Numbers 3:10 - Bible Ni Thothup

¹⁰ Thingar mmel’eg Aron nge pifak ni pumo’on ni ngu’ur rin’ed e maruwel ko prist; ma yug be’ ni nge guy rogon ngki rin’ e pi maruwel ney e yira thang e fan rok.”

Numbers 3:10 Σταυροειδείς Αναφορές

2 Samuel 6:7

Ka chingiyal’ nem me damumuw SOMOL ni Got ngak Uzzah nge li’ ngem’ ni bochan e dariy madgun SOMOL u wan’, me yim’ Uzzah u rom u to’oben fare Kahol Ko M’ag.

1 Kings 12:31

Miki ngongliy Jeroboam yungi ban’en ni tagil’ e meybil u daken e burey i yan, me mel’eg e girdi’ u lan boch e tabinaw ni ngar manged prist, ni gathi yad girdi’en e ganong ko Levi.

1 Kronicles 6:32

U ra thilthilgad ko tang ni yad ma yin’ u mit fare Tent u p’eowchen SOMOL, u m’on ndawori toy Solomon ni Pilung fare Tempel.

Nehemiah 6:11

Mu gu fulweg ni lungug, “Gathigag fa miti girdi’ ni gu ma mil ngu’ug mith. Ga be leamnag ma gu ra yan gu mith ngalan e Tempel ni bochan e nggu ayuweg e pogofan rog? Dab gu rin’.”

Exodus 29:9

mag m’ag e leed nga lukngurad mag tay fapi urwach nga lolugrad. Aram rogon ni ngam ognag Aron nge pifak ni pumo’on. Yad nge pi’in owcharad e ngu’ur pigpiggad rog ni prist ni manemus.

Ezekiel 44:8

Ya gathi kuyad e yad be tay murung’agen e pi bangbangin e thothup u lan e Tempel rog, kemang girdi’ nu bang e kar ted be tay murung’agen.

Levitikus 22:10

“Kemus ni be’ nreb i girdi’en e tabnaw ko prist e ra kay boch fare maligach nib tabgul; ma dariy yug be’ nra kay boch — ku ra be’ nma par rok e prist ara ma maruwel rok e prist ma dabi kay.

Numbers 1:51

Gubin ngiyal’ ni gimed ra deg ni ngam marod, ma pi Levite e yad e ngar piliged nga but’ fare Tent ma ku yad e yad ra n’uf ngalang bayay ko gin ni kam turguyed ni aram e gin ngam pired riy e ngiyal’nem. Ma yug be’ ni nge chugur nga charen fare Tent e yira thang e fan rok.

Numbers 16:10

Ke taymed nge urngin e tin kabay e Levite nike ga’ famed — ma chiney e ki gimed be guy rogon ni ngkum feked fare liw ko prist!

Numbers 16:35

Me pi’ SOMOL ba nifiy ni be dramram nge urfiy fa 250 i pumo’on ni kar pi’ed e incense.

Numbers 16:40

Re upong n’ey e ngi i puguran ngak piyu Israel ni yug be’ ni gathi reb i owchen Aron e dabiyag ni nge yib ko fare altar nge urufiy riy fapi incense ni yima pi’ ngak SOMOL. Mra rin’ be’ ma yira thang e pogofan rok ni bod Korah nge pi’in yad ngabang. Urngin e pin’ey nrin’ ni bod rogon ni yog SOMOL ngak Moses ni nge rin’ Eleazar.

Numbers 18:3

Ngar lebguyed e maruwel rorad ni fan ngom nge tin dabisiy nib milfan ngorad ni ngar maruwliyed ni fan ko fare Tent, machane dab ramathgad nga ban’en nib thothup u langgin fa Gin nib Thothuth fa ban’en nu altar. Ma fa’an yad ra rin’, ma yira thang e pogogan rorad ma ku eritay gur.

Numbers 18:7

Kemus ni go’ gur nge pifakam ni pumo’on e bmilfan e maruwel ko liw ko prist ngomed, nib l’ag rogon ko altar nge tin bay u langgin e Gin Th’abi Thothup. Pin’ey e bmil fan ngomed, ya kug pi’ ngomed e binem e liw ni prist nib tow’ath. Ra yib yug be’ nga charen ban’en nib thothup nda npi’ mat’won ma yira thang e fan rok.”

Numbers 3:11

Me ga’ar SOMOL ngak Moses,

Numbers 3:38

I Moses nge Aron nge fa pimo’on ni pifak e ngu’ur n’ufed e pi Tent rorad nga mit fare Tent u ley ni ngek. Yad e bmilfan ngorad ngonglen e pigpig u lan e Gin nib Thothup ni fan ngak e girdi’ nu Israel. Ma yug be’ ni nge guy rogon nge rin’ e pi maruwel ney e yira thang e fan rok.

Roma 12:7

Ma fa’anra salap rodad e ngad pigpiggad, ma thingar da pigpiggad. Ma fa’anra salap ni pi’ Got ngodad e ngad filed ban’en ngak e girdi’, ma thingar ud filed ban’en ngak e girdi’.

Efesus 2:19

Ere gimed e pi’in gathi gimed piyu Israel e gathi kigimed girdi’en yugu boch e nam ara bogni’ nda nnang owcherad; ya chiney e kam manged boch e girdi’ rok Got, ni kam manged girdi’en e tabinaw rok Got!

Deuteronomy 18:5

Ya SOMOL e mel’eg fare ganong rok Levi u fithik’ e pi ganong romed ni ngar manged prist ngar pigpiggad ngak ni manemus.

Hebrews 8:4

Fa’an mang e bay u fayleng, ma dabi mang reb e prist, ya bay e pi prist ni yad be pi’ e n’en ni yima pi’ ngak Got ni bod rogon nike yog e Motochiyel rok piyu Israel.

Judges 17:5

Re mo’on ney i Mikah e immoy tagil’ e meybil rok. I ngongliy boch e liyos nge ba efod, me mel’eg reb e pagel ni fak nge mang prist rok.

1 Samuel 6:19

I SOMOL e thang e pogofan rok medlip i ragag e pumo’on nu Beth Shemesh ni bochan e ranod ra chocho’gad ngalan fare Kahol ko M’ag. Me dolo’loy e girdi’ ni bochan e bo’or e girdi’ ni li’ SOMOL u fithik’rad.