1 Saˬmeuˬlaˆ 30 - Akha

Aˬmaˬlehˇ tsawˇ haˬ deuˬ-ahˇ guiˇ deuˆ-euˬ

¹ Nyiˬ nah byah laˇ ngeh, Daˬbiˇ hawˇ-eu aˬ yawꞈ-euˬ tsawˇ haˬ deuˬ Ziˇkaˬlehˆ meuˬ-ahˇ gʼoꞈ keuˆ-iˇ-euˬ meh. Aˬmaˬlehˇ tsawˇ haˬ deuˬ Yuˇdaˆ miˇ kʼahˬ laꞈ oˆ paw dzaˬ-ahˇ guiˇ deuˆ le-awˇ, Ziˇkaˬlehˆ meuˬ-ahˇ miˬ dzaˬ keuˬ dzeh yaꞈ-euˬ meh.

² Tsawˇ haˬ tiˬ gʼaˬ-ahˇ-iˬ aˬ yawꞈ maꞈ maˬ sehꞈ ni, zaˬ miˬ zaˬ dawˬ tawˆ luꞈ hawˇ-eu, zaˬ miˬ zaˬ kʼoeˇ deuˬ nehˬ-ehˇ kʼaˇ bi jawˇ yaꞈ-euˬ tsawˇ haˬ dawˬ tawˆ luꞈ-ahˇ sheuˬ geuꞈ gʼeh-euˬ meh.

³ Daˬbiˇ hawˇ-eu aꞈ yawꞈ-euˬ tsawˇ haˬ deuˬ meuˬ kʼoeˇ meuˬ-ahˇ gʼoꞈ keuˆ-iˇ ngeh, meuˬ meuˬ lah-ehˇ miˬ dzaˬ keuˬ dzeh jiˇ-awˇ, aˬ yawꞈ maꞈ-euˬ miˬ sawˇ zaˬ deuˬ dawˬ tawˆ luꞈ bi sheuˬ geuꞈ gʼeh jiˇ-euˬ gaˇ ya mawˇ-euˬ meh.

⁴ Kʼoeˇ ngeh, Daˬbiˇ hawˇ-eu aˬ yawꞈ-euˬ tsawˇ haˬ deuˬ, gʼaˬ ngoeˇ jiˇ ngeh keuˆ ni maˬ naˬ leˇ ni ngoeˇ-euˬ meh.

⁵ Daˬbiˇ-euˬ miˬ zaˬ deuˬ pyeuꞈ-eu, Aˬhiˇnoˬ hawˇ-eu Aˬbiˇgeˬlaˆ aˬ nyaꞈ kʼawꞈ, bi sheuˬ geuꞈ gʼeh-euˬ meh.

⁶ Kʼoeˇ ngeh jawˇ, Daˬbiˇ nui ma cawˆ dui dui-eu meh. Aˬ je ˬmiˇ neh ehˇ naˇ, aˬ yawꞈ maꞈ-euˬ miˬ sawˇ zaˬ deuˬ ya smˬ-iˇ jiˇ-euˬ baˬ da neh, aˬ yawꞈ-euˬ tsawˇ haˬ deuˬ nui ma naˇ dui dui-awˇ, aˬ yawꞈ-ahˇ kʼaˬ lo neh biˬ-eu lehˇ lmˬ luꞈ-eu meh. Ehˇ kʼawꞈ, aˬ yawꞈ-euˬ Miˬyehˇ pyeuꞈ-eu Sahˬpaˬ Miˬyehˇ aˬ yawꞈ-ahˇ gʼaˬ biꞈ-euˬ meh.

⁷ “Piˇ ma dm-eu pehˇ kʼahˬ pehˇ nymˇ hehˇ leꞈ sheˇ” lehˇ, Aˬhiˇmaˬlehˇ-euˬ aˬ li piˇ ma Aˬbyaˬdaˬ-ahˇ Daˬbiˇ ehˇ nehˬ ngeh, Aˬbyaˬdaˬ pehˇ kʼahˬ pehˇ nymˇ yuˇ gʼeh nehˬ-euˬ meh.

⁸ Kʼoeˇ ngeh, Daˬbiˇ Sahˬpaˬ Miˬyehˇ-ahˇ ehˇ nehˬ-eu, “Tsawˇ haˬ kʼoeˇ deuˬ-euˬ mehˬ nah ngaˇ caw teh-iˇ-awˬ loˇ. Aˬ yawꞈ maꞈ-ahˇ ngaˇ teh mi coeˇ tehꞈ-a loˇ.” Sahˬpaˬ Miˬyehˇ ehˇ-eu, “Aˬ yawꞈ maꞈ-ahˇ caw teh-iˇ-awˬ. Aˬ yawꞈ maꞈ-ahˇ nawˇ teh mi-awˇ, aˬ yawꞈ maꞈ neh nyehꞈ gʼeh-euˬ tsawˇ haˬ deuˬ-ahˇ nawˇ ka kʼoꞈ nya tehꞈ-a.”

⁹ Kʼoeˇ naˇ, Daˬbiˇ hawˇ-eu aˬ yawꞈ-euˬ tsawˇ haˬ koꞈ yaˇ gʼaˬ lehˬ hmˬ-awˇ doˆ-iˇ-euˬ meh. Beˬsawˬ lawˇ gawˆ-ahˇ iˇ keuˆ ngeh, tiˬ paˆ na deuˬ jawˇ yaꞈ-euˬ meh.

¹⁰ Daˬbiˇ-aˬ, tsawˇ haˬ oeˬ yaˇ gʼaˬ sheuˬ-awˇ mehˬ hu paw iˇ gʼeh-euˬ meh. Dzeˇ yaꞈ-euˬ kʼoeˇ nyiˬ yaˇ gʼaˬ-aˬ, gʼaˬ doeˇ doeˇ dui dui-eu miˇ neh, lawˇ gawˆ maˬ tsehˆ doˆ coeˇ-ehˇ jawˇ yaꞈ-euˬ meh.

¹¹ Daˬbiˇ nehˬ-ehˇ iˇ-euˬ deuˬ, bawˇ tsahˬ-ahˇ Iˇjiˇtuˆ tsawˇ jeuˬ aˬ li tiˬ li mawˇ-awˇ, Daˬbiˇ jawˇ gaˇ sheuˬ laꞈ nehˬ-euˬ meh. Aˬ li kʼoeˇ li-ahˇ aˬ yawꞈ maꞈ kaˬ muˇ bi dzaˬ-awˇ, iˇ cuꞈ bi dawˇ-euˬ meh.

¹² Lawꞈ koˆ taˬ-euˬ siˬ guˬ aˇ siˬ ui cuiˆ hawˇ-eu, aˬ gaꞈ aˇ siˬ yaw koˆ nyiˬ puˇ biꞈ-awˇ bi dzaˬ-euˬ meh. Aˬ yawꞈ dzaˬ gʼaˬ dawˇ gʼaˬ ngeh, gʼaˬ paˇ kʼoꞈ laˇ-euˬ meh. Aˬ yawꞈ tiˬ jeˬ-iˬ maˬ ya dzaˬ maˬ ya dawˇ ni jawˇ luꞈ-eu smˬ nah byah laˇ-euˬ meh.

¹³ “Nawˬ-euˬ baw leˬ aˬ suˇ gʼaˬ pyeuꞈ-awˇ, nawˇ aˬ geu gaˇ iˇ-eu cah te” lehˇ, aˬ li kʼoeˇ li-ahˇ Daˬbiˇ naˇ haˬ ngeh, aˬ li kʼoeˇ li heu loꞈ-ehˇ ehˇ-eu meh. “Ngaˇ-aˬ, Iˇjiˇtuˆ tsawˇ jeuˬ pyeuꞈ-awˇ, Aˬmaˬlehˇ tsawˇ haˬ tiˬ gʼaˬ-euˬ zaˬ kʼaˆ pyeuꞈ-eu ma. Ngaˇ pyaˬ-eu miˇ neh ngaˬ-euˬ baw leˬ ngaˬ-ahˇ byehˇ dzeh nehˬ laꞈ-euˬ smˬ nah byah laˇ-euˬ meh.

¹⁴ Yuˇdaˆ miˇ kʼahˬ laꞈ oˆ dzaˬ-ahˇ jaˆ-eu Sheˬleˬdiˇ tsawˇ jeuˬ-euˬ miˇ kʼahˬ hawˇ-eu, Gaˬlehˆ tsawˇ jeuˬ-euˬ miˇ kʼahˬ-ahˇ nga maꞈ guiˇ deuˆ-awˇ, Ziˇkaˬlehˆ meuˬ-ahˇ nga maꞈ miˬ dzaˬ keuˬ dzeh yaꞈ-euˬ ma.”

¹⁵ Daˬbiˇ ehˇ-eu, “Guiˇ deuˆ laˇ-euˬ tsawˇ haˬ kʼoeˇ deuˬ jawˇ gaˇ nga maꞈ-ahˇ nawˇ sheuˬ gʼeh nehˬ ma loˇ.” Aˬ li kʼoeˇ li ehˇ-eu, “Naw maꞈ ngaˬ-ahˇ maˬ sehꞈ-ehˇ, ngaˬ-euˬ baw leˬ-euˬ aˬ laꞈ laꞈ kʼoeˇ kʼawꞈ maˬ a kʼoꞈ nehˬ lehˇ, Miˬyehˇ-euˬ mehˬ shi kamˬ tsehˆ naˇ, ngaˇ sheuˬ gʼeh nehˬ ma.”

¹⁶ Kʼoeˇ naˇ, Ziˇkaˬlehˆ meuˬ-ahˇ guiˇ deuˆ laˇ-euˬ tsawˇ haˬ kʼoeˇ deuˬ jawˇ gaˇ, Daˬbiˇ-ahˇ aˬ yawꞈ sheuˬ gʼeh nehˬ-euˬ meh. Guiˇ deuˆ laˇ-euˬ tsawˇ haˬ kʼoeˇ deuˬ-aˬ, Piˇliˇtiˆ miˇ kʼahˬ hawˇ-eu Yuˇdaˆ miˇ kʼahˬ laꞈ kʼoeˇ aˬ yawꞈ maꞈ neh deuˆ za-euˬ myawˬ gahˬ myaˬ dui dui-eu miˇ neh, dzaˬ byawˬ dawˇ byawˬ byawˬ-awˇ, byawˬ gʼa muˆ gʼa-eu laꞈ kʼoeˇ, deh ga ga lah-ehˇ jawˇ byah taˬ-euˬ meh.

¹⁷ Yawˬ nah yawˬ uˬ bya bya laˇ-eu nehˬ-ehˇ, aˬ yawꞈ maꞈ-ahˇ Daˬbiˇ guiˇ deuˆ-awˇ, uˬ ciꞈ deuˆ ciꞈ-euˬ meh. Law taw dziˬ-awˇ cehˆ-euˬ zaˬ guˬ oeˬ yaˇ gʼaˬ maˬ ngeuˇ naˇ, aˬ yawꞈ maꞈ-euˬ tsawˇ haˬ tiˬ gʼaˬ-iˬ maˬ dzeuˇ-iˇ ni bi sehꞈ jiˇ-euˬ meh.

¹⁸ Daˬbiˇ-euˬ miˬ zaˬ nyiˬ gʼaˬ ahˇ leˇ-ehˇ, Aˬmaˬlehˇ tsawˇ haˬ neh kʼaˇ sheuˬ gʼeh-euˬ tsawˇ haˬ yawˬ gʼaˬ na luꞈ hawˇ-eu, kʼaˇ yuˇ gʼeh-euˬ myawˬ yawˬ jeˬ na luꞈ-ahˇ, Daˬbiˇ ka kʼoꞈ jiˇ-euˬ meh.

¹⁹ Aˬ yawꞈ-euˬ tsawˇ haˬ deuˬ-euˬ aˬ buˇ aˬ li deuˬ maˬ ehˇ, Aˬˬmaˬlehˇ tsawˇ haˬ neh yuˇ gʼeh-euˬ myawˬ gahˬ dawˬ tawˆ luꞈ maˬ ehˇ, tiˬ jeˬ-iˬ maˬ byoˆ ni Daˬbiˇ za kʼoꞈ jiˇ-euˬ meh.

²⁰ Yawˇ hawˇ-eu mawˇ neˇ dawˬ tawˆ luꞈ kʼawꞈ za kʼoꞈ-euˬ meh. Aˬ yawꞈ-euˬ tsawˇ haˬ deuˬ aˬ yawꞈ maꞈ-euˬ mehˬ hu jeˬ zaˬ kʼoeˇ deuˬ teh-awˇ, “Heu-aˬ, Daˬbiˇ neh deuˆ za-euˬ jeˬ zaˬ deuˬ meh” lehˇ ehˇ ehˇ-ehˇ cah-eu meh.

²¹ Kʼoeˇ naˇ, gʼaˬ baˬ dui dui-eu miˇ neh aˬ yawꞈ-euˬ mehˬ nah maˬ caw teh le nya-ehˇ, Beˬsawˬ lawˇ gawˆ dawˬ peh jawˇ yaꞈ-euˬ tsawˇ haˬ kʼoeˇ nyiˬ yaˇ gʼaˬ jawˇ gaˇ Daˬbiˇ gʼoꞈ leˇ-euˬ meh. Tsawˇ haˬ kʼoeˇ deuˬ mehˬ hu paw oe-awˇ, Daˬbiˇ hawˇ-eu aˬ yawꞈ-euˬ tsawˇ haˬ deuˬ-ahˇ ha laˬ le-euˬ meh. Daˬbiˇ gʼeh, aˬ yawꞈ maꞈ-ahˇ laˬ kʼaˬ cehˇ taˆ ni dawˬ ngehˬ cawˬ nehˬ-euˬ meh.

²² Ehˇ kʼawꞈ, Daˬbiˇ nehˬ-ehˇ iˇ-euˬ nui ma maˬ dawˇ-eu tsawˇ haˬ tiˬ paˆ na deuˬ ehˇ-eu, “Aˬ yawꞈ maꞈ aˬ dui maꞈ nehˬ-ehˇ maˬ oe-euˬ miˇ neh, aˬ dui maꞈ neh deuˆ za-euˬ myawˬ deuˬ aˬ yawꞈ maꞈ-ahˇ maˬ biˇ nehˬ. Aˬ yawꞈ maꞈ-euˬ miˬ zaˬ hawˇ-eu aˬ buˇ aˬ li deuˬ biꞈ kʼoꞈ nehˬ-awˇ, kʼaˇ iˇ-eu paw bi iˇ-awˬ.”

²³ Daˬbiˇ ehˇ-eu, “Aˬ yuiꞈ aˬ nyiˇ deuˬ-oˇ, Sahˬpaˬ Miˬyehˇ neh aˬ dui-ahˇ biꞈ laꞈ-euˬ myawˬ gahˬ deuˬ-ahˇ teu loꞈ-ehˇ maˬ jahˇ nya-a. Aˬ yawꞈ aˬ dui maꞈ-ahˇ yaw muiˬ paˬ-ehˇ haw piˇ-awˇ, aˬ dui-ahˇ guiˇ deuˆ laˇ-euˬ tsawˇ haˬ deuˬ kʼoeˇ taˆ bi gʼaˬ leˇ nehˬ laꞈ-euˬ meh.

²⁴ Naw maꞈ neh ehˇ-euˬ loꞈ-ehˇ maˬ geuꞈ nya-a. Dawˬ tawˆ luꞈ tiˬ kawˆ loꞈ-ehˇ ya biˇ geuꞈ meh. Naˇ kʼah paw jawˇ yaꞈ-awˇ myawˬ gahˬ deuˬ-ahˇ loꞈ piˇ yaꞈ-euˬ deuˬ kʼawꞈ, guiˇ deuˆ-iˇ-euˬ deuˬ loꞈ-ehˇ tiˬ kawˆ mya ni ya biˇ geuꞈ meh.”

²⁵ Daˬbiˇ neh zahˇ kʼoeˇ loꞈ-ehˇ taˬ taˬ-awˇ, Iˇsaˬleˬlaˆ miˇ kʼahˬ laꞈ kʼoeˇ, zahˇ kʼoeˇ hmˬ-ahˇ aˬ myah luꞈ caw teh-euˬ meh.

²⁶ Ziˇkaˬlehˆ meuˬ-ahˇ Daˬbiˇ gʼoꞈ keuˆ leˇ ngeh, Yuˇdaˆ miˇ kʼahˬ laꞈ kʼoeˇ aˬ yuiꞈ aˬ tsu geuꞈ luꞈ-eu aˬ yawꞈ-euˬ cawˬ deuˬ jawˇ gaˇ, aˬ yawꞈ neh guiˇ deuˆ za-euˬ myawˬ gahˬ deuˬ bi biꞈ ha-iˇ-awˇ, “Sahˬpaˬ Miˬyehˇ-ahˇ muiˇ-eu tsawˇ haˬ deuˬ-ahˇ nga maꞈ neh deuˆ za-euˬ myawˬ gahˬ deuˬ laꞈ kʼoeˇ, naw maꞈ-ahˇ kʼawꞈ laꞈ sawˬ biꞈ-eu ma” lehˇ tsaꞈ ahˇ gʼeh-euˬ meh.

²⁷ Aˬ yawꞈ neh laꞈ sawˬ biꞈ-euˬ tsawˇ haˬ deuˬ-aˬ, Beˬdeˬlaˇ meuˬ-ahˇ jawˇ-eu tsawˇ haˬ deuˬ, Yuˇdaˆ miˇ kʼahˬ laꞈ oˆ dzaˬ-ahˇ jaˆ-eu Laˬmahˇ meuˬ-ahˇ jawˇ-eu tsawˇ haˬ deuˬ, Yaˬtiˇlaˆ meuˬ-ahˇ jawˇ-eu tsawˇ haˬ deuˬ,

²⁸ Aˬyawˬ meuˬ-ahˇ jawˇ-eu tsawˇ haˬ deuˬ, Siˇpaˬmo meuˬ-ahˇ jawˇ-eu tsawˇ haˬ deuˬ, Eˇshaˬteˬmawˇ meuˬ-ahˇ jawˇ-eu tsawˇ haˬ deuˬ,

²⁹ Laˬkaˬlaˆ meuˬ-ahˇ jawˇ-eu tsawˇ haˬ deuˬ, Yeˬlaˬmeˬlaˇ aˇ jeuˬ, Kaˬnaˆ tsawˇ jeuˬ,

³⁰ Hawˇmaˬ meuˬ-ahˇ jawˇ-eu tsawˇ haˬ deuˬ, Bawˇlaˬshaˬ meuˬ-ahˇ jawˇ-eu tsawˇ haˬ deuˬ, Aˬdehˇ meuˬ-ahˇ jawˇ-eu tsawˇ haˬ deuˬ hawˇ-eu,

³¹ Heˬbyoˬ meuˬ-ahˇ jawˇ-eu tsawˇ haˬ deuˬ meh. Aˬ yawꞈ hawˇ-eu aˬ yawꞈ-euˬ tsawˇ haˬ deuˬ kʼaˇ cah keuˆ-awˇ, jawˇ naˬ kʼaˇ mˇ-euˬ jawˇ duˬ-ahˇ jawˇ-eu tsawˇ haˬ deuˬ-ahˇ, aˬ yawꞈ laꞈ sawˬ biꞈ keuˆ nehˬ-euˬ meh.