Psalms 10:14 - Bible Ni Thothup

¹⁴ Machane ga be guy; ga be yaliy e oloboch nge gafgow ma urngin ngiyal’ ni ka mu fal’eg rogom ni ngam pi’ e ayuw. Pi’in dabyag rorad ni ngar ayuwegedyad e ka ra pi’edyad nga pa’am; gubin ngiyal ni ga ma ayweg e pi’in ni ba t’uf e ayuw rorad.

Psalms 10:14 Σταυροειδείς Αναφορές

Genesis 21:17

Me rung’ag Got laman fare pagel ni be yor, me non fare engel rok Got u tharmiy ngak Hagar ni ga’ar, “Hagar, mang e ke magafan’um ngay? Dab mu rus. Ya Got e ke rung’ag laman fare pagel ni be yor.

Genesis 31:12

Me ga’ar, ‘Amchangar, urngin e kaming ni pumo’on ni yad be cheag ko tin ni ppin e yad ba myolyol, nge wupwupnun’, ma bochiyad e ba gagang’ e wech u downgin. I gag e kug yodroynag ya kug guy urngin e tin be rin’ Laban ngom.

2 Samuel 16:12

Ya sana ra guy SOMOL e gafgow ni kug tay me pi’ e tin ni bfel’ ngog nge yan nga luwan e thin nib kireb ni be yog ngog.”

2 Kings 9:26

‘Kug guy e cham ntay ngak Naboth nge fapi pumo’on ni pifak fowap. Mu gu micheg ni ku roy u lane rengi flang ney e gu ra gechig nigem riy.’” Me ga’ar Jehu ngak fare ta’ayuw rok, “Ere mu fek e ldow rok Joram, nga mun’ nga daken fare gi flang rok Naboth, ya nge yani aw e tin keyog SOMOL nga tagil.”

2 Kronicles 24:22

Ma ke pag fare pilung talin ni Jehoyada ni chitamngin Zekariah e i pigpig ngak nrib yul’yul’, me yog ni ngan li’ Zekariah nge yim’. Ma nap’an ni be yan ni nge yim’ Zekariah me tolul ni be ga’ar, “Mang e guy SOMOL e tin ni ga be rin’ nge gechig nigem!”

2 Kronicles 6:23

ma SOMOL, ngam mmotoyil ngorad u tharmiy ngam turguy e kireb rok e pi tapigpig rom. Mu gechignag e en nib buch e rok nrogon e gechig nib mat’aw ni nge aw ngak ma ga pithig u pulwon e en ni bfel’ e rok.

Psalms 146:9

Ma yoror ko pi milekag ni yad ma par u daken e but’ rodad; ma ayuweg e pi’in ke yim’ figirngirad nge pi’in kanim’ rorad, machane ma kirebnag wo’en e pi’in kireb.

Psalms 22:11

Dab mu par u orel rog! Ya ke chugur e oloboch, ma dariy be’ nra ayuw.

Psalms 31:8

Ma dawor mu pi’eg nga pa’ e pi to’ogor rog; kam pi’ matwog ni nggu waen ko gin gu be finey.

Psalms 35:22

Machane, gur SOMOL e kam guy e ran’ey. Ere SOMOL, dab mu th’abgulungam; dab mu palog nagem nga orel!

Psalms 55:22

Mu pi’ e gilab rom ngak SOMOL, ma bayi n’ufegem; dariy e ngiyal’ nra pag e pi’in yul’yul’ ngar mo’waergad.

Psalms 68:5

I Got, nma par u lane Tempel rok nib thothup, e ma ayweg e pi’in kanim’ rorad mma yoror rok e pi’in ke yim’ figirngirad.

Psalms 68:6

Ma pi’ e tabnaw ko pi’in dakuriy be’ rorad, ma chuweg e girdi’ u kalbus miyad felan’ ni ka ni pagrad, ma pi tatogopluw e bay ra pired u lan bbinaw ni kann’ag.

Exodus 2:25

Me guy rogon ni yibe sibnag yu Israel me magfan’ ngorad.

Exodus 22:22

Dab mu gafgow niged e pi’in ke yim’ figirngirad ara bitir ni kanim’ rorad.

Exodus 22:26

Fa’an ga ra fek wuru’ e mad rok be’ ni mich riy nra fulweg e salpiy nike fek rom, ma thingar mu fulweg fare mad ngak u m’on ni nge aw e yal’,

Proverbs 15:25

I SOMOL e ma gathey e tabnaw rok e pi’in tolngan’, mma yoror u tafen be’ nike yim’ figirngin.

Proverbs 15:3

I SOMOL e be guy urngin ban’en ni yibe rin’ u gubin yang, ndemturug ko tin bfel’ ara tin kireb e gadad be rin’ ma be yaliydad.

Isaiah 10:3

Mang e gimed ra rin’ ko ngiyal’ ni nge gechig nagmed Got? Ma ba mang e gimed ra rin’ ko ngiyal’ nra girengiy e riya’ u reb e nam nga dakenmed? U uw e gimed ra mil ngay ni ngam pir’egged e ayuw riy? Ma uw e gin gimed ra mithag talinmed ngay?

Jeremiah 16:17

Urngin ban’en ni yad be rin’ ma gu be guy. Ya dariy ban’en nib mith u p’eowcheg; denen rorad e de ling u p’eowcheg.

Jeremiah 23:24

Dariy bang nrayag ni nge mith be’ ngay nge dab gguy. Mogned, da mu nanged ni gu bay u gubin yang u tharmiy ngu but’?

Jeremiah 49:11

Mu paged e pi aromed ni kanim’ rok rog, bay gu chothowliyrad. Pi aromed nike yim’ figirngin e rayag ni ngar toergad ngog.

Jeremiah 51:56

Karbad ni ngar kireb niged yu Babylon; kan kol e pi salthaw riy, ma pi gan e gat’ing rorad e ke m’ingm’ing. I Gag ba Got ni gu ma gechignag e kireb, ma bay gu rin’ nga Babylon e tin nib merag ni ngan rin’ ngay.

Lamentations 3:59

Mu fol ngog; ya gamnang e kireb ni kan rin’ nib togopluw ngog.

Lamentations 3:60

Gamnang rogon e pi to’ogor rog ni yad be fananikayeg ma yad be makath nageg.

Hosea 14:3

Yu Assyria e dabiyag ni ngar chuweged gamad ko riya’, ma pi os ko mael e dabiyag ni ngar yororiyed gamad. Ri dab ku gogned bayay ngak e pi liyos romad ni yad e Got romad. A SOMOL, ga ma dag e wurngan’ ngak e pi’in dakriy be’ ni yad ra man ayuw ngak.”

Hosea 14:4

Be ga’ar SOMOL, “Bay gu fulweg e girdi’ rog ngog. Ma bay ra pired nri yad ba t’uf rog, ya dakugur damumuw ngorad.

Joel 3:4

“Gimed yu Tyre, nge yu Sidon, nge yu Filistia ni ga’ngin, mang e gimed be guy rogon ni ngam rin’ed ngog? Mogned, gimed be guy rogon ni ngam fulweged taban ban’en ngog? Fa’anra er rogon ni gimed be leamnag, ma bay gu fulweg taban ngomed ni papey!

Habakkuk 1:13

Ke di’in ma ke yag ni mu k’adan’um rok e pi girdi’ ney ndabiyag ni nge pagan’uy ngorad ma yad ba kireb? Lan owchem e kaygi thothup ni nge guy e kireb ni yibe rin’, ma dabiyag ni ngam par ngu’um guy e girdi’ ni yad be ngongliy e tin nde yal’uw. Ere mang ni kam th’ab gulungam kar pired ni yad be thang e pogofan rok e girdi’ ni kab gel e mat’aw rorad ngorad?

Deuteronomy 10:18

Ma guy ni nge par ni ngu’un ayuweg e pi’in kanim’ rorad nge pi’in keyim’ figirngirad; ma t’ufeg e milekag ni yad bay u fithik’ e girdi’ rodad mma pi’ ngorad e ggan nge mad.

2 Timothy 1:12

ma ireray fan ni kug gafgow. Machane dagur tamra’ ngay, ya gu manang e en ni kug pagan’ug ngak, ma bmuduwgil u wun’ug nrayag rok ni nge tay e tin ke pag fan ngog ni dabi buch ban’en riy nge yan i mada’ ko Rofen ni bay sul riy.

Hebrews 4:13

Dariy ban’en nrayag ni ngan mithag rok Got. Ya urngin ban’en ni kem’ay i sunumeg rok e be par u p’eowchen ndariy e upong u daken; mi ir e ri gadad ra weliy e pin’en ni ud rin’ed ngak.

1 Peter 4:19

Ere pi’in yibe gafgow nagrad ni fan e bay fan u wan’ Got ni ngar gafgowgad e susun e ngu’ur pired ni yad be ngongliy e tin nib mat’aw ma kar paged farad ngak e en ni ir e ke sunumiyrad, ni gubin ngiyal’ ma be tay u gil’ e tin keyog nra rin’.

1 Peter 5:7

Mpaged fan urngin e magafan’ romed ngak, ya be leamnag rogomed.

Judges 1:7

Me ga’ar Adonibezek, “Medlipi ragag e pilung ni kan th’ab e yu bugul ni ga’ u pa’rad nge yu bugul ni ga’ u ayrad ni ur fanged chobngen e ggan u tan e tebel rog. Ere chiney e ke rin’ Got ngog e n’en ni gu rin’ ngorad.” Min fek Adonibezek nga Jerusalem ko gin ni yim’ riy.