬ Miˬyehˇ aˬ dui nehˬ-ehˇ iˇ-awˇ, aˬ dui-ahˇ muiˇ-eu deuˬ-euˬ aˬ laꞈ laꞈ kʼoeˇ aˬ dui-ahˇ ka kʼoꞈ nehˬ laꞈ ni, Shiˇloˬ meuˬ-ahˇ jaˆ-eu aˬ yawꞈ-euˬ Dawˬ ma saˇ jaˇ Bahˬ keuˆ baꞈ laˬ leˇ kaˇ-euˇ.”

⁴ Kʼoeˇ naˇ, Shiˇloˬ meuˬ-ahˇ tsawˇ haˬ pyehˬ gʼeh-awˇ, Baoˬ huiˬ-eu Miˬyehˇ-euˬ muiˬ-eu shawˇ-eu nuiˇ duˬ bi geuꞈ dah taˬ-euˬ, Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ kʼoeˇ keuˆ bi baꞈ laˬ leˇ-euˬ meh. Eˇliˆ-euˬ aˬ li Hawˇpaˬniˇ hawˇ-eu Piˇnaˬhaˇ aˬ nyaꞈ nyiˬ mehˇ nmˇ luꞈ, dawˬ ma saˇ jaˇ Bahˬ keuˆ mehˬ nah caw teh gʼeh leꞈ-euˬ meh.

⁵ Dawˬ ma saˇ jaˇ Bahˬ keuˆ baꞈ keuˆ leꞈ ngeh, Iˇsaˬleˬlaˆ tsawˇ haˬ deuˬ laˬ kʼaˬ cehˇ dui dui-eu laꞈ kʼoeˇ yaw kʼaˆ-ehˇ guˇ-eu miˇ neh, miˇ tsaˬ tahˬ kʼawˇ luˆ luˆ-ehˇ pyeuꞈ laˇ-euˬ meh.

⁶ Kʼoeˇ loꞈ-ehˇ guˇ-eu teˇ saˇ-ahˇ Piˇliˇtiˆ tsawˇ haˬ deuˬ ya gaˬ ngeh, “Heˬbyehˇ tsawˇ haˬ deuˬ taˆ laꞈ kʼoeˇ guˇ guˇ-ehˇ jawˇ gaˇ naˇ haˬ sheˇ. Aˬ jeˬ miˇ neh guˇ-eu nya teu” lehˇ ehˇ-eu meh. Heˬbyehˇ tsawˇ haˬ deuˬ-euˬ taˆ laꞈ kʼoeˇ Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ baꞈ keuˆ laꞈ taˬ-euˬ gaˇ aˬ yawꞈ maꞈ ya mawˇ ngeh,

⁷ guˆ-awˇ heu loꞈ-ehˇ ehˇ-eu meh. “Aˬ yawꞈ maꞈ-euˬ taˆ laꞈ kʼoeˇ miˬ yehˇ tiˬ gʼaˬ oe keuˆ taˬ-euˬ nga. Heu loꞈ-ehˇ gʼeh-eu jeˬ aˬ dui tiˬ jawˇ-iˬ maˬ tahˬ puˬ haw-aˬ.

⁸ Baoˬ huiˬ-eu miˬ yehˇ kʼoeˇ deuˬ-euˬ aˬ laꞈ laꞈ kʼoeˇ, aˬ dui-ahˇ aˬ suˇ gʼaˬ ka kʼoꞈ nehˬ laꞈ nmˇ. Miˬ yehˇ kʼoeˇ deuˬ-aˬ, bawˇ tsahˬ bawˇ dahˇ laꞈ kʼoeˇ Iˇjiˇtuˆ tsawˇ haˬ deuˬ-ahˇ sehꞈ-euˬ miˬ yehˇ deuˬ ngeuˇ-eu jeˬ nga.

⁹ Piˇliˇtiˆ tsawˇ haˬ deuˬ-oˇ, nui ma kʼaˬ duˬ ni taˬ-eu laꞈ kʼoeˇ, kʼaˬ dzeˇ zaˬ-euˬ nui ma pi-awˇ guiˇ deuˆ-awˬ. Kʼoeˇ loꞈ-ehˇ noeˬ tsehˆ-awˇ maˬ deuˆ naˇ, Heˬbyehˇ tsawˇ haˬ deuˬ aˬ dui-euˬ zaˬ kʼaˆ geuꞈ-euˬ loꞈ-ehˇ, aˬ dui maꞈ kʼawꞈ aˬ yawꞈ maꞈ-euˬ zaˬ kʼaˆ paˇ ya geuꞈ poˆ tehꞈ-a. Teu miˇ neh kʼaˬ dzeˇ zaˬ-euˬ nui ma pi-awˇ guiˇ deuˆ kaˇ-euˇ.”

¹⁰ Kʼoeˇ naˇ, Piˇliˇtiˆ tsawˇ haˬ deuˬ leh jeh dui dui-awˇ guiˇ deuˆ-eu laꞈ kʼoeˇ, Iˇsaˬleˬlaˆ tsawˇ haˬ deuˬ-ahˇ deuˆ gʼaˬ-awˇ, Iˇsaˬleˬlaˆ tsawˇ haˬ deuˬ cehˆ gʼoꞈ-euˬ meh. Tsawˇ haˬ shiˇ dui dui-awˇ, Iˇsaˬleˬlaˆ yehˇ smˬ muiˇ gʼaˬ bi deuˆ sehꞈ-euˬ meh.

¹¹ Miˬyehˇ-euˬ Dawˬ ma saˇ jaˇ Bahˬ keuˆ aˬ cawˬ neh bi deuˆ za-awˇ, Eˇliˆ-euˬ aˬ li Hawˇpaˬniˇ hawˇ-eu Piˇnaˬhaˇ aˬ nyaꞈ nyiˬ mehˇ nmˇ luꞈ bi sehꞈ-euˬ meh.

Eˇliˆ shiˇ-euˬ

¹² Beˬyaˬmiˬ tsawˇ jeuˬ tiˬ gʼaˬ, guiˇ deuˆ duˬ-ahˇ neh Shiˇloˬ meuˬ-ahˇ keuˆ ni maˬ naˬ leˇ ni cehˆ-awˇ, tiˬ nah laꞈ kʼoeˇ tehꞈ-ehˇ cehˆ keuˆ-euˬ meh. Aˬ yawꞈ noeˬ shaˬ dui dui-eu gaˇ kawˆ aˬ cawˬ bi siˬ-eu gʼaˇ duˬ, aˬ yawꞈ-euˬ mehˬ tsoeˬ cehˬ pyaˬ cehˬ shaˇ-awˇ, aˬ yawꞈ-euˬ uˬ duˬ-ahˇ shaˬ jehˆ baꞈ daˆ taˬ-euˬ meh.

¹³ Dawˬ ma saˇ jaˇ Bahˬ keuˆ gaˇ kawˆ kʼahˬ lahˇ dui dui luꞈ-eu Eˇliˆ-aˬ, gaˇ ma gaˇ dzeˇ nuiˇ duˬ tiˬ tsahˇ-ahˇ nuiˇ-awˇ loꞈ luꞈ-eu meh. Tsawˇ haˬ kʼoeˇ gʼaˬ, kʼaˇ pyeuꞈ laˇ-euˬ gaˇ kawˆ meuˬ-ahˇ tsaꞈ gaˬ doe ngeh, meuˬ meuˬ lah-ehˇ ngoeˇ-eu meh.

¹⁴ Kʼoeˇ loꞈ-ehˇ guˇ-eu teˇ saˇ-ahˇ Eˇliˆ ya gaˬ-awˇ, “Aˬ jeˬ baˬ da neh guˇ ta” lehˇ naˇ haˬ-euˬ meh. Gaˇ kawˆ kʼoeˇ dzawˇ nehˬ-eu gʼaˇ duˬ, tsawˇ haˬ kʼoeˇ gʼaˬ Eˇliˆ jawˇ gaˇ yaw kawˇ-ehˇ cehˆ gʼeh-euˬ meh.

¹⁵ Eˇliˆ-aˬ, gʼoeˬ tseˇ yehꞈ kʼoꞈ kʼawˆ laˇ-awˇ, myaˆ nuiˆ maˬ mawˇ nya-ehˇ pyeuꞈ laˇ taˬ-euˬ meh.

¹⁶ “Ngaˇ guiˇ deuˆ luꞈ gaˇ neh cehˆ buˬ-awˇ, tiˬ gaˇ-iˬ maˬ naˬ leˇ ni cehˆ gʼoꞈ laꞈ-eu laꞈ kʼoeˇ, iˬ nah heu gaˇ cehˆ keuˆ laꞈ-euˬ ma” lehˇ, tsawˇ haˬ kʼoeˇ gʼaˬ ehˇ-eu meh. Kʼoeˇ ngeh, “Aˬ joˆ-ehˇ gʼeh taˬ li-oˬ” lehˇ, tsawˇ haˬ kʼoeˇ gʼaˬ-ahˇ Eˇliˆ naˇ haˬ-euˬ meh.

¹⁷ Tsawˇ haˬ kʼoeˇ gʼaˬ ehˇ-eu, “Iˇsaˬleˬlaˆ tsawˇ haˬ deuˬ Piˇliˇtiˆ tsawˇ haˬ deuˬ neh guiˇ bi deuˆ gʼaˬ-awˇ, cehˆ byaˆ luꞈ meh. Heu-aˬ, aˬ dui gʼaˇ duˬ guˆ dui dui laˇ paˬ-ehˇ gʼeh-eu smˬ-eu jeˬ pyeuꞈ-eu meh. Kʼoeˇ uˬ taꞈ, nawˬ li Hawˇpaˬniˇ hawˇ-eu Piˇnaˬhaˇ aˬ nyaꞈ nmˇ kʼawꞈ bi sehꞈ-awˇ, Miˬyehˇ-euˬ Dawˬ ma saˇ jaˇ Bahˬ keuˆ kʼawꞈ, aˬ cawˬ neh bi deuˆ za geuꞈ-euˬ meh.”

¹⁸ Tsawˇ haˬ kʼoeˇ gʼaˬ Dawˬ ma saˇ jaˇ Bahˬ keuˆ gaˇ kawˆ dzawˇ ngeh, gʼoˆ kʼehˬ dawˬ peh jaˆ-eu nuiˇ duˬ-ahˇ nuiˇ luꞈ-eu Eˇliˆ sehˇ pyaˆ-ehˇ coˬ-iˇ-euˬ meh. Aˬ yawꞈ mawˬ dui dui laˇ-awˇ, tsuˇ dui dui-eu miˇ neh, kawˬ lahˇ coˬ kʼehꞈ-awˇ shiˇ-euˬ meh. Aˬ yawꞈ-aˬ, Iˇsaˬleˬlaˆ tsawˇ jeuˬ-euˬ aˬ yuiꞈ aˬ tsu oeˬ tseˇ kʼoꞈ geuꞈ-euˬ meh.

Piˇnaˬhaˇ-euˬ miˬ zaˬ shiˇ-euˬ

¹⁹ Eˇliˆ-euˬ kuiˬ ma pyeuꞈ-eu Piˇnaˬhaˇ-euˬ miˬ zaˬ-aˬ, aˬ nyiˇ ciˬ deˇ le taˬ-euˬ meh. Miˬyehˇ-euˬ Dawˬ ma saˇ jaˇ Bahˬ keuˆ aˬ cawˬ neh bi deuˆ za-euˬ gaˇ kawˆ hawˇ-eu, aˬ yawꞈ-euˬ boeˇ miˬ aˬ da hawˇ-eu aˬ yawꞈ-euˬ kʼaˬ dzeˇ zaˬ shiˇ-euˬ gaˇ kawˆ aˬ yawꞈ ya gaˬ ngeh, ja pyuˬ ni uˬ maˆ naˇ laˇ-awˇ, aˬ nyiˇ ciˬ-euˬ meh.

²⁰ Aˬ yawꞈ shiˇ leˇ luꞈ ngeh, aˬ yawꞈ aˬ nyiˇ ciˬ gaˇ caw ba le-euˬ zaˬ miˬ zaˬ kʼoeˇ gʼaˬ aˬ yawꞈ-ahˇ, “Nui ma kʼaˬ duˬ ni taˬ-awˬ. Nawˇ aˬ li tiˬ li ciˬ gʼaˬ-euˬ meh” lehˇ ehˇ nehˬ kʼawꞈ, aˬ yawꞈ-ahˇ gaˬ leˇ gaˇ maˬ duˇ ni, ciˬ cuˇ ni jawˇ-eu meh.

²¹ Miˬyehˇ-euˬ Dawˬ ma saˇ jaˇ Bahˬ keuˆ aˬ cawˬ tsawˇ jeuˬ neh bi deuˆ za-euˬ gaˇ kawˆ hawˇ-eu, aˬ yawꞈ-euˬ boeˇ miˬ aˬ da hawˇ-eu aˬ yawꞈ-euˬ kʼaˬ dzeˇ zaˬ shiˇ-euˬ gaˇ kawˆ-ahˇ noeˬ-eu laꞈ kʼoeˇ, “Miˬyehˇ-euˬ yaw shehꞈ kʼahˬ sehˇ Iˇsaˬleˬlaˆ tsawˇ haˬ deuˬ nehˬ-ehˇ maˬ paˇ jaˆ meh” lehˇ ehˇ-awˇ, aˬ li kʼoeˇ li-ahˇ Iˇkaˬbawˇ lehˇ aˬ yawꞈ myahˇ nehˬ-euˬ meh.

²² “Miˬyehˇ-euˬ Dawˬ ma saˇ jaˇ Bahˬ keuˆ aˬ cawˬ neh bi deuˆ za geuꞈ-euˬ miˇ neh, Miˬyehˇ-euˬ yaw shehꞈ kʼahˬ sehˇ Iˇsaˬleˬlaˆ tsawˇ haˬ nehˬ-ehˇ maˬ paˇ jaˆ meh” lehˇ aˬ yawꞈ ehˇ-eu meh.