1 Saˬmeuˬlaˆ 13 - Akha

Piˇliˇtiˆ tsawˇ haˬ deuˬ-ahˇ guiˇ deuˆ-euˬ

¹ Sawˇluˆ sahˬ paˬ pyeuꞈ laˇ ngeh, aˇ kʼoꞈ smˬ tseˇ byah-awˇ, Iˇsaˬleˬlaˆ miˇ kʼahˬ-ahˇ oeˬ tseˇ nyiꞈ kʼoꞈ byah ni aˬ yawꞈ uˆ lahˇ-euˬ meh.

² Tsawˇ haˬ smˬ heˇ gʼaˬ aˬ yawꞈ tseˇ doˆ-awˇ, Aˬ yawꞈ jawˇ-eu Miˇkaˬmaˆ meuˬ hawˇ-eu Beˬdeˬlaˇ gahˬ kaˬ gawˬ jawˬ gawˬ duˇ deuˬ-ahˇ nyiˬ heˇ gʼaˬ bi jawˇ-awˇ, aˬ yawꞈ-euˬ aˬ li Yawˇnaˆshaˬ nehˬ-ehˇ Beˬyaˬmiˬ miˇ kʼahˬ Giˇbyaˬ meuˬ-ahˇ tiˬ heˇ gʼaˬ pyehˬ gʼeh-euˬ meh.

³ Geˬbaˬ meuˬ-ahˇ Piˇliˇtiˆ guiˇ maꞈ kʼoeˇ taˆ uˆ lahˇ-eu gʼaˬ-ahˇ Yawˇnaˆshaˬ neh sehꞈ-awˇ, gaˇ kawˆ kʼoeˇ Piˇliˇtiˆ tsawˇ haˬ dawˬ tawˆ luꞈ ya gaˬ-euˬ meh. Kʼoeˇ naˇ, Sawˇluˆ tsawˇ haˬ pyehˬ gʼeh-awˇ, Iˇsaˬleˬlaˆ miˇ kʼahˬ doe ni daˇ heh baw baw-ehˇ bi cah-awˇ, guiˇ deuˆ-eu gʼaˇ duˬ Heˬbyehˇ tsawˇ haˬ deuˬ-ahˇ bi kuˇ uiˬ-iˇ-euˬ meh.

⁴ Piˇliˇtiˆ guiˇ maꞈ kʼoeˇ taˆ uˆ lahˇ-eu yaw huiˬ gʼaˬ-ahˇ Sawˇluˆ neh sehꞈ-euˬ miˇ neh, Piˇliˇtiˆ tsawˇ haˬ deuˬ aˬ yawꞈ maꞈ-ahˇ muiˇ luꞈ-eu gaˇ kawˆ, Iˇsaˬleˬlaˆ tsawˇ haˬ dawˬ tawˆ luꞈ-ahˇ ehˇ gaˬ-euˬ meh. Kʼoeˇ ngeh, Iˇsaˬleˬlaˆ deuˬ, Giˇlaˇgaˬlaˇ meuˬ-ahˇ Sawˇluˆ jawˇ gaˇ uiˬ laˇ-euˬ meh.

⁵ Iˇsaˬleˬlaˆ tsawˇ haˬ deuˬ-ahˇ guiˇ deuˆ-eu gʼaˇ duˬ, Piˇliˇtiˆ tsawˇ haˬ deuˬ uiˬ leˇ taˬ-euˬ meh. Guiˇ deuˆ-eu mahˬ laˆ lawˬ smˬ muiˇ laˇ, mahˬ dziˬ-eu yehˇ koꞈ heˇ gʼaˬ hawˇ-eu, iˬ ma laˆ shaˆ lawˇ deh-ahˇ ga-eu kʼaˇ shuiꞈ loꞈ-ehˇ myaˬ-eu yehˇ deuˬ aˬ yawꞈ maꞈ kuˇ uiˬ taˬ-euˬ meh. Behˬdaˬbeˬ meuˬ-euˬ nahˇ ma doˆ kʼehˬ paw jaˆ-eu Miˇkaˬmaˆ meuˬ-ahˇ aˬ yawꞈ maꞈ iˇ-awˇ, sehˬ gʼawˆ gʼawˆ-awˇ jawˇ-euˬ meh.

⁶ Kʼoeˇ naˇ, kʼaˆ dui dui-eu guiˇ maꞈ pyehˬ gʼeh-awˇ, Iˇsaˬleˬlaˆ tsawˇ haˬ deuˬ-ahˇ teh byaˆ jiˇ-euˬ meh. Iˇsaˬleˬlaˆ tsawˇ haˬ tiˬ paˆ na deuˬ-aˬ, lo kʼahˬ lo byoe doe ni maˬ ehˇ, lo guˇ uˬ gʼmˬ-ahˇ maˬ ehˇ, lo guˇ kʼahˬ naꞈ kʼaˇ jaˆ gaˇ maˬ ehˇ, dzuˇ zaꞈ luꞈ-eu meh.

⁷ Tiˬ paˆ na deuˬ-aˬ, Yawˇdaˬ lawˇ baˬ cehˆ tsehˆ-awˇ, Gaˆ miˇ kʼahˬ hawˇ-eu Giˇlaˆ miˇ kʼahˬ-ahˇ cehˆ uˇ leˇ-euˬ meh. Sawˇluˆ-aˬ, Giˇlaˇgaˬlaˇ meuˬ-ahˇ jawˇ luꞈ-awˇ, aˬ yawꞈ mehˬ nah caw teh-eu deuˬ dawˬ tawˆ luꞈ yaw dzuˬ dzuˬ luꞈ-eu meh.

⁸ Sawˇluˆ-aˬ, Saˬmeuˬlaˆ neh aˬ yawꞈ-ahˇ ehˇ nehˬ taˬ-euˬ loꞈ-ehˇ, shiꞈ nah keuˆ ni Saˬmeuˬlaˆ-ahˇ dawˬ-euˬ meh. Ehˇ kʼawꞈ, Giˇlaˇgaˬlaˇ meuˬ-ahˇ Saˬmeuˬlaˆ maˬ laˇ doˆ-eu miˇ neh, kʼoeˇ gaˇ jawˇ-eu tsawˇ haˬ deuˬ Sawˇluˆ-ahˇ byehˇ dzeh yaꞈ-awˇ, cehˆ-euˬ meh.

⁹ Kʼoeˇ ngeh, “Miˬ dzaˬ dzah puiˆ-awˇ lawˇ-eu jeˬ hawˇ-eu cawˬ cawˬ taꞈ-eu lawˇ-eu jeˬ yuˇ laꞈ-awˬ” lehˇ, tsawˇ haˬ kʼoeˇ deuˬ-ahˇ Sawˇluˆ ehˇ nehˬ-euˬ meh. Kʼoeˇ naˇ, miˬ dzaˬ dzah puiˆ-awˇ lawˇ-eu jeˬ aˬ yawꞈ lawˇ-euˬ meh.

¹⁰ Miˬ dzaˬ dzah puiˆ-awˇ lawˇ-eu jeˬ lawˇ gʼaˬ-euˬ nehˬ-ehˇ Saˬmeuˬlaˆ laˇ keuˆ-euˬ meh.

¹¹ Saˬmeuˬlaˆ-ahˇ Sawˇluˆ ha laˬ-iˇ-awˇ, yaw zeu baw nehˬ-euˬ meh. Ehˇ kʼawꞈ, “Nawˇ aˬ jeˬ jahˇ luꞈ te” lehˇ, Sawˇluˆ-ahˇ Saˬmeuˬlaˆ naˇ haˬ-euˬ meh. Sawˇluˆ ehˇ-eu, “Nawˬ neh ehˇ taˬ-euˬ aˇ yamˬ-ahˇ nawˇ maˬ laˇ keuˆ-ehˇ tsawˇ haˬ heu deuˬ kʼawꞈ ngaˬ-ahˇ byehˇ dzeh-awˇ doˆ-iˇ luꞈ-eu meh. Kʼoeˇ uˬ taꞈ, Piˇliˇtiˆ tsawˇ haˬ deuˬ Miˇkaˬmaˆ meuˬ-ahˇ uiˬ leˇ jiˇ taˬ-euˬ meh.

¹² Piˇliˇtiˆ tsawˇ haˬ deuˬ Giˇlaˇgaˬlaˇ meuˬ heu meuˬ-ahˇ oe-awˇ, ngaˬ-ahˇ guiˇ deuˆ-eu lehˇ lehˬ hmˬ luꞈ-eu miˇ neh, Sahˬpaˬ Miˬyehˇ ngaˬ-ahˇ caw ba nehˬ laꞈ ni tiˬ jeˬ-iˬ maˬ ya jahˇ-aˬ siˬ lehˇ noeˬ-awˇ lawˇ-euˬ ma.”

¹³ Sawˇluˆ-ahˇ Saˬmeuˬlaˆ ehˇ nehˬ-eu, “Aˬ dzawˬ aˇ gah-euˬ gaˇ nawˇ mˇ-euˬ ngaˇ. Sahˬpaˬ Miˬyehˇ neh nawˬ-ahˇ biꞈ taˬ-euˬ zahˇ dawˬ kʼoꞈ dawˬ-ahˇ nawˇ maˬ naˇ haˬ geuꞈ-a. Nawˇ naˇ haˬ geuꞈ law nmˇ-aˬ, nawˇ hawˇ-eu nawˬ-euˬ zaˬ deuˬ uˆ deuˬ-ahˇ, Iˇsaˬleˬlaˆ miˇ kʼahˬ kʼoeˇ taˆ aˬ myah luꞈ bi uˆ lahˇ tehꞈ-a.

¹⁴ Nymˬ-mˇ poˆ jawˇ-aˬ, Iˇsaˬleˬlaˆ miˇ kʼahˬ-ahˇ nawˇ aˬ myah luꞈ maˬ paˇ ya uˆ lahˇ meh. Aˬ yawꞈ nui ma tsaˬ-eu tsawˇ haˬ tiˬ gʼaˬ-ahˇ Sahˬpaˬ Miˬyehˇ tseˇ doˆ-awˇ, aˬ yawꞈ-euˬ tsawˇ jeuˬ-ahˇ uˆ lahˇ-eu gʼaˬ bi geuꞈ tehꞈ-a.”

¹⁵ Saˬmeuˬlaˆ-aˬ, Giˇlaˇgaˬlaˇ meuˬ-ahˇ neh doˆ-iˇ-awˇ, mehˬ hu paw iˇ gʼeh-euˬ meh. Kʼoeˇ gaˇ jawˇ yaꞈ-euˬ tsawˇ haˬ deuˬ Sawˇluˆ mehˬ nah caw teh-awˇ, aˬ yawꞈ-euˬ yehˇ deuˬ jawˇ gaˇ iˇ-euˬ meh. Giˇlaˇgaˬlaˇ meuˬ-ahˇ neh Beˬyaˬmiˬ miˇ kʼahˬ Giˇbyaˬ meuˬ-ahˇ aˬ yawꞈ maꞈ iˇ-euˬ meh. Koꞈ yaˇ gʼaˬ ehˇ gʼaˬ ni byah-eu aˬ yawꞈ-euˬ yehˇ deuˬ-ahˇ Sawˇluˆ pyehˆ tseˇ haw-euˬ meh.

¹⁶ Sawˇluˆ hawˇ-eu aˬ yawꞈ-euˬ aˬ li Yawˇnaˆshaˬ-aˬ, aˬ yawꞈ nyaꞈ da zaˬ-euˬ yehˇ deuˬ nehˬ-ehˇ Beˬyaˬmiˬ miˇ kʼahˬ Geˬbaˬ meuˬ-ahˇ taˆ tsoˆ-awˇ jawˇ-euˬ meh. Piˇliˇtiˆ tsawˇhaˬ deuˬ-euˬ taˆ-aˬ, Miˇkaˬmaˆ meuˬ-ahˇ jaˆ-eu meh.

¹⁷ Iˇsaˬleˬlaˆ tsawˇ haˬ deuˬ-ahˇ guiˇ deuˆ leˇ-eu gʼaˇ duˬ, Piˇliˇtiˆ yehˇ deuˬ guiˇ maꞈ smˇ maꞈ biˇ-awˇ, aˬ yawꞈ maꞈ-euˬ taˆ-ahˇ neh doˆ laˇ-euˬ meh. Yaw beh muˇ-aˬ, Shuˇlaˆ miˇ kʼahˬ Awˇpaˬlaˇ meuˬ paw le-euˬ meh.

¹⁸ Nyiˬ muˇ tiˬ muˇ-aˬ, Behˬhawˇleuˬ meuˬ paw le-awˇ, smˬ muˇ tiˬ muˇ-aˬ, Zeˬbaiˬ deh kʼawꞈ hawˇ-eu bawˇ tsahˬ bawˇ dahˇ-euˬ laꞈ taˆ yaw goˇ-ahˇ jaˆ-eu miˇ kaˬ paw le-euˬ meh.

¹⁹ Iˇsaˬleˬlaˆ miˇ kʼahˬ laꞈ kʼoeˇ shmˇ tehˆ-eu ba jiˬ maˬ jawˇ-a. Aˬ jeˬ miˇ neh ehˇ naˇ, Heˬbyehˇ tsawˇ haˬ deuˬ mi cehˇ hawˇ-eu gahˬ maˬ ya tehˆ geuꞈ-a lehˇ, Piˇliˇtiˆ tsawˇ haˬ deuˬ neh daˇ tsehˆ taˬ-euˬ meh.

²⁰ Iˇsaˬleˬlaˆ tsawˇ haˬ deuˬ, nyoˬ tsehˬ, tsehˬ ma, deuˆ haˬ, yehˬ kʼoꞈ heu deuˬ kʼaˇ tehˆ myawꞈ mawꞈ ngeh, Piˇliˇtiˆ tsawˇ haˬ deuˬ jawˇ gaˇ iˇ-awˇ ya bi tehˆ myawꞈ-iˇ-eu meh.

²¹ Deuˆ haˬ hawˇ-eu mi cehˇ tehˆ myawꞈ poeˬ maˇ byaˆ byaˆ zaˬ tiˬ byaˆ ya biꞈ-awˇ, nyoˬ tsehˬ hawˇ-eu tsehˬ ma tehˆ myawꞈ poeˬ maˇ byaˆ byaˆ zaˬ nyiˬ byaˆ ya biꞈ-eu meh.

²² Kʼoeˇ miˇ neh, guiˇ deuˆ-eu aˇ nah aˇ yamˬ kʼoeˇ yamˬ laꞈ kʼoeˇ, Sawˇluˆ hawˇ-eu aˬ yawꞈ-euˬ aˬ li Yawˇnaˆshaˬ aˬ nyaꞈ da zaˬ maˬ ngeuˇ naˇ, Iˇsaˬleˬlaˆ tsawˇ haˬ tiˬ gʼaˬ-iˬ mi cehˇ hawˇ-eu gahˬ maˬ ahˇ-a.

²³ Piˇliˇtiˆ tsawˇ haˬ deuˬ-aˬ, aˬ yawꞈ maꞈ-euˬ yehˇ tiˬ muˇ-ahˇ, Miˇkaˬmaˆ gʼaˬ lahˇ-ahˇ bi loꞈ tsoeˬ taˬ-euˬ meh.