1 Saˬmeuˬlaˆ 10 - Akha

¹ Kʼoeˇ naˇ, tsiˇ maˇ tsaꞈ tiˬ tsaꞈ Saˬmeuˬlaˆ yuˇ-awˇ, Sawˇluˆ-euˬ uˬ duˬ-ahˇ tsiˇ shehˆ daˆ-awˇ mehˬ cuˇ cuˇ nehˬ gʼaˬ ngeh, Sawˇluˆ-ahˇ heu loꞈ-ehˇ ehˇ nehˬ-euˬ meh. “Iˇsaˬleˬlaˆ tsawˇ jeuˬ kʼoeˇ taˆ bi uˆ lahˇ-eu gʼaˇ duˬ, nawˬ-ahˇ Sahˬpaˬ Miˬyehˇ tsiˇ lehꞈ nehˬ-eu meh. Aˬ yawꞈ-euˬ tsawˇ jeuˬ-ahˇ nawˇ ya uˆ lahˇ-awˇ, muiˇ-eu deuˬ dawˬ tawˆ luꞈ-euˬ aˬ laꞈ laꞈ kʼoeˇ, aˬ yawꞈ maꞈ-ahˇ nawˇ ya ka kʼoꞈ nehˬ meh. Aˬ yawꞈ-euˬ tsawˇ jeuˬ kʼoeˇ taˆ bi uˆ lahˇ-eu gʼaˇ duˬ, Sahˬpaˬ Miˬyehˇ nawˬ-ahˇ tseˇ doˆ-euˬ gaˇ kawˆ saˇ kiˇ heu loꞈ-ehˇ jaˆ tehꞈ-a.

² Iˬ nah, ngaˇ jawˇ gaˇ neh nawˇ gʼoꞈ-iˇ ngeh, Beˬyaˬmiˬ miˇ kʼahˬ Zeˬlaˬzahˬ meuˬ meuˬ dzeˇ jaˆ-eu Laˬkeˬlaˇ-euˬ lmˬ bymˇ dawˬ peh, tsawˇ haˬ nyiˬ gʼaˬ-ahˇ nawˇ ya tahˬ puˬ tehꞈ-a. Nawˇ poˆ luꞈ-eu mahˬ tahˬ laˆ kʼoeˇ deuˬ-ahˇ mawˇ kʼoꞈ gʼaˬ-euˬ miˇ neh, mahˬ tahˬ laˆ kʼoeˇ deuˬ gaˇ kawˆ nawˬ da maˬ paˇ noeˬ shaˬ-ehˇ, nawˬ-euˬ gʼaˇ duˬ kʼahˬ lahˇ-eu laꞈ kʼoeˇ, “Ngaˬ li-ahˇ aˬ joˆ-ehˇ jahˇ-awˇ poˆ mawˇ paˬ nga” lehˇ ehˇ luꞈ-eu gaˇ kawˆ, tsawˇ haˬ kʼoeˇ nyiˬ gʼaˬ nawˬ-ahˇ ehˇ nehˬ laꞈ tehꞈ-a.

³ Kʼoeˇ gaˇ neh mehˬ hu paw nawˇ paˇ iˇ gʼeh-awˇ, Taˬbawˬ meuˬ-ahˇ jaˆ-eu muiˬ-eu shawˇ-eu aˇ bawˇ-ahˇ nawˇ iˇ keuˆ ngeh, Beˬdeˬlaˇ meuˬ-ahˇ Miˬyehˇ-ahˇ lawˇ nehˬ leˇ-eu gʼaˇ duˬ laˇ luꞈ-eu tsawˇ haˬ smˇ gʼaˬ-ahˇ nawˇ paˇ ya tahˬ puˬ tehꞈ-a. Tsawˇ haˬ kʼoeˇ smˇ gʼaˬ laꞈ kʼoeˇ, ciꞈ myehꞈ smˬ mawˇ tiˬ gʼaˬ tsahˇ luꞈ-awˇ, kaˬ muˇ smˇ siˬ tiˬ gʼaˬ pi luꞈ-awˇ, aˬ gaꞈ dzaˇ uiˇ tiˬ byah ni dahˬ-eu shaˬ kʼoˆ iˇ puˬ tiˬ gʼaˬ pi luꞈ tehꞈ-a.

⁴ Aˬ yawꞈ maꞈ nawˬ-ahˇ laꞈ tsaꞈ tsaꞈ-awˇ kaˬ muˇ nyiˬ siˬ biꞈ laꞈ ngeh, nawˇ ya ha geuꞈ nehˬ tehꞈ-a.

⁵ Kʼoeˇ naˇ, Piˇliˇtiˆ tsawˇ haˬ deuˬ-euˬ taˆ tiˬ taˆ jaˆ-eu jawˇ duˬ pyeuꞈ-eu, Giˇbyaˬ meuˬ-ahˇ jaˆ-eu Miˬyehˇ-euˬ gawˬ jawˬ-ahˇ nawˇ ya le tehꞈ-a. Meuˬ-euˬ lahˇ kʼehˬ dawˬ peh nawˇ le keuˆ ngeh, tahˬ diˬ deuˇ-mˬ diˬ-awˇ, bawˬ law baw, cehˇ lehˇ ciˆ-eu laꞈ kʼoeˇ, gawˬ jawˬ-ahˇ neh yaꞈ ka le luꞈ-eu Miˬyehˇ gʼaˇ duˬ ngehˬ dah-eu tsawˇ haˬ tiˬ deuˬ-ahˇ nawˇ ya tahˬ puˬ tehꞈ-a. Tsawˇ haˬ kʼoeˇ deuˬ gaˇ nyeh nyeh nyeh-ehˇ guˇ luꞈ tehꞈ-a.

⁶ Kʼoeˇ ngeh, Sahˬpaˬ Miˬyehˇ-euˬ yaw sahˇ ja pyuˬ ni nawˬ-ahˇ uˆ lahˇ le-awˇ, nawˇ kʼawꞈ aˬ yawꞈ maꞈ nehˬ-ehˇ tiˬ kawˆ loꞈ-ehˇ, uˬ duˬ tahˬ-eu zahˇ sahˇ kʼoꞈ-ahˇ taꞈ leˇ-eu gaˇ nyeh nyeh-awˇ guˇ-eu laꞈ kʼoeˇ, yawˬ gʼaˬ yawˬ loꞈ-ehˇ paˇ laˇ tehꞈ-a.

⁷ Kʼoeˇ loꞈ-ehˇ pyeuꞈ laˇ naˇ, Miˬyehˇ neh nawˬ-ahˇ kʼaˇ bi mˇ laꞈ-euˬ loꞈ-ehˇ mˇ-awˬ.

⁸ Giˇlaˇgaˬlaˇ meuˬ-ahˇ, ngaˬ-euˬ mehˬ hu nawˇ iˇ tawˬ-awˬ. Nawˬ-ahˇ ngaˇ kʼoeˇ gaˇ tahˬ puˬ le-awˇ, miˬ dzaˬ dzah puiˆ-awˇ lawˇ-eu jeˬ hawˇ-eu cawˬ cawˬ taꞈ-eu lawˇ-eu jeˬ lawˇ ma. Nawˇ jawˇ gaˇ ngaˇ oe-awˇ, aˬ joˆ-ehˇ ya jahˇ-eu gaˇ kawˆ maˬ ehˇ nehˬ le kʼoeˇ keuˆ ni, shiꞈ nah keuˆ ni kʼoeˇ gaˇ dawˬ tawˬ-awˬ.”

⁹ Saˬmeuˬlaˆ jawˇ gaˇ neh Sawˇluˆ doˆ-iˇ ngeh, Miˬyehˇ neh Sawˇluˆ-euˬ nui ma-ahˇ yawˬ jeˬ yawˬ bi paˇ laˇ-euˬ meh. Saˬmeuˬlaˆ neh Sawˇluˆ-ahˇ kʼaˇ ehˇ nehˬ-euˬ yawˬ jeˬ na luꞈ, kʼoeˇ ngeh nah laꞈ kʼoeˇ pyeuꞈ laˇ-euˬ meh.

¹⁰ Sawˇluˆ hawˇ-eu aˬ yawꞈ-euˬ zaˬ kʼaˆ Giˇbyoˬ meuˬ-ahˇ le keuˆ ngeh, Miˬyehˇ gʼaˇ duˬ ngehˬ dah-eu deuˬ-ahˇ tahˬ puˬ-euˬ meh. Miˬyehˇ-euˬ yaw sahˇ Sawˇluˆ-ahˇ ja pyuˬ ni uˆ lahˇ le-awˇ, aˬ yawꞈ maꞈ nehˬ-ehˇ aˬ yawꞈ cehˆ gawꞈ leˇ-awˇ, gaˇ nyeh nyeh-awˇ guˇ-euˬ meh.

¹¹ Aˬ yawꞈ kʼoeˇ loꞈ-ehˇ gʼeh luꞈ gaˇ aˬ yawꞈ-ahˇ siˬ nya-eu tsawˇ haˬ deuˬ ya mawˇ ngeh, “Giˇshaˆ-euˬ aˬ li aˬ jeˬ pyeuꞈ-iˇ-euˬ nga lehˇ haw sheˇ. Sawˇluˆ gʼeh Miˬyehˇ gʼaˇ duˬ ngehˬ dah-eu tsawˇ haˬ pyeuꞈ tsehˆ shaw taˬ loˇ” lehˇ, tiˬ gʼaˬ tiˇ gʼaˬ naˇ haˬ-eu meh.

¹² “Miˬyehˇ gʼaˇ duˬ ngehˬ dah-eu tsawˇ haˬ teu deuˬ aˬ geu gaˇ-euˬ tsawˇ haˬ nga. Aˬ yawꞈ maꞈ-euˬ aˬ da-ahˇ naw maꞈ siˬ nya ma” loˇ lehˇ, kʼoeˇ gaˇ jawˇ-eu tsawˇ haˬ tiˬ gʼaˬ naˇ haˬ-euˬ meh. Kʼoeˇ gaˇ neh naˇ, “Sawˇluˆ gʼeh Miˬyehˇ gʼaˇ duˬ ngehˬ dah-eu tsawˇ haˬ pyeuꞈ tsehˆ shaw taˬ loˇ” lehˇ ehˇ-eu dawˬ daˬ jaˆ laˇ-euˬ meh.

¹³ Gaˇ nyeh nyeh nyeh-ehˇ guˇ gʼaˬ ngeh, gawˬ duˇ-ahˇ jaˆ-eu lawˇ duˬ-ahˇ Sawˇluˆ le-euˬ meh.

¹⁴ Sawˇluˆ hawˇ-eu aˬ yawꞈ-euˬ zaˬ kʼaˆ-ahˇ aˬ yawꞈ-euˬ aˬ zawˇ ya mawˇ-awˇ, “Aˬ geu paw cah byoˆ-iˇ teˬ” lehˇ naˇ haˬ ngeh, “Mahˬ tahˬ laˆ poˆ poˆ-ehˇ cah-awˇ, maˬ poˆ nawˇ nya-eu miˇ neh Saˬmeuˬlaˆ jawˇ gaˇ le-euˬ ma” lehˇ Sawˇluˆ ehˇ kʼoꞈ nehˬ-euˬ meh.

¹⁵ “Naw nyaꞈ-ahˇ Saˬmeuˬlaˆ aˬ jeˬ ehˇ nehˬ laꞈ taˬ” lehˇ, aˬ yawꞈ-euˬ aˬ zawˇ Sawˇluˆ-ahˇ naˇ haˬ-euˬ meh.

¹⁶ “Jeˬ zaˬ kʼoeˇ deuˬ mawˇ kʼoꞈ gʼaˬ-euˬ meh” lehˇ ehˇ nehˬ laꞈ-euˬ meh lehˇ, Sawˇluˆ ehˇ kʼoꞈ nehˬ-euˬ meh. Ehˇ kʼawꞈ, aˬ yawꞈ sahˬ paˬ ya pyeuꞈ laˇ meh lehˇ Saˬmeuˬlaˆ neh aˬ yawꞈ-ahˇ ehˇ nehˬ-euˬ gaˇ kawˆ deuˬ, aˬ yawꞈ-euˬ aˬ zawˇ-ahˇ aˬ yawꞈ maˬ ehˇ nehˬ-a.

Sawˇluˆ-ahˇ sahˬ paˬ ka nehˬ-euˬ

¹⁷ Miˇzaˬpaˬ meuˬ-ahˇ, Saˬmeuˬlaˆ neh Iˇsaˬleˬlaˆ tsawˇ haˬ deuˬ-ahˇ Sahˬpaˬ Miˬyehˇ mehˬ shi kuˇ uiˬ-euˬ meh.

¹⁸ Kʼoeˇ naˇ, Iˇsaˬleˬlaˆ tsawˇ haˬ deuˬ-ahˇ aˬ yawꞈ heu loꞈ-ehˇ ehˇ nehˬ-euˬ meh. “Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ-ahˇ heu loꞈ-ehˇ ehˇ-eu meh. Iˇjiˇtuˆ miˇ kʼahˬ laꞈ kʼoeˇ neh naw maꞈ-ahˇ ngaˇ sheuˬ doˆ nehˬ laꞈ-euˬ laꞈ kʼoeˇ, Iˇjiˇtuˆ tsawˇ haˬ deuˬ-euˬ aˬ laꞈ laꞈ kʼoeˇ neh maˬ ehˇ, naw maꞈ-ahˇ kʼaˆ dzaˬ luꞈ-eu tsawˇ jeuˬ dawˬ tawˆ luꞈ-euˬ aˬ laꞈ laꞈ kʼoeˇ neh maˬ ehˇ, naw maꞈ-ahˇ ngaˇ ka kʼoꞈ nehˬ-euˬ ma.

¹⁹ Ngaˇ-aˬ, shaˬ-eu zahˬ-eu jeˬ hawˇ-eu guˆ-eu gaˆ-eu jeˬ laꞈ kʼoeˇ neh, naw maꞈ-ahˇ ka kʼoꞈ nehˬ-euˬ gʼaˬ pyeuꞈ-eu naw maꞈ-euˬ Miˬyehˇ ma. Ehˇ kʼawꞈ, naw maꞈ iˬ nah ngaˬ-ahˇ byehˇ dzeh-awˇ, sahˬ paˬ tiˬ gʼaˬ biꞈ nehˬ laꞈ lehˇ shaˇ-eu nga lehˇ ehˇ-eu meh. Teu miˇneh, yawˬ ha aˇ jeuˬ aˇ ca yawˬ ha jawˇ duˬ yuˇ-awˇ, Sahˬpaˬ Miˬyehˇ-euˬ mehˬ shi uiˬ laˇ-awˬ.”

²⁰ Kʼoeˇ ngeh, tsawˇ jeuˬ aˬ yawꞈ jeuˬ yawꞈ-ahˇ Saˬmeuˬlaˆ neh mehˬ hu paw bi doˆ laˇ-awˇ, Beˬyaˬmiˬ tsawˇ jeuˬ-ahˇ Sahˬpaˬ Miˬyehˇ tseˇ doˆ-euˬ meh.

²¹ Kʼoeˇ naˇ, Beˬyaˬmiˬ tsawˇ jeuˬ laꞈ kʼoeˇ aˇ ca aˬ yawꞈ ca yawꞈ-ahˇ mehˬ hu paw paˇ bi doˆ laˇ-awˇ, Maˬtaˬliˇ aˇ ca-ahˇ Saˬmeuˬlaˆ tseˇ doˆ-euˬ meh. Kʼoeˇ naˇ, Maˬtaˬliˇ aˇ ca laꞈ kʼoeˇ, kʼaˬ dzeˇ zaˬ aˬ yawꞈ gʼaˬ yawꞈ-ahˇ mehˬ hu paw paˇ bi doˆ laˇ-awˇ, Giˇshaˆ-euˬ aˬ li Sawˇluˆ-ahˇ tseˇ doˆ-euˬ meh. Ehˇ kʼawꞈ, Sawˇluˆ-ahˇ aˬ yawꞈ maꞈ maˬ poˆ mawˇ nya-a.

²² “Maˬ laˇ keuˆ jiˇ-euˬ tsawˇ haˬ jawˇ ta siˬ loˇ” lehˇ, Sahˬpaˬ Miˬyehˇ-ahˇ aˬ yawꞈ maꞈ naˇ haˬ ngeh, “Myawˬ baꞈ gahˬ taˬ-euˬ naˇ kʼah Sawˇluˆ dzuˇ zaꞈ luꞈ meh” lehˇ Sahˬpaˬ Miˬyehˇ ehˇ-eu meh.

²³ Kʼoeˇ ngeh, aˬ yawꞈ maꞈ cehˆ gʼeh-awˇ, Sawˇluˆ-ahˇ gʼeu doˆ laˬ-iˇ-euˬ meh. Yawˬ gʼaˬ na luꞈ naˆ maˬ tseˇ Sawˇluˆ uˬ duˬ tiˬ siˬ goˇ dzehˬ gaˇ aˬ yawꞈ maꞈ ya mawˇ-euˬ meh.

²⁴ Kʼoeˇ ngeh, “Heu-aˬ, Sahˬpaˬ Miˬyehˇ neh tseˇ doˆ-euˬ gʼaˬ meh. Aˬ dui laꞈ kʼoeˇ aˬ yawꞈ-ahˇ duˇ-eu tiˬ gʼaˬ-iˬ maˬ jawˇ-a” lehˇ, aˬ yawꞈ maꞈ-ahˇ Saˬmeuˬlaˆ ehˇ nehˬ-euˬ meh. Iˇsaˬleˬlaˆ tsawˇ haˬ dawˬ tawˆ luꞈ, “Sahˬ paˬ ziˇ baw ziˇ za luꞈ-uˇ” lehˇ guˇ-euˬ meh.

²⁵ Sahˬ paˬ tiˬ gʼaˬ mˇ nya-eu jeˬ hawˇ-eu mˇ paˬ-ehˇ gʼeh-eu jeˬ gaˇ kawˆ, Iˇsaˬleˬlaˆ tsawˇ haˬ deuˬ-ahˇ Saˬmeuˬlaˆ yaw muiˬ paˬ-ehˇ mehˬ nehˬ-euˬ meh. Gaˇ kawˆ kʼoeˇ deuˬ sahˬ boꞈ laꞈ kʼoeˇ boꞈ ahˇ taˬ-awˇ, muiˬ-eu shawˇ-eu jawˇ duˬ-ahˇ bi jaˆ-euˬ meh. Kʼoeˇ naˇ, aˬ yawꞈ maꞈ yawˬ gʼaˬ na luꞈ-ahˇ bi gʼoꞈ-iˇ-euˬ meh.

²⁶ Sawˇluˆ gʼeh Giˇbyaˬ meuˬ-ahˇ gʼoꞈ-iˇ-euˬ meh. Miˬyehˇ neh nui ma laˆ saˆ nehˬ-euˬ baoˬ ahˇ-eu tsawˇ haˬ tiˬ paˆ na deuˬ kʼawꞈ, aˬ yawꞈ-euˬ mehˬ nah caw teh gʼeh-euˬ meh.

²⁷ Ehˇ kʼawꞈ, gaˇ dahˇ maˬ tsoeˬ-eu tsawˇ haˬ tiˬ paˆ na deuˬ aˬ yawꞈ-ahˇ yaw zeu maˬ baw-ehˇ, “Tsawˇ haˬ heu gʼaˬ aˬ dui-ahˇ muiˬ laˇ ni tiˬ jeˬ-iˬ maˬ mˇ nya luꞈ-a” lehˇ ehˇ-awˇ, aˬ yawꞈ-ahˇ laꞈ sawˬ tiˬ jeˬ-iˬ maˬ biꞈ leˇ ni jawˇ-eu meh.