Proverbs 9:10 - Bible Ni Thothup

¹⁰ Ra ngam gonop ma som’on e thangri yib madgun SOMOL u lanin’um. Fa’anra gamnang Fa’anem nib Thothup, ma aram e ba tamilang lanin’um.

Proverbs 9:10 Σταυροειδείς Αναφορές

1 Kronicles 28:9

Me ga’ar ngak Solomon, “Fakag, gu be yog ngom ni ngam nang e Got rok e chitamam mag pigpig ngak u polo’ i gumircha’em ngu lanin’um, ni bod ni ug rin’. Manang gubin e tafnay rom nge tin ga be ar arnag, ma fa’an ga ra sul ngak ma ra rung’ag e meybil rom. Machane fa’anra mu fek yathin, ma ra n’agem ni manemus.

BABYOR NI JOB 28:28

Ga’ar Got ngodad e girdi’, “Ga ra gonop, ma aram e ke yib dugwen SOMOL u wan’um. Ra ngam llowan’ ma ngam pithigem ko kireb.”

Psalms 111:10

Dogwen SOMOL e ireram tabolngin e gonop; gubin e pi’in ma folwok rok e ra pi’ e tamilangan’ ngorad. Ir e ngan pining e sorok ngak ni dariy n’umngin nap’an.

Psalms 34:12

Mogned, gimed ba’adag ni ngam felfelan’gad ko biney e tamilang? Gimed ba’adag ni nge n’uw nap’an ni gimed bfelfelan’?

Proverbs 1:7

Ra nge tamilangan’um, ma som’on e thangri yib madgun SOMOL u lanin’um. Girdi’ ni balyang e dariy fan e gonop u wun’rad, ma daburad ni ngar folgad ko fonow.

Proverbs 2:5

Fa’an ga ra rin’ ma ga ra nang fan rogon ni ngan rus ngak SOMOL mra fel’ rogon ni ngam nang murung’agen Got.

Proverbs 30:3

Dariy reb e gonop ni yag ngog, ma dariy ban’en ni gumnang u murung’agen Got.

Eklesiastes 12:13

U tomuren urngin e pin’ey, ma ka ta’reb e kabay ni nganog: Nge yib madgun Got u wun’um, ma ga fol ko tin ke ta’chiylen, ya kemus fan e girdi’ ni sunmiy.

Matthew 11:27

“Chitamag e ke pi’ urngin ban’en ngog. Dariy be’ ni manang e en ni Fak, ya kemus ni en ni Chitamangiy e manang, ma dariy be’ ni manang e en ni Chitamangiy, ya kemus ni en ni Fak e manang, nge pi’in ba’adag e en ni Fak nem ni ngar nanged e Chitamngin.

John 17:3

Ba’aray ara’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, miyad nang ko mini’ Jesus Kristus, ni ir e kam l’oeg ke yib.

1 John 5:20

Gadad manang ni en ni Fak Got e ke yib ma ke tamilangnag an’dad ni ngad nanged fa bin riyul’ e Got. Gadad bay u fithik’ e bin riyul’ e Got — u fithik’ Fak ni Jesus Kristus. Ir e bin riyul’ e Got, ma ir e yafos ndariy n’umngin nap’an.