1 Saˬmeuˬlaˆ 26 - Akha

Sawˇluˆ-ahˇ Daˬbiˇ maˬ sehꞈ ni tiˬ poˆ paˇ taˬ nehˬ-euˬ

¹ Ziˇpaˬ meuˬ-ahˇ jawˇ-eu tsawˇ haˬ tiˬ paˆ na deuˬ, Giˇbyaˬ meuˬ-ahˇ Sawˇluˆ jawˇ gaˇ laˇ-awˇ, Yuˇdaˆ miˇ kʼahˬ bawˇ tsahˬ bawˇ dahˇ mehˬ dzaˬ-ahˇ jaˆ-eu Haˬciˇlahˬ gawˬ jawˬ-ahˇ Daˬbiˇ dzuˇ zaꞈ luꞈ-eu gaˇ kawˆ tsaꞈ gaˬ laˇ-euˬ meh.

² Iˇsaˬleˬlaˆ miˇ kʼahˬ laꞈ kʼoeˇ aˬ cawˬ naˆ maˬ tseˇ guiˇ deuˆ nya-eu yehˇ smˬ heˇ gʼaˬ-ahˇ Sawˇluˆ sheuˬ-awˇ, Ziˇpaˬ bawˇ tsahˬ bawˇ dahˇ laꞈ kʼoeˇ Daˬbiˇ-ahˇ poˆ-iˇ-eu gʼaˇ duˬ, tiˬ poˆ tehꞈ-ehˇ doˆ-iˇ-euˬ meh.

³ Yeˬshiˇmoˬ meuˬ-euˬ nahˇ ma doˆ kʼehˬ paw jaˆ-eu gaˇ ma gaˇ dzeˇ, Haˬciˇlahˬ gawˬ jawˬ-ahˇ taˆ tsoˆ-awˇ jawˇ-euˬ meh. Daˬbiˇ bawˇ tsahˬ bawˇ dahˇ laꞈ kʼoeˇ jawˇ luꞈ-awˇ, Sawˇluˆ aˬ yawꞈ-ahˇ poˆ le-euˬ gaˇ kawˆ ya siˬ-euˬ meh.

⁴ Kʼoeˇ ngeh, Daˬbiˇ tsawˇ haˬ pyehˬ gʼeh-awˇ bi kʼoeˬ sho haw-iˇ-eu laꞈ kʼoeˇ, aˬ diˇ aˬ maˇ Sawˇluˆ kʼoeˇ gaˇ oe keuˆ taˬ-euˬ gaˇ kawˆ ya siˬ duˬ-euˬ meh.

⁵ Daˬbiˇ yaw kawˇ-ehˇ iˇ-awˇ, Sawˇluˆ hawˇ-eu Sawˇluˆ-euˬ guiˇ maꞈ kʼoeˇ taˆ uˆ lahˇ-eu gʼaˬ pyeuꞈ-eu Neˬlaˇ-euˬ aˬ li Aˬbaˬnaˬ aˬ nyaꞈ aˬ gaˇ yuꞈ nga lehˇ haw duˬ-iˇ-euˬ meh. Sawˇluˆ gʼaˬ-aˬ, taˆ laꞈ kʼoeˇ yuꞈ luꞈ-awˇ, aˬ yawꞈ-euˬ guiˇ maꞈ deuˬ aˬ yawꞈ-euˬ tiˬ jawˬ jawˇ byah taˬ-euˬ meh.

⁶ Heˬtaˆ tsawˇ haˬ Aˬhiˇmaˬlehˇ hawˇ-eu, Zeˬluˇyaˆ-euˬ aˬ li Yoˇbaˬ-euˬ aˬ nyiˇ Aˬbiˇshaiˇ aˬ nyaꞈ-ahˇ, “Naw nyaꞈ ngaˬ nehˬ-ehˇ Sawˇluˆ-euˬ taˆ-ahˇ aˬ geu gʼaˬ iˇ nmˇ” lehˇ Daˬbiˇ naˇ haˬ ngeh, “Ngaˇ iˇ ma” lehˇ Aˬbiˇshaiˇ ehˇ-eu meh.

⁷ Kʼoeˇ ngeh miˇ, Daˬbiˇ hawˇ-eu Aˬbiˇshaiˇ aˬ nyaꞈ Sawˇluˆ-euˬ taˆ laꞈ kʼoeˇ uˇ-iˇ ngeh, uˬ duˬ dawˬ peh miˇ tsaˬ-ahˇ gahˬ soeˬ tsoˆ taˬ-awˇ, taˆ-euˬ gʼahˇ ceh yuꞈ luꞈ-eu Sawˇluˆ-ahˇ ya mawˇ-euˬ meh. Aˬbaˬnaˬ hawˇ-eu yehˇ deuˬ aˬ yawꞈ-euˬ jawˬ jawˬ-ehˇ yuꞈ kʼaˆ taˬ-euˬ meh.

⁸ Daˬbiˇ-ahˇ Aˬbiˇshaiˇ ehˇ nehˬ-eu, “Nymˇ ciꞈ nawˬ-ahˇ muiˇ-eu gʼaˬ-ahˇ, nawˬ-euˬ aˬ laꞈ laꞈ kʼoeˇ Miˬyehˇ a nehˬ laꞈ-euˬ ngaˇ. Aˬ yawꞈ-euˬ gahˬ neh aˬ yawꞈ-ahˇ miˇ tsa tsawˆ tsoˆ nehˬ-eu gʼaˇ duˬ ngaˬ-ahˇ aˬ kawˬ-aˬ biꞈ laꞈ-awˬ. Nyiˬ laꞈ luꞈ tuˆ tehˬ-awˇ maˬ tsawˆ ni, tiˬ laꞈ tehꞈ-ehˇ tsawˆ ma.”

⁹ Ehˇ kʼawꞈ, Daˬbiˇ ehˇ-eu, “Aˬ yawꞈ-ahˇ laˆ tahˬ laˆ naˇ-eu jeˬ maˬ mˇ kʼmˬ-a. Sahˬpaˬ Miˬyehˇ neh tseˇ doˆ-euˬ sahˬ paˬ-ahˇ laˆ tahˬ laˆ naˇ-eu jeˬ mˇ-eu tsawˇ haˬ-ahˇ, Sahˬpaˬ Miˬyehˇ kʼehˬ nehˬ kʼaˆ nehˬ tehꞈ-a.”

¹⁰ Daˬbiˇ paˇ ehˇ-eu, “Shiˇ yamˬ tsaˬ laˇ ngeh maˬ ngeuˇ naˇ, guiˇ deuˆ luꞈ ngeh Sawˇluˆ-ahˇ Sahˬpaˬ Miˬyehˇ bi shiˇ tehꞈ-a lehˇ, dehꞈ luꞈ-eu Sahˬpaˬ Miˬyehˇ laꞈ kʼoeˇ ngaˇ siˬ nya ma.

¹¹ Sahˬpaˬ Miˬyehˇ neh ka nehˬ-euˬ sahˬ paˬ-ahˇ laˆ tahˬ laˆ naˇ nehˬ-eu jeˬ maˬ ya mˇ ni, Sahˬpaˬ Miˬyehˇ ngaˬ-ahˇ laˆ tsoeˬ taˬ-euˬ meh. Aˬ yawꞈ-euˬ gahˬ hawˇ-eu iˇ puˬ yuˇ-awˇ doˆ-iˇ kaˇ-euˇ.”

¹² Kʼoeˇ ngeh, Sawˇluˆ-euˬ uˬ duˬ dawˬ peh jaˆ-eu gahˬ hawˇ-eu iˇ puˬ-ahˇ Daˬbiˇ yuˇ-awˇ, Aˬbiˇshaiˇ aˬ yawꞈ nyaꞈ doˆ-iˇ-euˬ meh. Kʼoeˇ loꞈ-ehˇ jahˇ-euˬ gaˇ tsawˇ haˬ tiˬ gʼaˬ-iˬ maˬ siˬ maˬ mawˇ-ehˇ, tiˬ gʼaˬ-iˬ maˬ noeˬ ni yuꞈ kʼaˆ jiˇ taˬ-euˬ meh. Aˬ jeˬ miˇ neh ehˇ naˇ, aˬ yawꞈ maꞈ yawˬ gʼaˬ na luꞈ kʼoeˇ taˆ, tiˬ jeˬ-iˬ maˬ noeˬ ni yuꞈ kʼaˆ byoˆ-eu jeˬ Sahˬpaˬ Miˬyehˇ bi keuˆ le taˬ-euˬ meh.

¹³ Kʼoeˇ naˇ, gʼaˬ lawˬ nui baˬ paw Daˬbiˇ tsehˆ doˆ-awˇ, ui cuiˆ gaˇ mahˇ kaˬ gaˇ le keuˆ ngeh, gawˬ duˇ-ahˇ daˆ doˆ le-awˇ,

¹⁴ “Aˬbaˬnaˬ-oˇ, ngaˇ guˇ luꞈ-eu gaˬ laˇ miˇ-a loˇ” lehˇ, Sawˇluˆ-euˬ yehˇ deuˬ hawˇ-eu Aˬbaˬnaˬ-ahˇ guˇ gaˬ nehˬ-euˬ meh. Aˬbaˬnaˬ gʼeh, “Sahˬ paˬ bi noeˬ laˇ-eu lehˇ teu gaˇ guˇ guˇ-ehˇ jawˇ-eu aˬ suˇ gʼaˬ-a” lehˇ naˇ haˬ-euˬ meh.

¹⁵ Daˬbiˇ ehˇ-eu, “Aˬbaˬnaˬ-oˇ, Iˇsaˬleˬlaˆ miˇ kʼahˬ laꞈ kʼoeˇ nawˇ aˬ cawˬ naˆ maˬ tseˇ huiˬ dzehˬ-eu gʼaˬ maˬ ngeuˇ loˇ. Toˆ-ehˇ ngeuˇ naˇ, nawˬ-euˬ sahˬ paˬ-ahˇ aˬ jeˬ miˇ neh nawˇ yaw muiˬ paˬ-ehˇ maˬ loꞈ piˇ te. Nymˬ-mˇ tseuˆ tseuˆ ni, nawˬ-euˬ sahˬ paˬ-ahˇ sehꞈ-eu lehˇ tsawˇ haˬ tiˬ gʼaˬ taˆ laꞈ kʼoeˇ uˇ le-euˬ maˬ ngeuˇ-a loˇ.

¹⁶ Nawˇ nawˬ-euˬ gaˇ-ahˇ yaw muiˬ paˬ-ehˇ maˬ mˇ nga. Sahˬpaˬ Miˬyehˇ neh dzoeˬ dzaˬ biꞈ nehˬ taˬ-euˬ naw maꞈ-euˬ sahˬ paˬ-ahˇ yaw muiˬ paˬ-ehˇ maˬ loꞈ piˇ-eu miˇ neh, naw maꞈ yawˬ gʼaˬ na luꞈ shiˇ-eu geuˇ meh lehˇ, dehꞈ luꞈ-eu Sahˬpaˬ Miˬyehˇ mehˬ shi ngaˇ ehˇ tsehˆ peuˬ ma. Sahˬ paˬ-euˬ gahˬ aˬ gaˇ iˇ ta. Sahˬ paˬ-euˬ uˬ duˬ dawˬ peh ciˬ taˬ-euˬ iˇ puˬ kʼoeˇ siˬ aˬ gaˇ jaˆ taˬ.”

¹⁷ Kʼoeˇ ngeh, Daˬbiˇ-euˬ teˇ saˇ-ahˇ Sawˇluˆ naˇ haˬ siˬ-awˇ, “Ngaˬ li Daˬbiˇ-oˇ, teu gaˇ dawˬ ngehˬ luꞈ-eu nawˇ ma loˇ” lehˇ naˇ haˬ ngeh, “Ngaˇ ma” lehˇ Daˬbiˇ ehˇ kʼoꞈ nehˬ-euˬ meh.

¹⁸ Daˬbiˇ ehˇ-eu, “Sahˬ paˬ-oˇ, nawˬ-euˬ zaˬ kʼaˆ pyeuꞈ-eu ngaˬ-ahˇ, aˬ jeˬ miˇ neh iˬ nah keuˆ ni teh luꞈ te.

¹⁹ Ngaˇ aˬ jeˬ mˇ lehˬ taˬ-euˬ jaˆ ta. Sahˬ paˬ-oˇ, ngaˇ ehˇ gaˇ tiˬ poˆ naˇ haˬ sheˇ, Nawˇ ngaˬ-ahˇ muiˇ ni Sahˬpaˬ Miˬyehˇ neh jahˇ-euˬ ngeuˇ naˇ, aˬ yawꞈ-ahˇ lawˇ nehˬ shehˇ nehˬ ngeh aˬ yawꞈ nui ma paˇ laˇ tehꞈ-a. Ehˇ kʼawꞈ, tsawˇ haˬ zaˬ neh jahˇ-euˬ jeˬ ngeuˇ naˇ, aˬ yawꞈ maꞈ kʼoeˇ taˆ Sahˬpaˬ Miˬyehˇ neh yaˬ kʼehˇ yaˬ nehˬ-euˬ jeˬ keuˆ le luꞈ-uˇ. Aˬ jeˬ miˇ neh ehˇ naˇ, Sahˬpaˬ Miˬyehˇ-euˬ miˇ kʼahˬ laꞈ kʼoeˇ neh aˬ yawꞈ maꞈ ngaˬ-ahˇ teh doˆ-awˇ, boeˇ miˬ siˬ kʼaˬ deuˬ-euˬ miˬ yehˇ deuˬ-ahˇ maˬ ngeuˇ naˇ uˬ duˬ tahˬ kʼaˇ maˬ za-eu bawˇ tsahˬ bawˇ dahˇ laꞈ kʼoeˇ bi shaˬ laꞈ-euˬ meh.

²⁰ Sahˬpaˬ Miˬyehˇ nehˬ-ehˇ gaˇ mahˇ kaˬ gaˇ, boeˇ miˬ siˬ kʼaˬ-euˬ miˇ tsaˬ-ahˇ, aˬ cawˬ neh ngaˬ-ahˇ taˬ bi sehꞈ nehˬ laꞈ. Iˇsaˬleˬlaˆ miˇ kʼahˬ-euˬ sahˬ paˬ-aˬ, ngaˇ loꞈ-ehˇ gʼeh-eu kuiˬ shehˇ tiˬ mawˇ maˬ tawˬ-eu tsawˇ haˬ-ahˇ aˬ jeˬ miˇ neh ya sehꞈ ta. Bawˇ tsahˬ-ahˇ jawˇ-eu aˇ jiˇ-ahˇ teh-eu loꞈ-ehˇ, aˬ jeˬ miˇ neh aˬ yawꞈ ngaˬ-ahˇ ya teh ta.”

²¹ Sawˇluˆ ehˇ-eu, “Ngaˇ mˇ-euˬ lehˬ law hawˇ nga. Ngaˬ li Daˬbiˇ-oˇ, gʼoꞈ laˇ-awˬ. Nawˬ-ahˇ laˆ tahˬ laˆ naˇ-eu jeˬ ngaˇ maˬ paˇ mˇ ma. Aˬ jeˬ miˇ neh nga lehˇ ehˇ naˇ, nymˇ ciꞈ nawˇ ngaˬ-ahˇ sehꞈ-eu yehꞈ dui dui laˇ-euˬ kʼawꞈ, maˬ sehꞈ ni bi dzeuˇ-iˇ laꞈ-euˬ meh. Ngaˇ-aˬ, tsawˇ uˬ tiˬ gʼaˬ law hawˇ miˇ-a. Guˆ dui dui laˇ paˬ-ehˇ gʼeh-eu jeˬ-ahˇ ngaˇ mˇ-euˬ nga.”

²² Daˬbiˇ ehˇ-eu, “Sahˬ paˬ-oˇ, nawˬ-euˬ gahˬ heu gaˇ jaˆ meh. Nawˬ-euˬ tsawˇ haˬ tiˬ gʼaˬ pyehˬ laꞈ-awˇ bi laˬ kʼoꞈ laˇ-awˬ.

²³ Saˇ jaˇ ziꞈ-awˇ yaw tsaˬ yaw dawˇ jeˬ mˇ-eu tsawˇ haˬ-ahˇ Sahˬpaˬ Miˬyehˇ guiˬ lahˬ biꞈ-eu meh. Iˬ nah nawˬ-ahˇ ngaˬ-euˬ aˬ laꞈ laꞈ kʼoeˇ aˬ yawꞈ a nehˬ laꞈ gʼaˬ-euˬ meh. Ehˇ kʼawꞈ, Sahˬpaˬ Miˬyehˇ neh tseˇ doˆ taˬ-euˬ gʼaˬ pyeuꞈ-eu miˇ neh, nawˬ-ahˇ laˆ tahˬ laˆ naˇ-eu jeˬ ngaˇ maˬ mˇ-aˬ.

²⁴ Iˬ nah ngaˇ nawˬ-ahˇ maˬ sehꞈ ni bi dzeuˇ-iˇ-euˬ loꞈ-ehˇ, ngaˬ-ahˇ kʼawꞈ Sahˬpaˬ Miˬyehˇ kʼoeˇ loꞈ-ehˇ jahˇ nehˬ laꞈ-awˇ, shaˬ-eu zahˬ-eu jeˬ laꞈ kʼoeˇ bi buˬ-iˇ laꞈ luꞈ-uˇ”

²⁵ Sawˇluˆ ehˇ-eu, “Ngaˬ li-oˇ, Miˬyehˇ nawˬ-ahˇ guiˬ lahˬ biꞈ luꞈ-uˇ. Nawˇ kʼaˇ mˇ kʼaˇ shaˇ-eu jeˬ mˇ pyeuꞈ shaˇ pyeuꞈ nya luꞈ-uˇ.” Kʼoeˇ naˇ, Daˬbiˇ iˇ byoˆ gʼeh-awˇ, Sawˇluˆ gʼoꞈ-iˇ-euˬ meh.